Ôr Kwagh u Una Kôr Or ken Ishima Yô

Kwagh u Filibu Er Yô

VIDIO: Filibu Pase Oretiopia Kwagh

1. Nenge VIDIO ne, gayô ôr Aerenakaa 8:30, 31. Maa time sha mbampin mba ve dondo ne:

1. Filibu yange hii iliam a Oretiopia la nena?

2. Filibu yange hii ôron nyi i kôron Oretiopia la ken ishima sha u una tese un kwagh u he?

Ka Nyi Se Hen ken Ikyav i Filibu Nee?

2. Aluer se hii iliam a or man se ôr kwagh u kôron nan ken ishima yô, nana hemba keghen ato shi lamen a vese gbar gbar.

Dondo Ikyav i Filibu

3. Ver ishima tsembelee. Ieren i or man mlu u ishigh ki nan una wase u u fan er i lu nan ken ishima yô. Nan kegh iyol u lamen a we? U fatyô u hiin iliam a nan sha ma kwagh u ken Bibilo sha u kaan wer, “U fa er . . . ?” Aluer or soo u lamen ga yô de kighir nan ga.

4. Waan ishima. De sendegh wer saa u hii iliam sha ma kwagh u ken Bibilo ave ave ga. Kegh shighe u u lam ve a hemba lun sha inja yô. Ashighe agen alaghga a gba u ú kegh kwagen u ne hide ne zua la.

5. Fa u geman a kwaghôron. Alaghga or la nana yem ôron kwagh ugen. Nahan wa iyol u ôron ma kwagh u ken Bibilo u una wase nan yô, aluer ka u u we ishima u lamen sha mi la ga je kpaa.