Gbenda u Zuan a Msaanyol

SE CII sar se pe ma se lu saan saan, shin ka nahan ga?— Kpa sha mimi yô ka ior cii ve lu saan saan ga. Ú fa ityôkyaa kpa?— Ityôkyaa yô ve hen ve fa kwagh u a ne msaanyol la ga. Mba henen ér ka sha u lun a akaa kpishi la ve vea zua a msaanyol ye. Kpa ka vea zua a akaa ne cii je kpa, msaanyol ve la tse ga.

Kwagh u vesen u a lu yô, ka un je ne. Ortesen Uhemban yange kaa ér: “U nan a na kwagh hembe saan iyol a u ngohol a ngohol kwagh.” (Aerenakaa 20:35) Nahan gbenda u zuan a msaanyol yô, kanyi?— Ka u nan mbagenev akaa, shi eren akaa sha ci ve la. Ú fa nahan kpa?

De se seer timen sha kwagh ne. Yesu yange kaa ér or u nan ngohol iyua yô nana kera lu saan saan gaa?— Ei, yange kaa nahan ga. Ka wea zua a iyua nahan ka i doo ú kpishi, shin ka i doo ú ga?— Hanmaor cii ka i doo nan. Ka i saan se iyol shighe u ka a̱ na se akaa a doon yô.

Kpa Yesu kaa wener ka hembe saan se iyol shighe u se ne a na or kwagh la. Nahan ka an ú kaa wer nan hemba iyua i eren a hanma orgen ciilii?— Een, ka Yehova Aôndo.

Bibilo kaa ér ka Aôndo a “ne uumace cii uma man iôôn kua akaa cii ye.” Nee se ura shi te se iyange kpaa, nahan ne iyiav mbi vesen, se mba zough a kwagh u se ya yô. (Aerenakaa 14:17; 17:25) Kape i lu ve Bibilo i̱ yer Yehova ér: “Aôndo u saan saan” ne! (1 Timoteu 1:11 NW ) U nan mbagenev kwagh la ka môm ken akaa a a ne ve Aôndo a lu saan saan je la. Man shighe u se ne or kwagh yô, se kpa kwagh la una va se a msaanyol.

Nahan kanyi se lu a mi i̱ se fatyô u nan mbageneve? Ú kaa we nyi?— Ashighe agen iyua ka i taver ishe. Aluer ka iyua i ú za ker hen ijiir i teen kwagh ve ú zough a mi je kpaa, a gba u ú kimbi inyaregh sha mi. Nahan aluer ú soo u nan or imba iyua la yô, alaghga a gba u ú koso inyaregh zan zan kia ngee ve ú yam iyua la ye.

Kpa ka hanma iyua i yamen a yam ga. U tesen ikyav yô, shighe u oo ú te baveraa yô mngerem ma ndôhôr ka ma kundu iyol u man kpen kpen. Nahan shighe u imura i ker or man ú ne nan imba mnger la yô, ú zua a msaanyol u or u nan a na kwagh ka nan zua a mi la.

Alaghga iyange igen ú wase ngô ú ne kange akpekpa. A doo un kpishi. Kpa kanyi ú pande ú er a ikya akpekpa ne ve, ú zua a msaanyol a hemba er ma ú ye í cica cii we tswen ve ma ú zough a mi laa?— Een, ú fatyô u karen ikya akpekpa ne nan azende ou. Ú soo u eren kwagh nahan ashighe agen kpa?

Ortesen Uhemban man mbaapostoli nav cii yange ve fa msaanyol u or ka nana na a na kwagh ve, nan zua mi yô. Ú fa kwagh u yange ve na ior mbagen kpa?— Lu kwagh u hemban sha won cii! Yange ve fa mimi u sha kwagh u Aôndo, shi ve pase ior mbagenev loho u dedoo ne saan saan je. Ve er kwagh ne kpa ve lumun ér ma or môm nana̱ na ve inyaregh sha kwagh u ve na ve la ga.

Iyange igen yô, apostoli Paulu vea ijende na i ishima ishima, orhenen Luka, ve za zua a kwase ugen u wen kpa soo pe ma un zough a msaanyol u nan a na kwagh la yô. Ve zua a na hen kpe ifi. Paulu za hen ijiir la vea Luka sha ci u ve ungwa ér ka ijiir i eren msen her. Shi lu kwagh u mimi, sha ci u mba za aren hen ijiir la yô, ve kohol kasev mbagenev lu eren msen her.

Paulu maa hii u ôron kasev mban loho u dedoo sha kwagh u Yehova Aôndo man Tartor na. Môm ken ve yô lu Lidia, a ver ishima zulee kpaa. Mba been kera yô, Lidia soo ér una er kwagh u tesen ér mimi je loho u dedoo u un ongo la ú doo un. Nahan á zamber a Paulu man Luka, a kaa a ve ér: “Aluer nea fa ner m ne Ter jighjigh yô, va nyôr tsa nen her a mo.” Nahan á zer a ve gbem tsô, vé va hen ya na.—Aerenakaa 16:13-15.

Yange doo Lidia kpishi u van a ior mba Aôndo mban hen ya na. Ve doo un ishima sha ci u ve wase un u henen fan kwagh u Yehova man Yesu, shi fan kpaa er ior vea va lu uma gbem sha won yô. Nahan saan un iyol er un ker cio u nan Paulu man Luka kwaghyan man ijiir i tsan yô. Nahan iyua i Lidia yange na la, i̱ na un msaanyol sha ci u un kpa vande soon ér ma un ne iyua. Ka kwagh u i doo u se umbur je ne. Alaghga mbagen vea kaa a vese ér gba u se na iyua. Kpa aluer mimi je se soo u nan iyua shon ga yô, kwagh la una va se a msaanyol ga.

Ikyav i tesen yô, aluer ú ngu a ityamegh ki kuese u ú soo u yan ye? Aluer m kaa a we mer, coon kuese la na wanye ugen nahan, a saan we iyol u coon nan na̱n kpa?— Kpa aluer ú ngu a kuese man ú zua a ma ijende you u nan doo ú ishima tsung di ye? Aluer ú kar a ishima you ú na ijende you shon kwagh yô, a hemba saan we iyol gaa?

Ashighe agen or ka nan doo se ishima je yô se soo ser se na nan hanma kwagh cii, se tange ma kwagh sha ci wase ga. Er Aôndo a lu hemban doon se ishima seer a seer la, kape shi i doo u se nengen Un kpaa je la.

Ortesen Uhemban yange fa icankwase u un kpa nenge kwagh nahan yô. Yange nenge a na ken tempel ken Yerusalem. Lu di a isham sulee ihiar tseegh; lu kwagh u lu a mi cii je la. Kpa u tesen ikyav yô, yange kende isham sulee la cii shin akwati u inyar sha u nan naagh shin eren iyua sha ci u tempel. Or môm kpa nan kighir un ér a̱ er nahan ga. Ior mba ve lu her la kpishi ve fatyô u fan kwagh u kwase la er tsô kpaa ga. Á er nahan sha ci u á soo u nan iyua, shi lu sha ci u Yehova doo un ishima sha mimi yô. Yange saan un iyol er un fetyô u nan kwagh yô.—Luka 21:1-4.

Igbenda ngi kpishi i se fatyô u nan kwagh yô. Ú fatyô u henen igbenda shon igen kpa?— Aluer se na or kwagh sha ci u se soo u nan sha mimi yô, kwagh la una na se msaanyol. Ka nahan ve Ortesen Uhemban yange kaa a vese ér: ‘Naan nen’ ye. (Luka 6:38) Aluer se er nahan yô, se na a saan ior mbagenev iyol. Shi a hemba saan se iyol cii!