Ú Ngu ‘Tumen Angahar sha Gbough Ku Huren Ibua a Mini?’
SHA ayange a i lu ngeren Bibilo la, i yaren tom a gbough ku huren ibua—lu gbough ku lihen gôgônan, ku yange i wa myôm ma horon mbera mbera sha ityough nagh—sha u huren uzendenya mba tôôn ikyav a mi er ibua nahan. Yange a hure zendenya a gbough kun kpa una za mape ga, una gema a tumen a tume angahar sha gbough ku shon nahan i lu nyi i eree? Yange zendenya ne a zua a myôhôryol ga, kpa i gema i nyoon un a nyoon tsô.
Yesu Kristu yange ôr kwagh u gbough ku huren ibua a mi shighe u a nder shin ku kera la, a ôr kwagh ne zum u a ande hen orgen u i yilan un ér Saulu, shighe u or ne lu yemen ér una za kôr mbahenen mba Yesu yô. Saulu ungwa Yesu ôr kwagh a na ken iwanger i wanger kpishi, kaa ér: “Saulu, Saulu, ka nyi u tevem a icana? U we u tume angahar sha gbough ku huren ibua a mi la yô, ka u á nyoon we a nyoon tsô.” Mtev u Saulu lu tôvon Mbakristu a ican ne, lu Aôndo jighilii je lu nôngon kwagh a na ye, man kwagh u lu eren ne lu kwagh u una bula a bula iyol na tsô.—Aerenakaa 26:14.
Se kpa alaghga tsô se mba ‘tumen angahar sha gbough ku huren ibua a mi’ a u fan shioo? Bibilo kaa ér “asemberakaa a mbafankwagh” nga er utakera mba mgbeghan se, mba ka ve na se er kwagh vough yô. (Orpasenkwagh 12:11) Aluer se lumun kwaghwan u a dugh sha u ken Mkaanem ma Aôndo la yô ma a mgbegha asema a ase shi ma a kôôm se sha inja kpaa. (2 Timoteu 3:16) Aluer ma mgbeghan se kpa se mba hendan a ma yô, se mba bulan a bula iyol yase tsô.
Saulu yange ungwa mkaanem ma Yesu man, nahan a gema uma na, a hingir apostoli Paulu, Orkristu u doonshima. Se kpaa aluer se ungwa kwaghwan u Aôndo yô se zua a averen a aa lu gbem sha won yô.—Anzaakaa 3:1-6.
[Picture Credit Line on page 32]
L. Chapons/Illustrirte Familien-Bibel nach der deutschen Uebersetzung Dr. Martin Luthers