‘Kaa a Se Yôô, Ka Hanma Shighe man Akaa Ne Aa Ere?’

 1. Ka nyi i sar se tsung u fan, er mbaapostoli nahana?

ER VA zulum u Yesu una kure tom na u pasen kwagh shin tar la, sar mbahenen nav u fan kwagh u mlu ve u ken hemen je zua ga. Nahan ka va shin ayange kpuaa u Yesu una kpe yô, mbahenen nav unyiin pine un ér: “Ka hanma shighe man akaa ne aa ere? Man ka nyi ia lu ikyav i sha mve Wou la man i mkurtara?” (Mat. 24:3; Mar. 13:3) Yesu na mlumun sha mpin ve la sha u ôron ve kwaghôron u profeti u i nger ken Mateu ityough 24 man 25 la. Ken kwaghôron u profeti shon la, Yesu tsengapasen akaa a kpilighyol, a aa er yô. Mkaanem nam mara ma se a inja kpishi, sha ci u se kpa sar se tsung u fan kwagh u una er ken hemen la.

 2. (a) Ka nyi yange se lu keren u seer kaven anyom imôngoo? (b) Ka mbampin mba utar mba nyi se lu timen sha mini?

² Mbacivir Yehova yange ve time sha kwaghôron u profeti u Yesu ôr sha kwagh u ayange a masejime la shi ve sôn mkav sha mi anyom imôngo. Ve ker u seer kaven shighe u mkaanem ma Yesu mara ma a kure yô. De se tese er se kav kwaghôron la wang yô, er se lu timen sha mbampin utar, mba ve hii sha ishember i “Ka hanma shighe” la. Ka ve je ne: Ka hanma shighe “zegecan” la una hii? Ka hanma shighe Yesu una ôr “iyôngo” man “ivo” ijiri? Ka hanma shighe Yesu una “va”?—Mat. 24:21; 25:31-33.

 3. Ngise la, se kav shighe u zegecan una va la nena?

³ Yange se hen ser zegecan la hii ken inyom i 1914, sha Ityav mbi Tar Cii Mbi Hiihii mbira, shi Yehova va “pande ayange” a ityav mbira ken inyom i 1918, shighe u ityav mbira bee la, sha er Mbakristu mba i shigh ve mkurem, mba ve shi her la vea zua a ian i pasen loho u dedoo sha tar cii yô. (Mat. 24:21, 22) Se lu henen ser a eren tom u pasen kwagh la a been yô, maa a tim tar u Satan ne cii kera. Nahan se hen ser zegecan la una va sha aaven atar. Una hii eren ken inyom i 1914 zan zan una va mem ken inyom i 1918, zan zan shi una va mough sha Armagedon maa una kuusu.

 4. Ka mfe u nyi yange wase se u seer kaven kwaghôron u profeti u Yesu ôr sha kwagh u ayange a masejime laa?

⁴ Nahan kpa, se mba seer timen sha kwaghôron u profeti u Yesu ôr sha kwagh u ayange a masejime la yô, se kav er i lu u kwagh ne una kure sha igbenda ihiar yô. (Mat. 24:4-22) Yange hii eren ken Yudia sha ayange a mbaapostoli la, shi una va er tar sha won cii sha shighe wase ne kpaa. Mkav ne na yô, se zua a iwanger sha akaa agen kpaa wang.a

 5. (a) Ka shighe u taver u nyi yange hii ken inyom i 1914 laa? (b) Shighe u ican la zua sha kwagh u yange er sha ayange a mbaapostoli la nena?

⁵ Shi se kav er iaven i hiihii i zegecan la yange hii ken inyom i 1914 la ga yô. Sha ci u nyi? Sha ci u kwagh u Bibilo tsengaôron la tese ér zegecan la una hii sha shighe u ityav mbia pev sha tar wuee ga, kpa una hii shighe u a ta ityav sha ukwaghaôndo mbaaiev sha tar cii la. Sha nahan yô, akaa a yange hii u eren ken inyom i 1914 la, lu mhii u zegecan la ga, kpa lu “mhii u ican” tsô. (Mat. 24:8) “Ican” i i ter heen ne zua sha kwagh u yange er ken Yerusalem kua Yudia ken inyom i 33 zan zan inyom i 66 la.

 6. Ka nyi ia tese ér zegecan la hii?

⁶ Ka nyi ia tese ér zegecan la hii? Yesu tsengaôron ér: “Zum u nea nenge kwaghndôhôrshima u nan mtim u profeti Daniel ôr kwagh na la, [una] tilen ken icighanjiir yô, (or u ôron kwaghngeren ne nana̱ ver ikyav) zum la, mba ve lu ken Yudia, ve̱ yevese ve̱ yem sha iwo.” (Mat. 24:15, 16) Kwagh ne yange hii eren ken inyom i 66, shighe u akumautya a Mbaroma (“kwaghndôhôrshima”) u sha ayange la va ‘tile ken icighanjiir,’ sha u tan num sha Yerusalem kua tempel u Mbayuda nengen ér ka icighanjiir la. Kwagh ne una va er sha gbenda u vesen shighe u Mzough u Ityar Cii (“kwaghndôhôrshima” u sha ayange a ase ne) una ta num sha Mbakristu Mbaaiev (mba ve nengen ér ve mba uicighanmbaiorov la) kua Zegebabilon cii la. Shi ken Mpase 17:16-18 kpa i ôr kwagh u num ne. Kwagh ne una nguren eren yô, a lu mhii u zegecan je la.

 7. (a) Yange i yima ior sha shighe u mbaapostoli la nena? (b) Ka nyi se ver ishima ser ia va er ken hemene?

⁷ Shi Yesu tsengapasen ér “á pande ayange la kera.” Kwagh ne yange hii eren ken inyom i 66, zum u akumautya a Mbaroma “pande ayange” a ve va u tan num sha Yerusalem la. Mbakristu mba i shigh ve mkurem, mba ve lu ken Yerusalem kua Yudia la maa yevese due, nahan i war ve. (Ôr Mateu 24:22; Mal. 3:17) Nahan, ka nyi se ver ishima ser ia er shighe u zegecan una va laa? Yehova una “pande ayange” a Mzough u Ityar Cii una ta num sha kwaghaôndo u aiegh la, una lumun ér a tim kwaghaôndo u mimi a kwaghaôndo u aiegh imôngo ga. Kwagh ne una na yô, a yima ior mba Aôndo.

 8. (a) Iaven i hiihii i zegecan la ia karen kera yô, nyi ia ere? (b) Ikyav tese ér ka hanma shighe a va yem a or u masetyô ken iorov mba 144,000 mbara sha? (Nenge ngeren u shin kpe la.)

⁸ Iaven i hiihii i zegecan la ia karen kera yô, nyi ia ere? Mkaanem ma Yesu tese ér shighe una kar cii ve Armagedon una hii ye. Ka nyi ia er hen shighe la? Se zua a mlumun u sha mpin ne ken Esekiel 38:14-16 kua Mateu 24:29-31. [Ôr.]b Kwagh ne una karen kera yô, Armagedon una va, maa a lu shighe u masetyô u zegecan la je la. Kwagh ne una zua sha mtim u i tim Yerusalem ken inyom i 70 la. (Mal. 4:1) Ityav mbi Armagedon mbira mbia va hingir sha ishendegh yô, mbia lu kposo a ityav mbigenev cii, mbia lu kwagh u “hii er i gba tar la je zan zan ainge ne i lu a er mayange ga yô.” (Mat. 24:21) Armagedon una karen yô, Hemen u Kristu u Anyom Dubu la ua hii.

 9. Kwagh u zegecan u Yesu tsengaôron la na yô ka ior mba Yehova nena?

⁹ Kwagh u zegecan, u Yesu tsengaôron ne taver jighjigh u nan wase. Sha ci u nyi? Sha ci u a na se ibumun ér sea tagher a ican sha shighe u zegecan la nan nan kpa, er se lu nongo u Yehova yô, se due ker sha. (Mpa. 7:9, 14) Kwagh u hemban cii yô, saan se iyol sha ci u sha shighe u Armagedon la Yehova una tsegha icighanti na shi una tese er a hembe sha won cii yô.—Ps. 83:18; Esek. 38:23.

10. Ngise la, se kav shighe u a ôr iyôngo man ivo ijir la nena?

¹⁰ Shi time ase sha kwagh u shighe u Yesu tsengapasen ken injakwagh na ér a va ôr iyôngo man ivo ijir la. (Mat. 25:31-46) Ngise la se hen ser shighe u ôron uumace mba ve lu iyôngo shin ivo ijir la a lu ken ayange a masejime ne jimin cii, hii ken inyom i 1914 zan zan yem ken hemen. Nahan se kure ikyaa ser mba ve vende loho u dedoo u Tartor la, kua mba vea kpe cii zegecan una hii la mba ivo, nahan vea kpe kpa a nder ve shin ku ga.

11. A fatyô u lun ken inyom i 1914 la i hii u ôron ior ijir ér mba iyôngo shin ivo ga sha ci u nyi?

¹¹ Ken inyom i 1995 la, Iyoukura hide time sha kwagh u i nger ken Mateu 25:31 ne: “Zum u Wan u or Una va sha iengem Na a mbatyomov mba Shaav cii a Na imôngo yô, zum la Una tema sha ikyônough Nagh ki torough ki engem la.” Yange se nenge ser Yesu hingir Tor u Tartor u Aôndo ken inyom i 1914 la, kpa “tema sha ikyônough Nagh ki torough ki engem la” sha u una ôr ‘akuraior cii’ ijir ga. (Mat. 25:32; tôô kar sha Daniel 7:13) Nahan kpa, injakwagh i iyôngo man ivo la hemba ôron kwagh u Yesu ér ka Orjir. (Ôr Mateu 25:31-34, 41, 46.) Er Yesu lu a gba ôron akuraior cii ijir ken inyom i 1914 la ga yô, a fatyô u lun ken inyom la hii u ôron ior ijir ér mba iyôngo shin ivo ga.c Nahan, ka hanma shighe Yesu una hii u ôron ijiri?

12. (a) Ka hanma shighe Yesu una hii u ôron akuraior cii ijiri? (b) Ka akaa a nyi i pase ken Mateu 24:30, 31 kua Mateu 25:31-33, 46 laa?

¹² Kwaghôron u profeti u Yesu ôr sha kwagh u ayange a masejime la tese ér una hii u ôron akuraior cii ijir shighe u a tim kwaghaôndo u aiegh kera la. Er se ôr sha ikyumhiange i sha 8 la nahan, i nger akaa agen a aa er hen shighe la ken Mateu 24:30, 31. Aluer u time sha avur la yô, u nenge Yesu tsengaôron akaa a a lu kwaghmôm aa a ter ken injakwagh i iyôngo man ivo la yô. U tesen ikyav yô, a ôr kwagh u: Wan u or Una va sha iengem Na a mbatyomov mba Shaav a Na imôngo; á kohol akuraior cii; mba i kur ve ijir ér mba iyôngo la vea ‘kende ityouv sha,’ gadia “uma u tsôron” una lu keghen ve.d Mba i kur ve ijir ér mba ivo la yô, vea “ta ave sha vanger,” sha ci u vea kav er “mtsaha u tsôron” a lu keghen ve yô.—Mat. 25:31-33, 46.

13. (a) Ka hanma shighe Yesu una ôr uumace ijir ér mba iyôngo shin ivo? (b) Mkav ne wase se u nengen tom wase u pasen kwagh la nena?

¹³ Nahan, se kure ikyaa ser nyi? Yesu una ôr akuraior a sha tar cii ijir ér mba iyôngo shin ivo zum u una va sha shighe u zegecan la. Una vaan sha shighe u Armagedon, u a lu iaven i masetyô i zegecan la yô, a tim mba ve lu er ivo la gbindigh gbindigh. Mkav ne wase se u nengen tom wase u pasen kwagh la nena? A wase se u nengen er tom wase u pasen kwagh la u lu kwagh u hange hange yô. Cii man zegecan la a hii yô, ior mba a ian her i vea fatyô u geman mhen ve, sha er vea hii u zenden sha gbenda u imbishi, u u “ze sha uma la” yô. (Mat. 7:13, 14) Sha mimi yô, hegen je kpa alaghga ior vea lu a ieren i tesen ér mba iyôngo shin ivo. Nahan kpa, doo u se umbur ser ka sha shighe u Armagedon la a kure ijir i mba ve lu iyôngo shin ivo la ye. Sha nahan yô, se mba a ityôkyaa i injaa i se za hemen u nôngon sha afatyô wase cii sha er se wase ior kpishi vea ungwa shi vea ngohol loho u Tartor la yô.

14, 15. Ka avur a ruamabera anyiin a han a ter kwagh u mve u Kristu ken hemen sha u va ôron ijiri?

¹⁴ Se seer timen sha kwagh u Yesu tsengapasen la nahan, tese ér gba u se nyôôso mkav wase sha kwagh u shighe u akaa a vesen agen aa er yôô? Se zua a mlumun sha mpin ne ken kwagh u profeti u Yesu la. De ase se nenge.

¹⁵ Kwaghôron u profeti u Yesu, u i nger ken Mateu 24:29–25:46 la hemba ôron kwagh sha kwagh u una er ken ayange a masejime ne, kua sha shighe u zegecan una va la. Hen ijiir la, Yesu ôr kwagh u ‘mve’ na shin mhidi na kuma kwa nigheni.e A ôr kwagh u zegecan la a kaa ér: ‘Vea nenge a Wan u or Una lu van sha abeen.’ Shi a kaa ér, ‘Ne fa iyange i Ter wen Una va la ga.’ Shi a kaa ér, ‘Ka hen shighe u ne ver ishima ga la je, Wan u or Una va ye.’ Shi ken injakwagh i Yesu i iyôngo man ivo la kpa, a kaa ér: ‘Wan u or Una va sha iengem Na.’ (Mat. 24:30, 42, 44; 25:31) Avur a anyiin ne cii nga ôron kwagh u mve u Yesu ken hemen sha u va u ôron ijir. Ka avur anyiin agen a han kpa Yesu a ter kwagh u mve na ken kwaghôron na u profeti laa?

16. Ka avur a Bibilo a han kpa a er kwagh u mve u Yesuu?

¹⁶ Yesu ôr kwagh u wanakiriki u jighjigh man u fan kwagh ér: ‘Wanakiriki u ter u nan una hide, una va kohol nan eren nahan la yô, á saan nan iyol.’ Ken injakwagh i anuunaukase la, Yesu kaa ér: ‘Mba ngur yemen sha u za yamen yô, orkwasehe za va.’ Ken injakwagh i utalenti la di, Yesu kaa ér: ‘Ka tse gbang yô, ter u mbatomov mbara za hide.’ Shi ken injakwagh ne i môm i môm, ter la kaa ér: ‘Er m hir nahan yô, ma m ngohol kwagh wam.’ (Mat. 24:46; 25:10, 19, 27) Ka hanma shighe nahan avur a Bibilo a anyiin, a a er kwagh u mve u Yesu ne a tese ér una va?

17. Yange se kaa ser nyi sha kwagh u mve u Yesu u i ter ken Mateu 24:46 laa?

¹⁷ Ngise la, se ôr ken ityakerada yase ser avur a anyiin a se mase teren ne nga ôron kwagh u mve, shin mhidi u Yesu ken inyom i 1918 la. Ikyav i tesen yô, nenge ase kwagh u Yesu a er sha kwagh u “wanakirki u jighjigh man u fan kwagh” la. (Ôr Mateu 24:45-47.) Yange se hen ser ‘mve’ u Yesu u i ter ken ivur i sha 46 la lu shighe u Yesu va sôr mba i shigh ve mkuren ken inyom i 1918, sha u fan mlu ve u ken jijingi, shi ver wanakiriki ér a nengen sha akaa a Ter na cii ken inyom i 1919 la. (Mal. 3:1) Nahan kpa, se seer timen sha kwaghôron u profeti u Yesu la nahan, tese ér gba u se nyôôso mkav u se lu a mi sha kwagh u shighe u akaa agen a i er ken kwaghôron shon aa kure yô. Sha ci u nyi?

18. Se time sha kwaghôron u profeti u Yesu la jimin cii nahan, se kure ikyaa sha kwagh u mve na ser nyi?

¹⁸ Ishember i “va,” i i vande teren ken Mateu 24 cii ivur i sha 46 la, ngi ôron kwagh u shighe u Yesu una va u ôron ijiir shi timin mbaaferev sha shighe u zegecan la tseegh. (Mat. 24:46, 30, 42, 44) Shi er se vande ôron sha ikyumhiange i sha 12 la nahan, ‘mve’ u Yesu u i ter ken Mateu 25:31 la kpa ngu ôron kwagh u shighe u ijirôron i ken hemen la. Sha nahan yô, hemba doon u se kure ikyaa ser mve u Yesu, u va nan wanakiriki na u jighjigh tom u nengen sha akaa a na cii, u i ter ken Mateu 24:46, 47 la shi ngu ôron kwagh u mve na u ken hemen, sha shighe u zegecan la kpaa.f Jighilii yô, kwaghôron u profeti u Yesu u se tim sha mi la jimin cii tese wang ér, avur a Bibilo a anigheni, a a er kwagh u mve u Yesu la cii nga ôron kwagh u mve na u ken hemen, u una va ôr ijir sha shighe u zegecan la.

19. Ka akaa a i nyôôso ken mkav wase a nyi se tim sha mini, man ka mbampin mba han a na mbamlumun sha mi ken ngeren mba ve dondo nee?

¹⁹ Nahan, ka nyi se hen ken ngeren nee? Sha mhii u ngeren ne je, se pine mbampin utar, mba ve hii sha ishember i “ka hanma shighe” la yô. Se hii fan er zegecan la yange hii ken inyom i 1914 la ga, kpa i lu u una va hii shighe u Mzough u Ityar Cii una ta num sha Zegebabilon la yô. Se mba been yô, se hide se nenge er i hii ve ijir i iyôngo man ivo la yange i hii ken inyom i 1914 ga, kpa i lu u kwagh ne una va er sha shighe u zegecan la yô. U masen yô, se tôv se fa er i hii ve i lu ken inyom i 1919 la Yesu va na wanakiriki na akaa a na cii ér a nengen sha mi ga, kpa i lu u una er nahan sha shighe u zegecan la yô. Sha nahan yô, mbampin mba utar, mba ve hii sha ishember i “ka hanma shighe” la cii, mlumun ngu sha mi môm, ér, ka ken hemen, sha shighe u zegecan la. Mkav u i nyôôso ne seer wasen se u kaven injakwagh i sha kwagh u wanakiriki u jighjigh la nena? Heela tseegh ga, kwagh shon wase se u kaven anzaakaa a Yesu agen, a a lu kuren sha mi ken ayange a masejime ne la nena? A na mbamlumun sha mbampin mba hange hange mban ken ngeren mba ve dondo ne.