Se Mba a Akaa a Injaa a Se Na Ior Yô
1 Mkaanem ma Aôndo ma a atesen a injaa kpishi aa a doo se tsung yô. (Ps. 12:6; 119:11, 14) Sha shighe ugen la, Yesu ôr anzaakaa sha u pasen kwagh u Tartor sha igbenda kposo kposo, been yô a pine mbahenen nav ér: “Ne kav akaa angan cii kpa?” Mba lumun ér ve kav a yô, a gema a kaa a ve ér: “Kape i lu man hanma orngeren u nan hingir orhenen ken tartor u Sha yô, nan ngu er orya nahan u ka nan dughun akaa a he man a tse ken iyou i nan i koson akaa a injaa la.”—Mat. 13:1-52.
2 Akaa a mimi a yange se fa zum u se hii u henen Bibilo la se fatyô u nengen a ser ka akaa a injaa a tse. Ka sea nguren timen sha akaacimin a ken Mkaanem ma Aôndo sha tseeneke wase yô, se hingir u fan akaa a mimi agen a ken Bibilo, nahan akaa ne a lu se akaa a injaa a he. (1 Kor. 2:7) Heela tseegh ga, “wanakiriki u jighjigh man u fan kwagh” kpa ngu a wase se se seer kaven akaa a he.—Mat. 24:45.
3 Atesen a he ne man a tse la cii doo se ishima tsung je. Sha nahan yô, hange se u seer ngohol ityesen shi se soo u seer fan u tesen Mkaanem ma Aôndo tsema tsema, sha er se tese ior mbagenev akaa a injaa a mimi a se hen la yô.
4 Hen Kwagh ken Ikyav i Yesu La: Yesu yange nôngo kpoghuloo pase ior mbagenev akaa a injaa a mimi, nahan kwagh ne tese ér akaa a mimi ne doo un ishima tsung. Yange una vôr je kpa, mayange a de u dughun akaa a injaa a ken ‘wuna’ na ga.—Yoh. 4:6-14.
5 Dooshima u Yesu lu a mi sha ior mba ve fa Aôndo kua mbaawashima nav kuma ve ga la yange na yô, a pase ve mimi u Aôndo u a ne uma la. (Ps. 72:13) Mhôônom kôr un a mba ve soo u fan Aôndo kua mbaawashima nav la, nahan ‘a tese ve akaa kpishi.’—Mar. 6:34.
6 Dondo Ikyav i Yesu: Aluer akaa a injaa aa se lu a mi ne doo se ishima tsung yô, a maa se iyol u pasen mbagenev akaa a doon tsung a a lu ken Bibilo la, er Yesu kpa maa un iyol nahan. (Anz. 2:1-5) Aluer se vôr ashighe agen je kpa, i̱ maa se iyol u ôron ior akaa a mimi a ken Ruamabera la. (Mar. 6:34) Aluer akaa a injaa a se lu a mi ne doo se tsung yô, ishima ia mgbegha se se pasen kwagh sha afatyô wase cii, se keren u seer eren tom ne sha ishima i tseen hanma shighe cii.