U Doo Yehova Ishima Kpishi

 1. Ka wea hen sha kwagh u Yehova nahan ka nyi ka i va u ken ishima?

I LU nahan u nôngo wer u ta ashe ken ishima you u nenge er Yehova a lu vee? Ka nyi ka i va u ken ishima shighe u u lu eren msen hen a naa? Er i lu u se fatyô u nengen a Yehova ga nahan kpa, Bibilo pase se mlu na sha igbenda kposo kposo. I yila Yehova ér “iyange man perutya,” shi i yila un ér “usu u hian kwagh vindi vindi.” (Ps. 84:11; Heb. 12:29) Esekiel yange ôr kwagh u Yehova ken mpase u sha mnenge ér ngu er iwen i safir, man iyôgh ki engem kua ikyume i doon kenger nahan. (Esek. 1:26-28) Alaghga se hen sha igbenda igen i i ôr kwagh u Yehova la yô, a kpiligh se iyol shin a lu se inja er se kuma u van ikyua a na ga nahan.

 2. Ka nyi alaghga ia na a taver mbagenev u kporom ikyua a Yehova?

² Alaghga a taver se u nan jighjigh ser se doo un ishima sha ci u se mba nengen a na ga. Shi alaghga a taver se u nan jighjigh ser se doo Yehova ishima sha ci u akaa a vihin a yange er se la. Adooga se mba a ter u se doo nan ishima ga. Nahan kpa, Yehova fa er ka i lu se ken ishima la, shi a fa er i hii ve alaghga a taver se u kporom ikyua hen a na la kpaa. Sha nahan yô, a pase se ken Mkaanem nam er un lu a aeren a doon tsung yô.

 3. Er nan ve i doo u se hen sha kwagh u dooshima u Yehova laa?

³ Ishember i i hembe pasen kwagh u Yehova tsembelee yô ka dooshima. Yehova ka dooshima. Bibilo kaa ér “Aôndo ka dooshima.” (1 Yoh. 4:8) Ka dooshima a mgbeghan Yehova u eren hanma kwagh u a eren cii ye. Uumace doo un ishima kpishi je yô, ka a er kwagh a mba ve civir un, kua mba ve civir un ga la je kpaa sha dooshima. (Mat. 5:44, 45) Ken ngeren ne, se lu hemban veren ishima sha kwagh u Yehova kua dooshima na la. Er se lu henen kwagh u Aôndo wase seer la, kape una lu hemban doon se ishima je la.

SE DOO YEHOVA ISHIMA KPISHI

 4. Dooshima u Yehova la na ka u ken ishima nena? (Shi nenge foto kpaa.)

⁴ ‘Yehova eren a vese kundu kundu.’ (Yak. 5:11) A kaa ér un ngu er ngô u mhôônom ma ker nan a ônov mba nan shin nan eren a ve kundu kundu nahan. (Yes. 66:12, 13) Hen ase sha kwagh u ngô u wan u nan a doo nan ishima kpishi shi a we nan ikyo yô. Ka nan kôr wan u nan sha ikyum, nan lamen a nan kundu kundu man sha imo i legh legh kpaa. Kwagh ka una er wan la u vihin shin nana vaan yô, ngô la a nôngo sha afatyô na cii ér zayol u wan la a bee. Se kpa shighe u se tagher a zayol yô, se fatyô u lun a vangertiôr ser dooshima u Yehova la una mgbegha un u wasen se. Orpasalmi yange nger wener: “Zum u mbamhen ve ngeem ken ishima yô, mbamsurshima Ou nam ishima i saan saan.”—Ps. 94:19.

 5. U nenge dooshima u Yehova u a geman ga la nena?

⁵ Yehova ka Aôndo u mimi. (Ps. 103:8) Ka sea er kwaghbo kpa te se kera ga, ka a za hemen u soon se her. Ikyurior Iserael yange i va Yehova ahenge a cin imôngo. Kpa er ve gema ishima sha akaabo a ve yô, Yehova tôndo zwa ér una za hemen u eren kwagh a ve sha dooshima. Yange kaa ér, mba un kwagh u icivirigh, shin ve gba un kwagh shi ve doo un ishima kpaa. (Yes. 43:4, 5) Nyian ne kpa, kape se doo Yehova ishima vough je la. Se fatyô u lun a vangertiôr hanma shighe ser Yehova una er kwagh a vese sha dooshima. Aluer se er akaa shami ga je kpa, Yehova una kende se ga. Aluer se gema ishima shi se hide hen a na yô, una ngohol se nahan se nenge er se doo un ishima her yô. A tôndo zwa ér ‘una de se a kwaghbo wuee.’ (Yes. 55:7) Bibilo kaa ér Yehova ka una deen se a akaabo ase nahan yô, ‘Yehova iyol na a va se a ashighe a mmem.’—Aer. 3:19.

 6. Ka nyi Sekaria 2:8 a tese se sha kwagh u Yehova?

⁶ Ôr Sekaria 2:8. Er se doo Yehova ishima yô, ka a fa er i lu se ken ishima la shi a kegh iyol u kuran se. Shi ka sea yaan ican yô, i vihi un. Sha nahan yô, se fatyô u eren msen hen a na a ishima i gbar gbar ser: “Kuram er hongorshe [wou] nahan.” (Ps. 17:8) Ishe ka ilegh ki iyolough ki injaa, shi kwagh ka una bende a mi je maa se fa. Nahan er Yehova a tôô se a kar sha hongorshe na yô, ka inja vough er ngu kaan ér, ‘Or u nan er ior av kwagh u vihin yô, nan ngu benden a kwagh wam u injaa’ nahan.

 7. Er nan ve i gbe u se seer lun a vangertiôr ser se doo Yehova ishima?

⁷ Yehova soo ér se asange asange se fa ser se doo un ishima. Kpa a fa er alaghga akaa a a er se ken uma la, aa na a taver se u fan ser se doo un ishima yô. Shin alaghga se mba tagher a akaa agen hegen a a ne i taver se u nan jighjigh ser se doo Yehova ishima yô. Se er nan ve se seer lun a jighjigh u nan ser se doo un ishima? Aluer se hen sha akaa a Yehova a er u tesen ér Yesu man mba i shigh ve mkurem kua se cii se doo un ishima la yô, kwagh la una wase se.

AKAA A YEHOVA A ER U TESEN ÉR UN NGU A DOO ISHIMA YÔ

 8. Yesu yange lu a vangertiôr ér un doo Ter na ishima sha ci u nyi?

⁸ Yehova yange lu vea Wan na u ishima ishima la anyom imôngo, nahan ve hingir u lun kôôsôô shi soon ayol a ve kpaa. Ka Yehova vea Yesu ve ye ijende i i hembe tsan sha won jimin cii ye. Yehova ôr ken Mateu 17:5 wang er Yesu a doo un ishima yô. Yange una soo yô, man gba ôron di tsô ér, ‘U ngun ne ka u i doom a na yô.’ Nahan kpa, yange soo ér se fa er Yesu a doo un ishima kpishi yô, ka nahan ve yange yila un ér “Wan wam u ishima ishima” ye. Yange saan Yehova iyol a Yesu hemban je yô, er yange kegh iyol u nan uma na sha ci u uumace yô. (Ef. 1:7) Yesu yange henen a hen ér un doo Ter na ishima ga. Kpa yange fa wang er un doo un ishima yô. Yange ôr a vangertiôr kwa kimbir kimbir er un doo Ter na ishima yô.—Yoh. 3:35; 10:17; 17:24.

 9. Ka ishember i nyi i tese ér mba i shigh ve mkurem la doo Yehova ishima? Ta iwanger. (Mbaroma 5:5)

⁹ Yehova shi tese wang er mba i shigh ve mkurem la, ve doo un ishima yô. (Ôr Mbaroma 5:5.) Nenge kwagh u a ôr u tesen ér ve doo un ishima la. Bibilo kaa ér Yehova ‘wase ve u fan’ ér ve doo un ishima. Takeda u pasen asember a ken Bibilo ugen ôr kwagh u dooshima u Yehova ér ngu er ka mngerem nahan. Kwagh ne tese wang ér mba shigh ve mkurem la doo Yehova ishima tsung! Mba i shigh ve mkurem la ve fa er ‘ve doo Aôndo ishima’ yô. (Yuda 1) Apostoli Yohane yange ôr er i lu mba i shigh ve mkurem la ken ishima yô. A kaa ér: “Nenge imba dooshima u Ter a tese se sha u i yilan se ér ônov nav ne sha wono!” (1 Yoh. 3:1) Ka mba i shigh ve mkurem la tseegh ve doo Yehova ishima yee? Ei, Yehova tese ér se cii se doo un ishima.

10. Ka nyi Yehova a er i hemban cii u tesen ér u doo un ishima?

¹⁰ Ka nyi Yehova a er i hemban cii i tesen ér se doo un ishima? Ka sha u nan Wan na ér a va kpe sha u paan se. Sha nahan yô, a tese dooshima u hemban sha won cii! (Yoh. 3:16; Rom. 5:8) Yehova yange na Wan na u môm môm la, ér a va kpe sha ci u uumace, sha er una fatyô u den se a asorabo shi se hingir azende a na yô. (1 Yoh. 4:10) Aluer se mba henen sha kwagh u Yehova kua Yesu yange ve er sha u paan se la yô, kwagh la una wase se u seer fan er se doo ve ishima kpishi yô. (Gal. 2:20) Yehova vea Yesu yange ve na nagh ku ipaan kura di tsô ér gba u a er nahan ga. Kpa lu sha ci u se doo ve ishima. Yehova tese ér se doo un ishima sha u nan Yesu u a lu Wan na u a hembe doon un ishima la, ér a va paa se. Yange de ér Wan na a va ya ican, shi a kpe sha ci wase.

11. Ka nyi se hen ken Yeremia 31:3 laa?

¹¹ Er se nenge nahan, Yehova yeren se ga kpa ka a pase se wang ér se doo un ishima. (Ôr Yeremia 31:3.) Yehova urugh se va a mi hen a na sha ci u se doo un ishima. (Nenge Duteronomi 7:7, 8.) Kwagh môm shin or môm nana fatyô u paven se a dooshima na la ga. (Rom. 8:38, 39) Dooshima na la, ka a na i lu u ken ishima nena? Ôr Pasalmi 23, nahan nenge er gbenda u Yehova tesen Davidi dooshima shi nengen sha a na la ua fatyô u wasen se cii nyian yô.

DOOSHIMA U YEHOVA LA KA A NA I LU U KEN ISHIMA NENA?

12. U sav pasen kwagh i u nger ken Pasalmi 23 la nena?

¹² Ôr Pasalmi 23:1-6. Ken Pasalmi 23 la, Davidi pase er un doo Yehova ishima shi a nengen sha a na yô. Davidi yange ôr er un lu kôôsôô a Yehova, Orkuran un la yô. Yange nenge ér aluer un de ér Yehova a hemen un yô, una hemba lun ken mkor, nahan a suur sha Yehova a ishima na cii. Davidi yange fa je ér una za hemen u doon Yehova ishima ken ayange a uma na cii. Er nan ve yange lu a vangertiôr nee?

13. Davidi yange lu a vangertiôr ér Yehova una nenge sha a na sha ci u nyi?

¹³ “Kwagh môm banem ga.” Davidi yange fa je ér kwagh môm a ban un ga sha ci u hanma shighe yô, Yehova a nenge sha mbamgbe nav. Shi yange fa ér Yehova ka ijende na shi a lumun un. Ka nahan ve yange lu a vangertiôr ér aluer ka nyi je ia va er un ken hemen kpa, Yehova una za hemen u nengen sha mbamgbe nav cii ye. Er Davidi fa ér un doo Yehova ishima shi Yehova una nenge sha a na yô, ishima kera nyian un ga, kpa saan un iyol shi kwagh u lu a mi la kuma un.—Ps. 16:11.

14. Yehova una nenge sha a we doo doo nena?

¹⁴ Yehova nengen sha a vese doo doo hemban je yô, shighe u akaa a vihin a er se yô. Anmgbian u kwase ugen iti na ér Claire.a A er tom shin Betel hemba anyom 20 hegen. Yange mbamzeyol mba vesen ta sha tsombor na man lu fan kwagh u una er u wasen ve ga. Yange ter na gba strooku shi i dugh anmgbian na u kwase ken tiônnongo kera, shi tsombor na kera lu a inyaregh kua ijiir i tsan ga. Yehova yange nenge sha a ve doo doo nena? Claire kaa ér: “Hanma iyange yô, Yehova yange a na tsombor wam akaa a kwagh a gbe ve a mi la. Ashighe kpishi Yehova yange a na se akaa je i hemba akaa a kwagh a gbe se a mi la! Ka m hen sha ashighe a Yehova a wase se la, mayange me hungur a dooshima na la ga. Kwagh ne ka a wasem m za hemen u civir Yehova saan saan shighe u mbamzeyol mbagenev ve te sha a mo je kpaa.”

15. Davidi yange zua a mmem sha ci u nyi? (Shi nenge foto kpaa.)

¹⁵ ‘A er yôhôr uma wam iyol.’ Ashighe agen mbamzeyol kua atsan a Davidi lu tagher a mi la a na yô i lu un ken ishima hang. (Ps. 18:4-6) Kpa Davidi yange zua a mmem sha ci u Yehova lu nengen sha a na shi tesen un dooshima. Yehova yange za a ijende na i i vôr ne “henpe agumatoho a hem,” kua hen “mngerem ma ma lu ving yô.” Nahan Davidi hide zua a agee shi za hemen u civir Yehova saan saan.—Ps. 18:28-32.

16. Dooshima u Yehova la na pever we iyol nena?

¹⁶ Nyian kpa, dooshima u Yehova u a geman ga la ka a wase se u wan ishima shighe u se tagher a atsan shin se lu nôngon a mbamzeyol yô. (Ukwe. 3:22; Kol. 1:11) Nenge ase kwagh u yange er anmgbian u kwase ugen yô, i iti na ér Rachel. Yange nom na undu un shi de u civir Yehova hen shighe u angev mbu Korona la. Kwagh ne yange vihi anmgbian u kwase ne kpen kpen. Yehova yange wase un nena? A kaa ér: “Yehova yange nôngo ér mo m fa mer m doo un ishima. Yange nam azende a yange a lu vea mo shi a vam a kwaghyan shi a tindim a ilyoho kua avur a Bibilo a taver mo ishima yô. Yange se lam, shi se se imôngo shi ve umbur mo er Yehova a lu nengen sha a mo her yô. Hanma shighe yô, ka m shi wuese Yehova er a nem m lu ken zege tsombor u se doo ayol a ase ne yô.”

17. Er nan ve Davidi yange “cia kwagh u bo ga”?

¹⁷ “Me cia kwagh u bo ga, sha ci u We U lu a mo.” Hanma shighe yô, uma u Davidi yange a lu sha zongo sha ci u lu a mbahyomov mba ageegh kpishi. Nahan kpa er Davidi doo Yehova ishima yô, fa je ér kwagh u eren un ngu ga. Davidi yange fa ér Yehova ngu vea na ken hanma mlu cii, nahan kwagh la taver un ishima. Ka nahan ve yange wa icam kaa ér: “[Yehova] dughum ken mciem am cii” ye. (Ps. 34:4) Shin er ashighe agen yange i cier Davidi iyol kpishi nahan kpa, yange fatyô u wan ishima sha ci u fa ér un doo Yehova ishima.

18. Er u fe wer u doo Yehova ishima yô, kwagh la una fatyô u taver we ishima shighe u i cier we iyol nena?

¹⁸ Ka sea fa ser se doo Yehova ishima nahan, kwagh la a taver se ishima shighe u se nyer ken mbamlu mba cieryol nena? Anmgbian u kwase ugen u a lu pania yô, i iti na ér Susi. A pase er yange lu un vea nom na ken ishima shighe u wan ve wua iyol na yô. A kaa ér: “Kwagh u vihin tsung ka una er u yô, kwagh la a bende a uma wou jimin cii, shi i lu u er u ngu a or môm u wasen we ga nahan. Kpa dooshima u Yehova la na yô, se fa ser se mba ken mkor shi kwagh u eren se ngu ga.” Rachel u se vande ôron kwagh na la kaa ér: “Sha iyange igen la tugh m vaa a Yehova genger genger, sha ci u ishima zam iyol shi ishima vihim ker shi cier mo iyol kpishi. Her ave ave la je maa mnenge mer Yehova surum ishima shi a na ishima gbam shimi, er ngô ka nan er a wan u nan nahan, maa m gba mnyam je. Mayange me hungur a tugh mbura ga cii.” Anmgbian ugen u a lu ortamen yô iti na ér Tasos. Yange i wuhe un ken purusu sha ci u a venda u zan shoja yum. Yehova yange tese un dooshima shi nenge sha a na nena? A kaa ér: “Yehova yange nam akaa je hemba akaa a kwagh gbam a mi la. Kwagh ne na yô, m seer lun a vangertiôr mer me fatyô u suur sha na a ishima yam cii. Shi er purusu u m lu ker la lu ijiir i doon ga nahan kpa, icighan jijingi u Yehova na yô, saan mo iyol. Kwagh la wasem u fan mer aluer m za hemen u suur sha Yehova yô, una za hemen u tesen mo dooshima. Nahan maa m hii u eren un tom sha ian i pania u keke la ken purusu.”

KPOROM IKYUA A AÔNDO WOU U U DOO UN ISHIMA LA

19. (a) Aluer se fa ser se doo Yehova ishima yô, kwagh la una bende a gbenda u se eren msen la nena? (b) Ka gbenda u han u hembe doon we ken igbenda i i ôr kwagh u dooshima u Yehova laa? (Nenge ngeren u kiriki u a lu a itinekwagh ér “Akaa A a Wase Se u Fan Ser Se Doo Yehova Ishima Yô” la.)

¹⁹ Akaa a se lam sha mi ne cii tese ér Yehova, “Aôndo u dooshima” la ngu a vese! (2 Kor. 13:11) Kwagh u hanma wase gba un ishima. Se mba a vangertiôr ser erdoo, shin dooshima na la una wa se atô. (Ps. 32:10) Aluer se mba henen sha akaa a Yehova a er u tesen se dooshima la hanma shighe yô, se lu hemban nengen er kwagh wase a gbe un ishima yô, kwagh la una na se seer kporom ikyua a na. Se fatyô u eren msen hen a na a ishima i gbar gbar, shi pasen un er kwagh a gbe se a dooshima na la yum yô. Se fatyô u ôron un akaa a a ne se ishimanyian la cii, sha ci u se mba a vangertiôr ser a fa er i lu se ken ishima la shi a kegh iyol u wasen se.—Ps. 145:18, 19.

20. Dooshima u Yehova la ka a wase se u kporom ikyua a na nena?

²⁰ Er wuhe ka ua kôr se, sea ôso usu ve i kera ndôhôr se ga nahan, kape dooshima u Yehova la kpa una fatyô u surun se ishima shighe u se tagher a atsan shin mbamzeyol je la. Sha nahan yô, lumun dooshima u Yehova la a sur u ishima shi a na u bem. Yô, se cii se lumun a dooshima na ne sha u kaan ser: “TER doom ishima!”—Ps. 116:1.