Yehova Ka Ter Wase Uhembansha!

“TER Uhembansha cier iyol kpekpe, ka zegetor sha won cii.”—PS. 47:2.

 1. Mkaanem ma Paulu ma i nger ken 1 Mbakorinte 7:31 la, ma tese ér Paulu lu ôron nyi?

APOSTOLI Paulu yange kaa ér: “mluashe u tar ne ngu karen kera.” (1 Kor. 7:31) A shi nan kpa Paulu lu tôôn mlu u tar ne karen sha tsembe u eren iniumbe, u mbaanumbev ve lu sha mi, ve lu eren iniumbe tesen akaabo man a doon zan zan iniumbe la i kar been yô.

2, 3. (a) A fatyô u tôôn nongo u u hendan kwagh a hemen u Yehova la karen sha nyi? (b) Ka mbampin mba nyi se lu timen sha mini?

² Nyian ne, iniumbe igen i hemban lun a inja cii ngi zan hemen, man we kpa u ngu ker! Kwagh u vesen ken iniumbe ne yô, i gba zua sha kwagh u paase hemen u Yehova Aôndo iyol la. A fatyô u tesen ikyav i iniumbe ne sha kwagh u alaghga una u er ken ma tar yô. Se tôô ser, tar ugen ngu a gomoti u a kor u sha tindi yô. Kpa nongo u ifer ugen kar ngu hemen tar shon sha anyighe man sha ipila kua sha iwoo-or. Nongo u ú kar u hemen tar la sha tindi ga ne ngu hendan kwagh a gomoti u tar la, shi ngu karen m-sue u mba ve lu sha ikyev i gomoti la cii ve sue un la.

³ Imba kwagh ne ngi zan hemen sha won cii. Gomoti ngu, u i lu Yehova “TER Uhembansha” a ver un sha tindi yô. (Ps. 47:2) Kpa nongo u ifer, u “Orbo” a hemen u la na yô, uumace nyôr ken ikyaatseren hegen. (1 Yoh. 5:19) Nongo u ifer ne ngu hendan kwagh a gomoti u Aôndo, u i ver un sha tindi la, shi ngu karen jighjigh u ior cii ve ne hemen u Aôndo la. Kanyi yange i na ve kwagh va hingir nahana? Er nan ve Aôndo a ne ian ér kwagh a lu nahana? Man kanyi se asange asange se er sha ikyaa nee?

Akaa a a Lu ken Iniumbe Ne La

 4. Ka akaa a ahar a nyi a we a zough ken iniumbe i i ze hemen sha won cii laa?

⁴ Iniumbe i i lu zan hemen sha won cii ne ngi a akaa ker ahar, a a we a zough yô: ka hemen u Yehova man mtil sha mimi u uumace. I yila Yehova kimbir kimbir ken Ruamabera ér “Uhembansha.” Ikyav i tesen yô, orpasalmi, u na Aôndo jighjigh vindi vindi la, wa icam ér: “Gadia TER Uhembansha . . . ka zegetor sha won cii.” (Pasalmi 47:2) Ishember i “Uhembansha” la ngi ôron kwagh u lun a tahav mbu hemban cii shin u lun tor u hemban cii. Tor ka nan tese ér nan ngu a tahav mbu hemban cii. Se mba a atôakyaa a a doo u se nenge Yehova Aôndo ser ngu Uhembansha yô.—Dan. 7:22.

 5. Doo u ishima ia mgbegha se u suen hemen u Yehova sha ci u nyi?

⁵ Er Yehova Aôndo a lu Orgbanakaa yô, ngu Uhembansha sha won cii. (Ôr Mpase 4:11.) Shi Yehova ka Orjir wase, man Orwan se atindi, man Tor wase, sha ci u un tswen er ijir shi dughun atindi shi hemen ken gomoti na u sha won cii la. (Yes. 33:22) Gba u se nenge Yehova ser ngu Ter wase Uhembansha sha ci u ka un a gbe se ye, shi se har sha a na kpaa. Aluer hanma shighe se mba umbur ser “TER ver ikyônough Nagh ki torough dông sha Usha, tartor Na kpaa ngu sha won cii” yô, ishima ia mgbegha se u suen hemen na.—Ps. 103:19; Aer. 4:24.

 6. Kanyi i lu mtil sha mimi?

⁶ Saa se za hemen u tilen sha mimi hen Yehova ve se lu suen hemen na ye. “Mtil sha mimi” ka u or lun tsev tsev sha u eren kwagh u vough shin nan ishima i nan cii sha u civir Aôndo. Or u nan til sha mimi yô, ka nan lu a ieren i mimi shi nan eren perapera kpaa. Ka imbaor i tertamen Yobu lu je la.—Yobu 1:1.

Er Iniumbe la Hii Yô

7, 8. Satan yange gba ahon sha ian i Yehova a lu a mi i lun tor u hemban sha won cii la nena?

⁷ Ortyom u Aôndo ugen yange gba ahon sha ian i Aôndo a lu a mi i lun tor la anyom kar hegen kuma er 6,000 nahan. Lu isharen i orhembanato la lu a mi ér i civir un er Aôndo nahan la i mgbegha un ôr mkaanem ma mara shi hemba ato ye. Yange mgbegha nomsoor u hiihii la, Adam vea kwase na, Ifa ér ve venda hemen u Aôndo, shi nôngo ér una vihi Yehova iti sha u kaan a ve ér, A er aie. (Ôr Genese 3:1-5.) Orhembanato ne maa hingir Orihyom u hemban man Satan (Orhendankwagh) man Diabolo (Or-msende) man iyô (orcugh) man darakon (orwuanor).—Mpa. 12:9.

⁸ Satan ver iyol na tor u hendan kwagh a Aôndo. Yehova Ter Uhembansha yange er nyi sha ahendan a a tagher a mi nee? Una tim Satan man Adam man Ifa, mbahembanato mba utar mban her ave ave jee? Yange lu a tahav mbu eren kwagh ne je ka u tunan ga, shi yange una er nahan yô, ma tese ér un hemba tahav sha won cii. Shi kwagh la ma tese ér kwagh u Yehova ôr sha kwagh u mtsaha u peren tindi na la lu mimi. Kpa er nan ve Yehova kera er nahan ga?

 9. Lu nyi Satan gba ahon sha mini?

⁹ Er Satan tsugh Adam man Ifa, shi na ve gema ijime a Aôndo yô, a tese ér un huna ian i Yehova a lu a mi i kaan a uumace ér ve ungwa imo na la. Heela tseegh ga, er Satan mgbegha nomsoor man kwase u hiihii la ve hemba Aôndo ato yô, shi a tese ér un huna mtil sha mimi u mbatyomov man uumace cica cii hen Aôndo kpaa. Er kwagh u Yobu, u lumun hemen u Yehova la a tese nahan, Satan senge ér una fatyô u nan uumace cii vea gema ijime a Aôndo.—Yobu 2:1-5.

10. Er Yehova tese tahav nav mbu hemban sha won cii la ga, shi tim Satan her ave ave ga yô, ka ian i nyi a ne?

¹⁰ Er Yehova tese tahav nav mbu hemban sha won cii la ga, shi tim Satan her ave ave ga yô, a na un shighe ér a tese una kuma u eren kwagh u a senge ér un kuma u eren la yô. Aôndo shi na uumace ian i tesen ér ve lumun hemen na. Kanyi i ze hemen ken uderimbaanyomov mba ve kar imôngo ne? Satan ver nongo u ifer, u u lu a tahav kpishi yô. Ken hemen yô, Yehova una tim nongo ne kua Diabolo, nahan una tese tseer tseer ér ka un a lu tor u hemban cii ye. Yehova Aôndo yange fa kwagh u dedoo u una va er ken hemen la tsembelee je tsengaôron kwagh shon, zum u i hemba un ato ken Eden la.—Gen. 3:15.

11. Kanyi uumace kpishi ve er sha kwagh u hemen u Yehovaa?

¹¹ Uumace kpishi tese jighjigh u nan shi ve za hemen u tilen sha mimi, sha kwagh u hemen u Yehova man u tseghan iti na la kpaa. Mba ve lu ken nongo ve ne yô, ka Abel man Enoki man Noa man Aberaham man Sara man Mose man Rutu man Davidi man Yesu, kua mbahenen mba Kristu mba sha derianyom u hiihii la, man ior umiliôn imôngo mba ve til sha mimi nyian ne. Mbasuen hemen u Aôndo er mban nahan, mba tesen ér Satan ka oraie shi mba paase iti i Yehova i Diabolo a vihi sha u kaan ihyagh ér una fatyô u nan uumace cii vea gema ijime a Aôndo la.—Anz. 27:11.

Se Fa Er Iniumbe Ne Ia Kure Yô

12. Se fatyô u lun a vangertiôr ser Aôndo una de ér ifer i za hemen gbem sha won ga nena?

¹² Se fa ser ica ia gba ga tsô, Yehova una tese er hemen na u hembe sha won cii yô. Una na ian ér iferkwagh i za hemen gbem sha won ga, shi se fa ser se mba ken ayange a masejime. Yehova yange tim mbaaferev shighe u Mngerem ma Deemee la. A tim Sodom man Gomora kua Farao man mbautyaav nav. Shisera man mbautyaav nav kua Senakeribi, tor u Ashiria man akumautya na, fatyô u hemban Uhembansha ityav ga. (Gen. 7:1, 23; 19:24, 25; Eks. 14:30, 31; Mbaj. 4:15, 16; 2 Utor 19:35, 36) Sha nahan yô, se mba a vangertiôr ser Yehova Aôndo una fatyô u den ér i vihi un iti shi i nzughul a Mbashiada nav gbem sha won ga. Heela tseegh ga, hegen se mba nengen a kwagh u a lu ikyav i mve u Yesu man mkurtar la.—Mat. 24:3.

13. Se er nan ve a va kera tim se a mbaihyomov mba Yehova imôngo ga?

¹³ Gba u se tese ser se sue hemen u Yehova la ve a kera tim se a mbaihyomov mba Aôndo imôngo ga ye. Se er kwagh ne nena? Ka sha u tilen paleghaa a hemen u Satan u ifer la shi den ser mbatomov nav ve ta se mciem iyol ga. (Yes. 52:11; Yoh. 17:16; Aer. 5:29) Saa se lu paleghaa a hemen u Satan ve se tese ser se sue hemen u Ter wase u sha la shi se mba a ishimaverenkeghen i waren zum u Yehova una sôr iti na i i vihi la shi una tese ér un ngu Tor Uhembansha ye.

14. Ka akaa a nyi i pase ken avegher a Bibilo kposo kposoo?

¹⁴ Bibilo pase akaa kpishi sha kwagh u uumace man hemen u Yehova vighe vighe. Mtom ma Bibilo ma mtar ma hiihii mara ôr se kwagh u igbetar man mgbe u or gba ken isholibo la, mtom ma mtar ma masetyô mara di gema ôr kwagh u a va hide a uumace ken mlu u vough la. Upeeji mba Bibilo mba ve nyer atô la ôr akaa vighe vighe, a Yehova Ter Uhembansha a er sha u kuren awashima na sha ci u uumace kua sha man tar la. Takerada u Genese tese er Satan kua ifer yange nyôr shin tar yô, shi vegher u takerada u Mpase u̱ masen been la gema tese er a va kar a ifer kera shi a tim Diabolo, nahan a er ishima i Aôndo shin tar er i eren i sha nahan yô. Sha kpôô yô, Bibilo pase kwagh u a ve a isholibo man ku la, shi i̱ tese er a va kar a akaa ne sha tar kera, a gema a na mbatilen sha mimi iember i been mayange ga kua uma u tsôron yô.

15. Gba u hanmô wase nana er nyi ve nana zua a mtsera zum u iniumbe i sha kwagh u or u nan kom u hemen la ia kure laa?

¹⁵ Ica ia kera gba ga tsô mluashe u tar ne cii una kar kera vindi vindi. Iniumbe i í zer tesen i anyom uderi uderi sha kwagh u or u nan kom u hemen la ia kure. A kar a Satan sha tsembe u eren iniumbe kera, ken masejime yô a tim un, nahan a gema eren ishima i Aôndo tseegh. Kpa, gba u se sue hemen u Yehova hegen ve se va zua a mtsera ken kwagh ne, se ember averen kpishi a Mkaanem ma Aôndo ma tsenge ôron la ye. Gba u se tsua or u se ta ikyaa a nan la keng. Saa se za hemen u lun ken vegher u Yehova ve se fatyô u kaan ser: “TER ta ikyaa a mo” ye.—Ps. 118:6, 7.

Se Fatyô u Tilen sha Mimi Her!

16. Er nan ve se fe ser uumace vea fatyô u tilen sha mimi ve here?

¹⁶ Se fatyô u suen hemen u Yehova sha mimi shi tilen sha mimi wase her, sha ci u apostoli Paulu nger ér: “Ma imeen ngi a tser ne ga, saa i hemban or ga la. Kpa Aôndo yô, ka u jighjigh, Una lumun er i̱ va mee ne i̱ hemba agee a en ga, kpa ken imeen la Una bugh ne gbenda u waren sha er ne̱ tile dông yô.” (1 Kor. 10:13) Imeen i Paulu a er kwagh u i la ka han ka i va, man Aôndo ngu a bugh se gbenda u waren nena?

17-19. (a) Ka ameen a nyi Mbaiserael yange ve gba ker ken taaikyôngoo? (b) Se fatyô u tilen sha mimi wase hen Yehova her sha ci u nyi?

¹⁷ Er kwagh u yange er Mbaiserael ken taaikyôngo la a tese nahan, “imeen” la ka i va sha igbenda i ia fatyô u mgbeghan se peren tindi u Aôndo yô. (Ôr 1 Mbakorinte 10:6-10.) Yange Mbaiserael ma fatyô u hendan a imeen, kpa “asorabo” gema sar ve, zum u Yehova er ivande, takanger har sha ci ve uwer jimin la. Shin er ior vande lun a inyam ga shighe wa karen nahan kpa, Aôndo naan ve mana ve yaan kuman ve. Nahan cii kpa, ve gba ken imeen i hua u eren zum u vea kohol takanger la.—Num. 11:19, 20, 31-35.

¹⁸ Cii man shighe ne yô, zum u Mose za sha Uwo u Senai u za ngohol Atindi la, Mbaiserael hingir mbacivirakombo, ve lu civir wanbua shi ember yagh yagh. Er orhemen ve, Mose kera lu a ve ga yô, ve kera palegh imeen ga. (Eks. 32:1, 6) Er shi ica ga u Mbaiserael vea nyôr ken Tar u Ityendezwa la, kasev mba Moabi mee ior udubu imôngo ve er idya a ve. Hen shighe la, Mbaiserael udubu imôngo saa ku sha isholibo ve la. (Num. 25:1, 9) Ashighe agen Mbaiserael yange ve gba ken imeen sha u eren ayôôso a ahendanegh, kwagen la ve mough ayôôso a Mose man Aôndo je kpaa! (Num. 21:5) Zum u i tim mbaaferev mba utar, Koraki man Datan man Abiram kua mba ve dondo ve ityô la kpa, Mbaiserael gba ahon, ve lu henen sha lan ér i wua mbaahendanegh mbara shami ga. Nahan Aôndo tindi bouange za tim Mbaiserael 14,700.—Num. 16:41, 49.

¹⁹ Imeen i môm ken ameen a i ter sha heen ne kpa, lu i Mbaiserael ma kanshio u hendan a mi ga. Yange ve gba ken imeen sha ci u ve undu jighjigh ve u nan shi ve hungur a Yehova, man ikyo i a wa sha a ve doo doo la shi hungur ve er igbenda na i lu jighilii yô. Ameen a se tagher a mi la ka ameen a a ve sha uumace cii yô, er Mbaiserael kpa tagher a mi nahan. Aluer se hendan a ameen ne shi se suur sha Aôndo ser a sue se yô, se za hemen u tilen sha mimi wase her. Se fatyô u lun a vangertiôr ser kwagh a lu nahan sha ci u ‘Aôndo ka u jighjigh’ shi una lumun ér ‘i̱ va mee se i̱ hemba agee a ase ga.’ Mayange Yehova kenden se ér se nyôr ken mbamlu mba vea na se uumace se kanshio u eren ishima na ga.—Ps. 94:14.

20, 21. Zum u i mee se yô, Aôndo ka a ‘bugh se gbenda u waren’ nena?

²⁰ Yehova ka a ‘bugh se gbenda u waren’ sha u taver se sha er se hendan a imeen yô. U tesen ikyav yô, mbatôvon ior a ican vea fatyô u eren se atsan sha u vea nôngo yô se nyiman jighjigh wase u nan. Imba ican la nahan ia fatyô u meen se ér se lumun kwagh u ve soo la sha er a kera seer gbidyen se shin nan se ican ga, shin waren ku je kpaa yô. Nahan kpa, sha kwagh u jijingi mgbegha Paulu ve ôr, i nger ken 1 Mbakorinte 10:13 la yô, se fa ser kwagh u a ve a imeen la ngôôr karen kera ga. Yehova una na ian ér a za hemen zan zan i hemba se u tilen sha mimi hen a na ga. Aôndo una fatyô u wan jighjigh u nan wase inya itine shi una na se agee a ken jijingi a se fatyô u tilen sha mimi her yô.

²¹ Yehova suen se sha ikyev i icighan jijingi na. Jijingi la shi ka a umbur se akaawan a ken Ruamabera a se yar tom a mi ve se fatyô u hendan a imeen yô. (Yoh. 14:26) Sha nahan yô, mba tsughun se se mba eren kwagh u bo ga. U tesen ikyav yô, se fa er mtil sha mimi wase la a we a zough vea ikyaa i or u nan kom u hemen sha won cii la yô. Er se fe nahan yô, Aôndo sue ior kpishi ve tile sha mimi her zan zan ve kar kpen. Kpa lu ku bugh ve gbenda u waren ga; lu iwasen i Yehova na ve la ve fatyô u wan ishima, a u gban ken imeen shio zan zan ku ve ye. Se kpa una fatyô u suen se nahan. Jighilii yô, ngu a yar tom a mbatyomov nav mba jighjigh mbara sha ci wase er mba eren tom mba ka i “tindin ve u za wasen mba vea ya dyako u myom la” nahan. (Heb. 1:14) Er ngeren u a dondo ne a tese nahan, ka mba tilen sha mimi tseegh vea fatyô u lun a ishimaverenkeghen ér vea va lu a ian i civirigh i suen hemen u Aôndo gbem sha won ye. Se fatyô u lun a ve imôngo, aluer se ta ikyaa a Yehova ser ngu Ter wase Uhembansha yô.

Ú Na Mlumun Wer Nyi?

• Er nan ve i gbe u se fa ser Yehova ka Ter wase Uhembansha?

• Inja i u tilen sha mimi hen Aôndo her la ér nyi?

• Er nan ve se fe ser ica ia gba ga tsô Yehova una tese tseer tseer ér ka un lu tor u hemban ciilii?

• Kwagh u 1 Mbakorinte 10:13 a er la tese ér se fatyô u tilen sha mimi her sha ci u nyi?

[Foto u sha peeji 24]

Satan yange mgbegha Adam man Ifa ér ve hemba Aôndo ato

[Foto u sha peeji 26]

Kange ishima wer u sue hemen u Yehova