Mbampin mba Mbaôron Takerada Ne Ve Pin La

I nger ahon a yange i gba sha kwagh u mkurem ma taver ishe ma yange i shighe Yesu la ke’ Ivangeli itiar. Yange lu mbaapostoli kpishi ve gba ahon yee, shin yange lu di Yuda tseeghele?

I nger kwagh ne ke’ Ivangeli i sha ikyev i Mateu man Marku man Yohane la. Ka inja er Yuda yange due ityough sha ahon a gban la, man abunde kera kera kpa mbaapostoli mbagenev yange ve lumun a na nahan. Kwagh ne ka ikyav i tesen e̱r i hii ve i doo u se wuese er se lu a ngeren mba Ivangeli unyiin yô. Akaa a yange hanmô ve nan ger la cii lu vough, kpa ka á cii a ôr hanma kwagh inja i môm vie vie ga. Aluer se tôô akaa a mbagen ke’ a ve yange ve nger la se kar sha akaa shon a mbagenev di kpaa yange ve nger la yô, se hemba nengen tsembelee er yange akaa kpishi lu zan hemen la vindi vindi.

Ngeren u ke’ Mateu 26:6-13 la pase ijiir shon i kwagh la yange er yô—lu hen ya u Shimon, orimande la, ke’ Betani—kpa a kera ter iti i kwase u yange va, lu va haan Yesu mkurem ma humandoon sha ityou la ga. Mateu nger ér: “Kpa er mbahenen Nav nenge nahan yô, asema vihi ve,” nahan ve gba ahon ér yange ma i tee mkurem mara ma i yam inyaregh ma i na mbaatsanev. (Ka se se nger i yier ye.)

Ngeren u Marku di hemba ngun a akaa vie vie ker. Kpa shi a seer ér yange kwase la hembe gber shon. Yange mkurem lu kimi mà má lu “nardu jim,” imba i alaghga yange í za va a mi ke’ India yô. Sha kwagh u ahon shon a i gba la yô, Marku nger ér “mbagenev asema vihi ve,” shi “ishima vihi ve a na kpishi.” (Marku 14:3-9, ka se se nger i yier ye.) Nahan ngeren mba uhar mbara tese ér yange lu apostoli môm tseegh nan gba ahon ga. Nahan kpa, kwagh shon yange hii nena?

Yohane u yange nenge kwagh shon sha ashe na la seer pasen avurakaa agenegh. A yila iti i kwase shon—ér lu Maria, anngô u Marta man Lasaru. Shi Yohane seer ivurkwagh igen i injaa, i̱ se tôô ser i̱ wa a wa akaa agenegh la inya tine, i̱ nyiman a nyiman á ga yô. A nger ér: “A shighe Yesu ma shin angahar, shi a ese Un angahar sha ice na.” (Ka se se nger i yier ye.) Aluer se kohol ngeren mban cii ijiir i môm yô, se kav ser a̱ shi nan kpa yange Maria shighe Yesu mkurem ma Yohane kpa a lumun ér yange ma lu “nardu jim” la sha ityou kua shin angahar kpaa. Yohane yange lu a Yesu ikyooso kyooso, shi ver ishigh u ishima ia ngôôr vihin un shighe u i lu lahan Yesu ga. I nger nahan ér: “Yuda Isekarioti, orhenen Na ugen, u una va nenge mker sha a Na la, kaa er: Ka nyi man i tee mkurem man i yam sule deri utar i ne mbaatsanev ga?”—Yohane 12:2-8.

Yuda yange lu “orhenen Na ugen” mimi, kpa ú fatyô u kaven ishimavihin i Yohane sha er or u lun sha imba ian ngin nahan nana lu wan ke’ ishima u nengen mker sha Yesu yô. Orgeman mkaanem Ikpurorfantakerada C. Howard Matheny yange wa zwa sha ngeren u ke’ Yohane 12:4 la nahan ér: “Ishember i pasen m-er u kwagh, i i kaa ér ‘una va’ [shin, “lu nôngon u”] man ishember i pasen kwagh u á lu a̱ kure ga i i kaa ér “una va nenge mker” [shin, “lu nôngon u nengen mker”] la cii tese kwagh u a lu zan sha adondo adondo, shin kwagh u a lu eren zan hemen her ave yô. Kwagh ne tese ér mnenge u Yuda yange nenge Yesu mker la, yange lu kwagh u a gba moughon gaagh tsô eren abu ga, kpa lu kwagh u a vande timen sha mi shi wan ago iyol sha mi ayange imôngo yô.” Yohane shi seer tan iwanger ér Yuda yange gba ahon “kpa lu sha ci u a wa mbaatsanev iko ga, kpa lu sha ci u un lu ormbaiv yô, man er a tilin ikpanyar yô, a dughun kwagh u i we kimi la.”

Nahan a fatyô u kaan ér ka Yuda ormbaiv la yange hii ahon a gban la ye, sha ci u aluer yange á tee mkurem ma taver ishe mara á we inyaregh kira shin ikpanyar i yange tilin la yô, yange ma hemba zuan a inyaregh ki una ii yô. Kpa alaghga yange Yuda hiin gban ahon yô, mbaapostoli mbagenev kpa gba unugh shin ikyer sha kwagh u yange ve nenge ér ka kwagh u vough yô. Nahan cii kpa, ka Yuda jighilii yange va a ahon a gban la ye.