Ityough Ikyundu Kar Môm
Awashima u Yehova Yem Zan Zan Za Kure ken Iengem Ve
1, 2. (a) Awashima u Yehova sha akaa a lun a mkav á á gbe á la yô, kanyi? (b) Ka unô man unô yange ve lu ken tsombor u mba civir Aôndo ken mzough laa?
AWASHIMA u sha dooshima u Yehova á lu a mi yô, ka u akaa a i gbe a gba, á a lu a mkav cii a̱ kohol a̱ civir Aôndo u á lu u mimi tswen la, shi á cii a̱ lu ken mlu u engem u lun ken ikyangenev ga u ônov mba Aôndo la. Shi ka kwagh u a sar ior mba perapera a doo ve ishima kpaa tsung je la.
2 Yange Yehova hii u kuren awashima u vesen ne zum u á hii ityom na i gbanakaa la je. Yange hii gban Wan na, u hii shighe u i nder un shin ku la je a lu “mmondo u iengem [i Aôndo] man shi eev mbu mlu Na vough” la. (Mbaheberu 1:1-3) Wan ne ngu kposo, sha ci u lu Aôndo un tswen gba un ye. Ken masejime yô, lu sha ikyev i Wan ne i gba akaa agen cica cii ye: hii sha mbatyomov mba shaav, maa mough gba sha uumace mba shin tar. (Yobu 38:7; Luka 3:38) Mban cica cii kohol hingir tsombor môm sha won cii. Ve cica cii Yehova lu Aôndo ve shi lu Tor ve u Hemban Cii, shi lu Ter u doon ve ishima kpaa.
3. (a) Ka dyako u nyi se cii se zough a mi sha ikyev i mbamaren asev mba hiihii mbara? (b) Ka ian i sha dooshima i nyi Yehova yange ver tsombor u Adam laa?
3 Yange mba kur mbamaren asev mba hiihii mbara ijir i kuugh ér ve er isholibo sha apera yum yô, maa i zenda ve ken Eden kera, shi Aôndo venda ve kpaa. Ve kera lu ken tsombor na ú ú lu tar sha won cii la ga. (Genese 3:22-24; Duteronomi 32:4, 5) Se cii ka ken tsombor ve shon la se dugh ye, nahan i mar se a ishima i eren kwaghbo. Kpa Yehova yange fa ér perapera una doo mbagenev ken tsombor u Adam man lfa ne ishima. Nahan A paase gbenda sha dooshima na sha er mban ne vea fatyô u zuan a “mlu u engem u lun a ikangenev ga u ônov mba Aôndo” la yô.—Mbaromanu 8:20, 21.
Iserael Ta Ian Na i Sôngo Sôngo la Kera
4. Ka ian i civirigh i nyi Yehova yange na Iserael u sha ayange a tsuaa laa?
4 Yange i gba Adam anyom nga karen ka kom er 2,500 nahan yô, Yehova na uumace mbagenev ian i lun ior Nav mba ikyooso ikyooso, lun kposo a ior mbagenev cii. A tsua Iserael u sha ayange a tsuaa la ér a̱ lu ior nav, shi a na ve Atindi na kpaa. (Genese 12:1, 2) A gema ve ve hingir ikyurior, shi a er awashima na sha ikyev ve kpaa. (Duteronomi 14:1, 2; Yesaia 43:1) Nahan kpa, ve lu ken ikyangenev mbi isholibo man ku her, nahan ve lu a̱ zua a mlu u engem u lun a ikyangenev ga u Adam man Ifa ve lu a mi sha hiihii la ga.
5. Yange Mbaiserael ta mtil u icivirigh u yange ve tile sha ishigh ki Aôndo la kera nena?
5 Nahan kpa, Mbaiserael lu sha ian i sôngo sôngo sha ishigh ki Aôndo. Shi ve lu a tom u wan Yehova ikyo ér ngu Ter ve, shi eren kwagh sha awashima na kpaa. Yesu yange ôr var var er i lu hange hange u vea er kwagh ne vea kure keng yô. (Mateu 5:43-48) Nahan kpa, ikyurior i Iserael la i̱ er kwagh ne ga. Shin er Mbayuda mbara ve zer tsô ér “se mba a Ter môm tsô, ka Aôndo” nahan kpa, Yesu kaa ér mbamhen vev man aeren a ve la tese ér ishenge ve la cii ngi gbilin tsô. (Yohane 8:41, 44, 47) Ken inyom i 33 S.W. la, Aôndo kar a Tindi la kera, shi mtil u icivirigh u Iserael tile sha ishigh nagh la kpa maa kure. Kpa ngun lu u kaan ér mayange je a kera tsa a doo Aôndo a ior ga shinii?
U Kohol “Akaa A A Lu Sha” La
6. Awashima u ‘mserakaa’ u Paulu a er kwagh a ter ken Mbaefese 1:9, 10 la yô, ér nyi?
6 Apostoli Paulu yange tese wener mbagenev ken uumace vea fatyô u lun a mtil u icivirigh sha ishigh ki Aôndo. Ikyav i tesen yô, Paulu ôr kwagh u mserakaa u Yehova a ser a ver ér mba ve ne jighjigh cii vea fatyô u va hingir ior mba ken ya Na la, a kaa wener: “[Aôndo] pase se kwaghmyer u awashima Na u A wa ishima ken Kristu sha u sôron akaa cii sha ci u shighe una va kuma vough la yô, Una kohol akaa a a lu Sha man a a lu shin tar kpaa ci ca cii.” (Mbaefese 1:9, 10) ‘Mserakaa’ ne har sha Yesu Kristu. Ka sha ikyev na i lumun ér uumace ve̱ lu a mtil u vough sha ishigh ki Aôndo ye. Mbagenev kpuaa ken atô ve mba a ishimaverenkeghen i yemen za lun sha. Ikpelaior igen cii yô ia lu uma shin tar gbem sha won.
7. Ka unô ve lu “akaa a a lu Sha” laa?
7 Hiihii yô, hii sha shighe u Pentekosti u 33 S.W. la je, i gema ishima i ver sha “akaa a a lu Sha” la, inja na yô, ka mba vea ya dyako vea Kristu imôngo ken Tartor u sha la je la. Aôndo na ve ishô sha ci u jighjigh u ve ne injar i naagh ku Yesu la. (Mbaromanu 5:1, 2) Ken masejime yô, i wa Mbayuda man Atôatyev kpa ker, nahan hingir u “akaa a a lu Sha” la aa nyôr iorov 144,000. (Mbagalatia 3:26-29; Mpase 14:1) Ka asande ve a mase shin shín tar ye.
U Kohol Akaa “A A Lu Shin Tar” La
8. Ka unô ve lu akaa “a a lu shin tar” laa, man mlu ve vea Yehova ngu nena?
8 Mserakaa shon môm ne shi ngu kohol akaa “a a lu shin tar” la kpaa. Mba kohol ior umiliôn imôngo hegen mba ve lu a ishimaverenkeghen i lun uma gbem sha won shin tar yô. Mba kenden iti i Yehova shi kenden a mcivir na sha ken mzough vea asande a mbayandyako i Tartor la imôngo. (Yesaia 2:2, 3; Sefania 3:9) Shi ve kpa mba yer Yehova ér “Ter” gadia ve fa ér ka un a lu imbor i uma ye. Shi mba ember mtil u vough sha ishigh nagh sha jighjigh u ve ne awambe a Yesu yange haa inya la. (Mpase 7:9, 14) Kpa er ve lu ken myen her yô, ka ken hemen á va lumun ve ér mba ônov mba Aôndo vindi vindi ye.
9. Ka ityendezwa i nyi Mbaromanu 8:21 a lu a mi sha ci u orumacee?
9 Mban mba ve lu a ishimaverenkeghen i lun shin tar ne mba keghen shighe u uumace mba i gbe ve cii á va ‘pase ve sha ikyev i mlu u hôôn la á tuhwa’ la hegen. (Mbaromanu 8:21) Myom la una hii zum u Kristu man akumautya na a sha la aa bee a zegecan la ken Armagedon kera cii yô. Inja na yô á tim botar u Satan ne cica cii, maa averen a Hemen u Anyom Dubu u Kristu una hemen ken Tartor u ageegh la maa aa dondo.—Mpase 19:17-21; 20:6.
10. Mbacivir Yehova vea wa nyi icam i iwuese?
10 A lu kwagh u saanyol kpen kpen zum u mbacivir Yehova shin tar cica cii vea kohol vea ngor akenge vea kimbir mkaanem ma mbacivir shaala ve lu ôron la, gadia mbara mba yôôn ikyenge ikyenge sha iember kaan ér: “We Ter, Aôndo, Uhembanagee, ityom You i vese, i kpiligh iyol kpaa. Igbenda You ka jighjigh man shi mimi kpaa, We, Tor u akuraior cii. We, Tere, ka an je nana cia U ga, man shi ka an nana civir iti You kpaa ga? Gadia ka We tseegh U lu wang ye, akuraior cii aa va aa va gure sha ishigh Yough gadia i pase ajir a ôron a Ou a jighjigh la ken igbar ve.” (Mpase 15:3, 4) Een, mbacivir Yehova cii vea zua ken mcivir u Aôndo u a lu u mimi tswen la. Mbakpenev je kpaa a nder ve shin ku, a na ve ian i zuan akenge ve wuese Yehova.—Aerenakaa 24:15.
Mlu u ken Uikyangen Ga u Kpilighyol Ngu ken Hemen
11. Ka mlu u ken uikyangen ga u kpilighyol u nyi mba vea war zegecan la vea zua a mini?
11 Zegecan la una karen kera, ityav mbi Armagedon kpa mbi a karen a iferkwagh shin tar kera cii yô, Satan Diabolo una kera lu “aôndo u tar” ne ga. Satan una kera va mbacivir Yehova a ameen na a ifer la ga. (2 Mbakorinte 4:4; Mpase 20:1, 2) Kwaghaôndo u aiegh una kera wa Yehova kwagh iyol ga, shin una shi a va a mbampav hen atô u uumace kpaa ga. Shi mayange mbautahav vea kera nzughul a mba ve civir Aôndo sha mimi la ga, shin vea nyighe ve kpaa je ga. Nenge imba mlu u ken uikyangen ga u una lu hen shighe la sha wono!
12. A pase ior cii sha ikyev i isholibo man akaa a i̱ ve a mi la a tuhwa nena?
12 Er Yesu a lu “Waniyôngo u Aôndo u A tee isholibo i tar kera” yô, una yar tom a injar i naagh nagh kura una bee a asorabo a orumace cica cii. (Yohane 1:29) Zum u Yesu lu shin tar ne la una de or asorabo a nan yô, a bee nan angev sha u tesen ér mimi je i de nan asorabo a nan. (Mateu 9:1-7; 15:30, 31) Kape Kristu Yesu u a lu Tor u Tartor u Aôndo u sha la shi una bee ior iangev sha ivande je la, una bugh mbaapirashe ashe shi mba kondon ikyer kpa vea lam, mbaakondoato vea ungwa shi mba gban awan kpaa awan ve aa bee, mba ihyundugh ki ker ve kpa kia bee, kua mba ve lu a iangev mbigenev kpaa. (Mpase 21:3, 4) A bunde “tindi u isholibo” la hen mba ve ongo tindi mbara cii, nahan ve ayol a ve kpa mbamhen vev man aeren a ve aa doo ve, shi aa doo Aôndo kpaa. (Mbaromanu 7:21-23) Dubuanyom la una kuusu yô, hen zum la ve cii a sôr ve vea hingir vough sha mlu u orumace la, vea hide a lu sha ‘inja i mlu man ibeen’ i Aôndo u a lu u mimi tswen la.—Genese 1:26.
13. Hemen u Anyom Dubu la ua kure yô, Kristu una er nyi, man kanyi ia va kere?
13 Kristu una hiden a orumace nana luun vough yô, hen shighe la una hide a tahav mbu í ne un ér a̱ er tom la una na Ter na: “Una gema tartor Una na Aôndo Ter, er A vande timin tarkuran cii kera man tahav kua agee cii kpaa. Gadia ka u Una ya tor keng, zan zan Una gema mbaihomov Nav cii, vea lu shin angahar a Na.” (1 Mbakorinte 15:24, 25) Hen shighe la Hemen u Anyom Dubu u Tartor la ua kure awashima u ú vindi vindi; nahan ityôkyaa a kera lu í gomoti ugen shi una lu hen atô u Yehova man orumace ga. Shi er a kar a isholibo man ku kera jimin cii, shi orumace kpa a yima nan yô, kwagh a kera gba u Yesu a̱ lu Orpaan se ga. Bibilo pase ér: “Wan kpaa Una gema iyol Na Una wa sha ikyev i Un u A gem akaa cii A wa sha ikyev Na la, sha er Aôndo Una hoghom cii ken hanma or cii yô.”—1 Mbakorinte 15:28.
14. Kanyi á de ér i̱ er uumace mba vea lu vough mbara cica ciili, man a lu sha ci u nyi?
14 Una been cii yô, a na orumace u nana lu vough hen shighe ne la ian i tesen shin aluer mimi je nan tsua a ishima i nan ér nana civir Aôndo u a lu u mimi tswen ne gbem sha won yô. Nahan, cii man Yehova una mase ngohol uumace mba vea hingir vough mbara ér mba ônov nav yô, saa una vande den a ta ve ikyaren i masejime ve. A dugh Satan man azôv a na shin ihungwa i í ze kweng la. Mba Yehova a doo ve ishima sha mimi yô kwagh ne una bula ve gbem ga. Kpa mba ve hembeato ve de ér i̱ mee ve, vea hemba Yehova ato yô, una tim ve imôngo a Diabolo u a lu orhembanato u hiihii la gbem sha won.—Mpase 20:7-10.
15. Kanyi kwagh shi ia hide a za hemen hen atô u akaa a Yehova a gbe á, a lu a mkav la ciilii?
15 Yehova maa una ngohol uumace mba vough mba ve ker hementor u Aôndo her sha ikyaren i masejime la cii, vea hingir ônov nav. Hii hen shighe la je, vea hii u ember mlu u ken uikyangen ga u engem u ônov mba Aôndo mba ve kpa ve lu ken tsombor u Aôndo u sha won cii la. Akaa a i gbe á a lun a mkav cii, á á lu sha man man á á lu shin tar kpaa cii, aa hide a civir un ken mzough, un u a lu Aôndo u mimi tswen ne. Hen shighe la awashima u Yehova una yem zan zan a za kure ken iengem! Ú soo wer we kpa ú lu ken tsombor u saan saan u ua lu gbem sha won tar sha won cii la kpa? Aluer wea soo nahan yô, se mba taver we ishima ser umbur kwagh u Bibilo i̱ ôr ken 1 Yohane 2:17 ne, ér: “Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.”
Kwaghôron u Hiden Kimbir Kwagh
• Cii man ihyembeato i ken Eden la yô, ka mlu u nyi yange lu hen atô u Yehova man mba civir unu?
• Ka tom u nyi ú lu sha ityough ki mbacivir Aôndo?
• Ka unô kpa shi vea va hingir ônov mba Aôndo, man kwagh ne bende a awashima u Yehova a we sha kwagh u mcivir u civir ken mzough môm la nena?
[Foto u sha peeji 190]
Uumace mba ungwan tindi vea ember uma ken paradiso u una tser tar cii la