U Wa Agoyol u Eren Batisema Vee?

 1. Ka nyi i doo u or nana er cii ve nana hii iyou i maana?

TÔÔ ase wer or soo u maan iyou. Nan fa iyou shon i nan soo u maan la kpaa. Nahan doo u fese je maa nana yem kasua nana za yam ikyav a va hii kwaghmaana? Ei. Cii man nana hii tom yô, kwagh ngu u i gbe hange hange u nana er yô; gba u nana gba kwar inyar, nana fa inyaregh ki iyou la ia tôô nan yô. Gba u nana er nahan sha ci u nyi? Ka sha ci u nana fa aluer nan ngu a inyaregh kuma u nana fatyô u maan iyou shon been yô. Aluer nan vande gbidyen kwar zulee nan fa inyaregh kira yô, nana hemba kôron cio u maan iyou i nan la kuren doo doo.

 2. Sha kwagh u Luka 14:27-30 a er yô, ka nyi i gbe u u hen sha mi zulee cii man u mase eren batisema?

² Yehova doo u ishima tsung shi u ngu a iwuese sha akaa a a er a we yô, nahan kwagh la mgbegha u u soo u eren batisema? Aluer kape i lu la yô, we kpa gba u u tsua kwagh u u er yô, vough er or u a soo u maan iyou la nahan. Se ôr nahan sha ci u nyi? Nenge ase mkaanem ma Yesu ma ma lu ken Luka 14:27-30 la. (Ôr.) Yesu lu pasen inja i u lun orhenen na. Cii man se hingir orhenen na yô, a gba u se kegh iyol u wan ishima a mbamtaver shi den ser akaa agen a kar se. (Luka 9:23-26; 12:51-53) Sha nahan yô, cii man u er batisema yô, a gba u u hen sha akaa a u hingir orhenen u Kristu ve u lu tagher a mi la zulee. U er nahan yô, u hemba wan agoyol a u er batisema kera kpa u za hemen u civir Aôndo sha mimi yô.

 3. Ka nyi se lu timen sha mi ken ngeren nee?

³ Mtsera u u zua a mi sha u hingir orhenen u Kristu u nan er batisema la una kuma sha atsan a u wa ishima a mi kua akaa agen a u de wer a kar u laa? A kuma yum! Hegen ne je kpa or u nan er batisema ka nan zua a averen kpishi shi nana va zua a mi ken hemen kpaa. De se time sha mbampin mbagen mba hange hange mba sha kwagh u batisema. Kwagh la una wase u u zuan a mlumun sha mpin ugen. Mpin shon ér: “M wa iyol kuma u eren batisema vee?”

 4. (a) Iyoltseghan ka nyi? (b) Er i pase ken Mateu 16:24 nahan, inja i u “nyiman” iyol you la ér nyi?

⁴ Iyoltseghan ka nyi? Cii man u er batisema yô, gba u u tsegha iyol you. Ka wea tseghan iyol you sha ci u Yehova yô, u er msen hen a na a ishima i môm, u pase un wer u gema uma wou cii u na sha u eren ishima na gbem sha won. Zum u u tsegh iyol you sha ci u Aôndo yô, u “nyiman” iyol you. (Ôr Mateu 16:24.) Hegen u hingir kwagh u Yehova, man kwagh ne ka ian i icivirigh i numben a mi ga. (Rom. 14:8) U ngu kaan a na wer hii hegen je, u ver ishima sha u civir un, a lu u eren ishima you ga. Aluer u tsegha iyol you sha ci u Aôndo yô, u er iceghzwa a na, man ka i numben a mi ga. Yehova kighir se ér se er iceghzwa ne ga. Kpa ka sea er iceghzwa ne yô, a ver ishima ér se kure i.—Ps. 116:12, 14.

 5. Iyoltseghan kaha a batisema nena?

⁵ Iyoltseghan kaha a batisema nena? Iyoltseghan ka kwagh u ka u er un we tswen ken iuv yô; ka kwagh u we vea Yehova ne uhar tseegh, orgen fe ga. Batisema ka kwagh u ken igbar; ka i er un sha ashe a ior. Ashighe kpishi ka i lu sha mkohol u kiriki shin sha mkohol u vesen. Ka wea eren batisema yô, u tese mbagenev wer u vande tseghan iyol you sha ci u Yehova.b Nahan batisema wou la ngu a na mbagenev ve fa je ér Yehova Aôndo wou doo u ishima a ishima you cii man a uma wou kua mhen man agee ou cii, je yô, u kange ishima u civir un gbem sha won.—Mar. 12:30.

6-7. Er i pase ken 1 Peteru 3:18-22 nahan, ka atôakyaa ahar a nyi a ne ve i gbe hange hange u or a er batisema?

⁶ Gba keng u saa or a er batisema? Gbidye ase kwar sha mkaanem ma ken 1 Peteru 3:18-22 man. (Ôr.) Er tso la lu ikyav i tesen ior wang ér Noa na Aôndo jighjigh nahan, kape batisema wou kpa i lu ikyav i tesen mbagenev wang ér u tsegha iyol you sha ci u Yehova je la. Kpa kwagh shon yô, saa or a er batisema keng keng-ne? Een, ka hange hange. Peteru yange pase er i hii ve i lu hange hange yô. Hiihii yô, ér ngu “waren ne.” Aluer se tese sha ieren yase ser se na Yesu jighjigh shi se na jighjigh ser yange va kpe sha ci wase, shi i nder un yem sha, hegen ngu “ken uwegh ku yanegh ku Aôndo” yô, batisema una fatyô u waren se.

⁷ Kwagh u sha uhar yô, batisema una na se fatyô u lun “a imoshima i dedoo.” Zum u se tsegh iyol yase sha ci u Yehova shi se er batisema yô, ka se hingir u yan ikyar a Yehova kôôsôô. Nahan er se gem ishima sha asorabo a ase sha mimi shi se ne nagh ku ipaan kura jighjigh yô, Aôndo ngu a de se a asorabo a ase. Sha nahan yô, se hingir u lun a imoshima i dedoo sha ishigh nagh.

 8. Ka nyi i doo u ia mgbegha u u eren batisema?

⁸ Ka nyi i doo u ia mgbegha u u eren batisema? Er u hen Bibilo zulee yô, u fa akaa kpishi sha kwagh u Yehova; mlu na kua gbenda u a eren akaa la. Akaa a u hen sha kwagh na la doo u ishima tsung, nahan kwagh la mgbegha u u soon un a ishima i môm. Sha nahan yô, gba u a lu dooshima la una lu ityôkyaa i tamen i i ne ve u lu eren batisema ye.

 9. Inja i u eren batisema ken iti i Ter man Wan man icighan jijingi er i ôr ken Mateu 28:19, 20 la ér nyi?

⁹ Shi kwagh ugen u i doo u una mgbegha u u eren batisema yô, ka mimi u a lu ken Bibilo shi u ne jighjigh a mi la. Gbidye ase kwar sha kwagh u Yesu yange ôr zum u wa tindi ér i za gema ior ve hingir mbahenen la. (Ôr Mateu 28:19, 20.) Yesu kaa ér mba ve er batisema cii, a gba u vea er un “ken iti i Ter man Wan man icighan jijingi.” Inja i kwagh ne ér nyi? Gba u saa u lumun a mimi u Bibilo i tese sha kwagh u Yehova kua Wan na Yesu man icighan jijingi la a ishima you cii. Mimi u Bibilo i tese ne ngu a tahav shi una fatyô u benden a ishima you kpaa. (Heb. 4:12) De se pande se za zwa sha mimi shon kpase.

10-11. Ka akaa a mimi a nyi u hen sha kwagh u Ter shi u ne jighjigh a mi?

¹⁰ Hide ase hen er yange lu u zum u u hen akaa a mimi ne sha kwagh u Ter la: ‘Iti na ér Yehova,’ shi ka un a “lu Uhembansha sha tar cii” ye; ka un tswen a lu “Aôndo u mimi” kpaa ye. (Eks. 6:3; Ps. 83:18; 2 Kron. 15:3) Ka un a gbe se ye shi “mwar [kpaa] ka hen TER a lu ye.” (Ps. 3:8; 36:9) A er kwagh u yiman se sha ikyev i isholibo man ku shi a na se ishimaverenkeghen i va zuan a uma u tsôron. (Yoh. 17:3) Iyoltseghan you man batisema wou la vea tese ér u hingir Orshiada u Yehova. (Yes. 43:10-12) We kpa u hingir u lun ken tsombor u mbacivir Aôndo sha tar cii mba i yer ve sha iti na man i lu ve kwagh u icivirigh tsung shi ve pasen ior iti shon kpaa la.—Ps. 86:12.

¹¹ Sha mimi yô, ka se kwagh u icivirigh kpishi er se fe mimi u Bibilo i tese sha kwagh u Ter la nahan! Ka wea na jighjigh a mimi mba injaav mban yô, ishima i mgbegha u u tseghan iyol you sha ci u Yehova shi eren batisema.

12-13. Ka akaa a mimi a nyi u hen sha kwagh u Wan shi u ne jighjigh a mi?

¹² Yange u hen mimi u sha kwagh u Wan nahan lu u nena? Ka Yesu a lu or u sha uhar u hemban sha won cii ye. Ka un a lu Orpaan wase ye. Yange na uma na sha ci wase a ishima na. Aluer se tese sha ieren yase ser se na nagh ku ipaan kura jighjigh yô, a fatyô u den se asorabo a ase, shi se fatyô u yan ikyar a Aôndo shi va zuan a uma u tsôron kpaa. (Yoh. 3:16) Yesu ka Pristi wase u Tamen. A soo ér una wase se, se zua a mtsera ken nagh ku ipaan kura shi se ya ikyar kôôsôô a Aôndo. (Heb. 4:15; 7:24, 25) Er a lu Tor u Tartor u Aôndo yô, ka un Yehova una er tom a na u tseghan iti na shi been a ifer shi van a averen a tsôron ken Paradiso u a lu van la ye. (Mat. 6:9, 10; Mpa. 11:15) Ka ikyav i Yesu i gbe u se dondon ye. (1 Pet. 2:21) Yange na uma na cii u eren ishima i Aôndo, nahan a ver se ikyav.—Yoh. 4:34.

¹³ Aluer u lumun a kwagh u Bibilo i tese sha kwagh u Yesu la yô, Wan u Aôndo u ishima ishima ne una doo u ishima. Dooshima la maa una mgbegha u u geman uma wou cii nan Yehova wer u er ishima na, er Yesu kpa er nahan. Kwagh ne di una gema a mgbegha u u tseghan iyol you sha ci u Yehova shi eren batisema.

14-15. Ka akaa a mimi a nyi u hen sha kwagh u icighan jijingi shi u ne jighjigh a mi?

¹⁴ Yange u hen mimi u sha kwagh u icighan jijingi nahan lu u nena? Icighan jijingi ka or ga, kpa ka tahav mbu Aôndo. Yehova yange mgbegha ior sha jijingi na ne, ve nger Bibilo, shi jijingi ne ngu a wase se u kaven kwagh u i nger ken Bibilo la shi dondon un ken uma wase. (Yoh. 14:26; 2 Pet. 1:21) Yehova shi ne se “agee a a gande a orumace” la sha ikyev i jijingi na ne. (2 Kor. 4:7) Jijingi ne ngu a na se agee a pasen loho u dedoo shi hendan a imeen shi nôngon a iyolkpen shi wan ishima a akaa a karen jighjigh wase. Jijingi ne shi wasen se u lun a aeren a dedoo a a kohol a lu “ityamegh ki jijingi” la. (Gal. 5:22) Ior mba ve suur sha Aôndo shi ve sen un jijingi ne sha mimi yô, ngu a na ve gbilin.—Luka 11:13.

¹⁵ Er se fe ser icighan jijingi una fatyô u wasen mbacivir Yehova sha er vea er un tom yô, kwagh la taver se ishima shi ka kwagh u surun se ishima kpen kpen! Aluer u na jighjigh a akaa a mimi a u hen sha kwagh u icighan jijingi la yô, kwagh ne una mgbegha u u tseghan iyol you sha ci u Yehova shi eren batisema.

16. Ka nyi se hila hene?

¹⁶ Kwagh u u tsough wer u tsegha iyol you sha ci u Aôndo shi u er batisema la ka kwagh u injaa kpen kpen. Er se hen nahan, gba u u kegh iyol u tagher a mbamtaver shi den wer akaa agen a kar u. Nahan kpa averen a u zua a mi la aa hemba akaa a u de wer a kar u la ica je. Batisema una fatyô u waren we shi una wase u u hingir u lun a imoshima i dedoo sha ishigh ki Aôndo. Shi kwagh u i gbe u una mgbegha u u eren batisema yô, a lu sha ci u Yehova Aôndo doo u ishima. Gba u u na jighjigh a mimi u u hen sha kwagh u Ter man Wan man icighan jijingi la cii a ishima i môm. Nahan u gbidyen kwar sha akaa a se hila hen la cii yô, u mase fan er u na mlumun sha mpin ne yô: “M wa iyol kuma u eren batisema vee?”

17. Ka akaa a nyi nahan i gbe u or a er cii ve nana er batisema?

¹⁷ Aluer u nenge wer u kuma u eren batisema yô, ka keng u er akaa a a na u ya ikyar vea Yehova kôôsôô yô.c Er u henen Bibilo hanma shighe yô, kwagh ne na u va fa Yehova kua Yesu tsembelee. U hingir u lun a jighjigh. (Heb. 11:6) Shi u na uityendezwa mba Yehova mba ve lu ken Bibilo la jighjigh, shi u lumun wer jighjigh u u ne nagh ku Yesu la una yima u sha ikyev i isholibo man ku. U gema ishima sha asorabo a ou; inja na yô, u vaa afanyô kpishi sha akaabo a yange u er la, shi u sôn Yehova wer a de u a akaa la. U gema ishima sha u den akaabo a yange u eren ken uma wou la, hegen u ngu eren akaa a Aôndo a lumun a mi yô. (Aer. 3:19) Ka i doo u kpishi u ôron mbagen kwagh u jighjigh wou. Yange u va kuma u hingir orpasenkwagh u nan lu a er batisema ga yô, nahan u hii u duen kwaghpasen vea tiônnongo. (Mat. 24:14) Yehova ngu tan ave vanger a we er u er akaa a hange hange ne yô. U na saan un iyol je zua ga.—Anz. 27:11.

18. Ka nyi igen kpa i gbe u u er cii ve u kuma u eren batisema?

¹⁸ Cii ve u er batisema yô, akaa agen kpa nga kpuaa a i gbe u shi u er yô. Er se vande henen nahan gba u u tsegha iyol you sha ci u Aôndo. Tôô shighe er msen hen a na a ishima you cii shighe u u lu tswen yô, shi tôndo zwa a na wer u civir un sha ayange a uma wou cii. (1 Pet. 4:2) U been yô, kaa a ortamen u wasen mzough u mbatamen tom la wer u soo u eren batisema. Nahan una ôr mbatamen mbagen vea lam vea we. Ishima i de nyian we sha ci u gba u vea za tema a lam vea we yum ga. Fa wer, anmgbianev mba fan kwagh mban vande fan we shi u doo ve ishima kpaa. Vea lam vea we sha atesen a Bibilo a u vande henen la. Ka ve soo u fan aluer mimi je u kav atesen ne shi u fa er i lu hange hange u tseghan iyol you sha ci u Yehova shi eren batisema yô. Aluer ve nenge ér u wa iyol kuma yô, vea kaa a we ér mkohol u kiriki shin u vesen u a lu van la u er batisema sha mi.

19-20. U eren batisema kera yô, ka nyi i gbe u u ere, man u er kwagh ne nena?

¹⁹ U eren batisema kera yô, ka nyi i gbe u u ere?d Umbur wer iyoltseghan ka ityendezwa, man Yehova soo ér u kure i. Sha nahan yô, u eren batisema kera yô, a gba u u kure ityendezwa you la. U er kwagh ne nena?

²⁰ Luun kôôsôô a tiônnongo wou. Er u er batisema u hingir Orkristu yô, hegen we kpa u ngu ken “mzough u anmgbianev.” (1 Pet. 2:17) Anmgbianev ou mba nomso man mba kasev mba ken tiônnongo vea hingir er ka tsombor wou nahan. Aluer u ngu zan mbamkombo hanma shighe yô, u hemba lun a ve kangenaa cii. Ôron Mkaanem ma Aôndo shi gbidyen kwar sha mi hanma sev. (Ps. 1:1, 2) Zum u u ôr Bibilo kera yô, tôô shighe gbidye kwar sha kwagh u u ôr la zulee. U er nahan yô, mkaanem mara ma a kôr u ken ishima. ‘Eren msen hanma shighe.’ (Mat. 26:41) Aluer u ngu eren msen a ishima i môm yô, kwagh la una na u seer kporom hen Yehova. ‘Za hemen u keren Tartor u Aôndo hiihii.’ (Mat. 6:33) U fatyô u eren kwagh ne sha u veren tom u pasen kwagh hiihii ken uma wou. Aluer u ngu duen kwaghpasen hanma shighe yô, jighjigh wou una za hemen u taver, shi u fatyô u wasen mbagenev kpaa u zan sha gbenda u uma u tsôron.—1 Tim. 4:16.

21. Batisema wou la una bugh u gbenda u zuan a nyi?

²¹ Kwagh u u tsough wer u tsegha iyol you sha ci u Yehova shi u er batisema la ka kwagh u injaa u hemban doon cii u u er ken uma wou yô. Ka mimi mbamtaver yô vea ban ga shi a gba u akaa agen aa kar u. Nahan kpa, mtsera u u er batisema ve u zua a mi la kuma sha mbamtaver mbara kua akaa agen a u de wer a kar u laa? A kuma yum! Nyityô ican i u tagher a mi ken tar u tse ne cii ka di sha “anshighe kpuaa shi i̱ peese” kpaa. (2 Kor. 4:17) Kpa batisema wou la una na a hemba saan we iyol hegen shi una bugh u ian i va zuan a “uma u a lu uma jim jim” la kpaa. (1 Tim. 6:19) Sha nahan yô, hen sha mlumun u u na sha mpin u “M wa iyol kuma u eren batisema vee?” la zulee shi er msen sha mi.