“M Ver Ne Ikav I Tesen”

‘Shighe kuma u ma ne lu mbatesen je.’—MBAHEBERU 5:12.

 1. Er nan ve mkaanem ma ken Mbaheberu 5:12 la ma a fatyô u nyian Orkristu ishima?

E̱R Ú er mkaanem ma i ne i nger má sha tinekwagh yase ne nahan, ishima nyian we sha mlu wou je kpa? Aluer ka u nahan yô, ú ngu tswen ga. Er se lu mbadondon mba Kristu yô, se fa e̱r i gbe u se lu mbatesen yô. (Mateu 28:19, 20) Se fa e̱r ashighe a se lu ker ne a ne i hingir torough torough u se tese kwagh sha afatyô wase cii yô. Shi se fa ser kwagh u se lu tesen la una fatyô u nan mba se lu tesen ve la uma gayô ku! (1 Timoteu 4:16) Sha gbaaôndo yô, se pine ayol a ase ser: ‘M ngu ortesen e̱r ma m lu la je kpa? Gbenda ngu u me seer u fan ityesen yôô?’

 2, 3. (a) Ortesen ugen pase imaagh ki fan ityesen la nena? (b) Yesu ver se ikyav i tesen sha kwagh u ityesenegh nena?

² Imba ishimanyian ngira i de ze se iyol ga. Aluer se mba henen ken ishima ser saa or a fa ityesen tsema tsema keng ve nana tese yô, alaghga a kunda se iyol sha mhen u henen gbenda u se kar ve se sôr igbenda i se tesen la. Imaagh ki fan ityesen ka gbenda u se tesen kwagh tsema tsema la ga, kpa ka kwagh u á hembe lun a inja ica je yô. Nenge ase kwagh u ortesen ugen u á tse ken tom ticaa yange nger ken takerada ugen sha kwagh ne la, ér: “U fan ityesen la ka kwagh u fan ayom shin igbenda i tesen kwagh shin lun a mbaawashima gayô aeren a tesen kwagh a mi keng ga. . . . Dooshima ka kwagh u hiihii ken ityesen.” Een, mnenge na la ka u ortesen akaa a taregh. Nahan je kpa, se Mbakristu se fatyô u yaren tom a mnenge na la sha kwagh u se tesen la. Er nena kwagh a lu nahana?

³ Ikyav yase i Ortesen u se dondo yô ka orgen ga kpa ka Yesu Kristu, u á kaa a mbadondon nav wener: “M ver ne ikav i tesen” la. (Yohane 13:15) Lu ôron kwagh sha ikyav na i yange tese sha u hiden a iyol ijime la, kpa ikyav i tesen í Yesu ver se la ngi a tom na u hemban cii u̱ yange lu orumace shin tar ve er la—sha u tesen ior loho u dedoo u Tartor u Aôndo la. (Luka 4:43) Hegen, aluer gba u ú pase tom u Yesu sha ishemberkwagh i môm yô, alaghga u tsua ishember i “dooshima” la, shin ú tsua i ga? (Mbakolose 1:15; 1 Yohane 4:8) Kwagh u hemba lun Yesu ken ishima yô lu mdoo u Ter na u sha, Yehova doo un ishima la. (Yohane 14:31) Er lu ortesen yô, Yesu seer tesen dooshima ne sha igbenda ihiar. Mimi mba lu tesen mbara doo un ishima, shi ior mba lu tesen la kpaa doo un ishima. De se hemba tôvon nen vighe vighe sha igbenda ihiar i ikyav i tesen na i á ver se ne.

Mdoo u Mimi mba Aôndo Doo Un Saa Her La

 4. Yesu hii a mdoo u ityesen i Yehova doon un ishima la nena?

⁴ Mnenge u ortesen nan nengen itinekwagh i nan tesen la una bende a ityesen i nan la. Ma ieren i tesen ér kwagh kera gba nan sha mi ga la una samber sha mbahenen mba nan. Yesu tese ma shighe môm ér un vôr a mimi mba injaa mba un lu tesen sha kwagh u Yehova man Tartor Na la ga. Itinekwagh ne doo Yesu ishima je gande. Yange hii dooshima ne shighe u lu orhenen la je. Ken gôgô mbaanyomov mba Wan u môm môm ne lu cii man hingir or la, lu orhenen u kwagh henen doo un tsung yô. Yesaia 50:4, 5 ngu a mkaanem ma kuman vough ne ér: ‘Ter AÔNDO nam nombor u ior mba henen kwagh, sha u me fa er me suwe wen u a ver la, sha kwaghôron yô; hanma sev ka A nderem, ka A bughum ato er m̱ ungwa er ior mba henen kwagh nahan. Ter AÔNDO bugh ato am, m hendan ga, m hide ijime kpaa ga.’

 5, 6. (a) Kanyi yange i̱ er Yesu sha batisema na laa, man kwagh la bende a na nena? (b) Ka mkposo u nyi se nenge a mi hen atô u Yesu man Satan sha gbenda u ve yar tom a Mkaanem ma Aôndo laa?

⁵ Shighe u lu orumace shin tar ne lu vesen a vese la kpa, mfe u Aôndo za hemen u doon Yesu her. (Luka 2:52) Nahan, ken batisema na la, kwagh ugen er un u lu a vande eren ma orgen ga yô. Luka 3:21 kaa ér: “I bugh Sha.” A shi nan kpa, lu sha shighe la Yesu fatyô u umbur mlu na u lu cii man hingir or la ye. Been heela kera yô, a hôô kwaghyan ayange 40 ken taaikyôngo. Ka keng je yange á saan un iyol tsung u gbidyen kwar sha ashighe kpishi a ngise lu sha ve ngohol ityesen hen Yehova la. Ica lu a gba ga tsô, i kar mdoo u mimi mba Aôndo ve doo un ishima la.

⁶ Satan gba meen Yesu shighe u tume un iyol man ijen i kôr un yô. Nenge mkposo u a lu hen atô u ônov mba Aôndo mba uhar mban ne! Ve cii ve lu civin ken Ruamabera u ken Zwa Heberu—kpa mbaawashima vev lu kwagh môm ga. Satan goom a Mkaanem ma Aôndo, lu yaren tom a mi sha ilyahan sha u kuren mbaawashima nav mba sha ifer la. Sha kpôô yô, or u hembanato la lu a ma kwagh môm ga kpa lu sha u lahan a laha mimi mba Aôndo la tseegh. Gema sha vegher ugen yô, Yesu lu civin ken Ruamabera sha dooshima, lu yaren tom a Mkaanem ma Aôndo kure kure sha u nan hanma mlumun cii. Yesu vande lun ica i gba cii man i hii u ngeren icighan mkaan ne ye, kpa ma gba un kwagh je zua ga. Ma lu mimi mba injaa mba ve due hen Ter na u sha yô! Á kaa a Satan wener mkaanem ma ma due hen Yehova mara ma hemba mán a inja a kwaghyan. (Mateu 4:1-11) Een, mimi mba Yehova tese Yesu la jimin cii doo un ishima. Nahan á tese dooshima la shighe u lu tesen la nena?

Mimi Mba Tesen La Doo Un

 7. Er nan ve Yesu palegh u duen a atesen a na?

⁷ Dooshima u Yesu lu a mi sha mimi mba tesen la lun ken igbar hanma shighe cii. Kera ga je kpa, alaghga yange ma lu un ican ga u duen a mbamhen nav. Gadia lu a mfe ngee man kwaghfan kpishi je. (Mbakolose 2:3) Nahan kpa, á shi umbur mbaungwan a na kwa imôngo imôngo wener hanma kwagh u un tesen cii due hen á na ga, kpa a due hen Ter na u sha la. (Yohane 7:16; 8:28; 12:49; 14:10) Mimi mba ve due hen Aôndo doo un ishima je ka kwagh u una gema ve á ver mhen na ga.

 8. Ken mhii u tom u Yesu u pasen kwagh la, á ver ikyav i tesen msuur u suur sha Mkaanem ma Aôndo nena?

⁸ Zum u Yesu hii tom na u pasen kwagh la yô, fese je maa a ver ikyav i tesen. Nenge ase gbenda u yange hii u pasen ior mba Aôndo ér un ngu Mesiya u i tôndo zwa la. Yange kar ishima tsô za due hen ikpelaior, maa yôô iyolna je ér un ngu Kristu, maa er uivande mba kpilighyol mban her sha u tesen wener kwagh u un lu ôron la ka mimi jee? Ei. Á yem ken shinagoge ape lu ikye i ior mba Aôndo u kohol sha u ôron Ruamabera la. Lu heela za ôr kwaghôron u profeti u Yesaia 61:1, 2 shi pase wener ka un je mimi u kwaghôron u profeti ne a lu ôron ye. (Luka 4:16-22) Uivande nav mba eren kpishi la tese ér Yehova ngu suen un. Nahan kpa, á suur sha Mkaanem ma Aôndo hanma shighe u una lu tesen yô.

 9. Yesu lu tese mdoo u Mkaanem ma Aôndo ma doo un ishima tsung la sha ieren na a Mbafarishi nena?

⁹ Shighe u mbaahendanev mba kwaghaôndo hendan a Yesu yô, yange ker gbenda ér saa una hemba ve keng ga, shin er lu a tahav mbu ma lu un ican ga u eren imba kwagh la nahan je kpaa. Kpaa, á de ér Mkaanem ma Aôndo ma venda kwagh a ve. Ikyav i tesen yô, umbur ase shighe u Mbafarishi kaa ér mbadondon mba Yesu mba peren tindi u Iyange i Memen sha u kever asagher a alakema yan shighe u ve lu karen gbenda ken sule ugen la. Yesu na ikyar wener: “Ne ôr kwagh u Davidi lu er shighe u ijen kôr un kua mba ve lu a na ityô la gaa”? (Mateu 12:1-5) Kera yô, alaghga ior mba ve kaan ér ve mba mbajighjigh mban vea ôr icighan mkaan i í nger ken 1 Samuel 21:1-6 la. Aluer ka nahan yô, ve kan shio u henen kwagh u injaa ua lu ker la. Nahan kpa, Yesu yô gba ôron a ôr kwagh la tsô ga. A gbidye kwar sha mi shi á kôr kwagh u ma tese la ken ishima. Akaawan a Yehova a tese ken ngeren shon la doo un ishima. Nahan á yar tom a kwagh la kua ikyav igen ken Tindi u Mose sha u pasen kwagh u Tindi a lu jim yô. Dooshima u Yesu lu a mi sha Mkaanem ma Aôndo tsung la yange a mgbegha un u tan ikyaa a ma zum u mbahemenev mba kwaghaôndo vea lu goom a ma sha u kuren mbamgbe vev shin vea lu cirin ma shin inya sha aeren a uter yô.

10. Yesu lu kure akaaôron a profeti sha igbenda i yange tesen kwagh la nena?

¹⁰ Itinekwagh ne doo Yesu ishima je lu kwagh u̱ una gban di tesen i̱ di sha u gban zeren kimbir kwagh môm môm gbem sha gbenda u ior vea vôr a mi shin a kera doo ve u ungwan ga la ga. Akaaôron a profeti vande kaan je ér Mesiya una ôr ‘akaaôron a doon sha zwa na’ man una yar tom a “akaaôron a dedoo” kpaa. (Pasalmi 45:2; Genese 49:21) Yesu kure akaaôron a profeti ne sha u pasen loho na sha gbenda u ua doo ior ungwan shi á time sha mi vindi vindi kpaa, sha u yaren tom a “akaaôron a dedoo” shighe u á lu tesen mimi mba ve doo un ishima yum ne yô. (Luka 4:22) Kera ka u henen a hen er ishigh nagh yange ki tesen msaanyol na la ga, shi ashe na kpaa yange a engem a isharen i tesen itinekwagh ne. Yange a lu kwagh u doon kpishi u veren ato a na, man nenge imba ikyav i tesen i dedoo i i taver se asema ér se dondon shighe u se lu lamen a mbagenev sha kwagh u se vande henen la sha wono!

11. Er nan ve er Yesu fa ityesen nahan cii kpa mayange timin akende sha imanger ga?

¹¹ Mkav u Yesu lu a mi sha mimi mba Aôndo man gbenda u lamen a ior la na un u hiin u timin akende sha imanger-a? Ashighe kpishi imba kwagh la ngi i na atica a á lu uumace ne u eren kwagh nahan. Nahan kpa, umbur wer, kwaghfan u Yesu lu a mi la lu sha mcivir u civir Aôndo. Imba kwaghfan ngila i ne iyolgengese ian ga, gadia “kwaghfan ngu hen mbahiden a iyol ijime.” (Anzaakaa 11:2) Kwaghgen kposo kpa lu u lu yangen Yesu u hingir or imangeregh shin kenden a iyol sha yô.

Yesu Lu a Dooshima sha Ior Mba Tesen La

12. Yesu tese ér un soo ér mbadondon nav ve de lun a mciem iyol sha ci na ga nena?

¹² Yesu tese ken ityesen na ér ior doo un ishima tsung. Mayange ityesen ná na ior u henen ér ve gba kwagh ga ze, í lu er ka i̱ uumace mba moron iyol nahan ga. (Orpasenkwagh 8:9) Peteru nengen ivande i Yesu igen been cii yô, cier un iyol gande, tsô a gba hen angahar a Yesu. Kpa Yesu soo ér mbadondon un ve cia un gighir gighir ga. Á kaa ken bem nahan wener, “De cie ga” tsô á na Peteru tom u nan msaanyol u wen kpa una lu a ci ker la, lu tom u geman ior mbahenen la. (Luka 5:8-10) Yesu soo wener i de lun mciem ma cian ortesen ma mgbeghan mbahenen nav ga kpa i lu dooshima u ve lu a mi sha mimi mba injaa mba a Aôndo la.

13, 14. Yesu tese sha nyi gbenda ér mhôônom ma ker un a ioro?

¹³ Mhôônom ma ma kôr Yesu a ior mba tesen ve la lu ikyav i tesen ér ve doo un ishima. “Man er A nenge a ikpelaior [la] yô, mhôônom kôr Un a ve tsung, sha ci u i tumbul a ve, ve sambe wuee er iyôngo i i lu a orkuran i ga nahan” yô. (Mateu 9:36) Mhôônom kôr un a ve sha mlu u ve lu ker la nahan ishima mgbegha un u wasen ve.

¹⁴ Nenge ase er mhôônom kôr Yesu sha shighe ugen kpaa yô. Zum u kwase u gban imbor i awambe za hen a na ken ikpelaior za bende a zungwer ku riga na yô, angev nav bee sha ivande. Yesu kav e̱r tahav mbu dugh ken a na nahan, kpa nenge a or u mbu bee nan angev la ga. A sendegh sha u fan kwase la. Sha ci u nyi? Lu sha ci u zôhôn a na sha ci u a per Tindi shin atindiakaa a mbangeren man Mbafarishi la e̱r alaghga yange una lu cian la ga. Kpaa, á kaa a na ér: “Wankwase, jighjigh wou u nan war u ve; yem bem bem, angev ou mbu̱ bee u.” (Marku 5:25-34) Nenge mhôônom ma ma lu ken mkaanem mara la. Yange gba ôron kwagh tsô wener, “Angev mbú bee” ga. Kpaa, a kaa ér: “Angev ou mbu̱ bee u.” Marku yar tom a ishember i u̱ gban pasen í kpôghôô nahan yô ia tile sha ityough ki u “nyoon inyam” yô, gbenda u gbidyen kwagh u ashighe kpishi yange i yar tom a mi sha u eren or ican yô. Nahan, Yesu lumun wener angev mbura mbu na kwase la ican kpishi man alaghga je yô a lu ican i sha iyol man i ken ishima kpaa. Mhôônom kôr un a na kpen kpen.

15, 16. Ka akaa a nyi a er ken tom u Yesu a tesen ér kwagh gbe un ka sha mdoom ma ioro?

¹⁵ Yange Yesu shi tese mdoo u ior ve doo un ishima la sha u veren ishima sha aeren a ve a dedoo la. Nenge ase kwagh u yange er zum u á zua a Natanael u va hingir apostoli la. “Tsô Yesu nenge Natanael ngur van her a Na yô, A ter un a kaa er: Nenge, mimi je, ka or u Iserael u ma icugh i lu ken a na je ga yô.” Lu sha ivande je Yesu kav mbamlu mba Natanael shi fa kwagh u a lu un ken ishima ye. Kpa, Natanael lu a mbamyina nav. Lu a mbamshi nav di er se nahan. Sha kpôô yô, zum u a ungwa kwagh u Yesu yô, á kaa sha imo igyer wener: “Ma kwagh u injaa una fatyô u duen ken Nasareti kpa?” (Yohane 1:45-51) Nahan kpa, a ôr kwagh sha iyol i Natanael nan kpa, Yesu ver ishima sha vegher na u dedoo la, mimi na la.

¹⁶ Shi zum u torutya ugen—u alaghga yange lu Ortyôtyev, Orromanu—za kohol Yesu kaa a na ér a bee wan na angev yô, Yesu fa e̱r orshoja la á lu a mbamshi kpaa yô. Uma u torutya u sha ayange la nahan ka keng yange una mgbogh a ipila man iwoo-or man mcivir u aiegh kpaa. Kpa, Yesu har sha kwagh u a lu u dedoo la—jighjigh na u nan la. (Mateu 8:5-13) Ken masejime yô, zum u Yesu va ôr kwagh a iferor u i mande un sha kon ikyua a na la yô, yange puu or la sha uma na u eren afer u ken ijime la ga kpa a taver un ishima a ishimaverenkeghen i mlu u ken hemen la. (Luka 23:43) Yesu fa dedoo e̱r u lun a mnenge u dang man u ken kpe sha mbagenev la una wase sha u tulen a tule ishima ve tseegh yô. Ka kwagh u henen a hen ga, iniôngon na i keren mdoom ma mbagenev la lu kwagh u̱ taver ior kpishi asema u hemban eren kwagh sha inja.

Lu a Ishima i Shiren Ior

17, 18. Mngohol u Yesu ngohol tom u van shin tar la tese er un ngu a ishima i shiren mbagenev nena?

¹⁷ Ishima i Yesu lu a mi i shiren mbagenev la lu ikyav i vesen igen i tesen dooshima u lu a mi sha ior mba tesen yô. Shighe u lu a va shin tar ga la je kpa kwagh u orumace doo Wan u Aôndo. (Anzaakaa 8:30, 31) Er lu “Imo” i Yehova shin orshua na yô, alaghga yange una eren akaa kpishi a a bende a uumace yô. (Yohane 1:1) Nahan kpa, lu u tesen orumace jighilii na ve va shin tar ye, “A gema iyol Na hingir gbilin er A tôô mlu u ortom,” a undu iaven na i vesen i sha la yô. (Mbafilipi 2:7; 2 Mbakorinte 8:9) Shighe u Yesu lu shin tar la, yange ver ishima wener ior ve eren un akaa ga. Kpa, á kaa wener: “Wan u or kpaa A ve, i lu sha u i̱ er Un tom ga, kpa sha u Un Una er mbagenev tom man Una na uma Na a̱ hingir ipaan sha ci u ior kpishi yô.” (Mateu 20:28) Yesu yar tom sha mkaanem man kure vough.

¹⁸ Yesu hide a iyol ijime sha u eren tom sha mbamgbe mba ior mba lu tesen mbara, á na iyol na sha ci ve a u timbir shio. Yange zende angahar ken tar u Ityendezwa la cii, lu zenden zende u pasen kwagh ukilomita udubu uderi uderi sha u nôngon aren a ior kpishi er un fetyô la. Lu er Mbafarishi man mbangeren nahan ga, a za hemen u hiden a iyol na ijime shi ior vaan hen a na kpaa. Ior atô kposo kposo cii—ashagbaior man ushoja man mbafanatindi man kasev man mbayev man atsanaior man mbauangev, je yô kua ior mba i te ve kera hen ityô kpaa—ve va hen a na saan saan a mciem shio. Er lu a isholibo ga nahan kpa, Yesu lu orumace nahan vôron shi ijen kpa i kôron un. Shighe u una vôr shin a sar un u memen shin keren shighe u lun ving eren msen je kpa, mbamgbe mba ior mbagen yange ve hemba gban un kwagh a mba nav.—Marku 1:35-39.

19. Yesu ver ikyav i tesen i eren kwagh a mbahenen nav a iyol hiden a mi ijime man a ishimawan man sha mhôôn nena?

¹⁹ Yesu lu a ishima i shiren mbahenen nav kpaa. Á er kwagh ne sha u tesen ve sha erdoo man a ishimawan. Zum u vea eren zôzô sha u kaven atesen a na a hange hange agen je kpa, á gba uwer ga, ishima kpa a vihi un shin a hômon kwagh a ve sha zwa zôhôn kpaa ga. A za hemen u keren igbenda i he i vea kav kwagh shon yô. Ikyav i tesen yô, hen sha er yange mbahenen ve shi zôhôn sha kwagh u or u nan hembe ugen la. Yesu yange á shi keren igbenda i he i una tese ve e̱r vea eren kwagh ayol a ve a iyol hiden a mi ijime je zan zan kar aren sha tugh mbu kpernan a wua un la. Ka sha kwagh u iyol hiden a mi ijime tseegh ga, kua sha akaa agen kpaa, Yesu kaa shami nahan ér: “M ver ne ikav i tesen.”—Yohane 13:5-15; Mateu 20:25; Marku 9:34-37.

20. Ka gbenda u tesen kwagh u nyi u pav Yesu u ver kposo a Mbafarishii, man er nan gbenda la u doo?

²⁰ Aluer u ver ishima yô, yange Yesu gbaa ôron mbahenen nav kwagh u ikyav i vea dondo la tsô ga; á ‘ver ve ikyav i tesen’ jighilii. Á tesen ve sha akav. Á tesen ve ér un hemba ve ga, inja er un iyol na un gande u eren akaa a un lu tesen ve la nahan ga. Kape Mbafarishi eren je la. Yesu ôr kwagh ve ér, ‘Mba kaan a kaa kwagh, kpa mba eren sha mi ga.’ (Mateu 23:3) Yesu hide a iyol na ijime nahan tese mbahenen nav kwagh u atesen a na a lu jim jim yô sha u eren á. Nahan zum u á taver mbadondon nav ishima ér ve palegh u keren uyôughyôughmbaakaav la yô, kera lu a lu kwagh u vea shi henen kwagh u lu ôron la ga. Ve fatyô u nengen a mimi u mkaanem nam mara, ér: “Atsôngo nga a ijô, inyon i sha ngi a aya, kpa Wan u or yô, ngu ape suur ityough ga.” (Mateu 8:20) Yesu er mbahenen nav tom sha u hiden a iyol ijime veren ve ikyav.

21. Kanyi kwagh se lu nengen sha mi ken ngeren u a ve ken hemen laa?

²¹ Ikyav tese wang ér er i̱ gbe tar je ka Yesu a lu Ortesen u hemban u a zende shin ú ye! Dooshima u yange lu a mi sha kwagh u yange tesen la kua dooshima u lu a mi sha ior mba tesen ve la lu kwagh u tseer tseer u ior mbaasemaamimi mba ve nengen a na shi ve ungwan ityesen na la nenge a mi yô. Se mba nyian se lu henen ikyav i a ver ne kpa se nenge a kwagh ne tseer tseer je. Nahan, se fatyô u dondon ikyav i vough i Kristu a ver se ne nena? Ngeren u ken hemen la una na mlumun sha mpin ne.

Ú Na Mlumun Wer Nyi?

• Kanyi i lu imaagh ki fan ityesene man ka ana nan ver ikyav laa?

• Ka sha nyi igbenda Yesu a tese ér mimi mba un tesen mbara doo un ishima?

• Yesu tese ér ior mba un tesen mbara doo un ishima nena?

• Ka akav a nyi a tese ér Yesu ngu a ishima i eren mba yange tesen ve la tomo?

[Picture on page 6]

Yesu tese ér akaawan a a lu ken Mkaanem ma Aôndo la doo un ishima nena?