Yesu Ver Se Ikyav I Hiden A Iyol Ijime
“M ver ne ikyav i tesen sha er ne kpaa er nen er M er ne nahan.”—YOH. 13:15.
Ú NA MLUMUN WER NYI?
Shighe u Wan u Aôndo lu a va shin tar ga la, yange hiden a iyol na ijime nena?
Shighe u Yesu hingir orumace la, yange hiden a iyol na ijime nena?
Iyol i hiden a mi ijime i Yesu la va a averen a nyi?
1, 2. Ka ityesen i nyi Yesu tese mbaapostoli nav hen tugh mbu kpernan a wua un laa?
HEN tugh mbu kpernan a wua Yesu la, lu vea mbaapostoli nav sha kpoyou u sha hen ya ugen ken Yerusalem. Er ve lu yan kwaghyan zan a mi ave la, Yesu kighir mough er riga na u ken won la. Nahan a tôô taor a zer. Maa a haa mngerem shin tasa, a gba ôôn mbahenen nav angahar shi uman á sha taor la. Been yô, a hide a hua riga na u ken won la. Hii nan ve Yesu er tom u gban ijime nee?—Yoh. 13:3-5.
2 Yesu iyol na kaa ér: “Ne kav kwagh u M er ne ne kpa? . . . Aluer Mo u M lu Ter man Ortesen, M ôô ne angahar yô, nahan ka u ne kpaa ne̱ ôô ayol a en angahar nahan keng. Gadia M ver ne ikyav i tesen sha er ne kpaa er nen er M er ne nahan.” (Yoh. 13:12-15) Er Yesu er tom u gban ijime ne yô, a tese mbaapostoli nav ityesen i vesen sha kwagh u hiden a iyol ijime, i̱ mayange vea hungur a mi ga, shi ia taver ve ishima er ken hemen kpa vea va lu mbahiden a iyol ijime yô.
3. (a) Acin ahar cii, Yesu tese ér ka a inja u hiden a iyol ijime nena? (b) Se hen nyi ken ngeren nee?
3 Ka shighe u Yesu ôô mbaapostoli nav angahar la yange hii pasen ve er i lu hange hange u hiden a iyol ijime ga. Sha shighe ugen la, Yesu ungwa mbaapostoli nav sendegh anyiman sha kwagh u or u nan hembe ken a ve la, nahan a yila wanye ugen a ver un hen atô ve, maa a kaa ér: “Anti or u nana lumun wanye ne ken iti Yam yô, ka Mo je nan lumun ye, man shi anti or u nan lumun Mo yô, nan ngu lumun Un u A tindim la kpaa. Gadia ka or u nan hembe ndahar ken a ven la, ka nan nan lu orvesen ye.” (Luka 9:46-48) Yesu yange lu lamen a Mbafarishi kwagen la, man er fa er ve keren itizan yô, a kaa a ve ér: “Hanma or u nan kende a iyol i nan sha yô, á hire a nan ijime; man u nan hir a iyol i nan ijime yô, á kende nan sha.” (Luka 14:11) Sha kpôô yô, Yesu soo ér mbadondon un ve hide a ayol a ve ijime, inja na yô, a soo ér ve kenden a iyol sha, ve henen ér ve hemba gban kwagh a mbagenev, shin ve eren kwagh inja er ve hemba mbagenev ga. Nahan yô, de se time nen sha ikyav na i hiden a iyol ijime la zulee sha er se dondo un yô. Shi se nenge er i lu se tseegh ieren ne ia wase se ga, kpa ia wase mbagenev kpaa yô.
“M HIDE IJIME KPAA GA”
4. Cii man Wan u Aôndo u môm môm la va hingir orumace shin tar yô, yange hiden a iyol na ijime nena?
4 Cii ve Wan u Aôndo u môm môm la va shin tar ne je kpa, yange hiden a iyol na ijime. Shighe u Yesu lu a hingir orumace ga la, a lu vea Ter na u sha la anyom ngee gande u ôron. Bibilo ôr kwagh u ikyar i Wan ya vea Ter na kôôsôô la ken Yesaia ér: “Ter Aôndo nam nombor u ior mba henen kwagh, sha u Me fa er Me suwe wen u a ver la, sha kwaghôron yô; hanma sev ka A nderem, ka A bughum ato er M̱ ungwa er ior mba henen kwagh nahan. Ter Aôndo bugh ato Am, M hendan ga, M hide ijime kpaa ga.” (Yes. 50:4, 5) Wan u Aôndo yange hide a iyol ijime shi kegh ato a kwagh u Yehova lu tesen un la zulee. Yange kegh iyol shi maa un iyol u henen kwagh hen Aôndo u mimi la. A̱ shi nan kpa Yesu nenge er Yehova hide a iyol ijime, lu eren kwagh a uumace mbaasorabo ne sha mhôôn yô.
5. Yesu u a lu Mikael, ortyom u tamen la yange ver ikyav i hiden a iyol ijime shi eren kwagh akuma akuma shighe u zua vanger a Diabolo la nena?
5 Lu hanma ortyom u sha lu a ieren i Wan u Aôndo u môm môm lu a mi la ga. Ortyom u va hingir Satan Diabolo la yange soo u henen kwagh hen Yehova ga. Vanger kehe un ker, nahan a hii u henen ér un hemba gban kwagh a mbagenev. A hide a iyol ijime ga. Sha nahan yô, a hemba Yehova ato. Kpa Yesu yô, ian i yange lu sha mi sha la kuma un, shi a ker u tesen tahav sha gbenda u bo kpaa ga. Er Yesu a lu Mikael, ortyom u tamen nahan kpa, yange er tahav hemba er ma er, shighe u lu “nôngon a diabolo, lu kpelan ikyom i Mose” la ga. Wan u Aôndo gema hide a iyol na ijime shi er kwagh akuma akuma. Yange doo un u keghen Yehova, Orjir Uhemban Cii ér a er kwagh er a nenge i doo un la man sha shighe u a soo la kpaa.—Ôr Yuda 9.
6. Yesu yange tese iyol i hiden a mi ijime sha u va eren tom u Mesiya nena?
6 Shighe u Yesu lu sha la, yange fa akaa a uprofeti ôr ér aa er un shighe u una va hingir Mesiya la. Sha nahan yô, ikyav tese ér yange vande fan er atsan lu keghen un ken hemen yô. Nahan cii kpa, Yesu lumun u van shin tar ne va lun Mesiya u Aôndo tôndo zwa ér ngu van la shi kpen er i tsengaôron nahan. Sha ci u nyi? Zum u apostoli Paulu lu pasen kwagh u iyol i hiden a mi ijime i Wan u Aôndo u môm môm la, a nger ér: “Un u A lu ken mlu u Aôndo la A nenge er mlu u lun kwagh môm a Aôndo la lu kwagh u yan ishar sha mi ga yô, kpa A gema iyol Na hingir gbilin er A tôô mlu u ortom, A hingir kwagh môm a ior la.”—Fil. 2:6, 7.
YESU “HIDE A IYOL NA IJIME” SHIGHE U LU ORUMACE LA
7, 8. Yesu yange hide a iyol na ijime shighe u lu iyev la man shighe u lu eren tom na u pasen kwagh la nena?
7 Paulu nger ér: “Er i va zua a [Yesu] a mluyol er or nahan yô, A hide a iyol Na ijime, hingir u ungwan kwagh zan zan ar ken ku, man lu ku u [sha kon] je.” (Fil. 2:8) Hii shighe u Yesu lu iyev la je, a ver se ikyav i iyol i hiden a mi ijime. Shin er lu Yosev vea Maria, mbamaren mba yinan mban yese Yesu nahan kpa, a “lu ungwan imo ve” a iyol i hiden a mi ijime. (Luka 2:51) Yesu ver agumaior ikyav i dedoo kpishi. Aôndo una ver agumaior a a lu ungwan imo i mbamaren vev la doo doo!
8 Shighe u Yesu gande or la kpa, a hide a iyol na ijime, nahan eren ishima na ga, kpa eren ishima i Yehova. (Yoh. 4:34) Shighe u Yesu Kristu lu eren tom na u pasen kwagh la kpa, yilan sha iti i Aôndo shi wasen mbaasemaamimi u zuan a mfe u vough sha kwagh u aeren a Yehova man awashima na sha ci u uumace. Shi Yesu eren kwagh u tesen ior sha kwagh u Yehova la kpaa. U tesen ikyav yô, kwagh u hiihii u Yesu ter ken msen u sha ikyav la yô, lu: ‘Ter wase u Sha, i̱ tsegha iti You.’ (Mat. 6:9) Sha nahan yô, Yesu wa mbadondon un kwagh ér, mtsegh u tseghan iti i Yehova la a lu ve kwagh u hiihii. Man kape un kpa eren je la. Sha nahan yô, er zulum u Yesu una kure tom na u pasen kwagh shin tar la, a kaa a Yehova ken msen ér: “M pase [mbaapostoli] iti You; Me shi Me pase ve i kpaa.” (Yoh. 17:26) Heela tseegh ga, Yesu kaan hanma shighe ér una fatyô u eren ma kwagh iyol na ga, saa sha iwasen i Yehova.—Yoh. 5:19.
9. Sekaria yange ôr kwaghôron u profeti sha kwagh u Mesiya ér nyi, man kwaghôron u profeti la va kure sha Yesu nena?
9 Sekaria yange ôr kwaghôron u profeti sha kwagh u Mesiya ér: “Ember tsung, we wankwase u Shion! Gbidye iwer we wankwase u Yerusalem; nenge, Tor wou ngu van her a we, Un ka u perapera je, man u hemban kpaa, u hiden a iyol Na ijime, A henda jaki, wan u mgbianjaki.” (Sek. 9:9) Kwaghôron u profeti ne yange kure zum u Yesu nyôr ken Yerusalem, cii man Iniongo i Paseka u inyom i 33 la. Yange ikpelaior kpishi tar akondo a ve kua ahu a ikyon sha gbenda. Sha kpôô yô, mnyer u Yesu ken Yerusalem la na yô, gar la cii hingir gong gong. Shighe u ior lu genger amo yilan Yesu ér Tor la je kpa, a hide a iyol na ijime.—Mat. 21:4-11.
10. Er Yesu ungwa Ter na zan zan kar kpen yô, kwagh la tese nyi?
10 Shighe u Yesu Kristu lu shin tar la, yange ungwa imo i Ter na shi a hide a iyol na ijime zan zan a kar kpen sha kon. Sha nahan yô, a tese wang ér uumace vea fatyô u tilen a Yehova sha mimi shighe u ve tagher a mbamtaver mba hemban vihin je kpaa. Yesu shi tese ér, kwagh u Satan kaa ér, uumace mba civir Yehova sha ci u mtsera u vea zua a mi la ka mimi ga. (Yobu 1:9-11; 2:4) Er Yesu ungwa Ter na a mshi shio yô, a tese ér Yehova ngu a ian i hemen, shi hemen na hemba doon kpaa. Yange a doo Yehova u nengen er Wan na u hiden a iyol ijime ne tile sha mimi, a mshi shio la je, ka u henen a hen ga.—Ôr Anzaakaa 27:11.
11. Nagh ku ipaan ku Yesu Kristu yange na la bugh uumace mba vea na jighjigh la gbenda u va zuan a nyi?
11 Shi ku u Yesu kpe sha kon la na yô, a kimbi injar i paan uumace. (Mat. 20:28) Kwagh ne bugh gbenda u uumace mba asorabo vea lu uma gbem sha won yô; shi a kure perapera u Yehova la kpaa. Paulu nger ér, ka sha ‘ieren i perapera i Or môm i ze a ior cii ken ishô i nan man uma’ ye. (Rom. 5:18) Ku u Yesu la bugh gbenda sha er Mbakristu mba i shigh ve mkurem la, vea za zua a uma u kpen ga sha, mba ve lu “iyôngo igen” la di vea zua a uma u tsôron shin tar yô.—Yoh. 10:16; Rom. 8:16, 17.
M NGU “ISHIMA LEGH LEGH”
12. Yesu yange eren kwagh a uumace mba yinan sha ishima i legh legh man a iyol i hiden a mi ijime nena?
12 Yesu yange kaa a mba “i ver [ve] iyol” cii ér ve va hen a na. A kaa ér: “Tôô nen igbur Yam sha ayol a en, va hen nen kwagh sha ikyev Yam, gadia M ngu ishima legh legh, man M kehen ityough kpaa ga, tsô né zua a mmem ken asema a en.” (Mat. 11:28, 29) Ieren i hiden a iyol ijime man i lun ishima legh legh la yange i mgbegha Yesu u eren kwagh a uumace mba yinan mbara kundu kundu, a msange u sha dooshima shio. Yange veren ishima ér mbahenen nav ve er kwagh u a hembe ve agee ken inya ga. Kpa wuese ve shi taver ve ishima. Yange na ve ve hen ér ve kuma u eren kwagh môm ga, shin ve gba kwagh ga ze. Sha mimi yô, Yesu lu or u wan tswam shin kighir mbagenev ga. Kpa geman taver mbadondon un ishima ér, aluer ve kporom ikyua a na shi mba dondon atesen a na yô, vea zua a mmem, sha ci u igbur na leghem, ikyav nav kpa peese. Yange i doo nomso man kasev, mbaganden a mbayev cii u van hen Yesu.—Mat. 11:30.
13. Yesu yange zungwe mba uma taver ve mbara mhôônom nena?
13 Yange kunya kôr Yesu a ior mba ken Iserael mba uma taver ve la, nahan a nenge sha mbamgbe vev sha afatyô na cii. U tesen ikyav yô, Yesu yange zua a or u sônon kwagh, u pirin ashe, u i yilan un ér Bartimeu la, lu vea orapirashe ugen u i ter iti na ga, u un kpa sônon kwagh yô, ve tema ikyua a gar u Yeriko. Mbaapirashe mba uhar mbara zer zamber a Yesu ér a wase ve, kpa ikpelaior yange ve ér ve huan ayôôso. Yesu yange ma venda u ungwan zamber u mbaapirashe mbara, kpa er nahan ga. A gema a kaa ér i va a ve hen a na, man er mhôônom kôr un a ve yô, a bugh ve ashe. Sha kpôô yô, Yesu yange dondo ikyav i Ter na Yehova, sha u hiden a iyol na ijime shi eren a mbaasorabo, mba ve gba kwagh ga mbara sha mhôôn.—Mat. 20:29-34; Mar. 10:46-52.
“HANMÔ U NAN HIR A IYOL I NAN IJIME YÔ, Á KENDE A NAN SHA”
14. Iyol i hiden a mi ijime i Yesu la va a averen a nyi?
14 Ieren i Yesu i hiden a iyol na ijime la va ior kpishi a iember man averen ngôgh. Yange saan Yehova iyol u nengen er Wan na u doon un ishima la er ishima i Aôndo a iyol i hiden a mi ijime yô. Er Yesu lu ishima legh legh shi kehen ityough kpaa ga yô, mbaapostoli man mbahenen nav cii zua a mmem. Ikyav i Yesu man ityesen na kua iwuese i yange wuese ve la wase ve u vesen ken jijingi. Ior mba sha kwarkyaa ga kpa yange ve zua a mtsera sha iyol i hiden a mi ijime i Yesu la, sha ci u wasen ve shi tesen ve shi taver ve ishima kpaa. Jighilii yô, uumace mba ve ne Yesu jighjigh cii vea zua a averen a tsôron sha ci u nagh ku ipaan ku a ne la.
15. Yesu yange hide a iyol na ijime nahan wase un nena?
15 Hide Yesu di ye? Yange hide a iyol na ijime nahan wase un kpa? Een, sha ci u yange kaa a mbahenen nav ér: “Hanmô u nan hir a iyol i nan ijime yô, á kende a nan sha.” (Mat. 23:12) Mkaanem mara yange ma kure sha a na vough. Paulu pase ér: “Aôndo . . . kende [Yesu] sha kpishi je . . . A ii Un iti i i hembe hanma iti igen cii, sha er hanma inyu cii i mba ve lu Sha man mba ve lu shin tar man mba ve lu shin atô u taregh kpaa, ia gure inya ken iti i Yesu yô, man hanma nombor kpaa ua pase er Yesu Kristu ka Ter je sha ci u iengem i Aôndo Ter.” Er Yesu hide a iyol na ijime shi tile sha mimi shighe u lu shin tar la yô, Yehova Aôndo kende a Wan na sha, na un tahav sha akaauma a a gbe a la, a a lu sha man a a lu shin tar cii.—Fil. 2:9-11.
YESU UNA “ZENDE . . . SHA CI U KWAGH U MIMI MAN U ISHIMA I LEGH LEGH”
16. Ka nyi i tese ér, Wan u Aôndo una za hemen u hiden a iyol ijime?
16 Wan u Aôndo una za hemen u hiden a iyol ijime zan zan ken hemen kpaa. Orngeren pasalmi ugen yange tsengaôron ér, zum u Yesu una hingir Tor sha la, una nôngo ityav a mbaihyomov mba Aôndo. A kaa ér: “Zende a icivir You doo doo, sha ci u kwagh u mimi man u ishima i legh legh [shin “iyol hiden a mi ijime,” NW] man u perapera.” (Ps. 45:4) Yesu Kristu una zende a iyol i hiden a mi ijime man mimi kua perapera sha Armagedon. Man ka nyi ia er shighe u Hemen u Anyom Dubu ua kure ve, Tor Mesiya una mase “timin tarkuran cii kera man tahav kua agee cii” laa? Una tese iyol i hiden a mi ijime hen shighe la je kpa? Een, gadia una “gema tartor Una na Aôndo Ter.”—Ôr 1 Mbakorinte 15:24-28.
17, 18. (a) Gba hange hange u mbacivir Yehova vea dondo ikyav i hiden a iyol ijime i Yesu ver la sha ci u nyi? (b) Se hen nyi ken ngeren u a dondo ne?
17 Gema Se di ye? Se va dondo ikyav i Yesu la, nahan se hide a ayol a ase ijime kpa? Shighe u Tor wase Yesu Kristu una va a mtim sha Armagedon la, se war kpa? Ikyav tese ér, ka mba ve hir a ayol a ve ijime shi ve eren perapera mbara tseegh una yima ve ye. Nahan aluer se soo u va waren yô, gba kpee u se hiden a iyol ijime. Heela tseegh ga, er iyol i hiden a mi ijime yange i wase Yesu man mbagenev nahan, aluer se mba hiden a ayol a ase ijime yô, se kua mbagenev kpaa, se zua a averen ngôgh.
18 Ka nyi ia wase se ve se dondo ikyav i Yesu i hiden a iyol ijime laa? Shin er alaghga a taver se u hiden a iyol ijime nahan kpa, se nôngo sha afatyô wase ser se lu a ieren ne nena? Se time sha mbampin mban ken kwaghhenen u a dondo ne.
[Ufoto mba sha peeji 12 la]
Ikyav i iyol i hiden a mi ijime i̱ Yesu a ver la ia wase se nena?
[Foto u sha peeji 13]
Yesu ver se ikyav i zungwen mbagenev mhôônom