ITYOUGH 17

Ka Nyi Or Yesu a Lu?

U I Gber a Gber Yô

Ka sea hen akaa a Yesu yange ôr shi er shighe u lu shin tar la yô, se nenge a aeren a na a dedoo a ka a na se soo u yan ijende a na kua Ter na Yehova yô. Aeren ne agen ka nyi man nyi? Man se dondo ikyav i Yesu la ken uma wase nena?

1. Ka sha igbenda i nyi nahan Yesu a lu er Ter naa?

Yesu yange lu sha vea Ter na, nahan nengen hanma kwagh u Ter na eren cii, shi hen akaa sha ikyev i Ter na anyom ubiliôn imôngo. Sha nahan yô, henen shi nengen shi eren kwagh vough er Ter na nahan. (Ôr Yohane 5:19.) Yesu bee Ter na vindi vindi je yô, yange kaa ér: “Or u nan nenge a mo yô, nan nenge a Ter kpaa.” (Yohane 14:9) Er u lu henen kwagh u Yesu ne, u lu fan kwagh u Yehova seer a seer. Ikyav i tesen yô, mhôônom ma yange ma kôr Yesu a ior la tese er u gbe Yehova kwagh yô.

2. Yesu tese ér Yehova doo un ishima nena?

Yesu yange kaa ér: “M ngu eren kwagh u Ter a kaam la vough, sha u tar u fa er Ter a doom ishima yô.” (Yohane 14:31) Shighe u Yesu lu shin tar la ungwan imo i Ter na, kua shighe u yange a taver un je kpaa, sha ci u Ter na doo un ishima kpishi. Yange a ôron mbagenev kwagh u Ter na hanma shighe sha er una wase ve, ve ya ijende a Ter na yô.—Yohane 14:23.

3. Yesu tese ér ior doo un ishima nena?

Bibilo kaa ér ‘doo Yesu a ônov mba iorov tsung.’ (Anzaakaa 8:31) Yange a tese ér ior doo un ishima sha u taver ve ishima shi wasen ve, a iyoltangen shio. Yange a er uivande u tesen tahav nav tsô ga, kpa shi i lu sha ci u mhôônom kôr un a ior. (Marku 1:40-42) Yesu yange eren a ior kundu kundu shi sangen a sange ga. Akaaôron a na yange a sur ior mba ve lu a ishima i mimi mba ve keghen ato a na la ishima shi a na ve ishimaverenkeghen. Yesu yange kegh a kegh iyol u yan ican shi kpen, sha ci u ior cii doo un ishima. Kpa hemba soon mba ve dondon atesen a na la cii.—Ôr Yohane 15:13, 14.

HEN KWAGH I ZA SHIMI

Seer fan or u Yesu a lu yô. Nahan nenge er u fatyô u eren kwagh a ior sha dooshima shi nan ve kwagh er Yesu nahan yô.

4. Yesu soo Ter na

Ikyav i Yesu la tese ér se fatyô u tesen ser Aôndo doo se ishima. Ôr Luka 6:12 man Yohane 15:10; 17:26. Zum u ne ôr hanma ivur ne bee yô, lam nen sha mpin ne:

Se tese ser Yehova doo se ishima er Yesu nahan nena?

Yesu ngu eren msen. — Yesu yange soo Ter na u sha la, shi lamen a na ken msen hanma shighe cii

5. Yesu yange a nenge sha mbamgbe mba iorov

Yesu yange a hemba veren ishima sha mbamgbe mba ior mbagenev a mba nav. Shighe u vôr je kpa, yange wase ior. Ôr Marku 6:30-44, maa lam nen sha mbampin mban:

Sha kwagh u avur ne a ôr yô, ka sha igbenda i nyi nahan Yesu yange tese ér kwagh u ior mbagenev gba un ishima?—Nenge ivur 31, 34, 41, man 42.
Ka nyi yange i mgbegha Yesu u wasen ioro? —Nenge ivur 34.
Er Yesu a bee Ter na yô, akaa ne cii tese u nyi sha kwagh u Yehova?
Ka sha igbenda i nyi nahan se fatyô u dondon ikyav i Yesu i wan mbagenev ikyo laa?

Yesu ngu koson iorov udubu imôngo sha ivande, a gema ikpenberedi itian man ishu i kiriki ihiar ngu nan mbahenen nav. Mbahenen nav gema mba nan nomso man kasev kua mbayev.

6. Yesu wa nagh

Er Yesu lu a kwagh a ave kpishi ga nahan kpa, yange naan ior kwagh shi a taver se ishima ér se kpa se naan mbagenev akaa ase. Ôr Aerenakaa 20:35, maa lam nen sha mpin ne:

Yesu tese ér ka nyi se er ve a saan se iyolo?

Nenge VIDIO i i lu heen ne, maa lam nen sha mpin u a dondo ne.

VIDIO: “Or u Nan Ne Kwagh la Ka I Hemba Saan Nan Iyol”—Anvegher Vidio (4:00)

Aluer se mba a kwagh ave kpishi ga je kpa, ka sha igbenda i nyi nahan se fatyô u nan mbagenev kwagha?

U fa kpa?

Bibilo tese ér se eren msen hen Yehova ken iti i Yesu. (Ôr Yohane 16:23, 24.) Ka sea er msen nahala yô, se tese ser se wuese kwagh u Yesu a er sha ci wase sha u se hingir azende a Yehova la.

IOR MBAGENEV KA VE KAA ÉR: “Kwagh gba Aôndo sha ican i se lu yan ne ga.”

Er Yesu a bee Ter na yô, gbenda u a eren kwagh la tese ér kwagh wase gba Yehova ishima nena?

KA NYI U HENE?

Yehova doo Yesu ishima shi ior kpa doo un ishima. U nguren fan kwagh u Yesu seer yô, kape Yehova kpa u lu fan un seer a seer je la, sha ci u Yesu eren kwagh er Ter na nahan.