“U Va Lu vea Mo ken Paradiso”

 1. Ka nyi Yesu yange ôr a iferor ugen u i mande un ikyua a na la nyi cii mase kpene? (Luka 23:39-43)

YESU vea mbaaferev uhar mba yange i mande un sha kon ve, ve kpa i mande ve ikyua a na la, yange ve ya ican kpishi cii ve mase kpen ye. (Luka 23:32, 33) Mbaaferev mba uhar mbara cii ve lu nahan Yesu tar, nahan kwagh la tese wang ér ve lu mbahenen nav ga. (Mat. 27:44; Mar. 15:32) Kpa u môm va gema ishima, kaa ér: “Yesu, umbur mo zum u u nyôr ken Tartor wou yô.” Yesu kaa a na ér: “Mimi je m kaan we nyian ne, u va lu vea mo ken Paradiso.” (Ôr Luka 23:39-43.) I ôr kwagh u tesen ér iferor ne yange ngohol loho u sha kwagh u “Tartor u sha,” u Yesu lu pasen shighe u lu shin tar la ga. Shi mayange Yesu kaa ér or la una nyôr ken Tartor la ga. (Mat. 4:17) Yesu lu ôron kwagh u ken hemen, shighe u tar ua hingir Paradiso la. Se ôr nahan sha ci u nyi?

 2. Ka inyi i tese ér iferor u gema ishima la yange una lu Oryuda?

² Iferor u va gema ishima la yange una lu Oryuda. Iferor shon kaa a ugen la ér: “Aôndo je kpa u cie gaa? Shin ka er u ye mtsaha môm vea na yumu?” (Luka 23:40) Mbayuda yange ve civir Aôndo môm tseegh, kpa ior mba ken akuraior na mbaaôndo kpishi jighjigh. (Eks. 20:2, 3; 1 Kor. 8:5, 6) Mbaaferev mbara yange vea lu ior mba ken akuraior yô, ngura ma pine ér, ‘Mbaaôndo je kpa u cie gaa?’ Heela tseegh ga, yange i tindi Yesu lu hen ior mba ken akuraior ga, kpa “hen iyôngo i ya u Iserael i i saa la tseegh.” (Mat. 15:24) Shi Aôndo pase Mbaiserael fa er un lu va nderen mbakpenev shin ku yô. Iferor u va gema ishima la yange una fa kwagh ne, shi mkaanem nam mara tese je ér yange tôô ér Yehova ngu va nderen Yesu shin ku ér a lu Tor u hemen Tartor u Aôndo. Kwagh ne tese ér or la yange lu a ishimaverenkeghen ér Aôndo una va nder un shin ku.

 3. Zum u Yesu ôr kwagh u Paradiso la, iferor u gema ishima la una hen ér nyi? Ta iwanger. (Genese 2:15)

³ Er iferor u gema ishima ne lu Oryuda yô, yange una fa kwagh u Adam man Ifa, kua Paradiso u Yehova ver ve ker la. Sha nahan yô, iferor la yange una fa dedoo je ér Paradiso u Yesu ôr la una lu ijiir i doonashe shin tar.—Ôr Genese 2:15.

 4. Doo u kwagh u Yesu ôr a iferor ugen la ma a wase se u henen sha nyi?

⁴ Kwagh u Yesu ôr a iferor ne la a wase se u henen er uma u ken Paradiso la una lu yô. Hemen u Tor Solomon u yange u na bem gba kpishi la ua wase se u fan kwagh u Paradiso. Bibilo kaa ér Yesu hemba Solomon. Nahan ka keng un vea mba vea tema tor a na imôngo mbara vea gema tar u hingir Paradiso u kundun iyol kpishi. (Mat. 12:42) Kwagh ne tese wang ér gba u mba ve lu “iyôngo igen” la vea ver ishima sha akaa a i gbe u vea er ve vea kuma u va lun uma gbem sha won ken Paradiso yô.—Yoh. 10:16.

 5. U hen wer uma una lu nena ken Paradiso?

⁵ Ka wea hen er uma a va lu ken Paradiso nahan, ka nyi ka i va u ken ishima? Alaghga ka kwagh u ijiir i memen i doonashe kpishi, er sule u Eden nahan, ka a va u ken ishima ye. (Gen. 2:7-9) Alaghga u umbur kwaghôron u profeti u Mika yange nger ér ior mba Aôndo vea tema, “hanmô ve . . . shin itine i kon u wain u nan, man shin itine i kon u tur u nan” la. (Mika 4:3, 4) Shi alaghga u umbur avur agen ken Bibilo a a tese ér kwaghyan una ngee shighe la kpishi la. (Ps. 72:16; Yes. 65:21, 22) Nahan kwagh u alaghga u nenge a mi ken ishima you yô, a lu iyol you hen ijiir i memen i doonashe kpishi, u tema hen tebul a akaayan a nyohon atô kposo kposo sha mi poo. Shi alaghga ihyuma i imendenev man ufaluwa kpa ia va u ken ishima. Shi u lu henen er ior mba hen tsombor wou man azende a ou, kua mba i nder ve shin ku la kpaa, i doo ve u lun imôngo vea mbagenev yô. Kwagh la cii ka myamciem ga. Ka keng kwagh a va lu nahan sha tar. Nahan kpa, ken Paradiso la, se lu eren tom ugen u doon kpishi.

 6. Ka nyi se lu va eren ken Paradiso? (Nenge foto.)

⁶ Yehova gba se ér se eren tom. (Orpa. 2:24) Sha shighe u Hemen u Kristu u Anyom Dubu la, se hemba eren a tom cii. A gba u mba a nder ve shin ku la vea lu akondo man kwaghyan man ajiir a tsan. A gba u se er tom u injaa kpoghuloo, ve vea zua a akaa la cii ye. Se lu a ian i icivirigh i geman tar hingir Paradiso, er yange gba u Adam man Ifa vea eren tom ken sule u u lu ya ve la nahan. Shi hen er a saan se iyol kpish u tesen ior umiliôn imôngo mba a nder ve shin ku vea lu a mfe kpuaa tseegh sha kwagh u Yehova kua awashima na, man er se lu wasen mbajighjigh mba yange ve kpe ica i gba cii man shighe u Yesu la, u fan akaa agen seer yô!

 7. Se na jighjigh ser nyi, man ka sha ci u nyi?

⁷ Se na jighjigh ser, se va lu ken Paradiso bem bem, shi se lu a hanma kwagh u kwagh a gbe se a mi cii, shi se eren akaa cii sha inja sha inja. Sha ci u nyi? Sha ci u Yehova hila tese ikyav er uma una lu shighe u Wan na una lu hemen uumace yô. Se fatyô u nengen a ikyav i hemen na la sha kwagh u hemen u Tor Solomon.

 8. Mkaanem ma ken Pasalmi 37:10, 11, 29 la yange ma kure sha mi shighe u Tor Davidi nger ma kera la nena? (Nenge ngeren u a lu a itinekwagh ér, “Mbampin mba Mbaôron Takeda Ne Ve Pin La,” ken Iyoukura ne.)

⁸ Aôndo yange na Tor Davidi nger kwagh pase er uma a va lu ken hemen, shighe u orjighjigh u fan kwagh nana tema tor yô. (Ôr Pasalmi 37:10, 11, 29.) Ka se ôr Pasalmi 37:11 shighe u se lu pasen kwagh u Paradiso u se lu veren ashe a mi la yô. Ka se er nahan sha ci u Yesu yange ôr kwagh ter mkaanem ma ivur la ken Ityesen na i sha Uwo la, u tesen ér mkaanem mara ma va kuren sha mi ken hemen. (Mat. 5:5) Kpa Davidi kpa yange ôr kwagh u tesen er uma a va lu sha ayange a Tor Solomon la yô. Shighe u Solomo tema tor sha Iserael la, nongoior u Aôndo tema bem bem, shi ve lu a akaa a kwagh gba ve a mi la cii, ken tar u ‘atumbabua dumbur ken u kua iyough kpaa’ la. Aôndo kaa ér: “Aluer nea zenden ken akaawan Am . . . , né eren sha mi kpaa yô, Me na bem ken tar la, né yav je, ma or u tan ne mciem iyol nana lu ga.” (Lev. 20:24; 26:3, 6) Mkaanem mara yange ma kure sha mi shighe u Solomon lu tor la. (1 Kron. 22:9; 29:26-28) Shi Yehova tôndo zwa ér mbaaferev cii vea va “kera lu ga.” (Ps. 37:10) Sha nahan yô, mkaanem ma ken Pasalmi 37:10, 11, 29 la yange mba vande kuren sha mi sha ayange a tsuaa la, shi ma a va kure sha mi ken hemen.

 9. Ka nyi torkwase u sekeba yange ôr sha kwagh u hemen u Tor Solomon?

⁹ Shighe u Solomon lu tor la, Torkwase u Sekeba za ungwa er bem gba ken tar u Iserael shi tar lu yôugh yôugh yô. Nahan Torkwase la mough ken tar u icaa je za ken Yerusalem ér una za nenge kwagh u ungwa la sha ashe a na. (1 Utor 10:1) Za nengen tartor u Solomon been yô, a kaa ér: “I ôrom ma kwagh je ga . . . Saan ior ou iyol, saan mbayev ou mban iyol mba ve til sha ishigh yough gbem, ve ongo kwaghfan wou ne.” (1 Utor 10:6-8) Kpa mlu u sha ayange a hemen u Solomon la lu mafo u kwagh u Yehova una va er sha hemen u Wan na Yesu di tsô.

10. Ka sha igbenda i nyi nahan Yesu a hembe Solomon?

¹⁰ Yesu hemba Solomon sha hanma gbenda cii. Solomon lu orumace u yinan u er asorabo a vesen, a yange va nongoior u Aôndo a mbamzeyol yô. Kpa Yesu yô, ka Orhemen u a lu a myen môm môm ga, shi a eren kwagh u vough hanma shighe cii yô. (Luka 1:32; Heb. 4:14, 15) Satan yange va Yesu a atsan kpishi, kpa Yesu za hemen u ungwan imo i Aôndo. Kristu tese ér mayange una er isholibo shin una er ma kwagh u una va mbadondon un sha mimi a mbamzeyol ga. Ka se kwagh u icivirigh kpishi, er Yesu a lu Tor wase yô.

11. Ka unô vea wase Yesu tom u hemen Tartor laa?

¹¹ Yesu una ver mba 144,000 mba teman tor vea na mba vea lu eren tom a na imôngo la vea lu nengen sha uumace shi vea kure awashima u Aôndo sha kwagh u tar. (Mpa. 14:1-3) Mba 144,000 mban cii shighe u ve lu shin tar, shin ve lu nomso man kasev la, ve tagher a mbamzeyol shi ve ya atsan kpishi, nahan vea lu mbahemenev mba zungwen a ior imôngo sha ci u ve kav mlu u uumace mba vea lu shin tar la. Kpa ka nyi tom jighilii mba vea tema tor a Yesu imôngo mban vea ere?

12. Ka nyi tom Yehova una va na mba 144,000 mbara?

¹² Tom u i ne Yesu kua mba vea za tema tor a na imôngo la u hemba tom u yange i na Solomon la ica je. Yange gba u Tor Solomon una nenge sha ior umiliôn imôngo ken tar môm tseegh. Nahan kpa, mba vea lu hemen ken Tartor u Aôndo la yô, vea wase u nengen sha ior ubiliôn imôngo mba vea lu sha tar cii la. Yehova ver mba 144,000 mbara sha ian i icivirigh kpen kpen!

13. Ka tom u vesen u nyi mba vea tema tor a Yesu imôngo la vea ere?

¹³ Mba 144,000 mbara vea lu ator man upristi, er Yesu nahan. (Mpa. 5:10) Sha shighe u gba u Mbaiserael vea dondon atindi a Mose la, tom u upristi jighilii yô lu u wasen nongoior la sha er ior vea za hemen u lun kuran gbong gbong u nôngoior la shi wasen ve ér ve za hemen u lun a kôôsôô a Yehova. Atindi la lu “mure u akaa a a lu van la,” nahan se fatyô u kaan ser mba vea lu hemen Tartor a Yesu imôngo la vea lu wasen nongior u Aôndo u lun gbong gbong sha iyol shi lun kôôsôô a Yehova. (Heb. 10:1) Hegen yô, se fa er mba vea lu ator man upristi ne vea lamen a uumace mba vea lu sha ikyev i Tartor shin tar la ga. A lu nyi je Yehova a we ishima u va eren kpa, se na jighjigh ken Paradiso u he la, a lu tesen ior kwagh u vea er yô.—Mpa. 21:3, 4.

14. “Mba ve lu “iyôngo igen” la zua vea anmgbianev mba Kristu mba ve lu “ankyumile u kpuaa” la nena?

¹⁴ Yesu yila mba vea va tema tor a na imôngo la ér “ankyumile u kpuaa.” (Luka 12:32) Shi a ôr kwagh u kweior u sha uhar, a yila ve ér “iyôngo igen.” Ikweior i ihiar ne cii kohol hingir “ikyum i môm.” (Yoh. 10:16) Ikweior i ihiar ne zua ngi eren tom imôngo hegen, shi vea va za hemen u eren nahan shighe u tar ua hingir paradiso la. Shighe la, mba ve lu “ankyumile u kpuaa” la vea lu sha, mba ve lu “iyôngo igen” la di vea gema a lu uma shin tar gbem sha won. Kpa akaa agen nga a i gbe u mba ve lu “iyôngo igen” la vea er hegen ve, vea kuma u va lun ken Paradiso yô.

15. (a) “Mba ve lu “iyôngo igen” la mba eren kwagh ken mzough vea anmgbianev mba Kristu nena? (b) U dondo ikyav i anmgbian u a lu ken shôôpu la nena? (Nenge foto.)

¹⁵ Iferor u gema ishima shighe u i mande un sha kon la yange kpe cii i mase veren un ian i una va tese iwuese na sha kwagh u Yesu a er sha ci na la ye. Kpa se mba se lu “iyôngo igen” ne yô, se a mba a ian kpishi hegen i tesen er ishima i lu se ker sha kwagh u Yesu la. Ikyav i tesen yô, ka se tese ser Yesu doo se ishima sha gbenda u se eren kwagh a anmgbianev mba i tsegha ve sha jijingi la. Yesu kaa ér ka sha akaa a iyôngo ne i er a anmgbianev nav mban la una ôr i ijiir ye. (Mat. 25:31-40) Se fatyô u suen anmgbianev mba Kristu sha u wasen ve tom u pasen kwagh shi geman ior hingir mbahenen la. (Mat. 28:18-20) Sha nahan yô, se soo u eren tom a akaa a henen Bibilo a ior a ve ne se le sha inja, er takeda u Lu Uma Gbem! la nahan. Wea lu a gba henen Bibilo a or ga yô, nôngo hii u henen Bibilo a ior kpishi er u fetyô la cii.

16. Ka nyi se fatyô u eren hegen sha u wan iyol i va lun ior mba ken Tartor u Aôndo?

¹⁶ Gba u se kegh zan zan ser se va lu ken Paradiso tsô se hingir imbaor i Yehova a soo ér se va lu la ga. Hegen je se fatyô u nôngon kpoghuloo hingir ior mba ôron shi eren kwagh sha mimi man akuma akuma. Shi se fatyô u eren kwagh a Yehova sha mimi, man or u se vese nan la kua Mbakristu mba se civir Yehova a ve imôngo la kpaa. Aluer se mba eren kwagh er atindi a Yehova a tese la vough vough ken tar u ifer ne yô, shighe u se va lu ken Paradiso la kpa a taver se u dondon a ga. Shi se fatyô u henen ityom man anza a tesen ér se mba wan iyol u va lun uma sha shighe la. Nenge ngeren u a lu a itinekwagh ér, “U Ngu Wan Iyol i Va ‘Yan Dyako u Tar’ Kpa?” la, ken Iyoukura ne.

17. Doo u ishima ia za se iyol sha asorabo a vesen a yange se er ken ijime laa? Ta iwanger.

¹⁷ Shi a gba u se nôngo ishima ia de u nan se ibo sha ci u asorabo a vesen a yange se er ken ijime la. Nahan kpa, mayange se tôô ser er i ne nagh ku ipaan sha ci wase yô, se za hemen u “eren isholibo her sha apera” ga. (Heb. 10:26-31) Kpa se fatyô u nan jighjigh ser, aluer se gema ishima sha asoraba a vesen a yange se er la sha mimi, se pase Yehova kua mbatamen ser ve wase se, shi se de ieren la yô, Yehova de se kwaghbo shin a de se akaabo shon vindi vindi. (Yes. 55:7; Aer. 3:19) Umbur kwagh u Yesu ôr a Mbafarishi ne, ér: “M va ka u yilan mbaperapera ga, kpa ka mbaasorabo.” (Mat. 9:13) Nagh ku ipaan kura ku a tahav kuma u cirin asorabo a ase cii.

18. Ka nyi u lu veren ashe wer u va lam sha mi vea iferor u yange i mande un sha kon ikyua vea Yesu laa?

¹⁸ Tôô ase wer u ngu ken Paradiso, u ngu lamen vea iferor u yange lam a Yesu shighe u i made u sha kon la. Ka keng we man or la cii ne wuese nagh ku ipaan ku Yesu la. Alaghga u pine un wer a seer ôron we kwagh u yange za hemen shighe u shi ahwa kpuaa Yesu una kpe sha kon la, man er lu un ken ishima shighe u Yesu lumun u eren kwagh u ôr a na la yô. Un di alaghga una pine u er yange uma lu ken ayange a masejime a tar u Satan ne yô. A lu kwagh u icivirigh kpishi u henen Mkaanem ma Aôndo a imbaor la!—Ef. 4:22-24.

19. Uma una due or ishima ken Paradiso ga sha ci u nyi? (Nenge foto u sha igbende.)

¹⁹ Uma una due or ishima ken Paradiso mayange ga. Hanma shighe cii se lu zuan a ior mba i sar se u fan kwagh ve yô lamen a ve, shi se lu a tom u injaa kpishi. Kwagh u hemban doon je yô, se lu fan Ter wase u sha la seer ayange ayange, shi akaa a a er sha ci wase la a va se a msaanyol kpishi. Hanma shighe yô, se luun a akaa kpishi a henen sha kwagh na, kua sha akaa a a gbe la. Se lu tsan sha won seer a seer, nahan Aôndo una lu doon se ishima seer a seer. Se sugh Yehova kua Yesu kpishi er ve tende zwa a vese ér se va lu uma gbem sha won ken Paradiso yô!