“Va Dondo Sha A Mo”

“Aluer anti or a sar nan pe van a Mo ityô yô, nana̱ nyiman iyol i nan, nana̱ tôô [kon u mtsaha] u nan ayange ayange, nana̱ dondo sha a Mo.”—LUKA 9:23.

 1, 2. (a) Yesu yange lôhô hanmaor ér nana er nyi? (b) Ú vengese mlehe u Yesu la nana?

SHIGHE u zurum u Yesu una kure tom na u pasen kwagh shin tar la, lu pasen kwagh ken tiôntar u Perea, u a lu Yordan yande la, ka vegher u sha ityoughkitaregh ki imbusutarimese i tar u Yudia je la. Tsô wanyekwaor ugen va pine un kwagh u una er ve una zua a uma u tsôron yô. Yesu kaven er wanyekwaor la lu kuran Tindi u i na Mbaiserael sha Ikyev i Mose la a ishima i môm yô, a kaa a na ér: “Za, za tôô akaa a u lu a mi la cii, tee, na mbaatsanev, nahan wea lu a kwagh u injaa Sha; yô, va dondo sha a Mo.” (Mar. 10:21) Nenge ase yôô, i lôhô wanyekwaor la ér, a dondo sha Yesu, Wan u môm môm u Aôndo Uhembansha u la!

² Wanyekwaor la venda u dondon sha Yesu, nahan kpa, mbagenev dondo sha a na. Yesu vande kaan a Filibu ér: “Dondo sha a Mo.” (Yoh. 1:43) Filibu dondo sha a na, shi va hingir apostoli kpaa. Yesu shi lôhô Mateu ér a dondo sha a na, un kpa vengese. (Mat. 9:9; 10:2-4) Jighilii yô, Yesu lôhô hanma or u perapera a doo nan ishima cii ér nana dondo sha a na. A kaa ér: “Aluer anti or a sar nan pe van a Mo ityô yô, nana̱ nyiman iyol i nan, nana̱ tôô [kon u mtsaha] u nan ayange ayange, nana̱ dondo sha a Mo.” (Luka 9:23) Nahan yô, antior u i sar nan u dondon Yesu sha mimi cii nana fatyô. Sar ú u dondon Yesu kpa? Se mbagenev kpishi se lumun u dondon Yesu, shi se mba lehe mbagenev ken tom wase u pasen kwagh la ser, ve kpa ve va dondo un.

 3. Se er nan ve se kuwa se kar ihyongo se de u dondon Yesu ga?

³ Kwagh ka a er i vihi yô, mbagenev mba yange ve tese isharen sha mimi u ken Bibilo la kera za hemen ga. Ve gba uwer, ve hide ijime zan zan ve “kuwa ve kar ihyongo,” nahan ve de u dondon Yesu. (Heb. 2:1) Se palegh hôn ne nena? Aluer se mba pinen ayol a ase mbampin mban yô, vea wase se: ‘Yange m tsua u dondon Yesu sha ci u nyi? Inja i u dondon Yesu ér nyi?’ Aluer se hen sha mbamlumun mba sha mbampin mba uhar mban yô, kwagh la una wase se se kange ishima se za hemen u zan sha gbenda u dedoo, u u ze ken uma u tsôron la. Shi kwagh la una wase se u taver mbagenev asema u dondon Yesu kpaa.

Doo u Se Dondo Yesu sha ci u Nyi?

 4, 5. Yesu kuma u hemen sha ci u nyi?

⁴ Profeti Yeremia ngise kaa ér: “TERE, m fa, gbenda u or ngu sha ikyev i nan ga; or u zenden la, mvershigh u iaven i angahar a nan ngu sha ikyev i nan ga.” (Yer. 10:23) Akaa a a er anyom imôngo hegen ne tese mimi u mkaanem ma Yeremia man. Ikyav tese wanger wanger ér uumace mba ve yen ne vea fatyô u hemen ayol a ve sha inja ga. Se lumun myer u Yesu a yer se ér se dondo sha a na la sha ci u se fa ser, a kuma u lun Orhemen wase sha gbenda u orumace môm nana fatyô u lun ga yô. Nenge ase akaa a a ne ve Yesu a kom u hemen yô.

⁵ Hiihii yô, lu Yehova iyol na tsua Yesu ér a lu Mesiya, Orhemen ye. Ka an je nan hembe fan or u nan kom u a tsua nan ér nana lu Orhemen wase a hemba Orgban wase sha wono? Kwagh u sha uhar yô, Yesu ngu a aeren aa a doo se ishima shi se fatyô u dondon yô. (Ôr Yesaia 11:2, 3.) A ver se ikyav i vough. (1 Pet. 2:21) Kwagh u sha utar yô, mbadondon mba Yesu cii doo un ishima tsung, ka nahan ve yange na uma na sha ci ve ye. (Ôr Yohane 10:14, 15.) Shi Yesu tese ér un ngu orkuranilev u dedoo, gadia ngu kuran se sha u se zua a uma u una va se a msaanyol shi una za a vese ken iengem i tsôron i ken hemen la. (Yoh. 10:10, 11; Mpa. 7:16, 17) Atôakaa ne man agen na yô, se er kwagh sha kwaghfan se tsua u dondon Yesu. Nahan kpa, u dondon Yesu la wa nyi man nyi kere?

 6. U dondon sha Yesu la wa nyi man nyi kere?

⁶ U se lun mbadondon mba Kristu la hemba di u kaan ér se mba Mbakristu tseegh tsô la. Nyian ne, ior mba kuman er biliôn uhar nahan ka ve senge ér ve mba Mbakristu, kpa aeren a ve a gema a tese ér mba “mbavendanatindi.” (Ôr Mateu 7:21-23.) Ior ka vea tese isharen i dondon Yesu yô, se pase ve ser, aeren a Mbakristu mbamimi jimin cii, a ve eren ayange ayange la har sha atesen a Yesu kua ikyav i dedoo i a ver se la. Ikyav i tesen yô, time sha akaa agen a se fe Yesu a mi la.

Dondo Ikyav i Kwaghfan u Yesu La

 7, 8. (a) Kanyi i lu kwaghfana, man er nan ve Yesu a ngee a kwaghfan yumu? (b) Yesu yange tese kwaghfan nena, man se fatyô u dondon un nena?

⁷ Yesu tese aeren a dedoo kpishi a a dugh ken igbar yô, kpa sé gema se time sha aeren anyiin tseegh. Aeren shon yô: ka kwaghfan man iyol i hiden a mi jime man gbashima kua dooshima na je la. Hiihii yô, time sha kwaghfan u Yesu la, a fa u yaren tom a mfe man mkav sha gbenda u doon kpishi. Apostoli Paulu nger ér: “Ka ken [Yesu] man i yer akaa a injaa cii a sha kwaghfan man mkav kpaa ye.” (Kol. 2:3) Yesu zua a imba kwaghfan la hana? Yesu iyol na kaa ér: “M er akaa er Ter A tesem yô.” (Yoh. 8:28) Ka Yehova a ne Yesu kwaghfan ye, nahan kpiligh se iyol er i hii ve Yesu a fe u tsuan akaa a una er a uma na sha kwaghfan nahan ga.

⁸ U tesen ikyav yô, Yesu yange tsua kwagh u una er a uma na yô sha kwaghfan. Yange tsua u lun uma akuma akuma, geman veren ishima sha kwagh môm tseegh, ka u eren ishima i Aôndo je la. Yange er tom a shighe kua agee a na sha kwaghfan sha u vanden keren Tartor. Se mba dondon ikyav i Yesu la sha u veren ‘ishe yase dedoo,’ nahan kera keren akaa a vihin se shighe shi danen se la ga. (Mat. 6:22) Mbakristu kpishi nyôôso mbamlu vev sha er vea seer eren tom u pasen kwagh la yô. Mbagenev mba eren tom pania. Aluer we kpa u ngu eren tom u pania yô, se wuese we kpishi. Aluer se mba ‘vanden keren Tartor’ yô, se zua a msaanyol man mkom kpishi.—Mat. 6:33.

Hiden a Iyou You Ijime er Yesu Nahan

 9, 10. Yesu yange hide a iyol na ijime nena?

⁹ Ieren i sha uhar i uma u Yesu i se time sha mi yô, ka iyol i hiden a mi ijime na la. Uumace mba ve yen ne ka vea zua a tahav yô, ve tese ér ve hemba mbagenev. Kpa Yesu yô, lu nahan ga! Shin er lu sha iantom i hemban cii i kuren awashima u Yehova nahan kpa, mayange mor iyol ga. Shi i wa se kwagh ér se dondo ieren na i kehen ityough ga la. Apostoli Paulu nger ér: “Lu nen a mhen ne ken a ven u a lu ken Kristu Yesu la kpaa. Un u A lu ken mlu u Aôndo la A nenge er mlu u lun kwagh môm a Aôndo la lu kwagh u yan ishar sha mi ga yô, kpa A gema iyol Na hingir gbilin er A tôô mlu u ortom, A hingir kwagh môm a ior la.” (Fil. 2:5-7) Kwagh ne wa nyi man nyi kere?

¹⁰ Yange saan Yesu iyol tsung u lun sha vea Ter na, nahan kpa “gema iyol na hingir gbilin” a mkighir shio. Sha nahan yô, i gema uma na i wa ken iyav mbu iniunkwase i ken Mbayuda, a vese kimi zan zan ka kom iwer i itiankarinyiin yô, i mar un lu ankyundan u forototo ken ya u orkapinta ugen u lu a kwagh ave ga yô. Yesu yange vese ken ya u Yosev kure kure zan zan va hii u tôôn angahar shi va kuma u zan ityom, shi hia or. Yange lu a isholibo iyol ga. Nahan kpa, shighe u Yesu lu iyev la jimin cii, lu sha ikyev i mbamaren nav mba ve lu uumace mbaasorabo la. (Luka 2:51, 52) Nenge imba er yange hide a iyol na ijime la sha wono!

11. Se dondo iyol i hiden a mi ijime i Yesu la sha nyi igbenda?

¹¹ Se tese ser se mba dondon ieren i Yesu i hiden a iyol ijime la sha u eren ityom i i lu inja er ka i injaa ga la. Ikyav i tesen yô, nenge ase tom u i we se ér se pase loho u dedoo ne. Alaghga a lu inja er tom ne ka u injaa ga nahan, hemban je yô, shighe u ior ve soo u ungwan loho wase ga la shin ve lu nahan se tar shin ve lu eren tswam a vese la. Kpa aluer se taver ishima ken tom u pasen kwagh yô, se wase mbagenev vea dondo Yesu. Nahan se wase u waren uuma mba iorov. (Ôr 2 Timoteu 4:1-5.) Ikyav igen yô, ka u sôron Iyou i Tartor yase. Tom ne wa u haan ihyôghonov kera man u ôôn hen inya shi kiren ahungwa, ityom ne cii ka i ior ve nengen ér ka i injaa ga yô. Nahan kpa, se fa ser u veren ishima sha Iyou i Tartor i i̱ lu ijiir i civir Aôndo u mimi, i i lu hen haregh wase la ka vegher u mcivir wase. Aluer se mba eren ityom i i lu er ka i injaa ga la a mkighir shio yô, se mba ior mba hiden a ayol a ase ijime, shi tesen ser se mba kaven Kristu kpaa.

Lu a Gbashima sha Tom u Pasen Kwagh Er Yesu Nahan

12, 13. (a) Yesu yange tese gbashima ken tom u pasen kwagh nena, man lu nyi i mgbegha unu? (b) Kanyi ia mgbegha se u eren tom u pasen kwagh ne sha gbashima?

¹² Nenge ase er Yesu yange lu a gbashima sha tom u pasen kwagh yô. Yesu yange er akaa kpishi shighe u lu shin tar la. Shighe u Yesu lu iyev la, a shi nan kpa er tom u orkapinta vea ter ikyoson na Yosev. Shighe u Yesu lu eren tom na shin tar la, er uivande,bee ior angev shi nder mbakpenev kpaa. Nahan kpa, tom na jighilii yô, lu u pasen loho u dedoo shi tesen mba ve kegh ato a na la. (Mat. 4:23) Er se lu mbadondon nav yô, ka tom shon môm se kpa se eren ye. Se dondo ikyav na la nena? Se kpa se fatyô u lun a atôakyaa a Yesu lu a mi ve lu a gbashima sha tom u pasen kwagh la.

¹³ Kwagh u hemban cii yô, mdoo u Aôndo doo Yesu ishima la yange mgbegha un u pasen ior loho u dedoo shi tesen ve kpaa. Mimi u Yesu tesen la doo un ishima. Yesu yange nenge mimi la ér ka kwagh u injaa tsung, nahan maa un iyol u pasen mbagenev akaa shon. Er se lu mbatesen yô, kape se kpa mimi mba se tesen ior la ve doo se je la. Hen ase sha mimi mba doon tsung mba se hen ken Mkaanem ma Aôndo la! Se fa kwagh u or u nan kom u hemen sha won cii la, shi se fa er ikyaa shon ia za a kure yô. Se fa kwagh u Ruamabera a tese sha mlu u mbakpenev man averen a Aôndo una va a mi ken tar u he la tsembelee. Sea sember fan mimi mban shin sea fa ve ica a gba kpa, mayange vea ya tsegh ga. (Ôr Mateu 13:52.) Ka sea pasen ior loho u dedoo a ishima i môm yô, se lu tesen mbagenev ser, mimi mba Yehova a tese se la doo se ishima.

14. Se dondo gbenda u Yesu tesen ior la nena?

¹⁴ Shi nenge ase gbenda u Yesu tesen ior la. Yange tesen ior ken Ruamabera hanma shighe cii. Yange hemban hiin kwaghôron na sha u kaan ér: “I nger ér.” (Mat. 4:4; 21:13) Akaaôron a Yesu a i nger la tese ér, ashighe kpishi yange a ôr mkaanem ma ken Ruamabera u ken Zwa Heberu la jighilii gayô a ôr kwagh a gber sha ma. Se kpa se mba suur sha Bibilo a ishima i môm ken tom wase u pasen kwagh la vough er Yesu kpa eren nahan. Heela tseegh ga, ka se nôngo u ôron ivur Ruamabera shighe u i gbe i doo yô. Ka sea er nahan yô, se wase mbaasemaamimi ve fa er se lu tesen ve mbamhen asev ga, kpa i lu mba Aôndo yô. Or ka nana lumun u ôron Bibilo shi pasen er Mkaanem ma Aôndo ma lu a inja kua kwagh u ma er nahan i saan se iyol kpen kpen. Shi ambaaior la ka vea lumun u dondon Yesu yô se ember kpishi.

Se Dondo Yesu sha u Soon Mbagenev

15. Ka ieren i Yesu i nyi i hembe duen tseer tseeree, man u timen sha mi la una bende a vese nena?

¹⁵ Ieren i Yesu i se mase timen sha mi la ka i hemban doon cii, ieren shon yô, ka mdoo u uumace ve doo un ishima la. Apostoli Paulu nger ér: “Dooshima u Kristu ngu mgbeghan se.” (2 Kor. 5:14) Ka sea hen er uumace cii ve doo Yesu ishima shi se asange asange kpa se doo un ishima nahan, kwagh la a kôr se ken ishima, nahan se kpa se soo u dondon ikyav na i dooshima la.

16, 17. Yesu yange tese ér mbagenev doo un ishima nena?

¹⁶ Yesu yange tese mbagenev dooshima nena? Yange tese dooshima ne sha gbenda u hemban cii, gadia a na uma na sha ci u ior cii. (Yoh. 15:13) Nahan kpa, shighe u lu eren tom u pasen kwagh shin tar la kpa tese dooshima sha igbenda igen. U tesen ikyav yô, mhôônom yange ma kôr un a mba ve lu yan ican la. Shighe u Yesu nenge Maria man mba ve lu a na ve lu vaan ku u Lasaru yô, kunya kôr un kpishi. Er lu a tahav mbu nderen Lasaru nahan kpa, yange sôr un ken ishima, tsô a “vaa.”—Yoh. 11:32-35.

¹⁷ Shighe u Yesu hii tom na u pasen kwagh shin tar la, orimande ugen va her a na, va zamber a na ér: “Aluer Wea rumun yô, U fatyô u wanger mo.” Nahan Yesu er nena? Ngeren la kaa ér: “Mhôônom kôr Un.” Nahan Yesu er kwagh u kpiligh iyol, “A naregh uwegh, A bende un iyol, A kaa a na er: M rumun, i̱ wanger we. Nahan imande maa bee un fese, a hingir wanger wanger.” Tindi u Mose yange tese ér mbaamandev cii mba wang ga, nahan lu u Yesu ma bende un uwegh iyol ga, kpa ma bee un imande na la. Nahan kpa, Yesu ngur wanger or ne imande yô, a soo ér or shon a kar benden iyol a or a nenge, alaghga je yô, lu hiin je orimande la una bende orgen uwegh iyol je la. Nenge imba ieren i sha mhôôn i sha dooshima ne la sha wono!—Mar. 1:40-42.

18. Se tese ser se mba “mbazungwenmhôônom” nena?

¹⁸ Er se lu mbadondon Yesu yô, gba u se tese ser mbagenev doo se ishima sha u lun “mbazungwenmhôônom.” (1 Pet. 3:8) Alaghga a taver se u kaven ican i ma anmgbian u nan lu a icôronuange nan lu yan shin a taver se u kaven er ishima i ze nan iyol tsung yô, hemban je yô, aluer se mba a vande yan imba ican la ga yô. Shin er Yesu lu a vande gban angev ga nahan kpa, zungwen mbauangev mhôônom. Se er nan ve se lu a mhôônom ma zungwen er Yesu nahana? Se er kwagh ne sha u wan ishima, keghen ato a mba ve lu yan ican la, shighe u ve lu ôron se mbamzeyol vev la. Heela tseegh ga, se fatyô u pinen ayol ase ser, ‘Aluer ka mo m lu yan ican ne nahan, a lum nena?’ Aluer kwagh gba se sha atsan a mbagenev ve lu yan la yô, se hemba ‘taver mba ve yen ishima la asema.’ (1 Tes. 5:14) Aluer se er nahan yô, se tese ser se mba dondon Yesu.

19. Ikyav i Yesu la bende a vese sha nyi igbenda?

¹⁹ Sha mimi yô, akaaôron man aeren a Yesu a se hen ne doo se kpen kpen! Aluer se mba timen sha akaa ne yô, a hemba saren se u lun er Yesu nahan, shi ishima ia hemba mgbeghan se u wasen mbagenev sha er ve kpa vea lu er un nahan. Nahan yô, se nôngo nen sha afatyô wase cii se dondo nen Tor Mesiya hegen zan zan gbem sha won.

U Fatyô u Pasen Kpa?

• Se er nan ve se lu a kwaghfan er Yesu nahana?

• Ka sha igbenda i nyi nahan se tese iyol i hiden a mi ijime?

• Kanyi ia wase se u lun a gbashima ken tom u kwaghpasene?

• Se dondo ikyav i Yesu sha u soon mbagenev sha nyi igbenda?

[Ngeren u kiriki/Foto peeji 5 la]

TAKERADA U U WASE SE U KAVEN KRISTU YÔ

Yange i due a takerada u he, u lun peeji 192 ken zwa Buter sha mkohol u vesen u inyom i 2007 la, mba yer u ér “Come Be My Follower.” I gber takerada ne sha u u̱ wase Mbakristu u henen kwagh u Yesu, hemban je yô, aeren a na. Ityough ki hiihii man ki sha uhar ki takerada ne ki ôr kwagh u Yesu, ngi been yô, vegher u hii la sav aeren a Yesu a tseer tseer la, er ieren na i hiden a iyol ijime la, man gbashima na, man kwaghfan na, kua ishimawan na nahan.

Kwagh ugen yô, takerada ne ngu a avegher kimi aa er kwagh u tom u Yesu u ortesen, man u or u pasen loho u dedoo, kua igbenda igen i á tese dooshima u vesen yô. Akaa a i er ken takerada ne cii ka u wasen Mbakristu sha er vea dondo Yesu yô.

Se na jighjigh ser, takerada u he ne ua mgbegha hanma wase nana pine iyol i nan ér: ‘M ngu dondon Yesu sha mimi kpa? Me hemba dondon sha a na nena?’ Shi Takerada ne ua wase “mba i ver ve sha u ve̱ zua a uma u tsôron yô,” vea hingir mbadondon mba Yesu.—Aer. 13:48.

[Foto u sha peeji 4]

Yesu lumun u van shin tar, ape i mar un lu wanikyundan la. Ka ieren i nyi yange gba u una lu a mi ve una er kwagh nee?

[Foto u sha peeji 6]

Kanyi ia mgbegha se ve se lu a ishimatseen sha tom u pasen kwagha?