“Ka An Nan Lu Wanakiriki U Jighjigh Man U Fan Kwagh?”

1, 2. Ka sha ikyev i an Yesu a koson se nyiana, man gba hange hange u se fa nan sha ci u nyi?

ANMGBIAN u kwase ugen yange nger anmgbianev asev mba ve eren tom hen afishi a ase a shin itine la washika, wuese ve kaa ér: “Anmgbianev, me fatyô u ôron ikwa i ne dugh a ngeren mba ve wasem sha ashighe a kwagh a hembe gban mo a mi cii la ga.” We u lumun a kwagh u anmgbian u kwase ne a er la kpa? Se mba kpishiv se lumun a na. Kpiligh se iyol er i hii ve kwagh a lu nahan yôô? Ei, kpiligh se iyol ga.

² Kwaghyan u ken jijingi u se zuan a mi sha shighe vough la ka ikyav i tesen ér, Yesu, u a lu Ityough ki nôngo na la, ngu kuren ityendezwa i a er ér una koson se la. Kpa ka sha ikyev i an a lu eren kwagh nee? Shighe u Yesu lu pasen kwagh u una lu ikyav i mve na la, a kaa wener una na “wanakiriki u jighjigh man u fan kwagh” la tom u nan ya na “kwaghyan sha ashighe ashighe.”a (Ôr Mateu 24:45-47.) Ka sha ikyev i wanakiriki u jighjigh ne Yesu a lu koson mbadondon un mba mimi ken ayange a masejime ne ye. Gba hange hange u se fa wanakiriki ne, sha ci u mlu wase vea Aôndo har sha kwaghyan u ken jijingi u wanakiriki ne a ne se la.—Mat. 4:4; Yoh. 17:3.

 3. Ityakerada yase i ôr nyi sha kwagh u injakwagh i wanakiriki u jighjigh laa?

³ Nahan se er nan ve se kav injakwagh i Yesu ôr sha kwagh u wanakiriki u jighjigh laa? Kera yô, ka kwagh u se pase ken ityakerada yase je ne: Sha iyange i Pentekosti u inyom i 33 la, Yesu tsua wanakiriki u jighjigh la ér a nengen un sha ya. Hii shighe la je, ka Mbakristu mba i shigh ve mkurem, ve lu shin tar sha ashighe kposo kposo la cii ve kohol ve lu wanakiriki, u Yesu ter ken injakwagh na la ye. Ya la di ka mba i shigh ve mkurem mbara asange asange. Ken inyom i 1919 la, Yesu wa “akaa a na cii” sha ikyev i wanakiriki ne. Ka akaa a Tartor na a shin tar la cii a kohol a lu akaa la ye. Nahan cii kpa, se hide se time sha mkaanem ma Yesu ôr sha kwagh u wanakiriki u jighjigh man u fan kwagh la zulee, shi se er msen shi se gbidye kwar sha mi, nahan se mase kaven ser, gba u se nyôôso mkav wase la. (Anz. 4:18) Yô, se time nen sha injakwagh ne, nahan se nenge er í bende a vese yô, sea lu a ishimaverenkeghen i yemen sha shin a lu i va lun uma gbem sha won shin tar kpaa.

4-6. Er nan ve se fatyô u kuren ikyaa ser, ayange a masejime yange hii ken inyom i 1914 cii ve, injakwagh i Yesu ôr sha kwagh u wanakiriki u jighjigh la hii u kurene?

⁴ Kwagh u i er ken injakwagh i wanakiriki u jighjigh man u fan kwagh la tese ér, injakwagh ne yange i hii u kuren sha iyange i Pentekosti u inyom i 33 la ga, kpa ka sha shighe u mkur ne. De se nenge er Ruamabera a wase se se kur ikyaa nahan yô.

⁵ Injakwagh i wanakiriki u jighjigh man u fan kwagh la ka môm ken akaaôron a profeti a Yesu ôr sha kwagh u una lu ‘ikyav i mve na man i mkurtar’ la. (Mat. 24:3) Vegher u hiihii u kwaghôron u profeti u ken Mateu 24:4-22 ne, kure sha avegher ahar. Vegher u hiihii la kure ken inyom i 33 zan zan 70 la. Vegher u sha uhar la di kure sha gbenda u vesen hen shighe wase ne. Kwagh ne tese ér mkaanem ma Yesu ôr sha kwagh u wanakiriki u jighjigh la kpa ma a kure sha igbenda ihiaraa? Ei.

⁶ Shighe u Yesu lu ôron kwagh u i nger ken Mateu 24:29 la, a hemba veren ishima u pasen kwagh u una er sha ayange a ase ne la. (Ôr Mateu 24:30, 42, 44.) Zum u lu ôron kwagh u una va er sha shighe u zegecan yô, a kaa ér ior vea ‘nenge a Wan u or Una lu van sha abeen a sha kwavaôndo.’ Maa a taver mba vea lu uma ken ayange a masejime la ishima ér ve kuran. A ôr mkaanem man sha ci ve: ‘Ne fa iyange i Ter wen Una va la ga,’ shi ‘Ka hen shighe u ne ver ishima ga la je, Wan u or Una va ye.’b Lu shighe u Yesu lu pasen akaa a aa er ken ayange a masejime la, a ôr injakwagh i wanakiriki u jighjigh la ye. Sha nahan yô, se fatyô u kuren ikyaa ser, ayange a masejime yange hii ken inyom i 1914 la cii ve, mkaanem ma Yesu ôr sha kwagh u wanakiriki u jighjigh la hii u kuren ye. Se kure ikyaa nahan ka sha inja je. Sha ci u nyi?

 7. Ka mpin u injaa u nyi yange due zum u shighe u sunda hii laa, man lu nyi i na ve mpin shon due?

⁷ Hide hen ase sha mpin ne: “Ka an [jim, NW] nan lu wanakiriki u jighjigh man u fan kwagh” laa? Sha shighe u mbaapostoli la, ityôkyaa lu i pinen mpin ne ga. Er se hen ken ngeren u karen la nahan, mbaapostoli yange ve er uivande shi ve na ior iyua i icighan jijingi sha ivande, sha u tesen ér Aôndo ngu suen ve. (Aer. 5:12) Nahan kera gba u a pine a pine or u Kristu tsua nan ér nana hemen la ga. Nahan kpa, ken inyom i 1914 la yô, kera lu nahan ga. Sha ci u shighe u sunda la hii ken inyom shon. Zum la shighe kuma u paven ivor i dedoo veren kposo a ivor i bo la. (Mat. 13:36-43) Er shighe u sunda hii yô, gba u a pine mpin u injaa ne, ér: Er Mbakristu mbaaiev, mba ve sengen ér mba mbadondon mba Yesu mba mimi la ve ngee kpishi yô, a er nan ve a fa Mbakristu mba mimi, mba i shigh ve mkurem laa? Injakwagh i wanakiriki u jighjigh la na mlumun sha mpin ne. Ka mbadondon mba Kristu mba i shigh ve mkurem la lu u a na ve kwaghyan u ken jijingi ye.

 8. Hii nan ve i lu a inja u mba vea kohol a lu nongo u wanakiriki u jighjigh la cii vea lu Mbakristu mba i shigh ve mkureme?

⁸ Gba kpee u mba vea lu nongo u wanakiriki u jighjigh la cii a lu Mbakristu mba i shigh ve mkurem, ve lu shin tar yô. Aôndo yila Mbakristu mban ér “nongo u upristi mba sha inja i tor,” shi a na ve tom u ‘yôôn aeren a Na a ageegh, Un u A yila ve ken ime, A va a ve ken iwanger Na i kpiligh iyol la.’ (1 Pet. 2:9) Ka a inja er mba ve lu “nongo u upristi mba sha inja i tor” ne ve lu a tom u tesen mba ve civir Aôndo a ve imôngo la mimi nahan.—Mal. 2:7; Mpa. 12:17.

 9. Ka Mbakristu mba i shigh ve mkurem cii ve kohol ve lu wanakiriki u jighjigh la yee? Ta iwanger.

⁹ Ka Mbakristu mba i shigh ve mkurem cii ve kohol ve lu wanakiriki u jighjigh la yee? Ei. Ka mba i shigh ve mkurem la cii ve lu uwegh sha tom u karen mba ve civir Aôndo a ve imôngo sha tar cii la kwaghyan u ken jijingi ga. Mbakristu mba i shigh ve mkurem mbagen mba udiakon shin mbatamen ken atôônanongo a ve. Mba tesen ior sha uya uya man ken atôônanongo a ve, shi mba dondon gbendatesen u mbahemenev mba shin itine. Kpa mba uwegh sha tom u karen anmgbianev vev mba sha tar cii kwaghyan u ken jijingi la ga. Heela tseegh ga, kasev kpa mba ken Mbakristu mba i shigh ve mkurem mban, kpa mayange mba keren ér vea lu mbatesen ken tiônnongo ga.—1 Kor. 11:3; 14:34.

10. Ka an nan lu wanakiriki u jighjigh man u fan kwagh laa?

¹⁰ Tsô ka an nan lu wanakiriki u jighjigh man u fan kwagh laa? Er Yesu kpa yange koso ikpelaior sha ikyev i asandeaior kpuaa nahan, wanakiriki ne ka annongo u kpuaa u Mbakristu mba i shigh ve mkurem, mba ve eren kwaghyan u ken jijingi shi ve karen un sha shighe u m-ande u Kristu ne yô. Ken ayange a masejime ne cii, Mbakristu mba i shigh ve mkurem, ve kohol ve lu wanakiriki u jighjigh la mba eren tom imôngo hen ijiir yase i shin itine la. Hegen ka Mbahemenev mba Shin Itine mba Mbashiada mba Yehova ve lu wanakiriki la ye. Nahan cii kpa fa wer, Yesu yange ôr kwagh u “wanakiriki” môm tseegh ken injakwagh la, u tesen ér ka or môm ga, kpa vea kohol a lu nongo môm. Sha nahan yô, mba ve lu Mbahemenev mba Shin Itine mbara ka ve zua imôngo ve ve tsua ma kwagh u vea er ye.

11, 12. (a) Ka ityom ihiar i nyi i ne wanakiriki u jighjigh man u fan kwagh laa? (b) Ka hanma shighe Yesu yange tsua wanakiriki u jighjigh la ér a nengen un sha ya, man lu unô tsuaa?

¹¹ I na wanakiriki u jighjigh man u fan kwagh la ityom kposo kposo ihiar. Tom u hiihii yô, ér a nengen sha ya; u sha uhar yô, ér a nengen sha akaa a ter na cii. Er i lu ken ayange a masejime ne tseegh injakwagh ne i lu kuren yô, se kaa ser lu u a na wanakiriki la ityom i ihiar ne cii hen shighe u m-ande u Kristu, zum a ver un tor sha, ken inyom i 1914 kera yô.

¹² Lu hanma shighe Yesu tsua wanakiriki u jighjigh la ér a nengen un sha ya? Cii man se na mlumun sha mpin ne yô, a gba u se tôv sha kwagh u er ken inyom i 1914, shighe u sunda hii la. Er se vande henen nahan, hen shighe la iniongo kpishi senge ér mba Mbakristu. Yesu una tsua wanakiriki u jighjigh la ken hanma nongo? Yange i na mlumun sha mpin ne shighe u Yesu vea Ter na ve va sha u va nengen tempel, shin gbenda u i ser i ver sha u civir Aôndo, hii ken inyom i 1914 zan zan mhii u inyom i 1919 la.c (Mal. 3:1) Yange doo ve a annongo u Mbahenen Bibilo, u tese ér Yehova man Mkaanem nam doo un ishima sha mimi la. Nahan cii kpa, yange gba u a wanger annongo ne sha igbenda igen, annongo u Mbahenen Bibilo ne kpa hide a iyol ijime, lumun ér i kar un shi i sôr un sha anshighe kpuaa. (Mal. 3:2-4) Mbahenen Bibilo sha mimi mban lu ivor i dedoo jim jim. Ken inyom i 1919, shighe u i hide i nder ior mba ve lu mnya ken jijingi la, Yesu tsua Mbakristu mbagenev mba i shigh ve mkurem ken annongo u Mbahenen Bibilo la, mba vian ken jijingi ér ve lu wanakiriki u jighjigh man u fan kwagh la, shi wa ve ya na sha ikyev.

13. Ka unô kpa ve lu ya laa, man ka sha ci u nyi?

¹³ Nahan ka unô ve lu ya laa? Ka mba i lu koson ve la ve lu ya la ye. Shighe u ayange a masejime hii ica lu a gba ga la, ya la cii lu mba i shigh ve mkurem mbara. Shighe kar yô, ya la va wa zegeikpelaior i iyôngo igen la kpa ker. Hegen iyôngo igen la hemba ngeen ken “ikyum i môm” i Kristu a lu hemen la. (Yoh. 10:16) Iniongo i ihiar ne cii ngi zuan a kwaghyan u ken jijingi, u wanakiriki u jighjigh man u fan kwagh a lu nan sha shighe vough la. Hide Mbahemenev mba Shin Itine, mba ve lu wanakiriki u jighjigh man u fan kwagh nyian la di ye? Gba u ve ayol a ve kpa a koso ve ken jijingi. Sha nahan yô, ve hide a ayol a ve ijime, sha ci u ve fa ér hanmô ve nan ngu vegher u ya la, vough er mbadondon mba Yesu mbagenev cii nahan.

14. (a) Ka tom u nyi i ne wanakiriki u jighjigh laa, man u wa nyi man nyi kere? (b) Ka icin i nyi Yesu yange ta wanakiriki u jighjigh man u fan kwagh laa? (Nenge ngeren u kiriki u a lu a itinekwagh ér, “Aluer Wanakiriki u Bo La . . .” la)

¹⁴ Yesu na wanakiriki u jighjigh man u fan kwagh la zegetom. Sha ayange a tsuaa la, imba wanakiriki u jighjigh shin orkuranya la nan nengen sha ya. (Luka 12:42) Nahan i na wanakiriki u jighjigh man u fan kwagh ne tom u nengen sha mbananjighjigh cii. Tom ne wa u nengen sha akaa a nongo wase u lu a mi la ker, kua tom u pasen loho u dedoo man mbamkohol mba kiriki man mba vesen, man tom u gberen ityakerada i pasen ior Bibilo a mi shi henen kwagh a mi sha tseeneke wase kua ken tiônnongo. Ya la suur sha akaa a ken jijingi a nongo u wanakiriki la u lu nan la cii.

15, 16. Ka hanma shighe Yesu una wa wanakiriki u jighjigh la akaa a na cii sha ikyeve?

¹⁵ Ka hanma shighe Yesu una na wanakiriki la tom u sha uhar, u nengen sha “akaa a na cii” laa? Yesu kaa ér: “Wanakiriki u ter u nan una hide, una va kohol nan eren nahan la yô, á saan nan iyol. Mimi je M ngu kaan ne, una wa akaa a na cii sha ikyev na.” (Mat. 24:46, 47) Umbur wer, Yesu na wanakiriki la tom u sha uhar la shighe u a hidi a va kohol un “eren nahan la,” inja na yô, a va kohol un nan mba ken ya na kwaghyan u ken jijingi la vough vough. Nahan kwagh ne tese ér, hii shighe u a na wanakiriki ne tom u nengen sha ya, man u wan un akaa a ter cii sha ikyev la, shighe a war karen. Cii man se fa er Yesu una wa wanakiriki la akaa a na cii sha ikyev, kua shighe u una er kwagh ne yô, gba u se hii fan akaa ahar: gba u se fa shighe u Yesu una va la, man akaa a a lu a Yesu la.

¹⁶ Yesu una va hanma shighe? Se ôr avur a hiihii a Mateu ityough 24 tsô se zua a mlumun. Umbur wer, ken avur ne yô, ishember i Yesu una lu “van” la ngi ôron kwagh u mve u Yesu una va u va ôron ijir shi timin mbaaferev, shighe u mkurtar la.d (Mat. 24:30, 42, 44) Nahan yô, er i ôr ken injakwagh i wanakiriki u jighjigh la nahan, Yesu una ‘va’ sha shighe u zegecan la.

17. Akaa a Yesu wa nyi man nyi kere?

¹⁷ “Akaa a [Yesu] cii” wa nyi man nyi kere? Ka shin tar tseegh akaa a Yesu a lu ga. Akaa la wa akaa a sha kpa ker. A kaa ér: “Tahav mbu Sha man mbu sha won cii i wam sha ikyev.” (Mat. 28:18; Ef. 1:20-23) Hegen ne, akaa a na la wa Tartor u Mesiya. I na un Tartor ne, hii ken inyom i 1914 la je, man ka u una hemen vea mbadondon un mba i shigh ve mkurem la.—Mpa. 11:15.

18. A doo Yesu kpishi u wan wanakiriki u jighjigh la akaa a na cii sha ikyev sha ci u nyi?

¹⁸ Nahan se kure ikyaa ser nyi? Se kure ikyaa ser, zum u Yesu una va sha u timin mbaaferev sha shighe u zegecan la, una nenge er wanakiriki u jighjigh a lu nan ya la kwaghyan u ken jijingi sha shighe vough vough yô. Nahan a doo Yesu kpishi u nan wanakiriki la tom u sha uhar la, ka tom u nengen sha akaa a na cii je la. Yesu una wa akaa a na cii sha ikyev i mba ve kohol ve lu wanakiriki u jighjigh la, shighe u vea ngohol iyua ve sha, vea lu hemen vea Kristu la.

19. Wanakiriki u jighjigh la una hemba ngohol iyua a mbagenev mba i shigh ve mkurem laa? Ta iwanger.

¹⁹ Wanakiriki u jighjigh la una hemba ngohol iyua a mbagenev mba i shigh ve mkurem laa? Ei. Aluer i tôndo zwa u nan ma annongo u kpuaa iyua yô, mbagenev mba ve lu her hen shighe la ga kpa vea fatyô u va zuan a iyua shon. Ikyav i tesen yô, time ase sha kwagh u Yesu ôr a mbaapostoli mba 11 hen tugh mbu kpernan i wua un la. (Ôr Luka 22:28-30.) Yesu tôndo zwa a ve ér una na ve iyua injaa sha ci u jighjigh ve u nan. Vea tema tor a na imôngo sha. Kpa anyom nga kar yô, a pase wener mba 144,000 mbara cii vea tema tor a na imôngo sha. (Mpa. 1:1; 3:21) Nahan er i pase ken Mateu 24:47 nahan, kape un kpa a tende zwa ér una wa annongo u kpuaa la akaa a na cii sha ikyev je la. Annongo la ka Mbakristu mba i shigh ve mkurem, ve kohol ve lu wanakiriki u jighjigh la je la. Jighilii yô, mba 144,000 cii vea lu a tahav mbu nengen sha akaa a Kristu cii a na imôngo.—Mpa. 20:4, 6.

20. Yesu yange tsua wanakiriki u jighjigh la sha ci u nyi, man u kange ishima u eren nyi?

²⁰ Er Yesu a lu koson se sha ikyev i wanakiriki u jighjigh man u fan kwagh yô, ngu dondon ikyav i yange ver shighe u lu shin tar la, yange koso ikpelaior sha ikyev i asandeaior kpuaa. Yesu yange tsua wanakiriki u jighjigh la ér a naan mba ve lu dondon un sha mimi ken ayange a masejime mbara cii kwaghyan u ken jijingi sha shighe vough, sha er vea lu ijen ken jijingi ga yô, vea lu mba i shigh ve mkurem shin vea lu iyôngo igen kpaa. Yô, se kange nen ishima u tesen ser se mba a iwuese sha kwagh ne, sha u suen anmgbianev mba i shigh ve mkurem, ve kohol ve lu wanakiriki u jighjigh man u fan kwagh la sha mimi.—Heb. 13:7, 17.