Agumaior Ne Wa Agoyol u Eren Batisema Vee?

1, 2. (a) Ka nyi ka i na ior mba Aôndo msaanyol nyiana? (b) Mbamaren mba ve lu Mbakristu la man mbatamen vea wase agumaior vea kav inja i batisema nena?

ORTAMEN ugen yange kaa a wan ugen u lun anyom 12, u i yilan un ér Christopher yô ér, “M fa u, hii sha iyange i i mar u la je. Shi doom kpishi er m ongo mer u soo u eren batisema yô. Kpa m soo u pinen we mer, ‘Er nan ve u soo u eren batisemaa?’ ” Ortamen la lu a atôakyaa a injaa a pinen mpin la. Hanma inyom yô, ka sea nenge agumaior udubu imôngo vea er batisema nahan, i saan se iyol kpen kpen. (Orpasenkwagh 12:⁠1) Kpa gba u mbamaren mba ve lu Mbakristu la man mbatamen mba ken tiônnongo vea nenge ér ka agumaior ayol a ve ve tsough u eren batisema ye, shi ve kav inja i kwagh u ve tsough u eren la kpaa.

² Bibilo pase se ér iyoltseghan man batisema ka kwagh u tesen ér Orkristu hii uma u he. Uma u he ne una va se a averen a Yehova, kpa shi una gema a na yô, Satan a hendan a vese. (Anzaakaa 10:22; 1 Peteru 5:⁠8) Sha nahan yô, gba u mbamaren vea tôô shighe vea tese mbayev vev vea fa inja i u lun orhenen u Kristu jim jim la. Aluer mbamaren mba agumaior ne ka Mbakristu ga yô, mbatamen mba ken tiônnongo vea wase ve u kaven inja i iyoltseghan man batisema. (Ôr Luka 14:​27-30.) Er or ka nan wa agoyol cii ve nan fatyô u maan iyou been nahan, gba u mba ve lu agumaior la kpa vea wa agoyol tsembelee cii ve, vea er batisema ye, sha er vea fatyô u civir Yehova sha mimi zan zan “mkur” yô. (Mateu 24:13) Ka nyi ia wase agumaior aa kange ishima u civir Yehova gbem sha wono? De se nenge ase.

 3. (a) Mkaanem ma Yesu man Peteru mara tese se er batisema a lu kwagh u hange hange nena? (Mateu 28:​19, 20; 1 Peteru 3:21) (b) Ka mbampin mba nyi se lu timen sha mini, man ka sha ci u nyi?

³ U ngu gumor u u soo u eren batisema yôô? Aluer ka nahan yô, ka kwagh u injaa tsung je u soo u eren ye! Ka kwagh u civirigh kpishi u or eren batisema, hingir Orshiada u Yehova. Shi ka kwagh u i gbe hange hange u Orkristu nana er keng ve nana va war zegecan yô. (Mateu 28:​19, 20; 1 Peteru 3:21) Ka wea er Batisema yô, u tese wer u tôndo zwa u civir Yehova gbem sha won. U soo wer u er sha ityendezwa you la, nahan mbampin mba ve dondo heen ne vea wase u u fan aluer u wa agoyol kuma u u er Batisema yô. Ka mbampin mba shon je: (1) M via kuma u me er batisemaa? (2) Sarem u eren batisemaa? (3) Ka a̱ kaa ér or tsegha iyol i nan sha ci u Yehova nahan, m fa mer mba kaan ér nyi? De se time nen sha mbampin mban.

4, 5. (a) Ka mbaganden tseegh i gbe u vea er batisema ga sha ci u nyi? (b) Ka a kaa ér Orkristu via yô, inja na ér nyi?

⁴ Bibilo kaa ér ka mba ve hingir gande gande la tseegh ve er batisema ga, shi i tese anyom jighilii a or a nyôr ve nana er kwagh ne kpaa ga. Anzaakaa 20:11 kaa ér: “Wanye kpaa ka nan pase iyol i nan sha aeren a nan je, shin aeren a nan a lu wang man vough kpaa.” Nahan wanye je kpa, nana fatyô u fan kwagh u a lu u vough man inja i u tseghan iyol i nan sha ci u Aôndo la kpaa. Sha nahan yô, aluer ma gumor nan tese ér nan via shi nan tsegha iyol i nan sha ci u Yehova yô, gba hange hange u nana er batisema, shi ka kwagh u dedoo kpaa.​—⁠Anzaakaa 20:⁠7.

⁵ Ka a kaa ér or via yô, inja na ér nyi? Ka hanma shighe cii anyom a or shin mvese u sha iyol a tesen ér nan via ga. Bibilo kaa ér mba ve vie la, ka mba ve tsaase “mkav [ve] u ken ishima” la sha er vea fa u paven kwagh u dedoo a u bo yô. (Mbaheberu 5:14) Or u nan vie yô, ka nan fa kwagh u dedoo, shi nan vande tsuan ken ishima i nan u eren kwagh shon. Sha nahan yô, or a fatyô u mgbeghan nan fese ér nana za er kwaghbo ga. Shi ka hanma shighe cii ka i gba u orgen a ôr nan kwagh u dedoo u nana er ga. Doo u se ver ishima ser ma gumor u nan er batisema la nana er kwagh u dedoo, aluer mbamaren mba nan shin mbaganden mbagenev mba ikyua ga je kpaa.​—⁠Nenge Mbafilipi 2:⁠12.

6, 7. (a) Pase mbamtaver mba Daniel tagher a mi ken Babilon la. (b) Daniel yange tese ér un via nena?

⁶ Gumor nana fatyô u tesen ér nan via er i pase ken ikyumhiange i sha 5 la nahan je he? Nenge ase ikyav i Daniel. Alaghga shighe u yange i yem a na ken Babilon, kera lu vea mbamaren nav ga la, lu anyom pue kar tseegh tsô. Ica gba ga maa Daniel hingir u za lun vea ior mba ve kuran atindi a Aôndo ga yô. Kpa de se seer timen sha kwagh u Daniel ne kpuaa. Yange i naan un icivir kpishi ken Babilon. Yange i tsua un vea agumaior agen kpuaa ér ve za eren tor tom. (Daniel 1:​3-5, 13) Ka inja er Daniel lu sha ian i injaa ken Babilon, i alaghga ken Iserael yô, mayange ma lu sha mi ga nahan.

⁷ Nahan Daniel er nena? A de ér Mbababilon ve gema un shin ve vihi jighjigh naa? Mayange ga! Bibilo kaa ér shighe u Daniel lu ken Babilon la, a vande ‘wan ken ishima ér una hôngor iyol na ga,’ kpa una palegh hanma kwagh u a gbe a zough a mcivir u mimi ga cii. (Daniel 1:⁠8) Kwagh ne tese je ér yange via!

 8. Ka nyi u fatyô u henen ken ikyav i Daniel laa?

⁸ U fatyô u henen nyi ken ikyav i Daniel laa? Gumor u nan vie yô, ka nan kusu akaa a nan ne jighjigh a mi la gbang, a lu sha ashighe a taver je kpaa. Nan ngu er hum, u ka a gema iyol ape a za nyer cii la nahan ga. Nan lun ijende i Yehova hen Iyou i Tartor, shi nan za lun ijende i tar ken makeranta ga. Ka a kar jighjigh u nan je kpa, nan tile sha mimi her.​—⁠Ôr Mbaefese 4:​14, 15.

9, 10. (a) Aluer gumor gbidye kwar sha kwagh u nan sember eren zum u nan tagher a ameen a karen jighjigh u nan la yô, a wase nan nena? (b) Inja i batisema ér nyi?

⁹ Jighilii yô, hanma or yina. Agumaior man mbaganden cii mba tsum. (Orpasenkwagh 7:20) Kpa aluer u soo u eren batisema yô, doo u u tôv u fa, wea kange ishima u kuran atindi a Yehova yô. Pine iyol you wer, ‘M ungwa imo i Yehova kuma shighe nena hegene?’ Hen sha kwagh u yange u er kwa u masetyô u i kar jighjigh wou la. Yange u tsua kwagh u i doo u u er kpa? Or ngu taver we ishima ér we u er kwagh a mfe wou sha u suen tar u Satan ne, er Daniel kpa i taver un ishima ér a̱ er nahana? Shighe u i lu meen we sha imba kwagh ne yô, u fatyô u fan ishima i Yehova kpa?​—⁠Mbaefese 5:⁠17.

¹⁰ Er nan ve i gbe hange hange u se zua a mbamlumun sha mbampin mba i doo u se pine ayol a ase laa? Gba hange hange sha ci u vea wase se se fa er batisema a lu kwagh u beelee ga yô. Batisema ka a wase mbagenev ve fa ér se er ityendezwa i vesen a Yehova. U tôndo zwa wer una doo u ishima shi u civir un gbem sha won a ishima you cii. (Marku 12:30) Gba u hanma or u nan er batisema cii nana kange ishima u kuren ityendezwa i nan er a Yehova la.​—⁠Ôr Orpasenkwagh 5:​4, 5.

11, 12. (a) Ka nyi i gbe u or u nan soo u eren batisema la nana fa? (b) Ka nyi ia wase u u lun a mnenge u Yehova kpa a lu a mi sha kwagh u batisema laa?

¹¹ Bibilo kaa ér ior mba Yehova cii, kua agumaior je kpaa, vea civir un sha “asema” a ve. (Pasalmi 110:⁠3) Nahan gba u or u nan soo u eren batisema la nana fa ér mimi je sar nan u eren batisema. Alaghga a gba u u gbidye kwar sha kwagh ne zulee, hemban je yô, aluer i yese u ken mimi yô.

¹² Alaghga er u lu vesen ne, u nenge ior kpishi er batisema, kua azende a ou agen man anngôôv ou je kpaa. Kpa wa ikyo sha er u hii u nengen wer gba u u er batisema sha ci u u vese kuma u eren batisema shin hanma or cii nan ngu eren yum ga. U er nan ve u lu a mnenge u Yehova kpa a lu a mi sha kwagh u batisema laa? Tôô shighe hen er i hii ve batisema a lu kwagh u hange hange yô. Ngeren ne man u dondon la vea wase u u zua a atôakyaa a injaa kpishi sha kwagh ne.

13. U er nan ve u fa wer mimi je sar u u eren batisemaa?

¹³ Gbenda môm u u fatyô u fan aluer sar u u eren batisema yô, ka u gbidyen kwar sha mbamsen ou. U eren msen hen Yehova hanma shighe kpa? U sen un akaa jighilii ken mbamsen ou kpa? Alaghga mbamlumun mba u ne sha mbampin mban ne, vea wase u u fa aluer u ya ikyar a Yehova kôôsôô yô. (Pasalmi 25:⁠4) Ashighe kpishi Yehova ka a ungwa mbamsen asev sha u tesen se kwagh ken Bibilo. Sha nahan yô, kwagh ugen u una wase u u fatyô u fan aluer u soo u lun kôôsôô a Yehova shi civir un a ishima i môm yô, ka u gbidyen kwar sha gbenda u u henen kwagh la. (Yosua 1:⁠8) Pine iyol you wer: ‘M henen Bibilo sha tseeneke wam hanma shighe kpa? Ka i kighir mo a kighir ve m er mcivir u hen tsombor yee?’ Mbamlumun mba u na sha mbampin mban ne, vea wase u u fan aluer mimi je sar u u eren batisema yô.

14. Pase mkposo u iyoltseghan man batisema u eren.

¹⁴ Alaghga agumaior agen aa fa mkposo u iyoltseghan man batisema ga. Adooga mbagenev vea kaa ér ve tsegha ayol a ve sha ci u Yehova, kpa ka a kuma ve u eren batisema ga. Kpa kwagh a fatyô u lun nahan je kpa? Iyoltseghan ka msen u or ka nan er hen Yehova u tôndon zwa ér nana civir un gbem sha won la. Ka wea er batisema yô, u ngu pasen mbagenev wer u vande tseghan iyol you sha ci u Yehova. Nahan cii man u er batisema yô, gba u u hii fan kwagh u a lu u tseghan iyol you sha ci u Aôndo la.

15. Ka nyi i lu iyoltseghana?

¹⁵ Ka wea tsegha iyol you sha ci u Yehova yô, u ngu kaan a na wer u hingir kwagh na. U tôndo zwa a na wer, u ver mcivir na hiihii ken uma wou. (Ôr Mateu 16:24.) Ityendezwa ne ka kwagh u beelee ga! (Mateu 5:33) Nahan u tese wer u fa wer u kera ngu kwagh wou iyol you ga, kpa u hingir kwagh u Yehova hegen nena?​—⁠Mbaromanu 14:⁠8.

16, 17. (a) Or nana nyiman iyol i nan nena? Tese ikyav. (b) Or u nan tsegh iyol i nan yô, nan ngu kaan a Yehova jighilii ér nyi?

¹⁶ De se nenge ase nen sha ikyav ne. Tôô ase wer ijende you igen na u mato. Ne u ityakerada i mato la yô, a kaa a we ér: “Mato ne ka u wou.” Kpa ijende you ne gema kaa ér: “Me lu a akii a mato ne her. Shi a lu mo me nahan un ye, a lu we ga.” U nenge imba iyua ne nena? Shi u nenge ijende you i i ne u mato ne nena?

¹⁷ Shighe u or tsegh iyol i nan sha ci u Yehova yô, nan kaa a Yehova ér: “M na u uma wam. M hingir kwagh wou.” Yehova ngu a ian i veren ishima ér or la nana kure ityendezwa i nan la. Kpa aluer or la nan hii u peren tindi u Yehova sha u sôôr or u nan civir un ga la myer di ye? Shin aluer nan lumun u eren tom u ua na nana kera lu a shighe kpishi u pasen kwagh ga, shin ua na nana hii u bunden mbamkombo fele fele di ye? Aluer kwagh ngu nahan yô, nan kera ngu kuren ityendezwa i nan er a Yehova la ga. Hingir inja er nan ngu a akii a mato la her nahan. Ka sea tsegha ayol a ase sha ci u Yehova yô, se mba kaan a na ser, “Uma wam hingir kwagh wou, kera ka kwagh wam ga.” Sha nahan yô, hanma shighe cii se eren kwagh u Yehova a soo la, aluer ka kwagh u se ayol a ase se soo ga je kpaa. Se dondo nen ikyav i Yesu la. A kaa ér: “M sen Sha, ka sha u Me er ishima Yam ga, kpa ka u eren ishima i u A tindim la.”​—⁠Yohane 6:⁠38.

18, 19. (a) Kwagh u Rose man Christopher ve er la tese ér batisema u eren ka kwagh u civirigh u a ve a averen nena? (b) U nenge batisema u eren nena?

¹⁸ Kwagh u se hen ne tese wang ér, batisema ka beerkwagh ga. Ka kwagh u civirigh tsung u or tseghan iyol i nan sha ci u Yehova shi eren batisema. Agumaior a Yehova a doo ve ishima shi ve fe kwagh u a lu iyoltseghan yô, mba timbir u tseghan ayol a ve sha ci u Aôndo shi eren batisema ga. Mba vaan afanyô ér ve er batisema yum ga. Wankwase ugen, u lun anyom pue kar, u a er batisema yô, iti na ér Rose, a kaa ér: “Yehova doom ishima, shi kwagh môm ngu u me er ve me hemba zuan a msaanyol a u civir un ga. Ken akaa a m tsough u eren ken uma wam cii, ka batisema yange m tsua a akperan a tan shio ye.”

¹⁹ Hide Anmgbian Christopher, u se vande teren kwagh na ken mhii u ngeren ne la di ye? A nenge batisema u yange er shighe u lu anyom 12 la nena? A kaa ér saan un iyol tsung er yange un tsua u eren nahan yô. Yange hii u eren pania u keke shighe u lu anyom 17 la, va lun anyom 18 yô, hingir diakon. Nyian ne ngu eren tom shin Betel. A kaa ér: “Batisema u yange m er la, lu kwagh u vough. Hegen m ngu eren Yehova man nongo na tom u nan mo msaanyol.” Aluer u soo u eren batisema yô, u wa agoyol nena? Ngeren u dondon la una na mlumun sha mpin la.