“Nenge, Mo Kpankwase u Ter, M Ngun”

1, 2. (a) Orvannya ugen yange sugh Maria nena? (b) Ka kwagh u vesen u nyi yange gba u Maria una eree?

MARIA aver zwa lu kenger er orvannya ugen lu nyôron hen ya ve yô. Orvannya ne pine Maria mbamaren nav ga. Lu Maria va un inya ye! Maria fa er or ne lu or u ken Nasareti ga yô. Er gar ve ne kehe ga yô, ve fa ayol a ve, nahan vea nenge a or u he yô ve fa fele. Nahan cii kpa, orvannya ne yô, mluashe na kaha kposo. A sugh Maria ishughun i or lu a vande sughun un ga yô. A kaa ér: “Mba sughun we, we u i lumun we sha mhôôn tsung ne, Ter ngu a we.”—Ôr Luka 1:26-28.

² Ka gbenda u Bibilo i hii ôron se kwagh u Maria, wan u Heli u ken gar u Nasareti u ken Galilia je ne. I hii ôron se kwagh na ken Bibilo hen shighe u gba u una er kwagh u vesen ken uma na yô. Yosev lu sôôr un una vôso; Yosev lu orkapinta, lu a inyaregh kpishi ga, kpa gema lu orjighjigh. Maria fa je ér un ngu vôson ornyar ga, nahan una lu a kwagh ave ga, kpa una gema a lu kwaseya u suen nom na Yosev, shi nengen sha tsombor na imôngo a nom na. Lu hen shighe ne or ne va un inya ye. Aôndo u Maria civir la tindi orvannya ne ér a va pase Maria tom una er yô, lu tom u ua gema uma na yô.

3, 4. Aluer se soo u fan kwagh u Maria yô, ka atesen a nyi i gbe u se fa a keng keng ga, kpa ka nyi i gbe u se time sha mini?

³ Ka i kpiligh ior kpishi iyol er i hii ve Bibilo i er kwagh u Maria kpishi ga yô. i ôr kwagh u iyev mbu Maria man ieren na cuku tseegh, man gema mluashe na yô, i ôr kwagh sha mi ga kuaa. Nahan kpa, kwagh u Mkaanem ma Aôndo ma er sha kwagh na la wase se u fan un tsembelee.

⁴ Aluer se soo u fan kwagh u Maria vighe vighe yô, a gba u se fa akaa a ukwaghaôndo kposo kposo ve tesen ior vev sha kwagh u Maria la keng keng ga. Nahan se lu timen sha akaa a i tesen sha kwagh u Maria ken ufoto man akaakperan shin a maan a maa la ga. Shi se time sha uzegembaatiiv mba ukwaghaôndo ve ne kwase u hiden a iyol ijime ne, er “Ngô u Aôndo” man “Torkwase u Sha” la nahan ga. Kpa se time sha kwagh u Bibilo i er sha kwagh na jim jim yô. i pase se akaa a doon kpishi sha kwagh u jighjigh u nan u Maria man er se kav un yô.

 5. (a) Kwagh u Maria er shighe u Gaberiel va sugh un la, wase se u fan nyi sha kwagh naa? (b) Ka ityesen i injaa i nyi se fatyô u zuan a mi hen Maria?

⁵ Orvannya u Maria ne gba lun or tsô ga. Lu ortyom Gaberiel. Zum u sugh Maria ér “we u i lumun we sha mhôôn tsung” la, ‘ishima ta Maria kwe kpishi’ sha kwaghôron ne, nahan gba henen inja ishughun ne, gadia or lu a vande sughun un nahan ga. (Luka 1:29) Lu an nan lumun un sha mhôônô? Maria yange fa ér uumace vea lumun un sha imba gbenda ne ga. Ortyom ne lu ôron kwagh u mlumun u sha mhôôn u Yehova Aôndo. Lu kwagh u hemba lun Maria a inja je ne. Nahan kpa Maria kende a iyol na sha, tôô ken ishima na ér Aôndo lumun un je ve ga. Ikyav i Maria ne tese se ér doo u se nôngo kpoghuloo sha u Aôndo a lumun se yô, mayange se kenden a iyol sha, se henen ser a vande lumun se kera ga. Aôndo hendan kwagh a mba ve gengese ayol a ve la, kpa mba ve hir a ayol a ve ijime la yô, ve doo un ishima shi ka a wase ve kpaa.—Yak. 4:6.

 6. Ka tom u icivirigh u nyi ortyom yange na Maria?

⁶ Yange gba u Maria una hide a iyol ijime, gadia lu tom u icivirigh ortyom la na un ye. A kaa a na ér una mar wan, wan la una lu or u hemban gban kwagh a hanma orumace ugen cii. Gaberiel kaa ér: “Ter Aôndo . . . Una na Un ikyônough ki torough ki Ter Na Davidi. Una lu tor ken ya u Yakob gbem sha won; tartor Na kpaa ua bee mayange ga.” (Luka 1:32, 33) Maria fa ityendezwa i Aôndo er a Davidi anyom kar hemba dubu môm ér wan na una tema tor gbem sha won la. (2 Sam. 7:12, 13) Nahan lu u wan na la una lu Mesiya u ior mba Aôndo lu veren ashe a na uderimbaanyomov imôngo la!

 7. (a) Mpin u Maria pine la pase nyi sha kwagh naa? (b) Agumaior nyian aa fatyô u henen nyi hen Maria?

⁷ Heela tseegh ga, ortyom la shi kaa a na ér a yilan wan na la ér “Wan u Uhembansha.” A er nan ve kwase u nan lu orumace nahan nana mar Aôndo wana? Sha mimi yô, a er nan man Maria una mar wan sha wono? Gadia Yosev lu sôôr un, kpa lu a vôso un ga. Nahan Maria pine ortyom la mpin ne jighilii ér: “Á er nan man kwagh ne una ere, gadia m ngu a fa nom ga?” (Luka 1:34) Aluer u nenge yô, kunya kôr Maria u ôron kwagh u iniuun na cuku ga. Iniuun na la lu un zege kwagh u numben a mi ga. Nyian ne, ka i sase agumaior kpishi iyol u vihin iniuun ve, shi mba ve lu a vande yaven a or ga la kpa i gema i nahan ve a naha tar. Sha kpôô yô, tar gema. Kpa Yehova yô, gema ga. (Mal. 3:6) Nyian ne kpa, mba ve kor atindi a na sha kwagh u aeren a dedoo la doo un ishima, vough er sha ayange a Maria la nahan.—Ôr Mbaheberu 13:4.

 8. Er Maria yina nahan kpa, lu u una mar wan u lun a myen shio nena?

⁸ Shin er Maria civir Aôndo sha mimi nahan kpa, yange yina. Nahan a er nan man una mar Wan u Aôndo una lu a myen ga? Gaberiel pase ér: “Icighan Jijingi Una sen sha a we, man agee a Uhembansha la kpaa aa kase u; ka sha ci u nahan man Un u á mar Un la á yilan Un er Icighanwan u Aôndo ye.” (Luka 1:35) Icighankwagh ka kwagh u a lu “wang” a “acôghor shio” yô. Orumace ka nana mar wan yô, wan la nan due a isholibo. Kpa sha kwagh u Maria yô, Yehova una er ivande i kpilighyol. Una wa uma u Wan na ken iyav mbu Maria, maa icighan jijingi na una “sen” sha Maria, nahan jijingi la una kura wan la sha er isholibo ia bende a na ga yô. Maria yange na ityendezwa i ortyom la jighjigh kpa? Yange kaa a ortyom la ér nyi?

 9. (a) Kwagh u i taver mbanyimanakaa u nan jighjigh a kwagh u Maria la, ka shami ga sha ci u nyi? (b) Gaberiel yange seer taver jighjigh u Maria nena?

⁹ Taver mbanyiman ivande ne man mbatimen sha kwaghaôndo mba ken kwaghaôndo u aiegh kpishi u lumun ér iniunkwase ia fatyô u maren wan. Er amba ne a fe takerada kpishi nahan kpa, ve fatyô u fan mimi u a taver ga ne ga. Gaberiel pase mimi shon ér, “ma kwagh môm u a hembe Aôndo u eren un yô, ngu ga.” (Luka 1:37) Maria lumun a mkaanem ma Gaberiel man, gadia un lu gumkwase u lun a jighjigh kpishi. Nahan kpa, jighjigh na la lu u gban lumun hanma kwagh tsô ga. Maria yange soo ér i tese un ikyav i ia wase un u nan jighjigh yô, vough er hanma or u lun a mkav kpa nana er nahan. Gaberiel kpa yange kegh iyol u pasen Maria akaa seer sha akaa a mimi a Maria vande fan la. A ôr un kwagh u Elisabetu, anmgbian na u kwase u vesen, u ior hen ér ngu ikyômkwase yô. A kaa a na ér Aôndo er ivande nahan Elisabetu ngu iyav!

10. Er nan ve i doo u se gba henen tsô ser ican lu ken tom u i na Maria la ga shi kwagh kpa lu sha mi u una cia ga ze?

¹⁰ Tsô Maria er nena? I ôr Maria tom u una er yô, shi i na un ikyav i tesen ér Aôndo una er hanma kwagh u Gaberiel ôr un la. Doo u se gba henen tsô ser Maria lumun u eren tom ne a mciem shin ican shio ga. Hiihii yô, yange una lu henen kwagh u shiôr na Yosev. Aluer Yosev va fa er un lu iyav nahan shi una lumun u vôson un kpa? Shi kwagh ugen yô, tom la kpa lu u kiriki ga. Lu u una kura uma u Wan u Aôndo u ishima ishima, u lu or u hemban doon Aôndo ishima cii la. Una nenge sha a na hii shighe u una lu anikyundan la zan zan, shi una kura un ken tar u bo ne. Sha kpôô yô, lu tom u kiriki ga!

11, 12. (a) Mbajighjigh mbagenev mba taver ishima je kpa, ashighe agen Aôndo yange una na ve tom u lun a ican ker yô, ve er nena? (b) Gbenda u Maria lam a Gaberiel la tese nyi sha kwagh na?

¹¹ Bibilo tese ér, ashighe agen mbajighjigh mbagenev mba taver ishima je kpa, yange i taver ve u eren ityom i Aôndo, i i lu a ican ker yô. Mose yange kaa ér una fatyô u lun orshua u Aôndo ga, sha ci u un ngu or u fan kwaghôron ga. (Eks. 4:10) Yeremia yange kaa ér un ngu “wanye,” nahan un yina u eren tom u Aôndo kaa ér una er la. (Yer. 1:6) Yona di yevese ityom i Aôndo tindi un la. (Yona 1:3) Maria di er nena?

¹² Mkaanem nam tese ér lu kwase u hiden a iyol ijime shi ungwan kwagh kpaa, man ma za gwa anyom imôngo hegen. A kaa a Gaberiel ér: “Nenge, mo kpankwase u Ter, m ngun; i erem sha mkaanem ou.” (Luka 1:38) Ngise la kpankwase lu ortom u hemban gban ijime cii; uma u nan jimin cii lu sha ave a orvesen u nan. Kape Maria nenge ér un ngu sha ikyev i Ter na, Yehova je la. Yange fa ér un ngu sha ikyev i Yehova nahan kwagh u zan un iyol ngu ga, gadia or u mimi yô, Yehova tesen nan mimi, shi a na jighjigh ér Yehova una ver un doo doo sha iniôngon na i eren tom u taver u i na un la.—Ps. 18:25.

13. Aluer Aôndo kaa ér se er ma kwagh u se nenge ser a taver shin ka kwagh u se fatyô u eren ga yô, ikyav i Maria la ia wase se nena?

¹³ Ashighe agen Aôndo ngu a kaa ér se er kwagh u i lu se inja er a taver kpishi shin ka kwagh u or a fatyô u eren ga yô. Kpa a na se atôakyaa kpishi ken Mkaanem nam a a ne ve i doo u se suur sha a na shi se wa ayol a ase sha ikyev na er Maria nahan yô. (Anz. 3:5, 6) Se wa ayol ase sha ikyev na kpa? Aluer se er nahan yô, una na se injar i ia na jighjigh u se ne un la una seer taver yô.

14, 15. (a) Yehova yange er kwagh u taver jighjigh u Maria shighe u za Elisabetu man Sekaria inya la nena? (b) Kwaghôron u Maria u i nger ken Luka 1:46-55 la, wase se u fan kwagh na nena?

¹⁴ Kwagh u iyav mbu Elisabetu mbu Gaberiel ôr Maria la doo un kpen kpen. Yange fa ér Elisabetu ngu sha ian i una fatyô u kaven mlu na la. Nahan Maria mough fese yem zende sha tar u iwoogh, ken Yuda henpe Elisabetu lu la; lu zende u ayange atar shin anyiin nahan. Maria za nyer hen ya u Elisabetu man Sekaria u lu pristi la yô, Yehova shi tese un ikyav igen i i seer taver jighjigh na yô. Er Elisabetu ungwa ishughun i Maria yô, wan tsuwe un ken uya sha iember. Tsô Elisabetu iv a icighan jijingi, nahan a yila Maria ér “ngô u Terem.” Aôndo pase Elisabetu ér wan u Maria una mar la una lu Ter na, una lu Mesiya. Shi icighan jijingi mgbegha un, a wuese Maria sha jighjigh na man ieren na i ungwan kwagh la, ér: “Saan un u a ne jighjigh la, iyol.” (Luka 1:39-45) Hanma kwagh u Yehova tôndo zwa u eren a Maria cii yô, va kure shami vough!

¹⁵ Maria kpa ôr kwagh. I nger kwagh u ôr la ken Mkaanem ma Aôndo. (Ôr Luka 1:46-55.) Ken Bibilo jimin cii ka kwaghôron u Maria u hemban lihen je ne, man kwaghôron ne pase se kwagh na kpishi je. A tese ér, lu kwase u wuese kwagh, gadia a wuese Yehova sha ian i a na un i lun ngô u Mesiya la. Shi gbenda u a ôr kwagh u Yehova ér heen mbamoron iyol man mbaageev, kpa gem wasen mba gban ijime man mbaatsanev mba ve keren u civir un la tese er lu kwase u nan jighjigh taveraa yô. Shi kwaghôron na la tese er mfe na za shimi yô. Ngeren ugen kaa ér yange ôr kwagh ter avur a Ruamabera u ken zwa Heberu la hemba kwa 20!a

16, 17. (a) Ka ieren i i doo u se dondo i nyi nahan Maria vea wan na yange ve tesee? (b) Mze u Maria za Elisabetu inya la umbur se kwagh u injaa u nyi?

¹⁶ Sha kpôô yô, Maria timen ken Mkaanem ma Aôndo kpoghuloo je. Nahan kpa, a hide a iyol na ijime, gadia hanma kwagh u ôr yô lu u ken Ruamabera, lu mhen na ga. Lu u iyange igen wan u lu vesen ken iyav nav la kpa una hide a iyol ijime er ngô na nahan, una kaa ér: “Ityesen i M tesen, ka i Yam ga, kpa ka i Un u A tindim la.” (Yoh. 7:16) Doo u se pine ayol a ase ser: ‘M ne Mkaanem ma Aôndo icivir shi m we ikyo sha kwagh u ma er kpa? Shin m hembe soon u pasen ior atesen am man mbamhen ava?’ Maria lumun u eren kwagh nahan ga.

¹⁷ Maria tsa vea Elisabetu iwer itiar, nahan a̱ shi nan kpa, ve lu taver ayol a ve asema hen shighe ne kpishi. (Luka 1:56) Kwagh u Maria za Elisabetu inya u i er ken Bibilo ne umbur se er u kôron ijende a or, i lu kwagh u injaa kpishi yô. Aluer se kôr ijende a or u Yehova Aôndo a doo nan ishima sha mimi yô, Aôndo una seer doon se ishima shi se kporom ikyua a na kpaa. (Anz. 13:20) Ayange nga kar yô, shighe kuma u Maria una hide ken ya na. Yosev una fa er Maria a lu iyav nahan una er nena?

18. Maria yange ôr Yosev nyi, man Yosev di gema er nena?

¹⁸ Adooga Maria yange de ér iyav mbura mbu due ga tsô ôr Yosev kwagh sha mi. Alaghga cii man ôr Yosev yô, lu henen kwagh u or u cian Aôndo, u fan kwagh tsung ne una er zum u una ungwa loho ne yô. Nahan cii kpa Maria de ga, ôr Yosev hanma kwagh u za hemen yô. Alaghga u ngu henen wer, ishima yange ia za Yosev iyol, man kape lu kpaa je la. Yange soo u lumun kwagh u wankwase u doon un ishima ne ôr un la, kpa gema lu inja er a nzughul a na nahan. Bibilo ôr se kwagh u Yosev lu henen ken ishima hen shighe ne ga. Kpa i kaa ér a wa ken ishima ér una pav a Maria, gadia yange or a tsôr kwase yô, i tôô ér nan vôso kwase shon kera kpaa. Nahan kpa, Yosev soo u nan un kunya ken igbar ga, shi soo ér i tsaha un kpaa ga, nahan wa ishima ér una pav a na myer. (Mat. 1:18, 19) Alaghga tsô Maria yange ure zum u ishima za Yosev iyol sha kwagh u kpilighyol u za hemen ne yô. Nahan kpa, Maria vihi ishima a Yosev sha ci u a na un jighjigh ga yum ga.

19. Yehova yange wase Yosev u eren kwagh u vough nena?

¹⁹ Yehova wase Yosev u eren kwagh u vough. Aôndo kaa a na ken mnya ér iyav mbu Maria mbura ka ivande. Ishima yange ia gba Yosev shimi je a zua ga! Yosev maa er kwagh u Maria kpa er zum u ortyom ôr un loho ne la, a er kwagh sha ishima i Yehova. A vôso Maria shi a wa iyol u eren tom u vesen u nengen sha wan u Yehova la.—Mat. 1:20-24.

20, 21. Ka nyi ior mba ve er ivaa man mba ve we ishima u va eren ivaa cii vea fatyô u henen hen Maria man Yosevee?

²⁰ Doo u noov man kasev man mba ve lu sôôr ayol a ve la vea hen kwagh hen nom man kwase mba yange ve lu sha tar anyom 2,000 ken ijime la. Se fa keng ser, er Yosev nenge kwase na lu eren ityom i ngô man i kwaseya tsembelee yô, a doo un kpishi er ortyom u Yehova tese un kwagh u una er yô. A̱ shi nan kpa, Yosev yange nenge er i doo u se suur sha Yehova zum u se soo u eren ma kwagh u vesen yô. (Ps. 37:5; Anz. 18:13) Se na jighjigh ser, yange una za hemen u eren akaa sha kwaghfan sha ci u tsombor na.

²¹ Maria di kpa yange venda ér una kera vôso Yosev ga ze, nahan kwagh ne tese se nyi? Shin er sha hiihii la, taver Yosev u lumun kwagh u Maria ôr un la nahan kpa, Maria wa ishima ér Yosev a̱ kure kwagh, sha ci u fa ér ka Yosev una va lu orya na ye. Kwagh ne yange tese Maria kwaghfan, man kasev mba ken Kristu nyian kpa vea fatyô u henen kwagh u injaa ker. U masen yô, kwagh ne yange una tese Yosev man Maria ér doo u noov man kasev vea lamen ayol a ve wang wang man sha mimi kpaa.—Ôr Anzaakaa 15:22.

22. Yosev man Maria yange ve hii ivese ve nena, man gema lu nyi lu keghen ve ken hemene?

²² Gumor Yosev man gumkwase Maria yange ve hii ivaa ve ne sha gbenda u hemban doon cii. Ve cii Yehova Aôndo doo ve ishima shi sar ve u eren ishima na shi lun mbamaren mba fan kwagh shi wan ônov vev ikyo. Akaa a doon lu keghen ve ken hemen, kua mbamtaver kpaa cii. Gadia tom u yesen Yesu, u una vese a hingir or u hemban sha tar cii la, lu keghen ve.