Ishimaverenkeghen i Mnder u Shin Ku I i Lu sha Ci u Mbakpenev la

U na jighjigh a kwagh u Bibilo i kaa ér a va nder ior shin ku la kpa?a Ishimaverenkeghen i va lun imôngo a ior asev mba ve kpe mbara, ka i kundun iyol je gande. Nahan kpa, mimi je a va nder ior shin kuu? De se time sha kwagh u mbaapostoli mba Yesu Kristu la, nahan se zua a mlumun sha mpin la.

Yange mbaapostoli lu a jighjigh u nan taveraa ér a va nder ior shin ku. Er nan ve ve lu a jighjigh u nan taveraa nahana? A̱ hemba kpa, lu sha ci u atôakyaa ahar. Hiihii yô, ishimaveren ve la yange i har sha ityôkwagh ne: Yesu iyol na kpa, i nder un shin ku. Zum u i nder Yesu shin ku la, mbaapostoli kua ‘anmgbianev mba hemban deri utaan’ nahan, nenge a Yesu “sha shighe môm.” (1 Mbakorinte 15:6) Heela tseegh ga, agwa u mnder u Yesu shin ku la samber wuee, er i tese ken ivangeli i Mateu man Marku man Luka man Yohane nahan.—Mateu 27:62–28:20; Marku 16:1-8; Luka 24:1-53; Yohane 20:1–21:25.

Sha uhar yô, yange Yesu nder ior shin ku kuma acin atar nahan, mbaapostoli mban nenge sha ashe a ve. Hiihii la lu ken gar u Nain, u dondon yô lu ken gar u Kapernahum, u masen yô, lu ken gar u Betani. (Luka 7:11-17; 8:49-56; Yohane 11:1-44) Or u Yesu mase nderen un, u i vande ôron kwagh na ken Iyoukura ne la, lu or u hen tsombor ugen u Yesu soo kwagh u ú kpishi yô. De se nenge kwagh u yange za hemen yô.

Yesu yange kaa a Marta u anngô na Lasaru kpe kuma ayange anyiin la ér “Anngôu una nder.” Marta yange kav inja i mkaanem ma Yesu mara sha hiihii la ga. A kaa ér: “M fa, una nder,” kpa lu henen ér a va lu ken hemen. Hen ase er yange a kpiligh Marta iyol zum u Yesu kaa a na ér, “Mo M ngu mnder man uma kpaa,” maa nder anngô na shin ku la yô!—Yohane 11:23-25.

Shighe u Lasaru kpe ayange kar anyiin la lu hana? Zum u i nder Lasaru la ôr ma kwagh u tesen ér za lu mape ken ayange a anyiin a a kpe la ga. Lasaru lu a jijingi u yange due yem sha tartor ga. Shighe u Yesu nder Lasaru shin ku la, yange za mgbegha Lasaru ape za lu ikyua a Aôndo lu ember ken Tartor u sha la hide a na, va nder un ga. Tsô Lasaru lu hana ken ayange a anyiin a a kpe laa? Jighilii yô, lu yaven shin uwar.—Orpasenkwagh 9:5, 10.

Umbur wer, Yesu yange kaa ér ku ngu er ka mnyam ma or nan lu yaven, ma a va nder nan sha mnder u shin ku yô. Bibilo ôr mkaanem ma Yesu ôr la ér: “Huror wase Lasaru ngu yaven, kpa Me za me za nder un. Nahan mbahenen kaa a Na er: Tere, aluer una lu yaven yô, una war. Kpa Yesu ôr, lu sha ku na; kpa ve yô, ve lu henen er ngu ôron kwagh u mmem u sha mnya. Nahan Yesu kaa a ve gbar gbar er: Lasaru kpe.” (Yohane 11:11-14) Yesu yange nder Lasaru, er un hide lu uma, shi hide lu imôngo vea tsombor na. Sha kpôô yô, Yesu yange er tsombor ne kwagh u doon je gande!

Mnder u Yesu nder ior shin ku shighe u lu shin tar la tsengatesen kwagh u una va er ken hemen zum u una hingir Tor u Tartor u Aôndo la.b Shighe u Yesu una tema sha ikyônough ki torough sha, una lu hemen tar ne la, Yesu una nder mba ve lu yaven shin iwar la cii vea hide a lu uma. Ka sha ityôkyaa ne kpaa yange kaa ér: “Mo M ngu mnder” ye. Hen ase er a va nder ior ou mba ve kpe mbara shin ku, u hide u nenge a ve ve a lu u yô! Shi hen ase er mba a nder ve mbara kpa vea nenge a vese ve vea ember yô!—Luka 8:56.

Yesu yange kaa a Marta ér: “Or u nana nam jighjigh yô, shin nana kpe kpaa, nana lu uma. Man anti or u nan lu uma man nan nem jighjigh yô, nana kpe mayange ga.” (Yohane 11:25, 26) Aluer ior mba Yesu una nder ve sha shighe u hemen na u anyom dubu la ve na un jighjigh yô, vea lu a ishimaveren i lun uma gbem sha won.

Yesu yange ôron akaa ne cii sha kwagh u mnder u shin ku been yô, a pine Marta mpin u kôron ken ishima nahan ér: “U na kwagh ne jighjigh kpa?” Marta “kaa a Na er: Een Tere, M vande nan jighjigh kera je mer, We U ngu Kristu, Wan u Aôndo.” (Yohane 11:26, 27) We di ye? U soo u nan jighjigh a ityendezwa i mnder u shin ku la er Marta nahan kpa? Yô, gba u u hii u zuan a mfe u kwagh u Aôndo a we ishima u va eren uumace la. (Yohane 17:3; 1 Timoteu 2:4) Mfe la una wase u ú lu a jighjigh. Er nan u pin Mbashiada mba Yehova wer, ve pase u kwagh u Bibilo i tese sha kwagh u awashima u Aôndo la ga? A doo ve kpishi, u pasen we kwagh u ishimaveren i doon tsung i mnder u shin ku la.