MBAZENDEV mba vihin asema ker lu zurum a Damaseku, ape vea za er iferkwagh i ve wa ishima u eren la. Lu u vea za zenda mbahenen mba Yesu mba i kôr ve ihyom la hen uya vev, vea kange ve, vea hee ve, maa vea kpela ve hen inya vea va mi ken Yerusalem sha er Mkohol u Mbaajiriv a za ôr ve ijir sha ishimavihin yô.

² Saulu, u lu orhemen u ior i toron asema ne la, vande lun a ibo i awambe iyol. Semberee ne, lumun ku u Sefanu shi tema lu nengen er ior i toron asema er un nahan, ta orhenen u Yesu u tseen ishima ne awen zan zan kar kpen yô. (Aer. 7:57–8:1) Kpa ishima i i vihi Saulu a mbadondon Yesu mba ve lu ken Yerusalem la saa heela ga, kpa a kange ishima ér una tuur ior ve seer eren Mbakristu ican. Yange soo ér una bee a annongo u i nenge un ér ngu zan iyol, u i yilan un ér “gbenda la.”—Aer. 9:1, 2; nenge ngeren u kiriki u ken zwa Buter u a lu a itinekwagh ér “Saul’s Mandate in Damascus” la, ken takerada u “Bearing Thorough Witness” About God’s Kingdom, peeji 61.