Se Er Nan Ve Se Za Hemen U ‘Keghene’?

 1. Alaghga se hingir u yinan ishima sha ci u nyi?

AYANGE a masejime a tar u Satan ne yange hii shighe u i ver Yesu Tor ken inyom i 1914 la. Yange i nôngo ityav sha ken inyom la, i daar Diabolo man azôv na i kende shin tar. (Ôr Mpase 12:7-9.) Nahan Satan fa er “shighe na a kera fese ga yô.” (Mpa. 12:12) Nahan cii kpa, “shighe” ne za hemen anyom imôngo hegen, man alaghga mbagenev vea hen ér ayange a masejime ne kpa lihe yum. Se hingir u yinan ishima, er se lu keghen ser Yehova a va a mkur nee?

 2. Ngeren ne una time sha nyi?

² Ishimayinan doo ga, gadia ia na se er kwagh gaegh. Se er nan ve se za hemen u keghene? Ngeren ne una na mlumun sha mbampin utar mba vea wase se se fa er se za hemen u keghen yô. (1) Ka ikyav i ishimawan i profeti Mika i nyi se fatyô u henen kwagh kere? (2) Ka akaa a nyi aa lu eren u tesen ér mkur u shighe wase u keghen la kuma? (3) Se er nan ve se tese ser se mba a iwuese sha ishima i Yehova a we laa?

 3. Sha ayange a Mika la, lu akaa a nyi lu zan hemen ken Iserael?

³ Ôr Mika 7:2-6. Profeti Mika yange nenge er mlu u ken jijingi u Mbaiserael vihi zan zan hingir caveraa sha hemen u bo u Tor Ahashi la yô. Mika yange tôô Mbaiserael mba banen a jighjigh u nan mban kar sha “saa” man “igyar i sha usaa.” Er saa shin igyar i sha usaa ka i vihi hanmaor u nan kar ker iyol nahan, kape Mbaiserael mba ve vihi a Yehova la kpa lu tswamen hanmaor u kwagh zua ve a nan je la. Ieren ve ne yange i vihi je yô, icombor je kpa kera lu ken mzough ga. Er Mika fa ér kwagh ngu u una er sha kwagh ne ga yô, a sôn Yehova a ishima na i môm. Maa a kegh Aôndo ér a er kwagh u a soo la. Mika yange lu a vangertiôr ér Yehova una er kwagh sha shighe u i kom Un yô.

 4. Ka mbamtaver mba nyi ka se tagher a mini?

⁴ Er Mika nahan, se kpa se mba hen atô u ior mba ve soo ayol a ve tseegh yô. Ve kpishi ka “mbalun a ishughun ga man mbalun wang ga, man mbalun a dooshima ga.” (2 Tim. 3:2, 3) Mba se eren tom vea ve ijiir i môm man mba se ze makeranta ijiir i môm vea ve man mbawanndor a vese ka vea tese ieren i soon ayol a ve tseegh la nahan, i za se iyol kpishi je. Kpa mbacivir Aôndo mbagenev mba tagher a mtaver u vesen ugen je kpaa. Yesu yange kaa ér mba ve lu tsombor môm vea mbadondon un la vea hendan kwagh a ve. Mkaanem nam man zua sha ma i nger ken Mika 7:6 la. Ma kaa ér: “M va sha u nan mpav her atô u or a ter u nan, man wankwase kpaa a ngô u nan, wankem di a ngôkem u nan. Man mba ken ya u or vea gema vea lu mbaihyomov mba nan je.” (Mat. 10:35, 36) Ka kwagh u ican kpishi u wan ishima a tarnahan man ahendan a mba ve lu tsombor môm a vese, mba ve ne Aôndo jighjigh ga la! Aluer se tagher a imba ican ne yô, se yina nen ishima, se lumun ser tsombor wase u kighir se ga. Kpa se za nen hemen u civir Yehova sha mimi, shi keghen un ser a va sôr akaa sha shighe na. Aluer se mba pinen iwasen hen a na hanma shighe yô, una na se agee man kwaghfan u una wase se u wan ishima la.

5, 6. Yehova yange ver Mika nena, kpa gema lu nyi Mika nenge a mi ga?

⁵ Yehova yange na Mika injar sha ishimawan na la. Mika yange lu uma zan zan Tor Ahashi kar kpen, shi hemen na u bo la kpa bee. A nenge wan u Ahashi u nomso, u i yilan un ér Hesekia, u lu Tor u dedoo la, kar tema sha ikyônough ki torough kira, shi hide a mcivir u mimi. Shi Mika yange nenge er kwaghôron u profeti u a nger sha kwagh u Samaria la kure shighe u Mbaashiria va ta num sha tartor u Iserael u ken imbusutarimese la.—Mika 1:6.

⁶ Nahan kpa, Mika yange nenge a mkur u hanma kwaghôron u profeti u Yehova mgbegha un ôr la ga. Ikyav i tesen yô, Mika nger wener: “Sha ayange a masetyô la, á ver uwo u ya u TER sha ityough ki iwoov, á kende a u sha, ua kar agungu; akuraior aa ur yemen her; akuraior kpishi aa za aa kaa er: Va nen, sé za nen sha uwo u TER.” (Mika 4:1, 2) Mika yange kpe ica i gba cii ve kwaghôron u profeti la va kure ye. Nahan cii kpa, a za hemen u civir Yehova her zan zan ku na. Ior mba lu her atô ve la yange vea er nyityô kwagh je kpa, a hide ijime ga. Nahan Mika nger wener: “Ior cii mba zenden hanmô ve ken iti i aôndo u nan, man se yô, sé zende ken iti i TER, Aôndo wase, gbem sha won.” (Mika 4:5) Mika yange fatyô u wan ishima sha ashighe a ican la sha ci u a lu a vangertiôr ér Yehova una kure uityendezwa nav cii. Profeti u jighjigh ne suur sha Yehova.

7, 8. (a) Se mba a ityôkyaa i lun a vangertiôr sha ci u nyi? (b) Ka nyi ia na ve shighe a kera gba se ica ga?

⁷ Se mba a imba vangertiôr ne hen Yehova je he? Se mba a ityôkyaa injaa i eren nahan. Se nenge ayol a ase er kwaghôron u profeti u Mika ne a kur vough yô. Ken “ayange a masetyô” ne, ior umiliôn imôngo, due ken akuraior man iniongoior man ijô kposo kposo va sha “uwo u ya u TER.” Er mbacivir Aôndo mban ve dugh ken akuraior a ashighe kpishi nga a nôngon ityav nahan kpa, ve gema ‘usanker vev, ve var induhar a mi,’ shi ve venda ér vea “kera hen ityav kpaa ga.” (Mika 4:3) Ka kwagh u civirigh kpishi er se lu môm ken ior mba Yehova mba ve soo bem kpishi ne yô!

⁸ Se cii se soo ser Yehova a va a mtim sha botar ne fese je. Nahan kpa, aluer ka u se wa ishima se keghen yô, a gba u se nengen akaa er Yehova a nengen la. A ver iyange i una ôr uumace ijir sha ikyev i Yesu Kristu, “Or u A ver” la. (Aer. 17:31) Kpa cii man shighe la yô, Aôndo ngu nan ior cii ian i aren sha “mfe u fan mimi la,” sha er vea dondo mfe shon, nahan vea war yô. Uuma mba iorov mba sha zongo. (Ôr 1 Timoteu 2:3, 4.) Aluer se wa ityough wasen ior ser ve zua a mfe u mimi u sha kwagh u Aôndo la yô, iyange i ijirigh i Yehova la ia kera gba se ica ga. Ica a gba ga tsô, shighe a bee. Iyange i ijirigh ia vaan yô, a saan se iyol kpishi er yange se wa ityough eren tom u pasen kwagh ne yô!

9-11. Kwagh u i nger ken 1 Mbatesalonika 5:3 la kure vee? Ta iwanger.

⁹ Ôr 1 Mbatesalonika 5:1-3. Ica a gba ga tsô, akuraior aa yôô ér “bem, man mkpeyol”! Aluer se soo ser kwagh ne a va bur se a bur ga yô, a gba u se ‘lu per geng ge geng.’ (1 Tes. 5:6) De se time nen sha akaa a aa er cii ve a mase yôôn bem man mkpeyol ne yô, sha er kwagh ne una wase se u lun per ken jijingi yô.

¹⁰ Shighe u i nôngo ityav mbi tar sha won cii mbi hiihii i bee la, akuraior hide lu keren bem, mbi sha uhar mbira kpa nahan. Ityav mbi tar sha won cii mbi hiihii mbira yange mbi been yô, i ver mzough u tar cii u i yilan ér League of Nations la ér a va a bem. Shighe kar yô, shi i va nôngo ityav mbi tar sha won cii mbi sha uhar mbira, mba been yô, shi i ver mzough u ityar cii, u i yilan ér United Nations la, nahan ior lu veren ishima ér mzough ne una va a bem sha tar. Ugomoti man ukwaghaôndo kpishi ver ishima ér mbamzough mban vea va uumace a bem. U tesen ikyav yô, ken inyom i 1986 la, mzough u United Nations la yôô ér inyom la ka Inyom i Bem Una Lu sha Tar Cii yô. Ken inyom la, utor mba hemen ityar kposo kposo kua mbahemenev mba ukwaghaôndo za kohol Poopu u hemen Côôci i Mbakatoliko, hen gar u Assisi, tar u Italia, ve er mbamsen ér bem a gba sha tar.

¹¹ Nahan kpa, bem man mkpeyol u i yôô ne, man akaa agen a i yôô sha u keren bem man mkpeyol la cii kure kwaghôron u profeti u i nger ken 1 Mbatesalonika 5:3 la ga. Sha ci u nyi? Sha ci u “mtim” u i kaa ér “una ande sha a ve ibuv” la ngu a va ga.

12. Ka nyi se fe sha kwagh u “bem, man mkpeyol” u a va yôô ken hemen laa?

¹² Ka unô vea va yôô ér “bem, man mkpeyol” ken hemene? Mbahemenev mba Mbakristu mbaaiev man ukwaghaôndo mbagenev vea lu uwegh sha kwagh ne nena? Mbahemen mba ugomoti kposo kposo di kpa vea lu uwegh sha kwagh ne nena? Bibilo pase se ga. Kwagh u se fe yô, nyityo gbenda u vea yôô bem man mkpeyol ne cii kpa, a lu “bem, man mkpeyol” u mimi ga, vea yôô un a̱ kuma ken atô nan nan kpaa. A lu Satan una lu hemen tar ne her ye. U vihi kaca kaca, shi ua za hemen nahan. Aluer se lumun a aie u Satan ne, shi se tile palegh sha gbaa ne ga yô, a vihi kpishi!

13. Mbatyomov mba kôron ahumbe a mtim la sha ci u nyi?

¹³ Ôr Mpase 7:1-4. Er se lu keghen mkur u kwagh u i nger ken 1 Mbatesalonika 5:3 la, mbatyomov mba ageev mba kôron ahumbe a mtim, a zegecan la. Ka nyi ve lu keghene? Apostoli Yohane pase kwagh u vesen ugen u ve lu keghen yô. Mba keghen ér i ver “mbatomov mba Aôndo wase” ikyav sha atsul i bee. A veren ve ikyav i masetyô ne a been yô, mbatyomov vea pase ahumbe a mtim la. Ka nyi ia er hen shighe ne?

14. Ka nyi i tese ér mtim u Zegebabilon zurumu?

¹⁴ Hen shighe ne a tim Zegebabilon u a lu tartor u kwaghaôndo u aiegh u sha tar cii, u a kom mtim la kera. Shighe u mtim una va sha a na la, or môm nana lu u yiman un ga. Se mba nengen a ikyav i tesen ér mtim na ne zurum hegen. (Mpa. 16:12; 17:15-18; 18:7, 8, 21) Jighilii yô, se nenge a ikyav ken abaver, i̱ i̱ tese ér ior mba kera suen un hegen kpishi ga yô. Abaver ka a shi nan ripoti i i tese ér ukwaghaôndo kua mbahemenev vev mba a ibo yô. Nahan cii kpa, mbahemenev mba Zegebabilon hen ér kwagh je kpa ngu u eren ve ga. Nenge mfe-ga sha wono! A yôôn er “bem, man mkpeyol” a been yô, fese je, ugomoti mba tar u Satan ne vea ta num sha kwaghaôndo u aiegh, vea tim un gburu gburu. A tsa sha won or a kera ungwa kwagh u Zegebabilon ga! Sha mimi yô, doo u se wa ishima se kegh shighe u akaa a vesen ne aa er la.—Mpa. 18:8, 10.

15. Yehova er kwagh gaegh ga sha ci u nyi?

¹⁵ Shin er ior ve lu lahan iti i Yehova nahan kpa, a wa ishima ngu keghen shighe u i doo u una er kwagh sha mi la. Yehova soo ér mbaasemaamimi ve de timin ga. (2 Pet. 3:9, 10) Se kpa kape i lu se laa? Cii man iyange i Yehova i va yô, se fatyô u tesen iwuese sha ishimawan na la sha u eren akaa a a dondo ne.

16, 17. (a) Doo u se wase mba ve de u civir Yehova sha gbashima la sha ci u nyi? (b) Er nan i hingir torough torough u mba ve de u civir Yehova sha gbashima la vea hide hen a naa?

¹⁶ Wase mba ve de u civir Yehova sha gbashima la. Yesu yange kaa ér ka a zua a iyôngo i môm tseegh i i saa la kpa, i ember sha kpishi. (Mat. 18:14; Luka 15:3-7) Mimi yô, Yehova we mba ve tese ér iti na doo ve ishima la cii ikyo tsung je, aluer mba civir un sha gbashima hegen ga je kpaa. Ka sea wase amba ne aa hide ken tiônnongo yô, se na i saan Yehova man mbatyomov nav iyol.

¹⁷ U ngu môm ken mba ve lu civir Aôndo sha gbashima hegen ga yôô? Alaghga yange orgen ken tiônnongo nan er kwagh u doon we ga, nahan u de u kohol imôngo vea nongo u Yehova. Adooga kwagh ne er shighe kar hegen, nahan pine iyol you wer: ‘Uma wam hemba doon hegen, shi hemba saan mo iyol a shighe u m lu civir Yehova sha gbashima laa? Yange lu Yehova hiim shinii, lu orumace u nan yen laa? I lu nahan Yehova erem ma kwaghbo vee?’ Sha kpôô yô, ka akaa a dedoo tseegh Yehova a eren se ye. Ka sea eren kwagh u se tsegh ayol a ase u eren la ga je kpa, a za hemen u nan se akaa a dedoo her. (Yak. 1:16, 17) Ica a gba ga tsô, iyange i Yehova la ia va. Hegen ka shighe u hiden ken tiônnongo man hen Ter wase u sha, u lun a dooshima je ne. Aluer se er nahan yô, kwagh ne una kura se ken ayange a masejime ne.—Dut. 33:27; Heb. 10:24, 25.

18. Doo u se ungwan imo i mba ve lu hemen se la sha ci u nyi?

¹⁸ Ungwan imo i mba ve lu hemen ken tiônnongo la. Yehova ka Orkuranilev u lun a dooshima, u a tesen se shi a kuran se yô. A tsua Wan na ér a lu Orkuranilev u Tamen u nengen un sha iyôngo. (1 Pet. 5:4) Mbatamen mba ve lu ken atôônanongo a hemban 100,000 la mba kuran iyôngo i Aôndo asange asange. (Aer. 20:28) Ka sea ungwan imo i mba i tsough ve ér ve hemen ne yô, se tese ser se mba a iwuese hen Yehova man Yesu sha akaa a ve er sha ci wase la.

19. Se er nan ve lu a anmgbianev asev kôôsôô?

¹⁹ Lu kôôsôô a anmgbianev ou cii. Se fatyô u eren kwagh ne nena? Orihyom ka nana ta num sha ma ikyumutya yô, ushoja mba ken ikyumutya la ka ve wa tange, inja na yô, ka ve sôsom a mbagenev sha er ian a gba hen atô ve ga yô. Sha nahan yô, i lu kwagh u orihyom a fatyô u karen ga. Satan ngu tan num sha ior mba Aôndo ka seer a seer. Hegen ka shighe u nôngon num ayol a ase ne ga. Kpa hegen ka shighe u i doo u se lu kôôsôô, shi se deen mbagenev a mbamyen vev, shi se tese ser se suur sha hemen u Yehova yô.

20. Ka nyi i doo u se er hegene?

²⁰ Yô, se cii se za nen hemen u lu per ken jijingi, shi se tese ser se mba a ieren i keghen kwagh la. Se cii se wa nen ishima, se keghen nen shighe u a yôô “bem, man mkpeyol,” kua shighe u a ver uicuwanmbaiorov ikyav i masetyô sha atsul a ve la. A been yô, mbatyomov mba unyiin mbara vea pase ahumbe a mtim la, nahan a tim Zegebabilon kera. Er se lu keghen ser akaa a kpilighyol ne a er ne, doo u se lumun u dondon kwaghwan u ior mba nongo u Yehova u tsough ve ér ve hemen la. Se wa nen tange, se nôngo kwagh a Diabolo man azôv a na! Hegen ka shighe u i doo u se ungwa kwaghwan u orpasalmi la je ne. A kaa ér: “Lu nen dông, asema a en a̱ taver, ne cii mba ne veren ishima, ne keghen TER yô.”—Ps. 31:24.