Henen sha Akaa a Yehova a Er sha ci Wou la Zulee

YANGE i nder Yesu shin ku shighe karen kpuaa yô, mbahenen nav uhar mough ken Yerusalem, ve lu zenden yemen ken gar u Emou. Ivangeli i Luka kaa ér: “Tsô mba ngur ôron kwagh timen sha mi ayol a ve nahan yô, Yesu iyol Na va mgbôghom a ve, gba zan a ve imôngo. Kpa ime wa ve ashe sha u vea kav Un ga yô.” Nahan Yesu kaa a ve ér: “Ka nyi akaa ne lu ôron ayol a en . . . yemene? Ve tile, ve gema ashe zuu.” Er nan ve yange ve lu zuu nahana? Mbahenen lu henen ér Yesu una yima Iserael sha ikyev i atôatyev hen shighe la, kpa imba myom la lu a va ga. I nyiishi i wua a wua Yesu. Ka nahan ve, asema vihi ve, ve lu zuu ye.—Luka 24:15-21; Aer. 1:6.

Tsô Yesu gba ôron kwagh a ve. “Hii sha Mose kua uprofeti cii, A gba pasen ve akaa a sha iyol Na ken icighanruamabera cii.” Akaa kpishi a lun a inja man a taver jighjigh u nan u mbahenen yange er shighe u Yesu lu pasen kwagh la! Mbahenen mba ngur ungwan iwanger i Yesu lu tan ve la yô, ishima i i lu vanden vihin ve la gema hingir iember. Shighe kar hen aikighe la yô, ve kaa ér: “Asema lu yeghen se a yegh zum u A lu ôron kwagh a vese sha gbenda, pasen se icighanruamabera la gaa?” (Luka 24:27, 32) Se hen nyi sha gbenda u mbahenen mba Yesu er kwagh laa?

Kwagh Ka Una Er er Se Ver Ishima la Ga Nahan, I Lu Se Nena?

Yange asema vihi mbahenen mba uhar mba ve lu yemen ken gar u Emou la sha ci u akaa a ve lu veren ishima a mi la kera er ga. Kwagh u i nger ken Anzaakaa 13:12 la yange er ve, i nger her ér: “Ishimaverenkeghen i i zough a mi ga yô, ka i na ishima i uren.” Se mbagenev mba se civir Yehova sha jighjigh i kom ukwavmbaanyomov imôngo la kpa, yange se hen ser cii man hegen nahan “zegecan” la una va ica a gba. (Mat. 24:21; Mpa. 7:14) Nahan alaghga shighe u zegecan la i̱ lu a va ga ne, kwagh la una na mbagenev ishimavihin.

Nahan kpa, umbur wer yange hide saan mbahenen mba uhar mbara iyol zum u Yesu wase ve u henen sha uityendezwa mba ve vande kuren la, man uityendezwa mbara mbagenev je yô, yange ve kure sha ashe a ve je. Se kpa se fatyô u lun a iember yase her shi kundun ishima shighe u ma kwagh u se lu veren ashe a mi a kera er ga yô, er mbahenen mbara nahan. Ortamen ugen ken Kristu, u a er tom u ortamen ica i gbe yô, mba yer un ér Michael, yange kaa er: “De haren ishima sha kwagh u Yehova a lu a er ga la ga. Kpa henen sha kwagh u a vande eren la.” Kwaghwan ne doo kpen kpen!

Kwagh u Yehova a Er La

Nenge ase akaa a vesen agen a Yehova a hila er yô. Yesu kaa ér: “U nan nem jighjigh yô, ityom i M eren ne, nan kpaa nana er i; i i hembe ingin je kpaa nana er.” (Yoh. 14:12) Nyian ne, mbacivir Aôndo mba eren ityom i Mbakristu er i gbe je i lu a vande eren ga yô. Ior mba hemban er miliôn utaankaruhar nahan mba veren ishima u va waren zegecan la. Nenge sha wono, i gbe je kpa, mbacivir Yehova sha jighjigh mba a ngee kpishi, shi ve er tom ken itiar kpishi sha tar cii nahan ga! Yehova wase mbacivir un ve er ‘ityom i i hembe ingin’ la, er Yesu tsengaôron nahan.

Kanyi igen kpa Yehova a er sha ci wasa? A wase mbaasemaamimi u duen ken botar ne kera sha injakwagh, van ken paradiso u ken jijingi u Yehova a er la. (2 Kor. 12:1-4) Tôô shighe gbidye kwar sha akaa agen a se zough a mi ken paradiso la hegen la. U tesen ikyav yô, kenger ityakerada i u koso hen ijiir you i koson ityakerada la, shin ityakerada i ken iyou i koson ityakerada i̱ hen Iyou i Tartor la. Tôv sha kwagh ken takerada u i yer ér Watch Tower Publications Index la, gayô nenge tser u sha kômputa, u ú lu a ityakerada ker kpishi, í yer ú ér Watchtower Library la. Wa tser u ungwan a ungwa, u iniumbe i sha kwagh u ken Bibilo ungwa. Hide umbur amo man akenge kua akaa a yange u nenge a mi sha ma mkohol u vesen u i sember eren yô. Kwagh ugen yô, shi umbur mlu u kundu kundu u se lu ker vea anmgbianev asev mba nomso man mbakasev la. Sha kpôô yô, se mba ken paradiso, gadia Yehova na se kwaghyan u ken jijingi mgbeghaa shi a na se mzough u anmgbianev mba lun a dooshima!

Orpasalmi Davidi yange kaa ér: “TERE, Aôndo wam, U er akaa a Ou a kpilighyol ngee kua mbamhen Ou mba sha a vese la kpaa.” (Ps. 40:5) Sha mimi yô, aluer se mba henen sha akaa a kpilighyol a Yehova a er sha ci wase la shi gbidyen kwar sha mbamhen nav mba dedoo mba a lu a mi sha a vese la yô, se seer lun a tahav mbu wan ishima, lun jighjigh ken mcivir u se lu civir Ter wase u sha, Yehova a ishima i môm la.—Mat. 24:13.

[Foto u sha peeji 31]

Yesu wase mbahenen nav u henen sha kwagh u Yehova er sha ci ve la

[Ufoto u sha peeji 32]

Hide umbur amo man akenge kua akaa a yange u nenge a mi sha ma mkohol u vesen, u i sember eren yô