“Lu Nen Geng Ge Geng”
“Mkur u akaa cii mgbôghom ve; . . . lu nen geng ge geng kpaa, sha u né fatyô u eren msen yô.”—1 PET. 4:7.
1. Lu itinekwagh i nyi Yesu pasen ior kwagh sha mini?
SHIGHE u Yesu Kristu lu shin tar la, itinekwagh i pasen ior kwagh sha mi yô, lu Tartor u Aôndo. Ka Tartor la Yehova una yar tom a mi, una paa hementor na iyol shi una tsegha iti na ye. Sha nahan yô, Yesu tese mbahenen nav ér ve eren msen hen Aôndo ér: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mat. 4:17; 6:9, 10) Kera shi ica ga tsô, Tartor ne ua tim tar u Satan ne kera nahan ua hemen ior vea er ishima i Aôndo sha tar cii. Daniel tsengaôron ér Tartor u Aôndo “ua hembe ityartor igen [i i lu hemen hegen] ne cii avur avur, ua tim i, kpa u yô, ua lu gbem sha won.”—Dan. 2:44.
2. (a) Lu u mbadondon Yesu vea fa ér a hii u hemen ken Tartor u sha la nena? (b) Ikyav la shi ia tese nyi igene?
2 Er mve u Tartor u Aôndo la yange lu mbadondon mba Yesu kwagh u vesen kpishi yô, ve pine Yesu ér: “Ka nyi ia lu ikyav i sha mve Wou la man i mkurtara.” (Mat. 24:3) Ikyav ia lu i tesen ér shighe u mve u Yesu la kuma, sha ci u shighe u Yesu una tema tor ken Tartor u sha la, ior mba shin tar vea nenge a na ga. Ikyav shon ia lu a avegher kposo kposo, a i tsengeôron kwagh u á ken Ruamabera yô. Lu u mbadondon Yesu mba vea lu uma hen shighe la vea nenge a ikyav la maa vea fa je ér Yesu hii u hemen sha. Shi ikyav la ia tese mhii u shighe u Bibilo i yer ér “ayange a masejime” a botar ne, a a tser tar u hegen ne cii la.—2 Tim. 3:1-5, 13; Mat. 24:7-14.
Lu Nen Geng ge Geng ken Ayange a Masejime Ne
3. Gba u Mbakristu vea lu geng ge geng sha ci u nyi?
3 Apostoli Peteru nger ér: “Mkur u akaa cii mgbôghom ve; nahan kundu nen ishima shi lu nen geng ge geng kpaa, sha u né fatyô u eren msen yô.” (1 Pet. 4:7) Gba u mbadondon Yesu vea lu geng ge geng, vea ver ishima sha akaa a a lu eren shin tar, a a tese ér ngu hemen ken Tartor u sha la. Shi gba u vea seer lun geng ge geng er mkur u botar ne a lu mgbôghom ne. Yesu kaa a mbahenen nav ér: “Kuran nen, gadia ne fa shighe u Orya Una va [u va ôron tar u Satan ne ijir] ga.”—Mar. 13:35, 36.
4. Pase mkposo u ior mba ve lu sha ikyev i tar u Satan ne man mbacivir Yehova. (Nenge ngeren u a lu a itinekwagh ér, “Shighe u Mzeyol Hii La” la.)
4 Satan ngu hemen ior kpishi, nahan ve kera ver ishima sha akaa a a lu eren shin tar la ga. Ve fa er Kristu a lu hemen sha hegen ga. Kpa mbadondon Kristu mba mimi yô, mba geng ge geng shi ve fa ityôkyaa i akaa a yange er ken derianyom u a kar la yange er yô. Hii ken inyom i 1925 la je, Mbashiada mba Yehova kav er Ityav mbi Tar Cii Mbi sha Môm kua akaa agen a yange er shighe u ityav mbin bee la cii tese wanger wanger ér Kristu hii u hemen sha ken inyom i 1914 la yô. Kwagh ne tese ér ayange a masejime a botar u Satan ne hii. Shin er ior kpishi ve fe inja i akaa a a lu eren ne ga nahan kpa, ve nenge er mlu u tar u hegen ne u kaha kpishi a tar u u lu cii man Ityav mbi Tar Cii Mbi sha Môm la yô.—Nenge ngeren u a lu a itinekwagh ér, “Shighe u Mzeyol Hii La.”
5. Doo u se kuran sha ci u nyi?
5 Akaa a kpilighyol a a lu eren sha tar cii i nôngo u kuman anyom deri hegen ne tese ér se mba ken ayange a masejime. Ica a gba ga tsô, Yehova una na Kristu ian una hemen mbatyomov mba ageegh vea va tim tar u Satan ne. (Mpa. 19:11-21) Í wa Mbakristu mba mimi kwagh ér ve kuran. Nahan er se lu veren ashe a mkur u tar ne yô, ka hange hange u se za hemen u kuran. (Mat. 24:42) Gba kpee u se kuran, shi se lumun ser Kristu a̱ hemen se se er tom u i we se sha ikyev la se tser tar cii.
Tom u I Gbe u A Er u a Tser Tar Yô
6, 7. Tom u pasen ior kwagh u Tartor ne za ikyura ken ayange a masejime ne nena?
6 I tsengaôron kwagh u tom u i gbe u ior mba Yehova vea er la ér ua lu vegher u ikyav i tesen ér se mba ken ayange a masejime a botar ne la. Yesu yange ôr kwagh u tom u se lu eren tar sha won cii ne zum u lu ôron akaa kposo kposo, a aa er ken mkur u tar ne la. Mkaanem ma ma lu shin heen, ma lu a inja kpishi ne kpa yange ma lu ken kwaghôron na u profeti la, ma kaa ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”—Mat. 24:14.
7 Hen ase sha akaa agen a a gbe a zough sha kwaghôron u profeti u Yesu ne yô. Shighe u ayange a masejime hii ken inyom i 1914 la, iyenge i mbapasen loho u dedoo lu kpuaa tsô. Kpa hegen ne, iyenge la nger je gande. Mbashiada mba Yehova mba hemban iyenge 7,000,000 nahan mba eren tom u pasen kwagh ne tar sha won cii, shi mba ken atôônanongo a hemban 100,000. Ken inyom i 2008 la, iorov 10,000,000 yange ve kohol Mbashiada mba Yehova ve umbur ku u Kristu. Iyenge ne hemba iyenge i ior mba yange ve va mkombo u umbur ku u Yesu inyom ken i 2007 la.
8. Er nan ve ahendan a Satan a ve a mi la a fetyô u yangen tom wase u pasen kwagh ga?
8 Sha kpôô yô, mba pasen akuraior cii kwagh u Tartor u Aôndo kpoghuloo, cii man mkur u tar ne una kuma ye! Er Satan a lu “aôndo u tar u ainge ne” nahan kpa, se mba zan hemen a tom u pasen kwagh u Tartor ne. (2 Kor. 4:4) Satan ngu yaren tom a mbapativ man ukwaghaôndo kua mbakpengav mba tar ne man igbenda i samber a abaver sha u nôngon ér una yange tom ne. Nahan kpa kanyi jighilii i ne ve tom ne u lu zan hemenee? Ka Yehova a lu suen tom ne ye. Sha nahan yô, tom u pasen loho u Tartor ne ngu seer zan a za hemen shin er Satan a lu nôngon ér una yange u nahan kpaa.
9. Se fatyô u kaan ser mze u se lu zan hemen ken jijingi ne ka ivande sha ci u nyi?
9 Se fatyô u kaan ser mze u tom u pasen loho u Tartor u lu zan hemen shi ior mba Yehova ve lu ngeen seer a seer ne ka ivande. Luun er Aôndo una lu suen tom ne sha u hemen u shi kuran ior nav ga yô, ma se ker cio u eren u ga. (Ôr Mateu 19:26.) Se mba a vangertiôr ser er icighan jijingi u Aôndo a lu eren tom ken asema a ior mba ve lu geng ge geng, mba i sar ve u eren Aôndo tom la yô, tom u pasen kwagh ne ua za hemen zan zan “mkur una kuma.” Man shighe u mkur la mgbôghom.
“Zegecan”
10. Yesu pase ér zegecan la una lu nena?
10 Mkur u tar ne una va shighe u “zegecan” una hii la. (Mpa. 7:14) Bibilo pase se er zegecan la una tsa ga, kpa Yesu kaa ér: “Zum la zegecan una er, imbacan i hii er i gba tar la je zan zan ainge ne i lu a er mayange ga yô, man mayange kpaa ia kera shi er nahan kpaa ga.” (Mat. 24:21) Aluer se hen sha ican i i tser tar ne, er Ityav mbi Tar Cii Mbi sha Uhar, mbi yange mbi wua ior er miliôn 50 shin 60 la yô, se nenge ser zegecan u a lu van la una hemba wuan ior cii. Zegecan ne una mase kuusu sha ityav mbi Armagedon. Ka shighe u Yehova una na mbautyaav nav ian vea tim tar u Satan ne gburu gburu je la.—Mpa. 16:14, 16.
11, 12. Kanyi ia tese mhii u zegecan laa?
11 Akaaôron a profeti a ken Bibilo pase iyange i zegecan la una hii ga, kpa a gema a ôr se kwagh u vesen u una tese mhii u zegecan shon yô. A tese ér, ugomoti mba tar ne vea tim ukwaghaôndo mbaaiev cica cii. Akaaôron a profeti a i er ken Mpase ityough 17 man 18 la tôô kwaghaôndo u aiegh kar sha idyakwase, u a er idya a utor mba tar ne yô. Mpase 17:16 tese ér kera shi ica ga tsô, utor mba tar ne “vea kôr idyakwase la ihyom, vea ngohol un akaa, una hingir aveve una hungwa idyelegh, vea ya inyam na vea nande un sha usu.”
12 Mtim u kwaghaôndo u aiegh una kuma yô, Aôndo una mgbegha “asema a [utor mba tar ne] sha u ve̱ er sha awashima Na,” ve tim kwaghaôndo u aiegh kera. (Mpa. 17:17) Nahan se fatyô u kaan ser ka Aôndo je una tim ve ye. Kape Aôndo una ôr ukwaghaôndo mba wan atseregh, mba ve tese ityesen i i lu sha ishima i Aôndo ga shi ve tev mbatomov mba Aôndo a ican ica i gbe hegen ne ijir je la. Tar ne fatyô u nengen a mtim u a lu keghen kwaghaôndo u aiegh ne ga. Kpa mbatomov mba Yehova mba jighjigh yô, ve nenge a mi. Man mba ôron ior kwagh u mtim ne ken ayange a masejime ne cii.
13. Kanyi i tese ér a tim kwaghaôndo u aiegh fele?
13 Mtim u kwaghaôndo u aiegh una kpiligh ior iyol kpishi. Kwaghôron u profeti u ken Bibilo tese ér, “Utor” mba tar ne mbagenev vea ôr kwagh u mtim na, ér: “Kwagh tser un ve, kwagh tser un ve . . . Gadia ken ihwa i môm tseegh tsô i yôhôr un kera cii.” (Mpa. 18:9, 10, 16, 19) “Ihwa i môm” i i ter ken Bibilo heen ne tese ér a tim un fele er inyiar nahan.
14. Shighe u mbaihyomov mba Yehova vea mough num a mbacivir un la, una er nan hen shighe la?
14 Se fa ser, a timin kwaghaôndo u aiegh kera shighe a karen kpuaa yô, mbaihyomov mba Yehova vea mough num a mbacivir Un, mba ve lu yôôn ajiraôron a Na la. (Esek. 38:14-16) Hen shighe la a lu Yehova u a tendezwa ér una kura ior nav mbajighjigh la vea lu nôngon num a na ye. Yehova kaa ér: “Ka sha iwuhe Yam man sha myegh u ishima Yam i vihin M kaa kwagh ye. . . . [Ka] nahan man vea fa er Mo M lu TER ye.” (Ôr Esekiel 38:18-23.) Aôndo ôr ken Mkaanem nam ér, “u nan bende a ven yô, nan bende a hongorshe [Wam] je.” (Sek. 2:8) Shighe u mbaihyomov mba Yehova vea mough num a mbacivir Un tar sha won cii la, Yehova una tema a tema ga. Una mough num a ve, una er kwagh u masen kuusu zegecan la, una tim ve sha iyange i Armagedon. Kristu una hemen mbatyomov mba ageegh, vea tim tar u Satan ne.
Doo u Kwagh u Mtim Ne Una Bende a Vese Nena?
15. Er se fe ser mtim u botar ne sôôn van nahan, doo u kwagh ne una bende a vese nena?
15 Er se fe ser mtim u botar ne sôôn van nahan, doo u kwagh ne una bende a vese nena? Apostoli Peteru nger ér: “Er akaa cii á va sough kera nahan yô, doo u né lu ken icighanmlu man né lu civir Aôndo nana?” (2 Pet. 3:11) Mkaanem mara wase se u fan er i doo u se dondo atindiakaa a Aôndo shi se eren aeren a civir Aôndo sha u tesen ser Yehova doo se ishima yô. Aeren ne wa u pasen loho u dedoo u Tartor u Aôndo kpoghuloo cii man mkur una va la kpa ker. Peteru shi nger ér: “Mkur u akaa cii mgbôghom ve. . . . nahan lu nen geng ge geng.” (1 Pet. 4:7) Se mba kporom hen Yehova shi se mba tesen ser a doo se ishima sha u eren msen hen a na hanma shighe, sônon un ser a hemen se sha iwasen i icighan jijingi na man nongo na u u lu sha tar cii la.
16. Doo u se eren sha akaawan a Aôndo vough vough sha ci u nyi?
16 Er se lu ken ashighe a bo ne yô, doo u se eren sha kwaghwan u a lu ken Mkaanem ma Aôndo ne vough vough, a kaa ér: “Nenge nen vighe vighe er ne zenden yô, i̱ de lu er mbalanenkwagh nahan ga, kpa i̱ lu er mbafankwagh nahan. Man waan nen ian yen ikyo, gadia ayange ne ka a bo je.” (Ef. 5:15, 16) Er i gbe tar je, ka hegen ifer i hembe ngeen ye. Satan er akaa kposo kposo, a yangen ior u eren ishima i Yehova shin danen ve asema. Se mba civir Yehova yô, se lan ayom a Satan ga, nahan se soo ser kwagh môm tsô a yange se u civir Aôndo sha mimi ga. Shi se fa kwagh u a sôôn eren yô, nahan se suur sha Yehova man mbaawashima nav.—Ôr 1 Yohane 2:15-17.
17. Pase er a lu mba vea war Armagedon la ken ishima shighe u vea nenge a nder ior shin ku yô.
17 Shighe ngu van u Aôndo una kure ityendezwa na i nderen mbakpenev shin ku la, gadia a va nder “mbaperapera kua mba ve lu perapera ga . . . shin ku.” (Aer. 24:15) Í ôr kwagh u ityendezwa wanger wanger ér: ‘Mba va nderen ior shin ku’ ne. Ityendezwa ne ia kure kpee, gadia ka Yehova je a er kwagh ne ye! I ôr ken Yesaia 26:19 ér: “Mbakpenev Ou vea lu uma; . . . Nder nen, wa nen icam, ne mba ne tem shin vuulevu; . . . tar kpaa ua due a ujijingi mba mbakpenev.” Mkaanem man yange ma hii kuren sha ior mba Aôndo mba sha ashighe a tsuaa, mba i hide a ve ken tar ve la; se kpa mkaanem man na se mba a vangertiôr ser tar u he la ua va kpee, a bunde ga. Nenge er mba a nder ve la vea hide vea lu vea ior vev ve a saan iyol yô! Sha kpôô yô, mtim u tar u Satan ne mgbôghom, shi tar u he la ngu soon van. Sha nahan yô, doo u se lu nen geng ge geng!
Baver We Kpa?
• Lu itinekwagh i nyi Yesu pasen ior kwagh sha mini?
• Tom u pasen loho u Tartor ne samber nyian nena?
• Doo u se lu geng ge geng sha ci u nyi?
• Ka kwagh u taver we ishima u nyi u zough a mi ken Aerenakaa 24:15?
[Ngeren u kiriki/Foto peeji 16, 17 la]
Shighe U Mzeyol hii La
Orgen, mba yer un ér Alan Greenspan, a gber takerada ugen ken inyom i 2007, mba yer u ér, The Age of Turbulence: Adventures in a New World (Shighe u Mzeyol: Akaa a Doon ken Tar u He). Alan Greenspan lu orkyôn u mzough u i yer ér United States Federal Reserve Board la. Mzough ne nengen sha ubam mba vesen mba ken tar u Amerika cii. Greenspan pase er tar yange u lu cii man inyom i 1914 yô, shi a pase er yange u lu ken anyom a a dondo sha inyom shon la kpaa, a kaa ér:
“Abaver a sha kwagh u mlu u tar yange u lu cii man inyom i 1914 la tese ér, ior kpishi yange ve eren a mbagenev doo doo shi ior lu seer zuan a mfe sha kwagh u iwavaren kpaa. Tar yange u doo je lu inja er zayol una kera lu ga yô. Mba ker ken derianyom u sha puetaankarunyiin yô, i cir ikpan i teen. Shi i pande u nzughul a ior kpaa. . . . Mfe u iwavaren yange seer ken derianyom u sha puetaankarunyiin la kpishi. U tesen ikyav yô, yange i zua a mfe u eren gbenda u girgidogo man telefon man usu u latriki man senema man mato kua ikyav mbi ken iyou kpaa, je yô se fatyô u teren akaa a yange i er ken derianyom shon cica cii ga. Mfe u i seer zuan a mi sha kwagh u tweregh man kwaghyan man gbenda u tindin a mngerem ken ugôngormbamgerev sha ajiir kposo kposo la yange na ior ver ishima ér tar ua doo . . . Hanma or cii nan hen ér kape tar ua za hemen u doon je la.”
Er . . . “Ityav mbi Tar Cii Mbi sha Uhar mbira yange mbi hemba wuan ior shi timin akaa cii nahan kpa, Ityav mbi Tar Cii mbi sha Môm mbira mbi hemba tulen mzehemen u uumace hiden a mi ijime: Ityav mbi hiihii mbira yange mbi vihi mhen u dedoo u ior lu a mi la. Mayange je, mlu u tar yange u lu cii man Ityav mbi Tar Cii Mbi sha Môm mbira una hungur mo ga, sha ci u hen shighe la lu inja er ior lu zuan a mfe sha akaa seer a seer nahan, shi ve lu zan ikyura seer a seer kpaa. Mlu u tar u hegen ne kaha kposo a mlu u tar yange u lu ken derianyom u a kar la, nahan kpa sar ior tsung er tar u hegen ne kpa ma u doo yô. U hen wer tswam man mtsee u tar u lu tseen karen ikyaa inya ne shin mbapatii vea vihi tar u hegen, u u lu bughun ashe seer a seer ne vough er Ityav mbi Tar Cii Mbi sha Môm mbira yange mbi vihi mzehemen u lu shin tar cii man ityav mbi shon laa? Or môm kpa nana fatyô u nan mlumun sha mpin ne vangertiôr ga.”
Greenspan umbur kwagh u profesôr ugen yange ôr un zum u lu henen a hen makeranta la, mba yer profesôr shon ér Benjamin M. Anderson, i mar un ken inyom i 1886, a kpe ken inyom i 1949. Yange kaa ér: “Ior mba ve lu uma hegen, mba vea fatyô u umbur er tar yange u lu cii man Ityav mbi Tar Cii Mbi sha Môm mbira yô, vea tôm shighe la kpen kpen. Tar kera ngu ken mkpeyol er yange u lu cii man ityav mbin hii la ga.”—Economics and the Public Welfare.
I ôr imba kwagh ne ken takerada ugen u Gerald J. Meyer yange nger, i gber u ken inyom i 2006 la, mba yer u ér A World Undone. U kaa ér: “Ashighe kpishi ior ka ve kaa ér, mbamzeyol mba shin tar ka ve ‘gema hanma kwagh cii.’ Ityav mbi Vesen mbi yange i nôngo ken inyom i [1914-1918] la tese ér kwagh ne ka mimi. Sha kpôô yô, ityav mbira yange mbi gema hanma kwagh cii: yange mbi gema uijootar man ugomoti man ishimaveren i akuraior tseegh tsô ga, mbi gema gbenda u ior ve nengen tar man ve ayol a ve la kpaa. Ityav mbira vihi tar u hegen ne kaca kaca, u kera doo er yange u doo sha shighe u i lu a nôngo mbi ga la ga.”
[Foto u sha peeji 18]
Yehova una na mbatyomov nav mba ageegh ian vea tim mbaihyomov nav sha iyange i Armagedon