Hen Aeren A Vough A Mbakristu La Shi Tese Mbagenev A Kpaa
“Nahan we u u tesen mbagenev ne u kera tese iyol you gaa?”—MBAROMANU 2:21.
1, 2. Ka atôakaa a nyi u lu a mi a á ne ve u soo u̱ henen Bibiloo?
U NGU a atôakaa kpishi a henen Mkaanem ma Aôndo. Alaghga u soo u fan akaa a mimi a á lu ker la—akaa a ior man akaa a yange za hemen la, man ajiir kua akaa agenegh kpaa. Ú soo u fan atesen a mimi a á kaha kposo a atesen a ukwaghaôndo la, imba er Mbautar shin Igyamusu nahan la. (Yohane 8:32) Shi a doo ú u̱ fan kwagh u Yehova seer sha er u fatyô u kaven un doo doo, shi u lu a aeren a vough sha ishigh nagh kpaa yô.—1 Utor 15:4, 5.
2 Ityôkyaa i i gbe i zough sha kwagh ne shi i lu i vesen i henen Mkaanem ma Aôndo yô, ka u wan ago iyol sha er u tese mbagenev—mba ve doo u ishima man ahuraior a ou kua mba u lu a fa ve ga je kpaa la. Ka u Mbakristu mba mimi vea hen a hen kwagh u vea er sha kwagh ne ga. Yesu kaa a mbahenen nav ér: “Nahan yô, za nen, za gema nen akuraior cii a̱ hingir mbahenen, . . . tesen nen ve u kuran akaa a M we ne kwagh sha mi cii.”—Mateu 28:19, 20.
3, 4. Er nan ve i lu kwagh u icivirigh u we tesen kwagh er Yesu yange wa tindi nahana?
3 U henen Bibilo a isharen i tesen mbagenev la ka kwagh u civirigh shi kwagh ne una fatyô u lun imbor i mkom u tsan gbem kpaa. I ndera nengen tom u ticaa ér ka tom u civirigh je ka kwagh u hegen ga. Takerada u i yer ér Encarta Encyclopedia la kaa ér: “Mbaganden kpishi ken Mbayuda yange ve nenge atica ér ka mbakuran ior sha ci u myom shi yange ve wa mbayev kwagh er ve na atica a ve icivir je i gema i hemba icivir i nan mbamaren vev la.” Hemba kan kwagh u icivirigh cii u Mbakristu tesen ayol a ve sha u henen Bibilo shi tesen mbagenev kpaa.
4 “Ior hemba ngeen ken tom u ticaa aa hanma tom ugen cii. Sha tar jimin cii nomso man kasev mba ve lu atica kuma er miliôn 48 nahan.” (The World Book Encyclopedia) Or u eren tom ticaa nan ngu a tom u tesen igyumior man nana fatyô u tesen ve sha gbenda u anyom a kar imôngo je kpa a hungur ve ga yô. Zum u ú yar tom sha tindi u Yesu u a kaa ér se tese mbagenev la yô, ityesen you ia hemba kôron ve ken asema cii; ia fatyô u benden a ve gbem sha won. Apostoli Paulu ta iwanger sha kwagh ne shighe u wa Timoteu kwagh la, ér: “Ver ishima sha iyol you man ityesen you kpaa, taver ishima sha mi. Aluer ú er nahan yô, ú yima iyol you kua shi mba ve lu ungwan we la kpaa.” (1 Timoteu 4:16) Een, ityesen you ngi a myom sha mi.
5. Er nan ve ityesen i Mbakristu i hembe ciili?
5 Ka Tor u sha won cii u a lu Imbor i vesen la a ne zwa shi a kaa ér u̱ tese iyol you man mbagenev kpaa ye. Kwagh ne na yô, gbenda kwagh tesen ne hemba nyityô kwaghtesen u tar u lu tesen cii, aluer ka agbar a tyesenegh a ka i hii tesen or, man kwagh tesen u mfe u tom eren shin ityesen i twersôron je kpaa. Ityesen i Mbakristu wa mhen u wanyemakeranta henen iyol i nan u kaven Wan u Aôndo, Kristu Yesu shi tesen mbagenev u eren nahan kpaa.—Yohane 15:10.
Er Nan Ú Tesen Iyol Youwe?
6, 7. (a) Er nan i lu hange hange u se vande tesen iyol yase? (b) Ka sha nyi gbenda nahan Mbayuda mba sha derianyom u hiihii la yange ve yina u lun mbatesen jimin cii je?
6 Er nan ve i kaa ér se hii tesen iyou yase keng ne? Sha kpôô yô, aluer se vande henen kwagh la fan ga yô se fatyô u tesen mbagenev tsembelee ga. Paulu ôr kwagh sha kwagh ne var var ken ngeren na u kôron ken ishima u yange lu a inja hen Mbayuda mba sha ayange la yô, shi ngu a loho u hange hange sha ci u Mbakristu nyian kpaa. Paulu pine ér: “Nahan we u u tesen mbagenev ne u kera tese iyol you gaa? We u u yee wer, i̱ de iin ga ne, u gema u ngu iini? We u u kaan wer, i̱ de eren idya ga ne, u gema u ngu eren idya? We u u nyagh akombo ne, u gema u ngu yan ishar sha akaa a ken utempel mba mbaaôndo? We u u wuese wer u ǹgu a atindi ne u gema u ngu lahan Aôndo sha tindi u peren wouwee?”—Mbaromanu 2:21-23.
7 Sha u yaren tom a mbampin mba kpehen or ishima ne yô, Paulu tér akaa ahar a Atindi a Pue yange ôr kwagh sha mi jighilii yô, ér: De iin ga, shi de eren idya ga. (Ekesodu 20:14, 15) Mbagen ken Mbayuda mba sha ayange a Paulu la lu moron iyol er ve mba a Tindi u Aôndo. Ve lu ‘mba i tese ve kwagh u ken Atindi shi ve fe doo doo je er ve mbá mbahemen mba mbaapirashe shi ve mbá iwanger i mba ken ime, mbatesen mba ve lu a kuma ga la.’ (Mbaromanu 2:17-20) Nahan kpa, mbagen ken ve lu mbaeren atseregh gadia ve iin shin ve eren idya ken myer. Kwagh la lu u lahan Tindi man Orwantindi u a lu sha la kpaa. U fatyô u nengen je wer yange ve kuma u tesen mbagenev ga; sha kpôô yô, yange ve yina u lun mbatesen jimin cii je.
8. Mbayuda mbagenev mba sha ayange a Paulu la lu ‘yan ishar sha akaa a ken utempel’ nena?
8 Paulu tér kwagh u ishar i yan ken utempel. Mbayuda mbagen yange ve er kwagh nahan kpôô kpôô-ô? Paulu lu henen ér nyi? Sha mimi yô, se̱ fatyô u fan inja i u ‘yan ishar sha akaa a ken utempel’ la jighilii ga, gadia ivur ne i pase kwagh sha kwagh ne kpuaa tseegh. Tsuaa la orngeren u gar u Efese yôô wener ahuraior a Paulu mba ‘mbayan ishar sha akaa a ken utempel’ ga, man kwagh ne tese ér a hemba kera kera kpa, ior mbagen yange ve nenge Mbayuda kuma u eren kwagh nahan. (Aerenakaa 19:29-37) Yange ve lu yaren tom shin ve lu eren kpenga aa akaa a injaa aa yange i tôô ken uitya shin mba lun a gbashima sha kwaghaôndo yange ve tôô ken utempel mba ior mbafanaôndoga laa? Sha kwagh u Tindi u Aôndo a kaa yô, lu u or a tôô ieev mbi zenaria man azurfa sha ci u mgbe u nan ga, kpa lu u a tim mbi kera cii. (Duteronomi 7:25)a Nahan alaghga Paulu lu ôron kwagh u Mbayuda mba yange ve laha tindi u Aôndo sha u yaren tom shin zuan a mtsera sha akaa a yange lu a ken utempel mba mbafanaôndoga la.
9. Ka nyi akaa a eren a ken tempel u ken Yerusalem la yange lu vough er ishar i yan sha akaa a ken tempel nahana?
9 Josephus gema ôr kwagh ugen u yange Mbayuda mbagenev unyiin er sha ilyahan ken Roma yô, orhemen ve lu or tesen Atindi. Iorov mba unyiin mban bume kwase Roma ugen u yange nyôr nongo a Mbayuda yô ér, a na iyua i zenaria man akaa a injaa agenegh ken tempel u ken Yerusalem la. Mba ngohol akaa a taver ishe ne hen kwase ne yô, ve gba eren gbayol ve a mi—di vough er ve ya ishar sha akaa a ken tempel nahan.b Mbagenev lu yan ishar sha akaa a ken tempel u Aôndo sha u nan iniav mbi doon ga shi eren kasua sha hua ken tembe tempel, nahan geman tempel hingir “bar u mbanumunior.”—Mateu 21:12, 13; Malaki 1:12-14; 3:8, 9.
Tese Aeren a Vough a Mbakristu
10. Ka semakwagh u nyi u sha mkaanem ma Paulu ma i nger ken Mbaromanu 2:21-23 la i doo u se nenge ser ka beer kwagh ga?
10 Aluer ka nyityô ieren i sha derianyom u hiihii i í kou iv mbu iin man idya man ishar i yan sha akaa a ken tempel la ker yange Paulu lu ôron je kpaa, mayange se nenge nen semakwagh u ken kwaghôron na la ser ka beer kwagh ga. A pine ér: “Nahan we u u tesen mbagenev ne u kera tese iyol you gaa?” Ka kwagh u injaa u fan ser akav a Paulu tese la cii har sha kwagh u aeren a vough. Apostoli la har ishima sha atesen a Bibilo shin akaa a mbayiase heen ga. Ityesen i or tesen iyol i nan man mbagenev i Paulu a ôr kwagh sha mi la gba zua sha kwagh u aeren a vough a Mbakristu.
11. Er nan i doo u ú ver ishima sha kwagh u aeren a vough a Mbakristu er u lu henen Mkaanem ma Aôndo laa?
11 U se yaren tom a ityesen i se zough a mi ken Mbaromanu 2:21-23 la inja na yô, ka u henen aeren a vough a Mbakristu ken Mkaanem ma Aôndo shi eren kwagh u se hen la shi tesen mbagenev u eren nahan vough. Nahan yô, shighe u ú lu henen Bibilo yô, ver ishima u fan atindiakaa a Yehova, aa lu imaagh ki ieren i vough i Mbakristu mba mimi la. Gbidye kwar sha kwaghwan man ityesen i u zough a mi ken Bibilo la. Nahan kange ishima yar tom sha kwagh u ú hen la. Shi gba u ú lu a ishimataver kua ishimaveren tsung sha u eren kwagh ne. Ka kwagh u zange u uumace mba ve yen ne keren ishô man atôakaa aa i hii ve i doo u vea er ma kwagh yô, shin aa i gbe u vea venda ieren i vough i Mbakristu la sha iaven igen kuaa je yô. Alaghga Mbayuda mba Paulu a tér kwagh ve ne tsa tom ken imba mhen u sha ayom u ka i ver ishigh u palegh iyol sha kwagh shin tsumen a mbagenev la. Mkaanem ma Paulu gema tese ér doo u or nana nenge aeren a vough a Mbakristu la ér á gba ma kwagh ga shin nana venda aeren shon sha kwagh u nan nenge i doo nan la ga.
12. Ieren i dedoo shin ieren i bo i bende a Yehova Aôndo nena, shi er nan ve i lu kwagh u wasen se u fan kwagh ne nahan ken ishima yase?
12 Apostoli la ôr kwagh sha ityôkyaa i vesen i henen kwagh shi yaren tom sha kwagh u aeren a vough a se zough a mi ken Bibilo la var var. Anzaabo a Mbayuda la yange bende a Yehova: “We u u wuese wer u ngu a atindi ne u gema u ngu lahan Aôndo sha tindi u peren wouwee? . . . Ka ne je ne ne i lu tuhwan iti i Aôndo hen atôatyev ye.” (Mbaromanu 2:23, 24) Nyian ne kpa kwagh una lu nahan vough, aluer se hure aeren a vough a Mbakristu la yô, ka Imbor i a la je se lu lahan ye. Kpa aluer se gema di se kôr atindiakaa a Aôndo dông yô, kwagh ne una bende a na sha gbenda u dedoo shi a lu icivir hen a na kpaa. (Yesaia 52:5; Esekiel 36:20) U we fan wer kwagh ngu nahan la una fatyô u taver ishima i kangen iyou shighe u ú tagher a ameen shin mbamlu mba i lu inja er u̱ huren aeren a vough a Mbakristu la ka gbenda u zange shin u ú hembe doon u eren kwagh je la yô. U seer yô, mkaanem ma Paulu tese se kwagh ugen kpaa. Dugh u we iyol you fan wer ieren you i bende a Aôndo yô, er u lu tesen mbagenev la, wase ve ve̱ fa ér myar u ve lu yaren tom sha atindi a aeren a vough a ve lu henen la bende a Yehova. Gban kan di sha ci u aeren a vough a Mbakristu nga ne mkom shi nga kuran mkpeyol u or yum ga. Kwagh ne bende a Or u a né shi a taver se ishima u eren aeren a vough la kpaa.—Pasalmi 74:10; Yakobu 3:17.
13. (a) Bibilo i wase se sha kwagh u aeren a vough la nena? (b) Pase jimin kwagh u a lu ken kwaghwan u ken 1 Mbatesalonika 4:3-7 la.
13 Aeren a vough bende a uumace mbagenev kpaa. U fatyô nengen a akav la ken Mkaanem ma Aôndo ma ma tese mluainja u yaren tom sha atindi a Aôndo a sha aeren a vough la man kwaghbo u a lu sha u vendan á la. (Genese 39:1-9, 21; Yosua 7:1-25) Shi ú fatyô u zuan a imba kwaghwan u vesen ne sha kwagh u aeren a vough nahan ér: “Gadia ishima i Aôndo yô, ka i ne, ka mtsegh wen; nyagh nen idya. Hanma or ker a ven nana̱ fa er nana er kwase u nan iyol i nan sha icighanmlu man iko i wan kpaa. I̱ de luun sha ishima i kenden i isharen i bo er atôatyev a a fe Aôndo ga la nahan ze. Ma or môm nana̱ de kera tsughun anmgbian u nan sha kwagh ne, nana̱ eren nan kwagh u vihin [ian i nan] ga, . . . gadia Aôndo yila se ka sha ci u hwanger ga kpa ka sha icighanmlu je.”—1 Mbatesalonika 4:3-7.
14. Kanyi ú fatyô u pinen iyol you sha kwaghwan u a lu ken 1 Mbatesalonika 4:3-7 laa?
14 Ior kpishi vea fatyô u nengen sha kwagh u avur ne a kaa la ér, idya i eren ka kwagh u a kaha kposo a aeren a vough a Mbakristu yô. Nahan kpa, u fatyô u henen kwagh sha kwagh ne hemban heela. Avur agen tese igbenda i henen kwagh shi gbidyen kwar man zuan a mkav kpaa kpishi je. Ikyav i tesen yô, u fatyô u gbidyen kwar sha inja i kwagh u Paulu a kaa ér u nyôron iyol ken idya i eren la una fatyô u nan or nana ‘tsugh anmgbian u nan sha kwagh ne, nana̱ er nan kwagh u vihin’ la yô. Ka akaa a nyi a lu ken kwagh ne, shi u kaven a la una seer mgbeghan we u lun a aeren a vough a Mbakristu la nena? Kwagh u ú zough a mi sha imba kwagh tôvon ne una fatyô u seer wan we ago a tesen mbagenev shi wasen ve u civir Aôndo nena?
Hen Kwagh sha Er Ú Tese Yô
15. Ka ikyav mbi tomough mbi nyi u fatyô u yaren tom a mi sha u tesen iyol you shighe u ú lu henen kwagha?
15 Mbashiada mba Yehova mba a ikyav mbi tomov mbi ve yaren tom a mi u tôvon kwagh sha mbampin, shin sha akaa a ve tagher a mi ken kwagh henen ve u ve lu henen sha u tesen ayol a ve shin mbagenev la. Ikyagh ki tomough ki gen ki ki lu ken ijô kpishi yô, ka takerada u i yer ér Watch Tower Publications Index la. Aluer u ngu a mi yô, u fatyô u yaren tom a mi u keren kwagh ken ityakerada i Mbashiada mba Yehova i í har sha Bibilo la. U fatyô u timen sha itinekwaghôron shin sha ivur Bibilo. Ikyagh ki tomough ki gen ki Mbashiada mba Yehova ve lu a mi ken ijô i vesen kpishi yô ka ki i yer ér Watchtower Library la. Kwagh u a lu sha tser u kômputa ne ngu a ityakerada ker kpishi je. Kwagh ne ngu a wase or u timen sha itinekwagh kua mpase u avur a ruamabera kpaa. Aluer u ngu a ikyagh ki tomough kin i môm shin mbi cii kpaa, yar tom a mbi nduuruu er u lu henen Mkaanem ma Aôndo la sha er u tese mbagenev yô.
16, 17. (a) Ka hana u fatyô u zuan a akaaôron a tan iwanger sha kwagh u eren kwagh u vihin or u i tér ken 1 Mbatesalonika 4:6 laa? (b) Ka sha igbenda i nyi nahan idya i eren ia fatyô u lun kwagh u vihin mbageneve?
16 Se nenge nen sha ikyav i se vande ôron kwagh teren sha heen ken 1 Mbatesalonika 4:3-7 la. Mpin ngu u a dugh sha kwagh u akaa a vihin or la yô. Ka akaa a nyi? Ka nena or a er kwagh u vihin oro? Sha u yaren tom a ikyav mbi tomov mbi i tér ne yô, alaghga u zua a akaaôron a tan we iwanger sha avur ne, sha kwagh u kwagh u vihin u Paulu a ôr kwagh sha mi la kpaa. Ú fatyô u ôron ambaakaa ne ken takerada u i yer ér Insight on the Scriptures, tihi u sha 1, peeji 863-864; man takerada u True Peace and Security—How Can You Find It? la, peeji 145; Iyoukura (zwa Buter) i Novemba 15, 1989, peeji 31 la.
17 Sha u henen kwagh ne yô, u nenge wer ityakerada ne tese e̱r mkaanem ma Paulu man ma lu mimi yô. Idyaor ka nan er Aôndo isholibo shi nan tsen iyol i nan sha uange. (1 Mbakorinte 6:18, 19; Mbaheberu 13:4) Nomsoor u nan nyer iyol ken idya i eren yô, ka nan er kwagh u vihin kwase u nan er isholibo a nan la sha igbenda kpishi. Nan nyume kwase la mlu u lun a mtil u vough man imoshima i dedoo la. Aluer nan ngu kwav yô, or la nyume nan ian i lun iniunkwase sha shighe u nan er ivaa la, shi nan vihi ian i nom u nana va vôso nan la i̱ eren iniunkwase. Nan er kwagh u vihin mbamaren mba kwase la man nom u nan kpaa aluer nan ngu a nom yô. Idyaor la vihi ian i tsombor u nan lun a aeren a vough. Aluer nan ngu ken tiônnongo u Mbakristu yô, nan va a ilyahan man iti vihin sha mi.—1 Mbakorinte 5:1.
18. U zua a iwasen ken Bibilo i henen sha kwagh u aeren a vough a Mbakristu la nena?
18 Akaaôron a sha kwagh u eren akaa a vihin or la na ivur la hemba wanger we gaa? Sha kpôô yô, u henen kwagh sha imba gbenda ne ka kwagh u injaa kpen kpen. Er u lu timen sha kwagh la, ú ngu tesen ka iyol you. Mkav u we kaven mimi man tahav mbu loho u Aôndo la una seer vesen. Ú hemba taver mkange u ú kange ishima you u lun a aeren a vough a Mbakristu her la, aluer ka nyityô imeen ia va je kpaa. Shi hen ase er u fatyô u hemban lun ortesen u nan fe ityesen doo doo la yôô! Ikyav i tesen yô, u fatyô u nan mbagenev mkav u ken 1 Mbatesalonika 4:3-7 la sha shighe u ú lu tesen ve mimi u ken Bibilo la, nahan u lu seer mkav ve man mdoo u aeren a vough a Mbakristu a doo ve la. Sha nahan yô, kwaghhenen wou la una fatyô u wasen we man mbagenev u civir Aôndo. Man ka di ikyav i môm i ken washika u Paulu nger hen Mbatesalonika la tsô se tér ye. Avegher agenegh kpa nga sha kwagh u aeren a vough a Mbakristu la shi kape akav a ken Bibilo kpaa a lu sha mi kaveraa je la, shi asemaakaa a wan kwagh a se fatyô u henen shi yaren tom a mi man tesen á kpaa nga.
19. Er nan ve i lu hange hange u we eren aeren a vough a Mbakristu laa?
19 Akperan a tan a fatyô u lun sha kwaghfan u a lu sha u eren kwagh ne ga. Yakobu 3:17 kaa ér “kwaghfan u a dugh Sha,” hen Yehova Aôndo iyol na la, “ka u wang.” Kwagh ne tese wanger wanger e̱r i doo u dondon atindi a aeren a vough a Aôndo la yô. Sha kpôô yô, Yehova soo ér mba ve til sha ci na u tesen Bibilo la ve lu a akav a dedoo aa “mlu u wang.” (1 Timoteu 4:12) Gbenda u uma u mbahenen mba tsuaa amba er Paulu man Timoteu nahan tese kwagh la; ve palegh idya i eren, je yô, Paulu nger wener: “Kpa idya man hanma inja i hôngorough kua hua u eren yô, u teren tsô kpaa, de teren her a ven ga er i kom uicighanmbaiorov yô. Hwanger man kwaghôron u sha beer man asenge a doon ga la cii.”—Mbaefese 5:3, 4.
20, 21. Er nan ve ú lumun a kwagh u apostoli Yohane yange nger ken 1 Yohane 5:3 laa?
20 Shin er atindi a aeren a vough a ken Mkaanem ma Aôndo la a wanger man a lu jighilii nahan kpaa, nga kwagh u yuhwan je ganden ga. Yohane yange fa kwagh ne nahan, un u lu apostoli u hemban tsan la. Sha akaa a yange nenge a mi ken uma na cii la yô, a fa wener aeren a vough a Mbakristu la ka kwagh u vihin ga. U ma i lu nahan yô, lu kwagh u doon man u wasen man u a lu a averen ker kpaa yô. Yohane ôr kwagh var var sha kwagh ne, ér: “Gadia ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.”—1 Yohane 5:3.
21 Kpa fa wer, Yohane yange tese ér u ungwan imo i Aôndo sha kwagh u aeren a vough a Mbakristu la ka gbenda u hemban doon sha ci u ngu u yima di or sha ikyev i mbamzeyol, man sha ikyev i kwaghbo u ka a va aluer nan er nahan ga la tseegh tsô ga. Yange tese kwagh u a lu u vough sha kwagh ne yô, sha u vanden lumun ér, kwagh ne ka gbenda u pasen mdoo u Yehova Aôndo a doo se ishima la, shi ka ian i injaa i se lu a mi i tesen un dooshima wase yô. Sha mimi yô, u or tesen iyol i nan kua mbagenev sha u Aôndo a doo ve ishima la gba u nana lumun shi nana yar tom sha atindi a na a tseng la. Een, inja i kwagh ne yô, ka u tesen iyol yase man mbagenev aeren a vough a Mbakristu la.
[Footnotes]
a Er Josephus lu ôron kwagh u Mbayuda wener mba lahan uicighanmbaakaav ga nahan kpa, a hide a ôr kwagh u tindi u Aôndo sha gbenda u ngun nahan ér: “Or môm nana de lahan mbaaôndo mba agar agenegh a civir la ga, shin yan ishar i akaa a ken utempel mba akuraior ga shin tôôn akaa a injaa a i tsegh ken iti i ma aôndo ugen ga.” (Ka se se nger i yier ye)—Jewish Antiquities, Takerada u sha 4, ityough ki sha 8, ikyumhiange i sha 10.
b Ngeren u i yer ér Jewish Antiquities la, Takerada u sha 18, ityough ki sha u 3, ikyumhiange i sha 5.
Baver We Kpa?
• Er nan i gbe u se hen kwagh sha er se tese iyol yase cii ve se tese mbageneve?
• Inja yase ia fatyô u benden a Yehova nena?
• Idyaor nana fatyô u eren kwagh u vihin or nena?
• U kange ishima wer u er nyi sha kwagh u aeren a vough a Mbakristu laa?
[Picture on page 20]
‘Atindi a Na nga yuhwan se ga’