Ngeren mba Timen sha Mi ken Antakerada u Mkombo u Uma Wase man Tom Wase — IJIIR I Watchtower a KOSON ITYAKERADA SHA INTANET YÔ

Ngeren mba Timen sha Mi ken Antakerada u Mkombo u Uma Wase man Tom Wase

DISEMBA 2-8

“Yehova Ver Zegeikpelaior I I Gande u Ôron Iyenge la Doo Doo”

(Mpase 7:9) Ken masetyô u akaa ne yô, m ver ashe, yô, nenge, zegeikpelaior lu, ma or fatyô u ôron i iyenge ga, ve due ken hanma ikyurior man hanma nongo man hanma nongoior man hanma zwa kpaa. Ve tile sha ishigh ki ikyônough ki torough kira man sha ishigh ki Waniyôngo ve haa akondo a pupuu iyol shi ve lu a andar a avilegh sha ave.

it-1-E 997 ¶1

Zegeikpelaior

Kwagh ne va a mpin ne, ér: Aluer “zegeikpelaior” la ka ior mba vea war shi vea lu shin tar ne yô, er nan i kaa ér ve “tile sha ishigh ki ikyônough ki torough kira man sha ishigh ki Waniyôngo” laa? (Mp 7:9) Ashie agen ka i er tom a ishember i “tile” la ken Bibilo, u tesen ér i lumun a or shin annongo u a lu sha ishigh ki un u or shon shin annongo shon a til la. (Ps 1:5; 5:5; Anz 22:29; Lu 1:19) Jighilii yô, ken Mpase ityough 6 la, i pase ér “utor mba sha won kua ashagbaior man utormbautyaav mba tamen man mbanyarev man mbaageev man hanma or cii, shin kpan shin wan kpaa,” mba keren u yeren “sha ishigh ki Un u A tem sha ikyônough ki torough la man shi sha iyugh i Waniyôngo kpaa, gadia zegeiyange u iyugh Na kuma ve, ka an je nana fatyô u tilen sha?” la. (Mp 6:15-17; nenge Lu 21:36.) Nahan a shi nan kpa, kwagh ne tese ér “zegeikpelaior” la ka ior mba i war ve sha shie u iyugh, nahan ve fetyô u ‘tilen’ sha ishigh ki Aôndo man Waniyôngo u tesen ér ve lumun ve la.

(Mpase 7:14) M gema m kaa a na mer: Terem, we u fa. Tsô a kaa a mo er: Mban ka mba ve dugh ken zegecan la yô; ve ôô uriga vev ken awambe a Waniyôngo, ve kungu ve.

it-2-E 1127 ¶4

Ican

Yange mba timin Yerusalem anyom nga kar ka nôngon u kuman er 30 nahan yô, i ôr apostoli Yohane kwagh u zegeikpelaior i i dugh ken akuraior man ijô man ior cii la ér: “Mban ka mba ve dugh ken zegecan la yô.” (Mp 7:13, 14) Er i kaa ér zegeikpelaior la ‘due ken zegecan la’ yô, tese je ér í war zegecan shon. Aerenakaa 7:9, 10 kpa lumun a kwagh u i er ken Mpase la ér: “Aôndo lu a [Yosev], A yima un ken atsan a na cii.” Yange i yima Yosev ken atsan a na cii sha ci u i na un tahav mbu wan ishima tseegh tsô ga, kpa sha ci u i war un ken atsan a a ya la cii.

(Mpase 7:15-17) Ka sha ci u nahan man ve lu sha ishigh ki ikônough ki Aôndo ki torough, ve lu eren Un tom ken tempel Na tugh man tetan kpaa ye. Un u A tem sha ikônough ki torough la Una samber tenti Na sha a ve. ¹⁶ Ijen ia kera kôr ve mayange ga, imura kpaa ga, oo ua kera ta ve ga shin ma mtsee kpaa ga, ¹⁷ gadia Waniyôngo u A lu ker atô u ikônough ki torough la Una hemen ve, Una za a ve hen ambor a mngerem ma umam, Aôndo Una ese ve mliam sha ashe kera cii.

it-1-E 996-997

Zegeikpelaior

Er A Fa Ve Yô. Kwagh u vesen u una wase se u fan zegeikpelaior la ngu ken kwagh u i pase sha kwagh ve ken Mpase ityough 7 la, kua ken avur a Bibilo agen, a a pase kwagh ve wang la kpaa. Mpase 7:15-17 ôr kwagh u Aôndo ér una “samber tenti Na sha a ve” shi ér a za a ve hen “ambor a mngerem ma umam” shi ér Aôndo una ese ve “mliam sha ashe kera cii.” Mpase 21:2-4 kpa ôr nahan, ér: “Tenti u Aôndo ngu hen ior” shi Aôndo una “ese ve mliam sha ashe kera cii” shi “ku ua kera lu ga.” Mpase u sha mnenge ne ngu ôron kwagh u ior mba ve lu sha, ape ‘Yerusalem u he a dugh a lu senen’ la ga, kpa ngu ôron kwagh u uumace mba ve lu shin tar ne la.

Ker Akaainjaa a ken Bibilo

(Mpase 7:1) Ken masetyô u akaa ne yô, m nenge mbatyomov mba Shaav unyiin tile sha azongo a tar a anyiin la, ve kôr ahumbe a anyiin a sha tar la sha u ma ahumbe a̱ de pever shin tar ga, shin sha zegemnger kpaa ga, shin sha ma kon kpaa ga.

re-E 115 ¶4

I Ver Iserael u Aôndo Ikyav

⁴ Ikyav tese wang ér mbatyomov mba unyiin mban tile sha ityough ki iniongo i mbatyomov i inyiin, i Yehova a eren tom a mi u kôron ahumbe a mtim zan zan shie u i ver la una kar kuman la. Shie u mbatyomov mbara vea pase ahumbe a ishimavihin i Aôndo, sha u a va kwa môm sha imbusutarimese man imbusutariyan man ityoughkitaregh kua ityôtar la, mtim la una vihi hanma kwagh. Mtim ne una lu er ahumbe a anyiin a Yehova yange er tom a mi u samben Elam u tsuaa, shi hemben un, maa timin un kera la nahan, kpa mtim la una gema a hemba vihin a mtim u Elam la. (Yeremia 49:36-38) Mtim ne una lu zegehiar u hemban vihin a “ijeverahumbe” i Yehova tim ikyurior i Amon sha mi la ica je. (Am 1:13-15) Vegher u nongo u Satan môm shin tar ne ua fatyô tilen sha, sha iyange i ishimavihin i Yehova, shie u una tese er hemen na u hembe cii, gbem sha won la ga.—Pasalmi 83:15, 18; Yesaia 29:5, 6.

(Mpase 9:11) Ve lu a tor ve, ka ortyom u ihyungwa la, iti na ken zwa Heberu er Abadon man ken zwa Grika yô, iti na er Apolion.

it-1-E 12

Abadon

Ka an nan lu Abadon, ortyom u ihyungwa laa?

Nahan kpa, Mpase 9:11 tese ér ishemberti i “Abadon” la ka iti i “ortyom u ihyungwa” la. Mba yer iti ne ken zwa Grika ér Apolion, man inja na yô, ér “Ortimin.” Ken derianyom u sha 19 la, i nôngo sha u ior ve fa ér ivur ne ngi ôron kwagh u kwaghôron u profeti u kure sha ior er Tor Vespasian man Muhammad kua Napoleon nahan je kpaa, shi ior kpishi nengen ortyom ne ér ka “Satan.” Nahan kpa, i tese ken Mpase 20:1-3 ér, ortyom u a lu a “ishindan u ihyungwa i i ze kweng la, ka ortyom u Aôndo u a dugh sha yô, shi ortyom ne ka “Satan” ga, sha ci u ka un a kange Satan, a daar un a gbihi shin ihyungwa i i ze kweng la ye. Takerada u i yer ér The Interpreter’s Bible la ta iwanger sha Mpase 9:11 ér, “Nahan kpa, Abadon ka ortyom u Satan ga, kpa ka ortyom u Aôndo u a eren tom u timin kwagh sha iniezwa i Aôndo yô.”

Er se sember henen ken ruamabera u ken zwa Heberu la nahan, ikyav tese ér ishember i ʼavad·dohnʹ la ngi kwaghmôm a Sheol man ku. Ken Mpase 1:18 la, Yesu Kristu kaa ér: “M ngu uma gbem sha won, man M ngu a ishindan i kuugh man i Hade kpaa.” I tese tahav mbu a lu a mi sha ihyungwa i i ze kweng la ken Luka 8:31. Se nenge a ikyav i tahav mbu a lu a mi u timin kwagh, kua Satan la ken Mbaheberu 2:14, ape i kaa ér Yesu va lu a iyol i inyam man awambe sha er “ka sha ku man Una vihi agee a un u a lu a tahav mbu kuugh la kera ye, ka diabolo je la.” Ken Mpase 19:11-16 la, i pase wang er a til sha ityough ki Ortimin shin Orwuan kwagh u Aôndo a tsough un yô.—Nenge itinekwagh i ken zwa Buter i APOLLYON la.

Bibilo i Ôron

(Mpase 7:1-12) Ken masetyô u akaa ne yô, m nenge mbatyomov mba Shaav unyiin tile sha azongo a tar a anyiin la, ve kôr ahumbe a anyiin a sha tar la sha u ma ahumbe a̱ de pever shin tar ga, shin sha zegemnger kpaa ga, shin sha ma kon kpaa ga. 2 Shi m nenge ortyom u Sha ugen lu kôndon pe iyange i dugh la, kôr kwagh u veren ikav a mi u Aôndo u uma la ken uwegh nagh, a ôr kwagh genger genger a mbatyomov mba Shaav mba unyiin mbara, mba i ne ve tahav mbu ve̱ vihi tar kua zegemnger kpaa la, 3 a kaa er: De vihin tar shin zegemnger shin ikon kpaa ga saa sé ver mbatomov mba Aôndo wase ikav sha atsul ve. 4 Tsô m ungwa iyenge i mba i ver ve ikav la, ka ior dubu deri môm man dubu akunduahar kar unyiin i ver ve ikav ken ikwe i ônov mba Iserael la cii ye. 5 Ken kwe u Yuda mba i ver ve ikav yô, ve lu dubu pue kar uhar. Ken kwe u Ruben lu dubu pue kar uhar. Ken kwe u Gadi lu dubu pue kar uhar, 6 ken kwe u Asher lu dubu pue kar uhar, ken kwe u Nafetali lu dubu pue kar uhar, ken kwe u Manase lu dubu pue kar uhar, 7 ken kwe u Shimeon lu dubu pue kar uhar. Ken kwe u Levi lu dubu pue kar uhar, ken kwe u Isakar lu dubu pue kar uhar, 8 ken kwe u Sebulon lu dubu pue kar uhar, ken kwe u Yosev lu dubu pue kar uhar man ken kwe u Benyamin kpaa mba i ver ve ikav yô, ve lu dubu pue kar uhar. 9 Ken masetyô u akaa ne yô, m ver ashe, yô, nenge, zegeikpelaior lu, ma or fatyô u ôron i iyenge ga, ve due ken hanma ikurior man hanma nongo man hanma nongoior man hanma zwa kpaa. Ve tile sha ishigh ki ikônough ki torough kira man sha ishigh ki Waniyôngo ve haa akondo a pupuu iyol shi ve lu a andar a avilegh sha ave. 10 Ve lu genger imo kaan er: Myom ka u Aôndo wase u A tem sha ikônough ki torough la man shi Waniyôngo kpaa. 11 Mbatyomov mba Shaav cii tile kase ikônough ki torough man shi mbatamen man akaauma a anyiin la kpaa, ve gba inya ve cir ishiv inya sha ishigh ki ikônough ki torough kira ve civir Aôndo, 12 ve kaa er: Amen, iwuese man iengem man kwaghfan man ishughun man icivir man agee man mtaver cii, ve̱ lu mba Aôndo wase gbem sha won. Amen.

DISEMBA 9-15

‘I Wua Mbashiada Uhar, Kpa shi I Hide I Nder Ve Mba Uma’

(Mpase 11:3) Me na mbashiada Av mba uhar tahav vea ôr kwaghôron u profeti á kuma ayange dubu man deri uhar man akunduatar, vea haa abaasôhô iyol.

(Mpase 11:7) Zum u vea kure shiada ve u eren yô, inyam i i dugh ken ihungwa i i za kweng la ia nôngo ityav a ve ia hemba ve ia wua ve kpaa.

(Mpase 11:11) Kpa ayange nga kar atar man tiôn yô, iôôn i uma i Aôndo nyôr ken ve, maa ve mough ve tile sha sha angahar a ve, zegemcie gba sha mba ve nenge a ve la.

Ker Akaainjaa a ken Bibilo

(Mpase 10:9, 10) Nahan m za hen ortyom u Sha la, m kaa a na mer, a̱ nam wantakerada la. Tsô a kaa a mo er: Ngohol, ya, una yua u shin uya, kpa ken zwa yô, una nyoho er ka iyough nahan. ¹⁰ Nahan m ngohol wantakerada la ken uwegh ku ortyom u Sha la, m ya, nyohom ken zwa er iyough nahan. M ye kera yô, gema yuam shin uya.

it-2-E 880-881

Wantakerada (Shin Ihyurenruamabera)

I Er Tom a Mi sha Injakwagh. I er tom a ishember i “wantakerada” (shin “ihyurenruamabera”) la sha injakwagh ken Bibilo sha ajiir kpishi. Esekiel man Sekaria cii nenge a ihyurenruamabera u i nger kwagh kimi man ken ijime cii yô. Lu kimi tseegh i hemban ngeren kwagh sha ihyurenruamabera ye, nahan zum u a nger kwagh sha uihyurenmbaruamabera mban kimi man ken ijime cii yô, alaghga i lu u tesen ér loho u i nger ker la u yuhwa shi u za shimi shi ka u numben a mi ga. (Esek 2:9–3:3; Sek 5:1-4) Ken mpase u sha mnenge u ken takerada u Mpase la, or tema sha ikyônough ki torough la kôr ihyurenruamabera ken uwegh nagh ku yanegh, u i cir un sha akav a ataankarahar yô, nahan orgen kera fa kwagh u i nger ker la ga, zan zan Waniyôngo u Aôndo kar bughun ve. (Mp 5:1, 12; 6:1, 12-14) Shi ken mpase u sha mnenge la, i va na Yohane ihyurenruamabera ugen shi i kaa a na ér a ya. Yohane ye yô, nyoho un, kpa gema yua un shin uya. Er yange i bugh ihyurenruamabera, i cir un ga yô, tese ér lu kwagh u a fatyô u kaven yô. Yange “nyoho” Yohane u zuan a loho u u lu ker la, kpa alaghga tsô, gema lu a akaa a yuan ker, a una tsengaôron, er i kaa a na ér a er la yô. (Mp 10:1-11) Esekiel kpa yange i na un imba ihyurenruamabera la, i lu a “ukwelegh man mzungu man iwer i gbiren” ker yô.—Esek 2:10.

(Mpase 12:1-5) Tsô i nenge a zegeivande Sha. Kwase cir iyange iyol, uwer lu shin angahar a na, lu a tsar u sha asan pue kar ahar sha ityough nagh, ² gema lu iyav, lu ngoron sha ican i mar, lu toghor mar. ³ Shi i nenge a ivande igen Sha, nenge, zegedarakon u nyian lu, lu a ityouv itiankarihiar man akor pue man sha ityouv itiankarihiar la yô, lu a ader a tor ataankarahar. ⁴ Tsa na kombor tiôn môm u ken atôôn atar a asan a sha aôndo haa shin inya. Tsô darakon la va tile sha ishigh ki kwase u a sôôn u maren la, sha u zum u una mar yô, maa un una mena wan la. ⁵ Nahan a mar wan u nomso u una tema tor sha akuraior sha tôgh ku iyôôgh; i tsuwe wan na la kera, i yem a mi sha Aôndo man sha ikyônough Nagh ki torough.

it-2-E 187 ¶7-9

Mnyoon u Martoghor

Ken mpase u sha mnenge u i tese Yohane la, a nenge a kwase ugen sha, lu vaan “ngoron sha ican i mar, lu toghor mar.” Wan u i mar la, lu “wan u nomso u una tema tor sha akuraior sha tôgh ku iyôôgh” yô. Er darakon la nôngo ér una mena wan shon nahan kpa, “i tsuwe wan na la kera, i yem a mi sha Aôndo man sha ikyônough Nagh ki torough.” (Mp 12:1, 2, 4-6) Yange Aôndo tsuwe wan la kera u tesen je ér a lumun un ér ka u na, er lu ieren i ior mba sha ayange a tsuaa la u zan a wan u he u i mar la hen ter na ér a lumun un nahan. (Nenge itinekwagh i ken zwa Buter i BIRTH la.) Nahan “kwase” la ka “kwase” u Aôndo, inja na yô, ka “Yerusalem u Sha” je la, u a lu “ngô” u Kristu man anmgbianev nav mba ken jijingi la.—Ga 4:26; Heb 2:11, 12, 17.

Nahan kpa, jighilii yô, “kwase” u Aôndo u sha la una lu vough, shi mar na la ua nyoon un kpôô kpôô ga. Sha nahan yô, mnyoon u martoghor la ka injakwagh i tesen ér “kwase” la una fa ér kuma u una mar; nahan una veren ashe je ér, ica gba ga tsô una mar.—Mp 12:2.

Yange lu u “wan u nomso” ne una lu ana? Lu u “una tema tor sha akuraior sha tôgh ku iyôôgh.” Yange i tsengaôron kwagh ne sha un u Aôndo a ver un Tor u Tartor u Mesiya la ken Pasalmi 2:6-9. Kpa yange i mar Kristu shin tar ne, shi i va wua un shi i nder un shin ku, shie kar gôgônan cii ve Yohane va mase nengen mpase u sha mnenge ne ye. Sha nahan yô, ka inja er mpase u sha mnenge la ngu ôron kwagh u shie u i ver Tartor u Mesiya sha ikyev i Yesu Kristu Wan u Aôndo, un u zum u i nder un ve, “za tema sha uwegh ku yanegh ku Aôndo gbem [la]. Ngu masen keghen zan zan á va gema mbaihyomov Nav vea hingir Un kwagh u pendan angahar a Na sha mi.”—Heb 10:12, 13; Ps 110:1; Mp 12:10.

Bibilo i Ôron

(Mpase 10:1-11) M shi m nenge ortyom u Sha ugen, u ageegh, lu senen Sha, a cir ibeenegh iyol, ikume i sha aôndo kpaa lu sha ityough nagh, ishigh nagh lu er iyange nahan, angahar a na lu er mtôm ma usum nahan. 2 Lu a wantakerada sha uwe ivegher. A ndyar nguhar iyan sha zegemnger man shi a ndyar nguhar imese sha tar. 3 A genger imo er ka kume u begha nahan. Er a genger imo yô, idyuran i itiankarihiar dura. 4 Er idyuran i itiankarihiar la dura yô, m wa iyol u ngeren, kpa m ungwa imo due Sha kaa er: Cir kwagh u idyuran i itiankarihiar la i kaa la, ver ikav sha mi, de ngeren ga. 5 Ortyom u Sha u m nenge a tile sha zegemnger man sha tar kpaa la a kende uwegh nagh ku yanegh sha je, 6 a bum Un u A lu uma gbem sha won u A gbe Sha kua akaa a a lu ker cii man tar kua akaa a a lu sha mi cii man zegemnger kua akaa a a lu shimi cii, a kaa er, mayange á kera ngôôr je ga 7 kpa sha ayange a ortyom u Sha u sha utaankaruhar la, zum u una tôngo yô, kwaghmyer u Aôndo la una kure er A lu pasen uprofeti, mbatomov Nav la nahan. 8 Tsô imo i m vande ungwan Sha la, shi ôr kwagh a mo kaa er: Za, za tôô takerada u a lu ivegher ken uwegh ku ortyom u Sha u a til sha zegemnger man sha tar la. 9 Nahan m za hen ortyom u Sha la, m kaa a na mer, a̱ nam wantakerada la. Tsô a kaa a mo er: Ngohol, ya, una yua u shin uya, kpa ken zwa yô, una nyoho er ka iyough nahan. 10 Nahan m ngohol wantakerada la ken uwegh ku ortyom u Sha la, m ya, nyohom ken zwa er iyough nahan. M ye kera yô, gema yuam shin uya. 11 Shi i kaa a mo er: Ka u shi ú ôr kwaghôron u profeti sha kwagh u iniongo i ior kpishi man akuraior kpishi man ijô kpishi man utor kpishi keng.

DISEMBA 16-22

“De Cie Inyamkyume i Cier Iyol la Ga”

(Mpase 13:1, 2) Maa a tile sha waarawa u shin kpe zegemnger her. Tsô m nenge inyamkyume i̱gen lu duen shin zegemnger la, i̱ lu a akor pue man ityouv itiankarihiar, ader a tor pue lu sha akor la, ati a lahan Aôndo gema lu sha ityouv mbi i̱. ² Inyamkyume shon i̱ m nenge a mi ne lu er ka anyam nahan, kpa angahar a i̱ gema lu er ka a biya nahan, shi zwa u i̱ lu er ka zwa u begha nahan. Tsô derakon la na inyamkyume la tahav nav man ikyônough ki torough nagh, kua tahav mbu vesen mbu hemen.

(Mpase 13:11) Tsô shi m nenge inyamkyume i̱gen lu duen shin tar, i̱ lu a akor ahar er ka waniyôngo nahan, kpa i̱ gema i̱ lu ôron kwagh er ka derakon nahan.

(Mpase 13:15) Shi i na i̱ ian ér i̱ na eev mbu inyamkyume la iôôn, sha er eev mbu inyamkyume shon mbua lam, shi mbua wua mba ve vende u civir eev mbu inyamkyume shon cii yô.

re-E 194 ¶26

U Nôngon Ityav a Inyamkyume Ihiar i Vihin Tu

²⁶ Inyamkyume i i lu a akor ahar la i tile sha ityough ki nyi? I tile sha ityough ki Tahav mbu Tar u Amerika vea Ingila Ve Lu a Mi sha Tar Cii La, man ka inyamkyume ne i môm môm tsô i lu ityough ki sha utaankaruhar ki inyamkyume i hiihii la ye, kpa gema ngi eren tom u vesen ugen! Er i dugh inyam ne i ver kposo ken mpase u sha mnenge la yô, wase se u nengen wang er i til sha tseeneke, i lu eren kwagh sha tar ne yô. Inyamkyume i sha injakwagh i lun a akor ahar ne, tile sha ityough ki ityahav mbi patii i ihiar, i i lu sha tseeneke u i, kpa i gem i lu eren kwagh gungur môm yô. Akor a na a ahar a lun “er ka waniyôngo” nahan la, tese ér ngi ishima legh legh shi i vihi tu ga, shi wanger gomoti na tsembelee, nahan tar cii ka u nengen kwagh ken a na. Kpa ka i gema i ôron kwagh er ka “derakon” nahan, sha ci u ka i kighir ior shi i taan ve mciem iyol shi ka i er tswam je kpaa, hanma ijiir i i lumun a gbenda u í soo ér i hemen la ga cii. Í taver ior ishima ér ve dondo hemen u Tartor u Aôndo u sha ikyev i Waniyôngo u Aôndo la ga, kpa ngi eren ishima i Satan u a lu zege derakon la. Inyam la tuur ior hingir u soon tar ve kpishi, maa kwagh la va a mpav kua ihyom, nahan i na ior seer civir inyamkyume i hiihii la.

re-E 195 ¶30-31

U Nôngon Ityav a Inyamkyume Ihiar i Vihin Tu

³⁰ Kwagh u a ze hemen ken yiase la wase se u kaven ér eev mbura tile sha ityough ki nongo u Ingila man Amerika ve due a u shi ve ne u ze iti shi ve lu suen u la. Sha hiihii la, i yilan u ér Mzough u Ityar sha Won Cii. Ken Mpase ityough 17 la, inyamkyume igen kposo tile sha ityough ki mzough ne; ka inyamkyume i̱ nyian dindee, i i lu uma, shi i lu sha tseeneke u i la. Mzough u tar sha won cii ne ka a ‘ôr kwagh,’ inja na yô, ka a ta ihyagh, a senge ér ka un tseegh una fatyô u van uumace a bem shi zayol una kera lu ga ye. Kpa jighilii yô, mzough ne gema hingir ijiir i ityar i i lu ker la lamen sha ishimavihin shi tuhwan ayolave. Shi mzough ne anger ior shin hanma tar u u vende tahav nav cii ér una dugh u ken mzough shon kera shin una tim u. Jighilii yô, Mzough u Ityar sha Won Cii yange dugh ityar igen i i venda u dondon mbamhen nav cii ken mzough shon kera. Sha shie u zegecan una hii la, “akor” a a til sha ityough ki shoja i eev mbu inyamkyume ne la, aa er tom u timin kwagh.—Mpase 7:14; 17:8, 16.

³¹ Hii sha shie u Ityav mbi Tar Cii Mbi sha Uhar la je, eev mbu inyamkyume ne, mbu hegen i gem yilan mbu ér Mzough u Ityar Cii la, wua ior kpôô kpôô je kpaa. Ikyav i tesen yô, ken inyom i 1950 la, shoja i Mzough u Ityar Cii igen za ityav mbi tar u North Korea lu nôngon vea tar u South Korea la. Shoja i Mzough u Ityar Cii, vea shoja i tar u South Korea la yange wua ior mba North Korea man China kuma er 1,420,000 nahan. Shi hii ken inyom i 1960 zan zan 1964 la, ushoja mba Mzough u Ityar Cii za nôngo num ken tar u Congo (shin Kinshasa). Heela tseegh ga, mbahemenev mba ken tar ne, kua poopu Paul VI man poopu John Paul II, za hemen u kaan ér eev mbun ka ishimaverenkeghen i uumace i masetyô man i hemban doon cii, i zuan a bem. Ka ve hanger ikyaa ér aluer uumace er eev mbun tom ga yô, vea tim ayolave. Sha nahan yô, ve na i wua uumace, mba ve vende u dondon eev mbura shi civir mbu la sha injakwagh.—Duteronomi 5:8, 9.

(Mpase 13:16, 17) I̱ lu kighir ior cii—mbakiriki kua mbavesen, mbanyarev man mbaibanave man mba ve lu ikpan ga yô, kua ikpan—ér i̱ ver ve ikyav sha uwegh vev ku yanegh gayô sha icul, ¹⁷ shi or môm nana̱ de fetyô u yamen kwagh shin teen kwagh ga, saa or u nan lu a ikyav la tseegh, ka iti i inyamkyume shon, shin namba u iti i i̱ shon je la.

Ker Akaainjaa a ken Bibilo

(Mpase 16:13, 14) Tsô m nenge a ujijingi mba hôngorov utar, ve lu er ka mbaatungwa nahan, u môm due ken zwa u derakon la, ugen due ken zwa u inyamkyume la, ugen la di due ken zwa u profeti u aiegh. ¹⁴ Jighilii yô, ka akaaôron a a dugh hen azôv shi a lu eren uivande yô; nga duen zan hen utor mba sha tar cii, sha u kohol ve imôngo sha ci u ityav mbi iyange i vesen i Aôndo U Hemban Agee Cii la.

(Mpase 16:21) Tsô awombo a vesen osough sha aôndo haa sha ior, hanma iwombo yuhwa kuma er talenti môm nahan, nahan ior laha Aôndo sha ci u ican i ve ya sha awombo shon la, gadia awombo la vihi akaa je cieryol.

Bibilo i Ôron

(Mpase 16:1-16) Tsô m ungwa imo due ken icighanjiir la genger genger kaa a mbatyomov mba utaankaruhar mbara ér: “Za nen za gema nen iyugh i Aôndo i i lu shin agbande a ataankarahar la haa nen shin tar.” 2 Tsô u hiihii la yem za haa iyugh i shin gbande na la shin tar. Maa ior mba ve lu a ikyav i inyamkyume la kua mba ve lu civir eev mbu i̱ la, gba avav a bo, a nyoon tsung. 3 U sha uhar la haa iyugh i shin gbande na la shin zegemnger. Maa a hingir awambe, er ka a orkpen nahan, nahan hanma kwaghuma kpe, akaa a shin zegemnger cii. 4 U sha utar la haa iyugh i shin gbande na la shin uifi kua ihwembe i mnger. Maa ve hingir awambe. 5 Tsô m ungwa ortyom u a lu a tahav sha mnger la kaa ér: “We u U lu, u ngise kpa u lu la, We u U eren kwagh a ior ou sha mimi la, u ngu u perapera, gadia ka we u ôr ajir ne nahan ye, 6 sha ci u ve haa awambe a uicighanmbaiorov man a uprofeti inya, nahan u na ve awambe wer ve ma; man ka kwagh u a kom sha a ve je la.” 7 Tsô m ungwa atse a nan nagh la kaa ér: “Yehova Aôndo, we U Hemban Agee Cii, u ôron ajir sha mimi man sha perapera.” 8 U sha unyiin la gema iyugh i shin gbande na la haa sha iyange, nahan i na iyange tahav ér i ta tsung ior ve̱ hughum iyol. 9 Tsô oo ta tsee je ior hughum iyol, kpa ve gema ve laha iti i Aôndo, un u a lu a tahav sha atsan ne la, ve gema ishima sha u vea na un icivir ga. 10 U sha utaan la gema iyugh i shin gbande na la haa sha ikyônough ki torough ki inyamkyume la. Maa tartor u i̱ la wa ime, nahan nyoon ve je ve gba nyiman iniombor ve, 11 kpa ve laha Aôndo u sha, sha ci u mnyoon ve la, man avav a bo a ve gbe la, ve gema ishima sha u vea undu ityom ve la ga. 12 U sha ataratar la haa iyugh i shin gbande na la sha zegeifi u Yuferati, tsô mngerem nam uma kera, sha u sôron gbenda sha ci u utor mba ve lu vegher u iyange ka i due la. 13 Tsô m nenge a ujijingi mba hôngorov utar, ve lu er ka mbaatungwa nahan, u môm due ken zwa u derakon la, ugen due ken zwa u inyamkyume la, ugen la di due ken zwa u profeti u aiegh. 14 Jighilii yô, ka akaaôron a a dugh hen azôv shi a lu eren uivande yô; nga duen zan hen utor mba sha tar cii, sha u kohol ve imôngo sha ci u ityav mbi iyange i vesen i Aôndo U Hemban Agee Cii la. 15 “Nenge! M ngu van er ormbaiv ka nan va nahan. Or u nana lu per shi nana lu a akondo a nan iyol her yô, a saan nan iyol, sha ci u nana zende idyelegh sha u nana ya kunya sha ishigh ki ior ga.” 16 Tsô ve kohol ve imôngo hen ijiir i ka i yila ken zwa Heberu ér Armagedon la.

DISEMBA 23-29

“Ityav mbi Aôndo Mbia Bee a Ityav Cii”

(Mpase 19:11) Tsô m nenge i bugh sha, yô nenge! nyinya u pupuu lu. Man un u tema sha mi la iti na ér Jighjigh man Mimi, ôron ijir shi nôngon ityav sha perapera.

(Mpase 19:14-16) Shi akumautya a sha lu dondon un ijime sha anyinya a pupuu, hanmô ve haa ikyondo i taver ishe iyol, i̱ pupuu i̱ lun wang. ¹⁵ Shi gôgô sanker u esen tsor tsor lu ken zwa na, lihe due ken won, ka u una gber akuraior a mi, shi una hemen ve sha gbough ku iyôôgh. Heela tseegh ga, una shoghor wain shin ihyungwa i shoghor wain, ka iyugh i cieryol i Aôndo U Hemban Agee Cii la je la. ¹⁶ I nger iti sha ikyondo na i a haa iyol la, sha namegh nagh, ér: Tor u utor man Ter u uter.

it-1-E 1146 ¶1

Nyinya

Ken mpase u sha mnenge u sha injakwagh u Yohane nenge la, i tese Yesu u i ver un sha ian i icivirigh la, lu nahan nyinya u pupuu shi ikyumutya dondo un ijime, i mba ve lu ken ikyumutya shon cii tema sha anyinya a pupuu yô. Yange i tese Yohane mpase u sha mnenge ne u ôron kwagh u ityav mbi Kristu una nôngo a mbaihyomov cii, sha perapera man ijirôron i mimi, sha ci u Yehova Aôndo u a lu Ter na la. (Mp 19:11, 14) Ken Mpase ityough 6 la, i tese mbaanyinyav kposo kposo kua mba ve hende a, mba ve til sha ityough ki tom u tor u Kristu una er man atsan a a dondo la.—Mp 6:2-8.

(Mpase 19:19, 20) Tsô m nenge a inyamkyume la kua utor mba sha tar kua ushoja vev, ve kohol imôngo sha u vea nôngo ityav a un u a tem sha nyinya la man a ikyumutya na. ²⁰ Tsô i kôr inyamkyume la man profeti u aiegh u yange eren uivande sha ishigh ki i̱ sha u tsughun mba ve lu a ikyav i inyamkyume shon kua mba ve civir eev mbu i̱ la. Er ve lu uma her la je, i ker ve ve za gba ken ber u usu, u sulfur a lu yeghen usu shimi la.

re-E 286 ¶24

Tor u Nôngon Ityav la Hemba Ityav sha Armagedon

²⁴ A va daar inyamkyume i lun ityouv itiankarihiar man akor pue, i i dugh shin zegemnger, i i til sha ityough ki mzough u patii u Satan la, ia za jahar inya, maa kwagh u i una bee, kua profeti u aiegh la, ka tahav mbu tar cii mbu sha utaankaruhar je la. (Mpase 13:1, 11-13; 16:13) Er ve lu “uma” her shin ve lu eren kwagh ken mzough u hendan a ior mba Aôndo mba shin tar ne her la je, i ker ve ve za gba ken “ber u usu” la. Ka ber u usu kpôô kpôô i lu ôron kwagh na heen yee? Ei, sha ci u inyamkyume la man profeti u aiegh la kpa ka annyamev kpôô kpôô ga. Nahan ber u usu la tile sha ityough ki mtim u tsôron man u masetyô, ape or ze nan hidi ga la. Ka ken usu ne a va ker ku man Hade kua Satan iyolna kpaa cii, vea za gba ye. (Mpase 20:10, 14) Jighilii yô, kwagh ne ka zegeusu u nan aferaior ican ker gbem sha won ga, sha ci u imba ijiir la i ndôhôr Yehova ishima je ka kwagh u una hen sha mi tsô kpaa ga.—Yeremia 19:5; 32:35; 1 Yohane 4:8, 16.

(Mpase 19:21) Kpa i wua mbagenev cii sha gôgô sanker u due ken zwa u un u a tema sha nyinya la. Nahan inyon cii ide sha inyam ve.

re-E 286 ¶25

Tor u Nôngon Ityav la Hemba Ityav sha Armagedon

²⁵ Ior mbagen cii, mba yange ve lu ken gomoti jighilii ga, kpa ve gema ve venda u geman ishima ken tar u uumace u u we anyighe ne la kpa, i ‘wua ve sha gôgô sanker u un u a tem sha nyinya la.’ Yesu una kaa ér ve kuma ku. Er i kaa ér mba va kenden ve ken ber u usu la ga yô, tese ér mba va nderen vee? Ijiir i môm kpa ngi i i kaa a vese ér mba va nderen ior mba Orjir u Yehova una wua ve hen shie la ga. Er Yesu iyolna kpa a tese nahan, mba ve lu “iyôngo” ga la cii, vea yem “ken usu u tsôron, mtsaha u a lu sha ci u Diabolo man mbatyomov nav la,” ka “ken mtim u tsôron” je la. (Mateu 25:33, 41, 46) Kwagh ne una lu mkur u “iyange i ijirigh man i a va tim mba ve vende Aôndo la.”—2 Peteru 3:7; Nahum 1:2, 7-9; Malaki 4:1.

Ker Akaainjaa a ken Bibilo

(Mpase 17:8) Inyamkyume i̱ u nenge a mi la, yange i̱ lu, kpa kera ngi ga, nahan kpa i̱ sôôn duen shin ihyungwa i i ze kweng la, shi ka u i̱a yem ken mtim. Man ior mba ve tem sha tar—mba hii shighe u i lu gban tar la je, i nger ati a ve ken ihyurenruamabera u uma ga yô—a kpiligh ve iyol u nengen er inyamkyume ne yange i̱ lu, kpa i̱ kera lu ga, kpa shi i̱a va lu yô.

re-E 247-248 ¶5-6

I Pase Kwagh u Kpiligh Iyol U Ior Ve Fe Un Ga la Wang

⁵ ‘Inyamkyume la, yange i̱ lu.’ Een, yange i lu Mzough u Ityar sha Won Cii u i ver un hii ken Janawari 10, 1920 yem hemen la. Ityar lu ken mzough ne 63, i ashie agen i undu un shi i va hide i nyôr un yô. Kpa ken masejime yô, tar u Japan man Jamani man Italia undu mzough ne, shi i va dugh ityar i i zom cii i yilan ér Soviet Union la ken mzough ne kera. Ken uwer u Setemba 1939 la, Ornazi u vihin tu u lu hemen Jamani la hii Ityav mbi Tar Cii Mbi sha Uhar la. Er Mzough u Ityar sha Won Cii la fatyô u van a bem sha tar ga yô, a yem shin ihyungwa i i ze kweng la, kera lu eren tom na tsembelee ga. Ken inyom i 1942 nahan maa kwagh na bee vindi vindi. Yehova yange pase ior nav inja i mpase u sha mnenge ne hen shie la vough; yange pase ve cii man shie la ga, shi pase ve hen shie u kwagh shon er kar kera la ga! Sha mkohol u New World Theocratic Assembly (Mkohol u Tar u He u Aôndo) la, Anmgbian N. H. Knorr ôr kwagh u mpase u sha mnenge ne, maa yôô ér, ‘inyamkyume la, kera ngi ga.’ Maa a pine mpin ne, ér: “Mzough u Ityar sha Won Cii” la una saa shin ihyungwaa?” Tsô a ôr mkaanem ma ken Mpase 17:8 la, maa a na mlumun ér: “Mzough u ityar cii la una hide a due.” Shi kape yange va lu vough je la, man kwagh ne kure Kwaghôron u profeti u Yehova la!

A due shin Ihyungwa i I Ze Kweng la

⁶ Inyamkyume i nyian dindee la, yange i va hide due shin ihyungwa i i ze kweng la kera. Sha iyange i Jun 26, 1945 la, ityar 50 kohol ken kpentar u San Francisco, tar u America, ayôôso lu gong gong. Ityar ne maa haa vota u lumun Ngeren u Tesen Ityom i Mzough u Ityar Cii u he ne una lu eren yô. Lu u mzough ne una er tom u “van a bem shi been a zayol sha tar cii kera.” Akaa kpishi a Mzough u Ityar Cii ne lu eren la zua sha akaa a ngise Mzough u Ityar sha Won Cii eren la. Takerada u i yer ér The World Book Encyclopedia la kaa ér: “Sha igbenda igen yô, Mzough u Ityar Cii ne eren kwagh er Mzough u Ityar sha Won Cii la nahan, u yange i ver un shie u Ityav mbi Tar Cii Mbi sha Môm bee kera la . . . Lu ityar kpishi i yange i lu ken Mzough u Ityar sha Won Cii la, lu ken Mzough u Ityar Cii ne kpaa ye. Yange i ver Mzough u Ityar Cii la ér a wase u van a bem hen atô u akuraior, er Mzough u Ityar sha Won Cii la kpa eren nahan. Avegher a vesen a Mzough u Ityar Cii ne nga kwaghmôm a Mzough u Ityar sha Won Cii la sha igbenda kpishi.” Jighilii yô, Mzough u Ityar Cii la ka mhidi u inyamkyume i nyian dindee la. Ityar 190 i i lu ken Mzough u Ityar Cii ne la, hemba ityar 63 i yange lu ken Mzough u Ityar sha Won Cii la ica je; shi mzough u he ne hemba ngeen a ityom a mzough u tse la.

(Mpase 17:16, 17) Man akor pue a u nenge a mi la kua inyamkyume la, vea kôr gbagakwase la ihyom shi vea ngohol un akaa cica cii, una hingir idyelegh, shi vea ya inyam na shi vea nande un sha usu una hia vindi vindi. ¹⁷ Gadia Aôndo wa ken asema a ve sha u ve̱ er sha awashima na, inja na yô, ve̱ dondo mhen ve u a lu kwaghmôm la, ve̱ na inyamkyume la tahav sha tartor ve, zan zan mkaanem ma Aôndo ma kar kuren sha mi.

Bibilo i Ôron

(Mpase 17:1-11) Nahan u môm ken mbatyomov mba utaankaruhar mba ve lu a agbande a ataankarahar la va kaa a mo ér: “Va, m̱ tese u ijirôron i i lu van sha zege-gbagakwase u a tem sha mngerem kposo kposo, 2 un u utor mba tar ne ve er idya a na, shi ior mba ve tem sha tar ve hunde sha ci u wain na la, ka idya na je la.” 3 Maa a tôôm sha tahav mbu jijingi, a yem a mo ken taaikyôngo. Tsô m nenge a kwase tema sha inyamkyume i̱ nyian dindee, i̱ lu a ati a lahan Aôndo iyol kpulughuu, shi i̱ lu a ityouv itiankarihiar man akor pue. 4 Kwase la haa ikyondo i nyian dimiin man i nyian dindee iyol, shi wuha iyol sha zanaria man awen a injaa man utagbede, shi lu a kôôpu u sha zanaria sha uwe, akaa a ndôhôrshima man a hôngorough a idya na la iv shimi poo. 5 I nger un iti sha icul, ka iti i ior ve fe i ga yô, ér: “Zegebabilon, ngô u ugbagambakasev man u akaa a ndôhôrshima a sha tar.” 6 Tsô m nenge kwase la ma awambe a uicighanmbaiorov man a mbashiada mba Yesu je hunde. M nengen a na yô, kpiligh mo iyol kpishi. 7 Nahan ortyom la kaa a mo ér: “Ka nyi man ashen i kpiligh we iyolo? De m ôr u kwagh u kwase la, u ior ve fe ga yô, kua kwagh u inyamkyume i̱ a tem sha i̱, i̱ lu a ityouv itiankarihiar man akor pue la: 8 Inyamkyume i̱ u nenge a mi la, yange i̱ lu, kpa kera ngi ga, nahan kpa i̱ sôôn duen shin ihyungwa i i ze kweng la, shi ka u i̱a yem ken mtim. Man ior mba ve tem sha tar—mba hii shighe u i lu gban tar la je, i nger ati a ve ken ihyurenruamabera u uma ga yô—a kpiligh ve iyol u nengen er inyamkyume ne yange i̱ lu, kpa i̱ kera lu ga, kpa shi i̱a va lu yô. 9 “Saa or a lu tsev tsev ve nana kav kwagh ne ye: Ityouv i itiankarihiar la tile sha ityough ki iwo itiankarihiar, i kwase la a tem sha mi yô. 10 Shi utor mbá utaankaruhar: Mba utaan ve gba, u môm ngu her, ugen la ngu a va ga; kpa zum u una va yô, una lu sha anshighe kpuaa tsô. 11 Nahan inyamkyume i̱ yange i̱ lu, kpa i̱ kera lu ga la, shi ngi tor u sha anigheni kpaa, kpa i̱ due ka ken mba utaankaruhar mbara, shi ngi zan ken mtim.

DISEMBA 30–JANAWARI 5

“Nenge! M Ngu Eren Akaa Cii a He”

(Mpase 21:1) Tsô m nenge a sha u he man tar u he; gadia sha u tse man tar u tse la kar kera, shi zegemnger kera lu ga.

re-E 301 ¶2

Sha u He man Tar u He

² Yehova yange kaa a Yesaia anyom uderi imôngo ken ijime, cii man shighe u Yohane la ér: “M ngu gban Usha u he man tar u he kpaa; á kera umbur akaa a tsuaa la ga, man shi aa kera va or ken ishima kpaa ga.” (Yesaia 65:17; 66:22) Yange mba duen a Mbayuda mba jighjigh mbara ken uikyangen ken Babilon, ape ve lu ker anyom 70 la kera, mba hidi ken Yerusalem ken inyom i 537 la yô, kwaghôron u profeti ne maa kure sha gbenda u hiihii. Mba hidi yô, ve hingir nongoior u wang, inja na yô, ka “tar u he” je la, shi ve lu sha ikyev i gomoti u he, inja na yô, ka “Usha u he” je la. Nahan kpa, apostoli Peteru kaa ér kwaghôron u profeti ne una va kure sha gbenda u vesen ugen, ér: “Kpa se mba keghen usha mba hev man tar u he er a tende zwa nahan, man ka ken a ve perapera una tema ye.” (2 Peteru 3:13) Maa Yohane tese ér ityendezwa ne ia kure sha iyange i Ter. “Sha u tse man tar u tse,” mba ve til sha ityough ki akaa a Satan a i ser a i ver shin tar ne la man gomoti u un vea azôv a na ve hemen la cii, vea kar kera. “Zegemnger” u kpianger, u a til sha ityough ki uumace mba wan ifer shi hemban ato la cii, una kera lu ga. Maa “sha u he man tar u he,” mba ve til sha ityough ki nongoior u he, u ua lu sha ikyev i gomoti u he, u a lu Tartor u Aôndo la, vea kar a tile sha ityough ki zegemnger u kpianger la.—Nenge Mpase 20:11.

(Mpase 21:3, 4) Tsô m ungwa imo due hen ikyônough ki torough kira genger genger, kaa ér: “Nenge! Tenti u Aôndo ngu hen atô u uumace, una tema a ve imôngo, shi vea lu ior nav. Aôndo iyol na una lu vea ve. ⁴ Una ese ve mliam cii sha ashe kera, ku ua kera lu ga, ijungwen kpa ia kera lu ga, mliam kpa ma a kera lu ga, shi mnyoon kpa una kera lu ga. Akaa a tse la kar kera.”

(Mpase 21:5) Un u a tem sha ikyônough ki torough la kaa ér: “Nenge! M ngu eren akaa cii a he.” Shi a kaa ér: “Nger kwagh ne, gadia mkaanem man ma kuma u nan ma jighjigh, shi ka ma mimi.”

Ker Akaainjaa a ken Bibilo

(Mpase 20:5) (Mbakpenev mbagenev cii hide lu uma ga zan zan anyom 1,000 la kar been.) Ka mnder u shin ku u hiihii je ne.

it-2-E 249 ¶2

Uma

Tindi u Aôndo wa Adam la tese ér yange Adam una ongo imo i Aôndo yô, ma kpe ga. (Ge 2:17) Nahan shie u a kar a ku, u u lu orihyom u masetyô u uumace kera la, uumace mba ungwan imo i Aôndo la vea kera lu a isholibo ken a ve i ia va ve a ku ga. Vea kera kpe mayange ga. (1Ko 15:26) A mase timin ku kera shie u hemen u Kristu ua bee kera, u takerada u Mpase u tese ér ua lu anyom 1,000 la. Heen ne, i ôr kwagh u mba vea hingir utor man upristi a Kristu imôngo la ér, “ve hide ve lu uma, ve tema tor a Kristu imôngo anyom 1,000.” A shi nan kpa, “mbakpenev mbagenev cii” mba vea hide a lu uma ga ‘zan zan anyom 1,000 aa kar been’ la, ka mba a nder ve vea hide a lu uma sha mbee u anyom dubu môm la, kpa a nder ve, vea hide a lu uma cii ve a pase Satan shin ihyungwa i zan kweng ér a kar uumace ye. Sha shie u anyom dubu aa bee la, ior mba shin tar cii, vea hingir vough, er Adam man Ifa yange ve lu cii ve ve gba ken isholibo la nahan. Hen shie ne, vea lu a uma u vough, a isholibo iyol shio. Mba a ta ve ikyaren shie u a pase Satan shin ihyungwa i zan kweng sha anshie kpuaa, kpa vea gba ga la, vea ember uma gbem sha won.—Mp 20:4-10.

(Mpase 20:14, 15) Maa i kende ku man Uwar cii ken ber u usu la. Ber u usu la tile sha ityough ki ku u sha uhar. ¹⁵ Heela tseegh ga, or u i nenge a iti i nan ken takeda u uma la ga cii yô, i kôr nan i kende ken ber u usu la.

it-2-E 189-190

Ber u Usu

Ishember ne due kwa môm tseegh ken takerada u Mpase, shi ngi ôron ka injakwagh je ka ashe tugh ga. Bibilo iyol i í pase kwagh u injakwagh ne i lu ôron yô, ér: “Ber u usu la tile sha ityough ki ku u sha uhar.”—Mp 20:14; 21:8.

Ajiir agen a i ter kwagh u ber u usu ken takerada u Mpase la kpa, seer pasen wang er i lu injakwagh ishember ne i lu ôron yô. I kaa ér i kende ku ken ber u usu ne. (Mp 19:20; 20:14) A fatyô u nanden ku kpôô kpôô ga je ka ashe tugh ga. Shi i kaa ér Diabolo u a lu or u ken jijingi la kpa, i kende un ken ber u usu la. Er a lu or u ken jijingi yô, a fatyô u nanden un ken usu kpôô kpôô ga.—Mp 20:10; nenge Ek 3:2; man Mbaj 13:20.

Er ber u usu ne a til sha ityough ki “ku u sha uhar” shi er Mpase 20:14 a kaa ér i kende “ku man Uwar” cii ker yô, tese wang je ér ber u usu la tile sha ityough ki ku u uumace ve ye dyako u ú hen Adam la ga (Ro 5:12), shi ber u usu la ngu ôron kwagh u Uwar (shin Sheol) kpaa ga. Nahan a shi nan kpa, ber u usu la ka injakwagh i i lu ôron kwagh u ku ugen, u or nan kpe je, nana fatyô u hiden lun uma ga yô, sha ci u ijiir i môm kpa ngi ape i kaa ér “ber u usu” la una na mba ve lu ken a na la ga, er ku u Adam man Uwar (shin Sheol) vea na mba ve lu shin a ve la nahan ga. (Mp 20:13) Sha nahan yô, mba i nger ati a ve ken “takeda u uma” ga la, inja na yô, ka mbahendan a hemen u Aôndo, mba ve vende u geman ishima je la, a kende ve ken ber u usu la, inja na yô, ka mtim u tsôron shin ku u sha uhar je la.—Mp 20:15.

Bibilo i Ôron

(Mpase 20:1-15) Tsô m nenge ortyom due sha lu senen, lu a akii a bughun ihyungwa i i ze kweng la ken uwe, kua ishiligh ku vesen. 2 A kôr derakon la, ka tseiyô la je la, u i yilan ér Diabolo man Satan la, a kange un sha u a lu uikyangen anyom 1,000. 3 Maa a ker un a za gba shin ihyungwa i i ze kweng la, a cir un shimi, a ver ikyav sha zwa u ihyungwa shon, sha u a̱ de kera tsughun akuraior ga zan zan anyom 1,000 la a kar been. Aa been yô, shi a pase un sha anshighe kpuaa keng. 4 Tsô m nenge a mkônom ma torom, shi i na mba ve tema sha ma la tahav mbu ôron ijir. Shi m nenge a awambe a mba yange i wua ve sha ci u ve lu eren shiada sha kwagh u Yesu, man sha ci u ve lu ôron kwagh u Aôndo la, kua mba ve venda u civir inyamkyume la shin eev mbu i̱, shi i ver ve ikyav i i̱ sha icul kua sha uwe ga la. Ve hide ve lu uma, ve tema tor a Kristu imôngo anyom 1,000. 5 (Mbakpenev mbagenev cii hide lu uma ga zan zan anyom 1,000 la kar been.) Ka mnder u shin ku u hiihii je ne. 6 Hanma or u nan lu ken mba a nder ve sha mnder u shin ku u hiihii la cii yô, saan nan iyol shi nan ngu icighanor, ve yô, ku u sha uhar la ngu a tahav sha a ve ga, kpa vea lu upristi mba Aôndo man mba Kristu, shi vea tema tor a na imôngo anyom 1,000. 7 Anyom 1,000 la aa been a bee nahan, a dugh Satan ken purusu na kera, 8 una yem una za tsugh akuraior a a lu sha azongo a tar a anyiin la, ka Gogi man Magogi je la, sha u kohol ve imôngo sha ci u uitya. Iyenge ve ngi er waarawa u shin kpe zegemnger nahan. 9 Tsô ve samber sha tar wuee ve kase afo a uicighanmbaiorov man gar u doon ishima la, ve wa atô. Kpa usu due sha sen hia ve purututu. 10 Shi Diabolo u lu tsughun ve la kpa i ker un za gba ken ber u usu man sulfur, ape inyamkyume man profeti u aiegh ve vande lun la; shi a er ve ican atetan man tugh zan zan gbem sha won. 11 Tsô m nenge a ikyônough ki torough ki vesen ki pupuu, kua Un u tema sha ki la. Sha man tar kar sha ishigh nagh kera, shi ijiir i môm kera lu sha ci ve ga. 12 Shi m nenge mbakpenev, mbakiriki kua mbavesen cii, tile sha ishigh ki ikyônough ki torough kira, shi i bugh uihyurenmbaruamabera. Kpa shi i bugh ihyurenruamabera ugen; ka ihyurenruamabera u uma. I ôr mbakpenev ijir sha aeren a ve, er akaa a i nger ken uihyurenmbaruamabera mbara a tese la. 13 Zegemnger na mbakpenev mba ve lu shin a na la, shi ku man Uwar na mbakpenev mba ve lu shin a ve la, nahan i ôr ve ijir sha aeren a ve seer seer. 14 Maa i kende ku man Uwar cii ken ber u usu la. Ber u usu la tile sha ityough ki ku u sha uhar. 15 Heela tseegh ga, or u i nenge a iti i nan ken takeda u uma la ga cii yô, i kôr nan i kende ken ber u usu la.

DISEMBA 2019

I saan or u nan zenden sha mhen u mbaaferev ga la iyol, gbenda u mbaasorabo nan til sha u ga, mbanahantar kpaa nan tem imôngo a ve ga; 2 atindi a TER ka kwagh u gban nan ishima, shi ka atindi a Na nan zeren henen a ken ishima tugh kua tetan kpaa ye.

9 Kpa mba i sar ve pe lun mbanyarev yô, ka ve gba ken imeen man ken to u hônon man ken asaren kposo kposo a gbilinigh man a vihin. Ka a mire a ior ken mtim man ken msaaishe. 10 Gadia mishe u hanma inja i kwaghbo cii yô, ka inyaregh ki saren. Mbagenev yô, ki hange ve nahan ve tsume ve undu jighjigh u nan, ve kuma ayol a ve sha atsan atô kposo kposo.

22 Ishima i saan saan ka icigh ki dedoo, kpa ishima i yinan yô, i om akuhe.

7:1 Ken masetyô u akaa ne yô, m nenge mbatyomov mba Shaav unyiin tile sha azongo a tar a anyiin la, ve kôr ahumbe a anyiin a sha tar la sha u ma ahumbe a̱ de pever shin tar ga, shin sha zegemnger kpaa ga, shin sha ma kon kpaa ga. 2 Shi m nenge ortyom u Sha ugen lu kôndon pe iyange i dugh la, kôr kwagh u veren ikav a mi u Aôndo u uma la ken uwegh nagh, a ôr kwagh genger genger a mbatyomov mba Shaav mba unyiin mbara, mba i ne ve tahav mbu ve̱ vihi tar kua zegemnger kpaa la, 3 a kaa er: De vihin tar shin zegemnger shin ikon kpaa ga saa sé ver mbatomov mba Aôndo wase ikav sha atsul ve. 4 Tsô m ungwa iyenge i mba i ver ve ikav la, ka ior dubu deri môm man dubu akunduahar kar unyiin i ver ve ikav ken ikwe i ônov mba Iserael la cii ye. 5 Ken kwe u Yuda mba i ver ve ikav yô, ve lu dubu pue kar uhar. Ken kwe u Ruben lu dubu pue kar uhar. Ken kwe u Gadi lu dubu pue kar uhar, 6 ken kwe u Asher lu dubu pue kar uhar, ken kwe u Nafetali lu dubu pue kar uhar, ken kwe u Manase lu dubu pue kar uhar, 7 ken kwe u Shimeon lu dubu pue kar uhar. Ken kwe u Levi lu dubu pue kar uhar, ken kwe u Isakar lu dubu pue kar uhar, 8 ken kwe u Sebulon lu dubu pue kar uhar, ken kwe u Yosev lu dubu pue kar uhar man ken kwe u Benyamin kpaa mba i ver ve ikav yô, ve lu dubu pue kar uhar. 9 Ken masetyô u akaa ne yô, m ver ashe, yô, nenge, zegeikpelaior lu, ma or fatyô u ôron i iyenge ga, ve due ken hanma ikurior man hanma nongo man hanma nongoior man hanma zwa kpaa. Ve tile sha ishigh ki ikônough ki torough kira man sha ishigh ki Waniyôngo ve haa akondo a pupuu iyol shi ve lu a andar a avilegh sha ave. 10 Ve lu genger imo kaan er: Myom ka u Aôndo wase u A tem sha ikônough ki torough la man shi Waniyôngo kpaa. 11 Mbatyomov mba Shaav cii tile kase ikônough ki torough man shi mbatamen man akaauma a anyiin la kpaa, ve gba inya ve cir ishiv inya sha ishigh ki ikônough ki torough kira ve civir Aôndo, 12 ve kaa er: Amen, iwuese man iengem man kwaghfan man ishughun man icivir man agee man mtaver cii, ve̱ lu mba Aôndo wase gbem sha won. Amen. 13 Ugen ken mbatamen ôr kwagh a mo kaa er: Mba ve hee akondo a pupuu la, ka unô, man shi ka han ve dughu? 14 M gema m kaa a na mer: Terem, we u fa. Tsô a kaa a mo er: Mban ka mba ve dugh ken zegecan la yô; ve ôô uriga vev ken awambe a Waniyôngo, ve kungu ve. 15 Ka sha ci u nahan man ve lu sha ishigh ki ikônough ki Aôndo ki torough, ve lu eren Un tom ken tempel Na tugh man tetan kpaa ye. Un u A tem sha ikônough ki torough la Una samber tenti Na sha a ve. 16 Ijen ia kera kôr ve mayange ga, imura kpaa ga, oo ua kera ta ve ga shin ma mtsee kpaa ga, 17 gadia Waniyôngo u A lu ker atô u ikônough ki torough la Una hemen ve, Una za a ve hen ambor a mngerem ma umam, Aôndo Una ese ve mliam sha ashe kera cii.

8:1 Zum u A bugh ikav i sha utaankaruhar la yô, huan Sha ving, kuma er a lu vegherihwa nahan. 2 Tsô m nenge mbatyomov mba Shaav mba utaankaruhar mba ve til sha ishigh ki Aôndo la, i na ve ikor i tôngon itiankarihiar. 3 Ortyom u Sha ugen va tile hen atse a nanden nagh sha mi la, lu a gbande u zenaria. I na un kwaghhumandoon ngee er a̱ nungwa sha mbamsen mba uicighanmbaiorov cii, sha atse a zenaria a a lu sha ishigh ki ikônough ki torough la. 4 Tsô mnyim ma kwaghhumandoon la kôndo a mbamsen mba uicighanmbaiorov imôngo ken uwegh ku ortyom u Sha u a lu sha ishigh ki Aôndo la. 5 Tsô ortyom u Sha la tôô gbande la, a iv un a usu u sha atse la, haa shin tar. Tsô idyuran gba kua amo man inyiar man tar kpaa tenger. 6 Nahan mbatyomov mba utaankaruhar mba ve lu a ikor i tôngon la wa iyol u tôngon. 7 Tsô u hiihii la tôngo nahan awombo man usu haa shin tar i nungwa awambe sha mi, tsô tiôn môm u taregh u ken atôôn atar, hia kera, ikon kpaa, tiôn môm u ken atôôn atar hia kera, toho u ndor cii kpaa hia kera. 8 Tsô ortyom u Sha, u sha uhar kpaa tôngo nahan i kende kwagh shin zegemnger lu er ka zegewo u hian nahan, 9 tiôn môm u ken atôôn atar a zegemnger hingir awambe, maa tiôn môm u ken atôôn atar a akaauma a shin zegemnger kpe man shi tiôn môm u ken atôôn atar a utso kpaa vihi. 10 Ortyom u Sha u sha utar kpaa tôngo tsô zegeshan osogh Sha gba, lu yeghen er ka ikaghusu nahan. A gba sha tiôn môm u ken atôôn atar a uifi man ambormnger kpaa. 11 Iti i ishan la yô, er Kon u yuan, tsô tiôn môm u ken atôôn atar a mngerem kpaa gema yua er kon u yuan la nahan. Ior kpishi kpe sha mngerem mara sha ci u ma yough yô. 12 Ortyom u Sha u sha unyiin la kpaa tôngo tsô i vihi tiôn môm u ken atôôn atar a iyange, man shi tiôn môm u ken atôôn atar a a uweregh man shi tiôn môm u ken atôôn atar a asan kpaa, nahan tiôn môm u ken atôôn atar iwanger ve la gema wa ime, tiôn môm u ken atôôn atar a sev kera wanger ga, tugh kpaa nahan. 13 Tsô m nenge, m ungwa gafa lu purugh sha kwavaôndo je, lu kaan sha zegeimo er: Kwagh á tser, kwagh á tser, kwagh á tser mba ve tem shin tar cii sha ci u mtenge u ikor i i shi her i mbatyomov mba Shaav mba utar mba ve sôôn u tôngon la.

9:1 Ortyom u Sha u sha utaan kpaa tôngo, tsô m nenge ishan i i osogh Sha i gbe shin tar la, man i na un ishindan u ihungwa i i ze kweng la. 2 Nahan a bugh ihungwa i i ze kweng la maa mnyim gba duen shin ihungwa la er ka mnyim ma zegeusu u iwaagh nahan, iyange man kwavaôndo wa ime sha ci u mnyim ma ihungwam mara. 3 Ken mnyim mara yô, mbaahungwa due kimi va sha tar man i na ve tahav er ayese a sha tar a lu a tahav nahan. 4 I ta ve icin er ve̱ de vihin toho u sha tar ga, shin ma kwagh u menden shin ma kon kpaa ga, saa di ior mba ve lu a ikav i Aôndo sha atsul a ve ga la. 5 I na ve ian i wuan ve ga, kpa ve̱ er ve ican zan zan iwer itian, man ican ve la lu er ka mnyoonom ma iyese nahan zum u ka ia ta or yô. 6 Sha ayange la yô, ior vea ker ku kpa vea zua a mu ga, vea tôm u ma ve kpe kpa ku ua yevese ve. 7 Mluashe u mbaahungwa mbara yô, lu er ka anyinya a i ser a iyol sha ci u utya nahan. Sha ityouv vev yô, kwagh lu er ka atsar a a bee zenaria yô. Ishiv vev yô, lu er ka ishiv mbi iorov nahan. 8 Ice ve lu er ice i ukase, anyi a ve lu er anyi a begha nahan. 9 Ve har iper i utya, i lu er iper i iyôô nahan, iov i akper a ve lu er ihuran i akeke a utya kpishi nahan, zum u anyinya ka a zaan ayem ken utya la. 10 Ve lu a ica er ayese nahan man ishoho kpaa; tahav vev mbu eren ior ican zan zan iwer itian la, mbu lu ken ica ve. 11 Ve lu a tor ve, ka ortyom u ihungwa la, iti na ken zwa Heberu er Abadon man ken zwa Grika yô, iti na er Apolion. 12 Kwaghtseren u hiihii la kar kera ve, nenge, mase shin u akaatseren ahar aa va yô. 13 Ortyom u Sha u sha ataratar la kpaa tôngo. Tsô m ungwa imo due ken akor anyiin a atse a zenaria a nanden nagh sha mi a sha ishigh ki Aôndo la, 14 i kaa a ortyom u Sha u sha ataratar u a lu a ikpamkor la er: Sagh mbatyomov mba unyiin mba i zer ve hen zegeifi u Uferati, 15 nahan i sagh mbatyomov mba Shaav mba unyiin mbara, mba i ver ve a ver je sha ci u ihwa shon la man iyange la man uwer la man inyom la sha u ve̱ wua tiôn môm u ken atôôn atar a ior kera. 16 Iyenge i mbautyav mba sha anyinya lu dubu pue kwa dubu pue zan zan kwa har je, m ungwa iyenge ve la. 17 M nenge anyinya ken mpase u sha mnenge man mba ve lu hendan a la kpaa, ve lu nahan: ve har iper i utya i nyian er usu nahan man i kwer kwer er hiakinto nahan man shi i ayaikure er sulfur nahan. Ityouv mbi anyinyav lu er ityouv mbi ubegha nahan, ken ijô ve yô, usu lu duen kua mnyim man sulfur kpaa. 18 Sha atsan shon atar ne yô, i wua tiôn môm u ken atôôn atar a ior, lu sha usu man mnyim man sulfur mba ve lu duen ken ijô ve la. 19 Gadia tahav mbu anyinya la mbu ken ijô ve man shi ken ica ve kpaa, gadia ica ve lu er iyô nahan, lu a ityouv sha mi, lu sha mbi je man ve vihin akaa ye. 20 Ior mba ve shi her mba i wua ve sha atsan la ga yô, ve kera gema ishima ve undu aeren a sha ave ve la ga, ve de u civir ujijingi mba Satan kpaa ga, shin u civir ieev kpaa ga, mbi sha zenaria man azurfa man dela man iwen man kon, ka mbi mbi fetyô u nengen ga, shin u ungwan ga, shin u zenden kpaa ga yô. 21 Ve kera gema asema a ve, ve undu iwoo-or ve, shin ahir a ve a eren shin idya ve i eren, shin iiv vev la kpaa ga.

9 Ken masetyô u akaa ne yô, m ver ashe, yô, nenge, zegeikpelaior lu, ma or fatyô u ôron i iyenge ga, ve due ken hanma ikurior man hanma nongo man hanma nongoior man hanma zwa kpaa. Ve tile sha ishigh ki ikônough ki torough kira man sha ishigh ki Waniyôngo ve haa akondo a pupuu iyol shi ve lu a andar a avilegh sha ave.

14 M gema m kaa a na mer: Terem, we u fa. Tsô a kaa a mo er: Mban ka mba ve dugh ken zegecan la yô; ve ôô uriga vev ken awambe a Waniyôngo, ve kungu ve. 15 Ka sha ci u nahan man ve lu sha ishigh ki ikônough ki Aôndo ki torough, ve lu eren Un tom ken tempel Na tugh man tetan kpaa ye. Un u A tem sha ikônough ki torough la Una samber tenti Na sha a ve. 16 Ijen ia kera kôr ve mayange ga, imura kpaa ga, oo ua kera ta ve ga shin ma mtsee kpaa ga, 17 gadia Waniyôngo u A lu ker atô u ikônough ki torough la Una hemen ve, Una za a ve hen ambor a mngerem ma umam, Aôndo Una ese ve mliam sha ashe kera cii.

10:1 M shi m nenge ortyom u Sha ugen, u ageegh, lu senen Sha, a cir ibeenegh iyol, ikume i sha aôndo kpaa lu sha ityough nagh, ishigh nagh lu er iyange nahan, angahar a na lu er mtôm ma usum nahan. 2 Lu a wantakerada sha uwe ivegher. A ndyar nguhar iyan sha zegemnger man shi a ndyar nguhar imese sha tar. 3 A genger imo er ka kume u begha nahan. Er a genger imo yô, idyuran i itiankarihiar dura. 4 Er idyuran i itiankarihiar la dura yô, m wa iyol u ngeren, kpa m ungwa imo due Sha kaa er: Cir kwagh u idyuran i itiankarihiar la i kaa la, ver ikav sha mi, de ngeren ga. 5 Ortyom u Sha u m nenge a tile sha zegemnger man sha tar kpaa la a kende uwegh nagh ku yanegh sha je, 6 a bum Un u A lu uma gbem sha won u A gbe Sha kua akaa a a lu ker cii man tar kua akaa a a lu sha mi cii man zegemnger kua akaa a a lu shimi cii, a kaa er, mayange á kera ngôôr je ga 7 kpa sha ayange a ortyom u Sha u sha utaankaruhar la, zum u una tôngo yô, kwaghmyer u Aôndo la una kure er A lu pasen uprofeti, mbatomov Nav la nahan. 8 Tsô imo i m vande ungwan Sha la, shi ôr kwagh a mo kaa er: Za, za tôô takerada u a lu ivegher ken uwegh ku ortyom u Sha u a til sha zegemnger man sha tar la. 9 Nahan m za hen ortyom u Sha la, m kaa a na mer, a̱ nam wantakerada la. Tsô a kaa a mo er: Ngohol, ya, una yua u shin uya, kpa ken zwa yô, una nyoho er ka iyough nahan. 10 Nahan m ngohol wantakerada la ken uwegh ku ortyom u Sha la, m ya, nyohom ken zwa er iyough nahan. M ye kera yô, gema yuam shin uya. 11 Shi i kaa a mo er: Ka u shi ú ôr kwaghôron u profeti sha kwagh u iniongo i ior kpishi man akuraior kpishi man ijô kpishi man utor kpishi keng.

11:1 Nahan i nam iyiagh ki karen kwagh a mi, ki lu er ka gbough nahan. I kaa a mo er: Mough sha, kar tempel u Aôndo man atse a nanden nagh sha mi, man mba ve lu civir Aôndo kimi la kpaa. 2 Kpa tembe u ken kungur u tempel la yô, gba den u tsô, u̱ lu ken won, de karen u ga, gadia i na u sha ikev i akuraior, aa ndyar icighangar shin angahar á kuma iwer akunduahar kar ihiar. 3 Me na mbashiada Av mba uhar tahav vea ôr kwaghôron u profeti á kuma ayange dubu man deri uhar man akunduatar, vea haa abaasôhô iyol. 4 Mban yô, ka ikon i olev ihiar man shi udaarmbaamenger uhar mba ve til sha ishigh ki Ter u taregh. 5 Ka a sar or pe eren ve kwagh u vihin yô, usu u due ken zwa ve u hia mbaihomov vev. Man shi ka a sar or pe eren ve kwagh u vihin yô, kape á wua nan keng je la. 6 Ve yô, mba a tahav mbu cirin Sha sha er ma ura u̱ de nee sha ayange a ve lu ôron kwaghôron u profeti la ga yô, shi mba a tahav sha mnger sha u geman ma ma̱ hingir awambe, man shi u haan hanma injacan sha tar, hanma shighe u i sar ve cii. 7 Zum u vea kure shiada ve u eren yô, inyam i i dugh ken ihungwa i i za kweng la ia nôngo ityav a ve ia hemba ve ia wua ve kpaa. 8 Akom a ve aa lu sha gbenda ken zegegar u i yer un sha inja i jijingi er Sodom man Igipiti her ape Ter ve kpaa, i mande Un sha terankon la. 9 Ior mba ken iniongo i ior man ikwe man ijô man akuraior vea kenger akom a ve á kuma ayange atar man tiôn vea rumun er i̱ ii a shin uwar ga; 10 mba ve tem sha tar cii vea ember sha ci u kwagh u a er ve la, á saan ve iyol vea tindi uiwua hen ayol a ve, sha ci u uprofeti mba uhar mban ve er mba shin tar ican yum yô. 11 Kpa ayange nga kar atar man tiôn yô, iôôn i uma i Aôndo nyôr ken ve, maa ve mough ve tile sha sha angahar a ve, zegemcie gba sha mba ve nenge a ve la. 12 Tsô ve ungwa imo i vesen due Sha kaa a ve er: Kôndo nen shaan! Nahan ve kôndo ve yem Sha ken ibeen, mbaihomov vev mbara lu kenger ve je. 13 Hen shighe la je tar tenger kpen kpen, tiôn môm u ken atôôn pue a gar yôhôr, i wua ior dubu utaankaruhar sha mtenger u tar la, mba ve shi her yô, cier ve iyol, ve gba civir Aôndo u Sha. 14 Kwaghtseren u sha uhar kar ve, nenge, kwaghtseren u sha utar la ngu van fefa. 15 Ortyom u Sha u sha utaankaruhar kpaa tôngo, tsô i ungwa uzegembaamoov Sha, ve kaa er: Tartor u shin tar hingir u Ter wase man u Kristu Na ve, Una tema tor gbem sha won. 16 Tsô mbatamen mba ikundu kar unyiin mba ve tema sha mkônom vem ma torom sha ishigh ki Aôndo la gba inya ve cir ishiv vev inya, ve civir Aôndo, 17 ve kaa er: We Ter, Aôndo, Uhembanagee, We u U lu her, ngise kpaa U lu la, se mba wuese We sha ci u U ngohol agee a vesen a Ou la shi U tem tor yô. 18 Akuraior yuwe kpa iyugh You gema va man shi shighe u á ôr mbakpenev ijir, man shighe u á na mbatomov Ou injar, ka uprofeti man uicighanmbaiorov, man mba ve cie iti You, mbavesen kua mbakiriki la, man shi shighe u á tim mba ve lu vihin tar la kpaa. 19 Tsô i bugh tempel u Aôndo Sha, nahan i nenge a areki u ikuryan Na ken tempel Na, man inyiar lu man amo man idyuran man tar tenger man awombo a vesen kpaa.

12:1 Tsô i nenge a zegeivande Sha. Kwase cir iyange iyol, uwer lu shin angahar a na, lu a tsar u sha asan pue kar ahar sha ityough nagh, 2 gema lu iyav, lu ngoron sha ican i mar, lu toghor mar. 3 Shi i nenge a ivande igen Sha, nenge, zegedarakon u nyian lu, lu a ityouv itiankarihiar man akor pue man sha ityouv itiankarihiar la yô, lu a ader a tor ataankarahar. 4 Tsa na kombor tiôn môm u ken atôôn atar a asan a sha aôndo haa shin inya. Tsô darakon la va tile sha ishigh ki kwase u a sôôn u maren la, sha u zum u una mar yô, maa un una mena wan la. 5 Nahan a mar wan u nomso u una tema tor sha akuraior sha tôgh ku iyôôgh; i tsuwe wan na la kera, i yem a mi sha Aôndo man sha ikônough Nagh ki torough. 6 Kwase la gema yevese yem ken ikôngo ape a lu a ijiir i Aôndo vande sôron sha ci na sha u á koso un her, á kuma ayange dubu man deri uhar man akunduatar. 7 Tsô ityav gba Sha, Mikael kua mbatyomov nav lu nôngon a darakon. Darakon a mbatyomov nav kpaa lu nôngon, 8 kpa a hemba ga, ian kera lu sha ci ve Sha kpaa ga. 9 I gbihi zegedarakon la shin inya, ka tseyô je la, u i yer un er Diabolo man shi Satan la, u a lu tsughun tar cii la, i gbihi un shin tar shi i gbihi mbatyomov nav a na imôngo kpaa. 10 Tsô m ungwa zegeimo Sha, lu kaan er: Hegen yô, myom man agee man tartor u Aôndo wase man shi tahav mbu Kristu Na kpaa va ve, gadia or u senden anmgbianev asev la yô, i gbihi un kera, un u a senden ve sha ishigh ki Aôndo atetan kpaa, tugh kpaa la. 11 Ve yô, ve hemba un sha awambe a Waniyôngo man shi sha kwaghôron u shiada ve man uma ve kpaa doo ve ishima ga zan zan ar ken ku je. 12 Nahan yô, ember nen ne Usha, man shi ne mba ne tem ker kpaa. Kpa kwagh á gema á tser tar man zegemnger gadia diabolo sen shin ven, ishima vihi un tsung gadia a fa er shighe na a kera vese ga yô. 13 Zum u darakon la nenge er i gbihi un shin tar yô, a zenda kwase u a mar wannomso la. 14 Kpa i na kwase la akper a zegegafa er a̱ purugh a̱ kar sha ishigh ki iyô la kera a̱ yem ken ikôngo hen ijiir na ape á koso un á kuma shighe man ashighe man veghershighe. 15 Tsô iyô la suwa mngerem ma ken zwa u i ken ijime i kwase la er ka ifi nahan sha u ia er ma̱ kuwa a na kera yô. 16 Kpa tar gema wase kwase la, tar aver zwa u u, mena ifi u darakon suwa ken zwa na kera la. 17 Nahan ishima vihi darakon a kwase la, a yem sha u za nôngon ityav a tsombor na u u shi her u kor atindi a Aôndo shi u lu eren shiada sha kwagh u Yesu kpaa yô.

3 Me na mbashiada Av mba uhar tahav vea ôr kwaghôron u profeti á kuma ayange dubu man deri uhar man akunduatar, vea haa abaasôhô iyol. 4 Mban yô, ka ikon i olev ihiar man shi udaarmbaamenger uhar mba ve til sha ishigh ki Ter u taregh. 5 Ka a sar or pe eren ve kwagh u vihin yô, usu u due ken zwa ve u hia mbaihomov vev. Man shi ka a sar or pe eren ve kwagh u vihin yô, kape á wua nan keng je la. 6 Ve yô, mba a tahav mbu cirin Sha sha er ma ura u̱ de nee sha ayange a ve lu ôron kwaghôron u profeti la ga yô, shi mba a tahav sha mnger sha u geman ma ma̱ hingir awambe, man shi u haan hanma injacan sha tar, hanma shighe u i sar ve cii. 7 Zum u vea kure shiada ve u eren yô, inyam i i dugh ken ihungwa i i za kweng la ia nôngo ityav a ve ia hemba ve ia wua ve kpaa. 8 Akom a ve aa lu sha gbenda ken zegegar u i yer un sha inja i jijingi er Sodom man Igipiti her ape Ter ve kpaa, i mande Un sha terankon la. 9 Ior mba ken iniongo i ior man ikwe man ijô man akuraior vea kenger akom a ve á kuma ayange atar man tiôn vea rumun er i̱ ii a shin uwar ga; 10 mba ve tem sha tar cii vea ember sha ci u kwagh u a er ve la, á saan ve iyol vea tindi uiwua hen ayol a ve, sha ci u uprofeti mba uhar mban ve er mba shin tar ican yum yô. 11 Kpa ayange nga kar atar man tiôn yô, iôôn i uma i Aôndo nyôr ken ve, maa ve mough ve tile sha sha angahar a ve, zegemcie gba sha mba ve nenge a ve la.

Nahan i nam iyiagh ki karen kwagh a mi, ki lu er ka gbough nahan. I kaa a mo er: Mough sha, kar tempel u Aôndo man atse a nanden nagh sha mi, man mba ve lu civir Aôndo kimi la kpaa. 2 Kpa tembe u ken kungur u tempel la yô, gba den u tsô, u̱ lu ken won, de karen u ga, gadia i na u sha ikev i akuraior, aa ndyar icighangar shin angahar á kuma iwer akunduahar kar ihiar.

Nenge, M ngu tindin ortyom Wam, una sôrom gbenda ken hemen; man Ter u ne keren Un la Una va ken tempel Na fese je, ka Ortyom u ikuryan, u i doo ne a Na yô; nenge, ngu van, kape TER u akum a Sha A kaa ne. 2 Kpa ka anti nana hendan ishigh a iyange i mve Na laa? Man ka anti kpaa nana tile sha zum u Una ande laa? Gadia ngu er ka usu u or-soughon iyôgh nahan, man er icahul i or u ôôn akondo yô; 3 Una tema er orsoughon man orsôron azurfa sha u a̱ hingir wang yô, Una wanger ônov mba Levi, Una wanger ve wang er zanaria man azurfa nahan; nahan vea na TER nagh sha perap̣era.

3 Me na mbashiada Av mba uhar tahav vea ôr kwaghôron u profeti á kuma ayange dubu man deri uhar man akunduatar, vea haa abaasôhô iyol.

9 Ior mba ken iniongo i ior man ikwe man ijô man akuraior vea kenger akom a ve á kuma ayange atar man tiôn vea rumun er i̱ ii a shin uwar ga;

Tsô tor Dariu kaa, nahan i ker ken iyou i koson uruamabera henpe i koson ikav mbi injaav ken Babilon la. 2 Nahan i zua a ihurentakerada hen Akemeta, ken iyou i tor, i ken tar u Media la, i nger sha mi nahan: Kwagh u umbur: 3 Sha inyom i hiihii i tor Shirushi la, tor Shirushi kaa er: Sha kwagh u iyou i Aôndo i ken Yerusalem la, i̱ shi i̱ maa iyou la her, kaa ijiir i nan nagh her je la, i̱ tim imagh ki i ki̱ taver: ityaven i i, i̱ lu aseva akunduatar, igbanger i i kpaa aseva akunduatar, 4 sha uzegembaawenev iniongo itiar man ikpande i he, nongo môm; inyaregh ki á vihi yô, á dugh ki ken iyounyar i tor; 5 ikav mbi zenaria man mbi azurfa mbi ken iyou i Aôndo mbi Nebukadinesar lu kura ken tempel u a lu ken Yerusalem, va mi ken Babilon la kpaa, i̱ hide a mi, shi i̱ za ver mbi ken tempel u ken Yerusalem la, hanimôgh sha ijiir i ki; ú ver mbi ken iyou i Aôndo. 6 Nahan yô, we, Tatenai, gomna u yande Ifi man Shetarbosenai kua nongo wen, ugomna mba ve lu yande Ifi la, kar nen hen ijiir la kera, yem nen ca; 7 tsuwa nen ave sha kwagh u tom u iyou i Aôndo la kera; gomna u Mbayuda kua mbavesen mba Mbayuda ve̱ maa iyou i Aôndo la hen ijiir i i. 8 Man shi m wa tindi sha kwagh u né er mbavesen mba Mbayuda mbara, sha u wasen ve u maan iyou i Aôndo la: ka ken inyaregh ki tor a zough a mi sha kpandegh ku yande Ifi la je, i̱ pande i̱ na ior mban inyaregh ki ve vihi la, doo doo ye, i̱ de timbir ga. 9 Man kwagh u a gbe ve sha agumabua man anomaiyôngo man agumaiyôngo sha ci u iniav mbi nanden Aôndo u Sha, man alakema man bar man wain kua mkurem, sha imo i upristi mba ve lu ken Yerusalem la yô, i̱ naan ve ayange ayange i̱ de bundu ga, 10 sha u ve̱ naan Aôndo u Sha iniav mbi human doon man ve̱ eren msen kpaa sha ci u uma u tor kua u ônov nav. 11 Shi m kaa mer, hanma or u nana er kposo sha kwaghôron ne yô, i̱ tsuwa hwange hen ya u nan, i̱ kenden nan sha, i̱ mande nan sha u; shi á gema ya u nan á hingir tihi u uihôgh sha ci u kwagh ne; 12 man Aôndo u A ne iti Na i tem hen ijiir la kpaa, A̱ nzughul a utor cii man akuraior, a vea za uwegh sha u geman kwagh ne kposo, er vea yôhôr iyou i Aôndo i i lu ken Yerusalem la yô. Mo Dariu m kaa nahan; yô, i̱ er nahan sha ishima i môm je.

10 Tsô a nger ken iti i tor Ahasueru, a ver ikav sha mi sha kunya u tor, a tindi uwashika sha ikev i mbatyomov mba hendan anyinya a tor a yevese tsung, a i mar a hen ya u tor la; 11 a nger er, tor rumun er Mbayuda mba ve lu ken hanma gar, ve̱ kohol imôngo, ve̱ nôngo sha ci u uma ve, sha u saren man u wuan man u timin hanma ikumutya i ior man i ipaven cii, mba vea mough num a ve la, a mbayev mba kiriki kua kasev vev, man shi ve̱ kura inyarev vev ve̱ ya ishar, 12 sha iyange i môm ken uipaven mba tor Ahasueru cii, ka sha iyange i sha pue kar utar sha uwer u sha pue kar uhar la, ka uwer u Adar je la. 13 I kaa ken kwaghngeren la er, i̱ wa tindi la sha hanma ipaven, man i̱ yôô un hen akuraior cii, sha er Mbayuda ve̱ wa ago iyol sha ci u iyange la, ve̱ or iyev sha mbaihomov vev yô.

16 Kpa tar gema wase kwase la, tar aver zwa u u, mena ifi u darakon suwa ken zwa na kera la.

20 Aôndo wase ka Aôndo u yiman se acin imôngo je, iku i waren kpaa ka hen AÔNDO Ter i lu ye.

21:1 Ishima i tor ngi sha ikev i TER er uikuwanmbamngerev nahan, ka A gema i henpe i sar Un cii,

21 Kpa TER lu a Yosev, eren a na dedoo, A na doo orkurangaadi la a na. 22 Orkurangaadi gema mbakwarev mba ve lu ken gaadi ca ca, wa Yosev sha ikyev; hanma kwagh u i eren ker kpaa, i lu un a er ye. 23 Ishima i kera nyian orkurangaadi sha ma kwagh môm u a lu sha ikev na ga, gadia TER lu a na; kwagh u a eren kpaa, TER a veren kwagh la doo doo.

17 A tindi or vande hemen ve; i tee Yosev, hingir kpan; 18 i mande un agbe shin angahar, ican er un sha iyô, 19 zan zan shighe u imo Na kar kuren, man mkaanem ma TER kar un kera la. 20 Tor tindi er i̱ pase un, i̱ tuhwa; ka ortaregh u ior pase un tuhwa ye;

12 Sarem pe fa nen anmgbianev, kwagh u a erem ne gema hingir mzehemen u Loho u Dedoo, 13 je hingir ken igbar ken ya u mbakuran mba Shisar cii man mbagenev cii kpaa er ikangenev mbi i kangem ne ka sha ci u Kristu je, 14 man anmgbianev mba ken Ter mba ve zough a ishima i taver sha ikangenev yav, mba ve hembe cihin u ôron kwaghôron u Aôndo, ve kera cie ga yô, ve hemba ngeen.

10 De cie akaa a aa va tser u la ga. Nenge diabolo ngu veren iyol u una kende ior enev mbagenev ken gaadi, sha u á kar ne yô; man ican ia er ne á kuma ayange pue je. Lu jighjigh, ar ken ku je man Me na u tsar u uma ye.

13:1 Tsô m nenge inyam due shin zegemnger lu a akor pue man ityouv itiankarihiar. Sha akor a i yô, ader a tor lu pue, sha ityouv mbi i yô, ati a uityuhwan lu. 2 Inyam shon i m nenge a mi la yô, i lu er ka anyam nahan, angahar a i lu er a dwem nahan, man zwa u i lu er zwa u begha nahan. Darakon gema na i agee a na man shi ikônough nagh ki torough man shi tahav mbu vesen kpaa. 3 Ityough ki mômough ken ityouv mbi i yô, lu er i gber ki, er kia kpe nahan; kpa ivav i i mgbôghom a ku la i bee. Tar cii dondo inyam la, kpiligh ior iyol a i, 4 ve civir darakon sha ci u a gem tahav nav a ne inyam la yô, shi ve civir inyam la kpaa, ve kaa er: Ka an nan lu er inyam ne nahana, man shi ka an nana fatyô u nôngon ityav a ii? 5 Shi i na inyam la zwa sha u ôron uzegembaakaav kua ityuhwanev kpaa, shi i na i ian er i̱ eren tahav zan zan iwer akunduahar kar ihiar. 6 Tsô i bugh zwa u i, i gba tuhwan Aôndo, shi i tuhwa iti Na kpaa man shi tabernakel Na kpaa, ka mba ve tem Sha je la. 7 Shi i na i ian sha u i̱ nôngo ityav a uicighanmbaiorov i̱ hemba ve kpaa, shi i na i tahav sha hanma nongo man hanma nongoior man hanma zwa man hanma ikurior kpaa. 8 Mba ve tem shin tar cii vea civir i, ka ve mba i nger ati a ve ken ruamabera u uma u Waniyôngo ga la, Un u i senge Un hii sha igbetar je la. 9 Aluer or nana lu a ato yô, nana̱ ungwa. 10 Aluer i ver or sha ci u uikangen yô, ka ken uikangen je nana za keng ye. Aluer or nana wua sha sanker yô, nan di kpaa, á wua nan sha sanker keng. Ka sha kwagh ne man ishima i taver i uicighanmbaiorov man jighjigh ve u nan a lu ye. 11 Shi m nenge inyam igen due shin tar, lu a akor ahar er waniyôngo nahan, kpa i gema i lu ôron kwagh er darakon nahan. 12 I lu eren tahav mbu inyam i hiihii la cii sha ishigh ki i hiihii la, shi i lu eren er tar kua mba ve tem ken u yô, ve̱ civir inyam i hiihii i ivav i i, i mgbôghom ken ku kpa i war la. 13 I er uivande mba vesen, i er usu je kpaa due Sha sen shin tar sha ashe a ior. 14 I lu tsughun ior mba ve tem shin tar sha uivande mba i ne i u eren sha ishigh ki inyam i hiihii la, i kaa a ve er ve̱ er eev mbu inyam i i gber i sha sanker kpa i lu uma her la. 15 Man i na i ian sha u i̱ na iôôn ken eev mbu inyam la nahan eev mbu inyam mbura gba lamen je, shi i na er mba ve civir eev mbu inyam la ga yô, i̱ wua ve kera. 16 Shi i lu eren er i̱ na ior cii ikav sha uwegh vegh ku yanegh shin icul ve, mbakiriki man mbavesen kpaa, mbanyarev man mbaatsanev kpaa, ônov man ikpan kpaa, 17 sha u ma or nana̱ de fetyô u yamen kwagh ga shin u teen kwagh kpaa ga, saa di or u nan lu a ikav la, ka iti i inyam la je la, shin iyenge i iti i i. 18 Heen yô, kwaghfan ngu. Or u nan lu a mfe yô, nana̱ ôr iyenge i inyam la, gadia ka iyenge i or je. Iyenge i i yô, ka deri ataratar man akunduatar kar ataratar.

14:1 M shi m ver ashe, tsô nenge, Waniyôngo tile sha uwo u Shion. Ior lu a Na imôngo ve kuma dubu deri man akunduahar kar unyiin, i nger iti Na man shi iti i Ter Na sha atsul a ve. 2 Tsô m ungwa imo due Sha lu er ihuran i mngerem ma vesen nahan, shi lu er kume u idyuran i baveraa nahan. Imo i m ungwa la lu er mbakuhwanadiguve mba kuhwan mbaadiguve vev nahan. 3 Ve lu wan icam i he sha ishigh ki ikônough ki torough kira man sha ishigh ki akaauma a anyiin la man mbatamen kpaa. Ma orgen fatyô u rumun icam la ga, saa di mba dubu deri man akunduahar kar unyiin mbara mba i paa ve shin tar la tseegh. 4 Mban ka mba ve hôngor ayol a ve sha ukase ga la, mba wang er ka anuunaukase nahan. Ka ve ve lu dondon Waniyôngo hen ape A ze cii ye, ka mba i paa ve ken ior, ve lu iyiagh ki tsutswaagh sha ci u Aôndo man sha ci u Waniyôngo kpaa ye. 5 Ken zwa ve kpaa i zua a aie ga; mba a acôghor iyol ga. 6 M shi m nenge ortyom u Sha ugen lu purugh sha kwavaôndo lu a Icôronloho u Dedoo u yôôn hen mba ve tem shin tar cii, hen hanma ikurior man hanma nongo man hanma zwa man hanma nongoior. 7 Lu kaan sha zegeimo er: Cia nen Aôndo, na nen Un icivir gadia shighe Na u ôron ijir kuma ve, civir nen Un u A er Sha man tar man zegemnger man amboramnger kpaa la. 8 Ortyom u Sha ugen u sha uhar kpaa dondo, lu kaan er: A yôhôr ve, Zegebabilon u a er akuraior cii a ma wain u asaren a na a ijimbagh la, yôhôr ve. 9 Shi ortyom u Sha ugen u sha utar dondo sha a ve, lu kaan sha zegeimo er: Aluer anti or nana civir inyam man eev mbu i shi nana ngohol ikav sha icul shin sha uwegh ku nan yô, 10 nan kpaa nana ma wain u iyugh i Aôndo u i nongo kwagh sha mi ga i hee ken iyongo i iyugh Na la. Á er nan ican sha usu man sha sulfur sha ishigh ki uicighanmbatyomov mba Shaav man sha ishigh ki Waniyôngo kpaa. 11 Mnyim ma ican ve la maa kôndon sha gbem sha won. Mba a mmem ga, tugh kpaa tetan kpaa; ka mba ve civir inyam man shi eev mbu i man shi anti or u nan ngohol ikav i iti i i je la. 12 Ka heen man ishima i taver i uicighanmbaiorov i lu ye, ka ve mba ve we atindi a Aôndo iko man shi jighjigh u nan Yesu la kpaa. 13 Shi m ungwa imo due Sha, kaa er: Nger wer: Hii hegen je zan zan mbakpenev mba ve kpe ken Ter yô, á saan ve iyol. Jijingi kaa er: Kape i lu je la, ka sha u vea mem ityom ve gadia aeren a ve nga zan a ve ityô. 14 M shi m ver ashe, nenge, ibeenegh ki pupuu lu, or tema sha mi lu inja er wan u or nahan, lu a tsar u zenaria sha ityou shi lu a louji u esen tsor tsor sha uwe. 15 Ortyom u Sha ugen due ken tempel, yila u a tema sha ibeen la sha zegeimo er: Naregh louji wou, sunda, gadia shighe u sunda kuma ve, sunda u shin tar kpaa via tsembelee. 16 Tsô un u a tema sha ibeen la vishigh louji na shin tar, maa i sunda tar je. 17 Shi ortyom u Sha ugen due ken tempel u a lu Sha. Un kpaa, lu a louji u esen tsor tsor. 18 Ortyom u Sha ugen kpaa shi due ken atse a nanden nagh sha mi la; ka u a lu a tahav sha usu je la. A ôr kwagh sha zegeimo a u a lu a louji u esen tsor tsor la, a kaa er, naregh louji wou u esen tsor tsor la sunda asume a wain u shin tar gadia asume a na via ve. 19 Tsô ortyom u Sha la vishigh louji na shin tar, a sunda wain u shin tar, a haa shin zegeihungwa u shoghor wain u iyugh i Aôndo la. 20 Nahan i shoghor wain shin ihungwa i shoghor wain la, ken won gar. Awambe due shin ihungwa la zan zan ar sha ulagema mba anyinyaav, zan zan mail deri uhar je.

15:1 M shi m nenge ivande igen Sha, i vesen i kpiligh iyol kpaa. Mbatyomov mba Shaav utaankaruhar, lu a atsan a ataankarahar, ka a masetyô je la, gadia ka sha a je iyugh i Aôndo ia kure ye. 2 Shi m nenge kwagh er zegemnger u lun er gelashi nahan u i nongo usu sha mi yô. Mba ve hemba inyam la man shi eev mbu i man shi iyenge i iti i i yô, ve tile ken kpezegemnger u lun er gelashi nahan la, ve lu a mbaadiguve mba Aôndo. 3 Ve lu wan icam i Mose wanakiriki u Aôndo man shi icam i Waniyôngo kpaa, ve lu kaan er: We Ter, Aôndo, Uhembanagee, ityom You i vese, i kpiligh iyol kpaa. Igbenda You ka jighjigh man shi mimi kpaa, We, Tor u akuraior cii. 4 We, Tere, ka an je nana cia U ga, man shi ka an nana civir iti You kpaa ga? Gadia ka We tseegh U lu wang ye, akuraior cii aa va aa va gure sha ishigh Yough gadia i pase ajir a ôron a Ou a jighjigh la ken igbar ve. 5 Ken masetyô u akaa ne m nenge i bugh tempel u tenti u shiada Sha. 6 Tsô mbatyomov mba Shaav mba utaankaruhar mba ve lu a atsan a ataankarahar la due ken tempel. Ve haa akondo iyol a wang a engem, shi ve zer ikwange i zenaria sha vanger. 7 U môm ken akaauma anyiin la gema na mbatyomov mba Shaav mba utaankaruhar mbara agbande a zenaria ataankarahar iv a iyugh i Aôndo u A lu uma gbem sha won la. 8 Tsô tempel iv a mnyim ma iengem i Aôndo man shi mnyim ma agee a Na kpaa, ma or môm kera fatyô u tilen ken tempel ga, saa atsan a ataankarahar a mbatyomov mba utaankarahar mbara aa bee kera ve.

16:1 M shi m ungwa zegeimo due ken tempel, i kaa a mbatyomov mba Shaav mba utaankaruhar mbara er: Za nen za haa nen agbande a ataankarahar a iyugh i Aôndo i lu shimi la shin tar. 2 Tsô ortyom u Sha u hiihii la za za haa gbande na shin tar, maa ior mba ve lu a ikav i inyam shi ve lu civir eev mbu i kpaa la, ve gba avav a bo a vihin. 3 U sha uhar gema haa gbande na shin zegemnger maa hingir er ka awambe a orkpen nahan, hanma kwagh u uma u shin zegemnger cii kpe. 4 Ortyom u Sha u sha utar haa gbande na shin uifi man amboramnger maa ve hingir awambe. 5 Shi m ungwa ortyom u mnger lu kaan er: We, U ngu u perapera, We u U lu hegen, ngise kpaa U lu la, U ngu wang sha ajir a ôron a Ou ne. 6 Gadia ve haa awambe a uicighanmbaiorov man uprofeti kpaa, nahan U na ve awambe Wer, ve̱ ma. Kwagh ne kuma sha a ve je. 7 Shi m ungwa atse a nanden nagh sha mi la kpaa lu kaan er: Kape i lu je la Tere, Aôndo Uhembanagee, ajir a Ou a ôron ka sha mimi man sha jighjigh kpaa. 8 Ortyom u Sha u sha unyiin la haa gbande na sha iyange maa i na iyange ian sha u i̱ hia ior sha usu yô. 9 Tsô ior hia sha mtsee u taveraa la, ve gba tuhwan iti i Aôndo u A lu a tahav sha atsan angan, ve kera gema asema, ve na Un icivir ga. 10 Ortyom u Sha u sha utaan la haa gbande na sha ikônough ki torough ki inyam la, maa taror u i wa ime, ior gba nyuman iniombor ve sha ci u mnyoon. 11 Ve tuhwa Aôndo u Sha sha ci u mnyoonom vem man shi avav a ve la kpaa, ve kera gema asema a ve sha aeren a ve la kera ga. 12 Ortyom u Sha u sha ataratar la haa gbande na shin zegeifi u Uferati, maa mngerem nam uma sha u sôron gbenda sha ci u utor mba sha ityoughkitaregh la. 13 M shi m nenge ujijingi mba hwangerev utar er asôhô nahan due ken zwa u darakon la man shi ken zwa u inyam la man shi ken zwa u profeti u aiegh la. 14 Gadia ka ujijingi mba diabolo mba ve eren uivande la, mba duen zan hen utor mba sha tar sha won cii sha u kohol ve ijiir i môm sha ci u ityav mbi iyange i vesen i Aôndo, Uhembanagee la. 15 Nenge, M ngu van er ormbaiv nahan. Or u nan lu per shi nan kor riga u nan sha u nana kera zende idyelegh er á nengen kunya u nan ga yô, i saan nan iyol. 16 Tsô ve kohol ve imôngo hen ijiir i i yer ken zwa u Heberu er Armagedon la. 17 Ortyom u Sha u sha utaankaruhar la haa gbande na sha ahumbe, nahan zegeimo due ken tempel, ken ikônough ki torough kira, lu kaan er: I kure ve! 18 Maa inyiar lu kpishi kua amo man idyuran kpaa, tar kpaa tenger sha agee, imba i u lu a vande tenger mayange ga, hii sha shighe u or hii teman shin tar la je, kape mtenger u tar ne a lu sha agee ne. 19 Nahan zegegar la pav ikwe itiar, agar a akuraior kpaa yôhôr kera. Aôndo umbur Zegebabilon sha u nan un iyongo i wain u iyugh Na la. 20 Nahan acile cii yevese, i kera zua a iwo kpaa ga. 21 Uzegembaawombov osogh Sha haa shin tar, iwombo i môm yuhwa kuma er talenti môm nahan (pams deri môm). Ior gba tuhwan Aôndo sha ican i awomboogh la, gadia ican i a la cier iyol yum.

Tsô m nenge inyam due shin zegemnger lu a akor pue man ityouv itiankarihiar. Sha akor a i yô, ader a tor lu pue, sha ityouv mbi i yô, ati a uityuhwan lu. 2 Inyam shon i m nenge a mi la yô, i lu er ka anyam nahan, angahar a i lu er a dwem nahan, man zwa u i lu er zwa u begha nahan. Darakon gema na i agee a na man shi ikônough nagh ki torough man shi tahav mbu vesen kpaa.

11 Shi m nenge inyam igen due shin tar, lu a akor ahar er waniyôngo nahan, kpa i gema i lu ôron kwagh er darakon nahan.

15 Man i na i ian sha u i̱ na iôôn ken eev mbu inyam la nahan eev mbu inyam mbura gba lamen je, shi i na er mba ve civir eev mbu inyam la ga yô, i̱ wua ve kera. 16 Shi i lu eren er i̱ na ior cii ikav sha uwegh vegh ku yanegh shin icul ve, mbakiriki man mbavesen kpaa, mbanyarev man mbaatsanev kpaa, ônov man ikpan kpaa, 17 sha u ma or nana̱ de fetyô u yamen kwagh ga shin u teen kwagh kpaa ga, saa di or u nan lu a ikav la, ka iti i inyam la je la, shin iyenge i iti i i.

Tsô m nenge inyam due shin zegemnger lu a akor pue man ityouv itiankarihiar. Sha akor a i yô, ader a tor lu pue, sha ityouv mbi i yô, ati a uityuhwan lu.

11 Shi m nenge inyam igen due shin tar, lu a akor ahar er waniyôngo nahan, kpa i gema i lu ôron kwagh er darakon nahan.

15 Man i na i ian sha u i̱ na iôôn ken eev mbu inyam la nahan eev mbu inyam mbura gba lamen je, shi i na er mba ve civir eev mbu inyam la ga yô, i̱ wua ve kera.

17:1 Nahan u môm ken mbatyômov mba shaav mba utaankaruhar mba ve lu a agbande la va va ôr kwagh a mo, kaa er: Va heen, m̱ teseu ijirôron i zegeidyakwase u a tem sha mngerem ma kpishim la. 2 Ka un man utor mba shin tar ve er idya a na, mba ve tem shin tar kpaa ve hunde wain u idya na la. 3 Nahan a kua a mo ken Jijingi a yem a mo ken taaikôngo. Tsô m nenge a kwase tema sha inyam i nyian bong, i lu a ati a uityuhwan iyol wue wue, i lu a ityouv itiankarihar man akor pue. 4 Kwase la yô, haa akondo a nyian dindee man a nyian bong iyol, lu a zenaria iyol wue wue man shi awen a injaa man utagbede kpaa, lu a iyongo i zenaria ken uwegh nagh, iv a akaa a ndôhôr ishima man akaa a hôngorough a idya nan la. 5 Sha icul na yô, i nger iti sha mi lu kwaghmyer je. I nger er: ZEGEBABILON, NGÔ U UDYAMBAKASEV MAN SHI AKAA A NDÔHÔR ISHIMA A SHIN TAR KPAA. 6 M shi m nenge kwase la lu hunden sha awambe a uicighanmbaiorov man shi sha awambe a mbashiada mba Yesu kpaa. M nenge a na nahan kpiligh mo iyol je gande. 7 Tsô ortyom u Sha la kaa a mo er: Kanyi kwase ne a kpiligh we iyol nahana? Me pase u kwaghmyer u kwase ne man shi inyam i a hende, i lu a atyouv ityiankarihar man a kor pue la. 8 Inyam i u nenge a mi la ngise i lu kpa hegen kera ngi ga, ngi sôôn u duen shin ihungwa i i ze kweng la karen zan ken mtim. Mba ve tem shin tar, mba hii sha igbetar je i nger ati a ve ken ruamabera u uma ga la, á kpiligh ve iyol er ngise inyam la i lu kpa hegen i kera lu ga, kpa shi i a va lu la. 9 Ka sha kwagh ne man mkav u lun a mfe la a lu ye. Ityouv itiankarihiar la ka iwo itiankarihiar i kwase la a tem sha mi je la. Shi ka utor utaankaruhar kpaa. 10 Ken ve yô, mba utaan ve gba, u môm ngu her, ugen la yô, ngu a va ga. Zum u una va yô, una tema keng kpa á lu anshighe kpeghee tsô. 11 Sha kwagh u inyam i ngise i lu kpa hegen i lu ga la yô, ka i je i lu i sha aniegheni ye, kpa ngi ken mba utaankaruhar la, shi ngi zan ken mtim. 12 Akor pue a u nenge a mi la yô, ka utor pue je la. Mba a ngohol tahav mbu tor ga, kpa vea ngohol tahav er utor nahan a inyam la imôngo á kuma ihwa i môm. 13 Mban yô, ishima ve ngi môm, mba geman agee ve man tahav vev nan inyam la. 14 Vea nôngo ityav a Waniyôngo kpa Waniyôngo Una hemba ve kua mba ve lu a Na imôngo la, ka mba i yer ve, i tsough ve, ve lu jighjigh la, gadia Un ka Ter u uter man Tor u utor kpaa. 15 Shi a kaa a mo er: Mngerem ma u nenge a mi ma idyakwase a tem sha mi la yô, ka iniongo i ior man akumaior man akuraior man ijô. 16 Man shi akor pue a u nenge a mi la kua inyam yô, vea kôr idyakwase la ihom, vea ngohol un akaa, una hingir aveve una hungwa idyelegh, vea ya inyam na vea nande un sha usu. 17 Gadia Aôndo na ve ken asema a ve sha u ve̱ er sha awashima Na, ve̱ er a ishima môm je, ve̱ gema tor ve, ve̱ na inyam la zan zan akaaôron a Aôndo aa kure vough yô. 18 Kwase u u nenge a mi la yô, ka zegegar u a lu a tahav sha utor mba shin tar yô.

18:1 Ken masetyô u akaa ne yô, m nenge ortyom u Sha ugen lu senen Sha, lu a tahav mbu vesen, tar kpaa wanger sha iengem na la. 2 A yila sha imo i genger genger a kaa er: A yôhôr ve, Zegebabilon yôhôr ve, hingir ijiir i ujijingi mba bov tsan her, shi hingir ya u hanma jijingi u hwangeregh man shi ya u inyon i hwangerev man i ndôhôr ishima kpaa. 3 Gadia akuraior cii ma wain u isharen na i ijimbagh la. Utor mba shin tar kpaa er idya a na. Mbakasuav mba shin tar hingir mbanyarev sha agee a ishar na i i haa ve iyol la. 4 Shi m ungwa imo igen due Sha kaa er: Nongoior Wam, due nen ken a na kera sha er né nyôr nongo sha asorabo a na ga, shi né ngohol atsan a tseren un la kpaa ga yô, 5 gadia asorabo a na hingir tihi tav je ar Sha, Aôndo kpaa umbur afer a na. 6 Er nen a na vough er un kpaa a eren nahan la; or nen un iyev kwa har sha aeren a na la; nungwa nen un kwaghman kwa har shin iyongo i a lu nungwan la. 7 Er a lu civir iyol na shi ishar i lu haan un iyol nahan yô, kape na nen un ican man ijungwen vough la. Gadia ken ishima na yô, a lu kaan nahan er: M tema tor je, m ngu kwasecôghol ga, ijungwen kpaa me nenge a mi ashe ga. 8 Sha ci u nahan yô, atsan a na aa va shire sha a na iyange i môm je. Ka ku man ijungwen man ijen kpaa, á nande un sha usu kpaa. Gadia Ter Aôndo u A lu ôron un ijir la ka u ageegh je. 9 Utor mba ve er idya a na shi ishar i hee ve iyol a na imôngo la, vea vaa, vea zungwe un zum u vea nenge mnyim ma mhie na la. 10 Vea tile ken ica vea cia atsan a na la vea kaa er: Kwagh tser u ve! Kwagh tser u ve! we, zegegar ne, Babilon u taver ne, ijir you kure ken ihwa i môm tsô. 11 Mbakasuav mba shin tar mba vaan mba zungwen un, gadia or môm kera ngu yamen ikav vev ga. 12 Ka ikav mbi sha zenaria man azurfa man awen a injaa man utagbede man akondo a pupuu a dedoo man akondo a nyian dindee man akondo a shiliti man akondo a nyian bong man shi hanma inja i kon u human doon man hanma anzakaa a i er a sha anyi a nortar man shi hanma anzakaa a i er a sha ikon i injaa man sha dela man sha iyôgh ki iligh man sha awen a mabel 13 man shinamon man amomo man akaa a human doon man mkurem ma human doon man libano man wain man mkurem man mwem ma kengese man alakema man ibua man iyôngo man iyôngo man anyinya man akeke a zeren sha anyinya man ikpan man uuma mba iorov kpaa. 14 Atam a ou a a lu saren uma wou yum la kpaa a due ken a we kera, hanma kwagh u injaa man hanma kwagh u engem saa u ishe ve, á kera zua a mi mayange ga. 15 Mbaeren kasua sha akaa ne mba ve zough a mtsera ken a na, vea tile ken ica vea cia atsan a na la, vea vaa vea zungwe kpaa. 16 Vea kaa er: Kwagh tser un ve, kwagh tser un ve, zegegar ne u a hee akondo a pupuu a dedoo iyol man akondo a pupuu a dedoo iyol man akondo a nyian dindee man akondo a nyian bong kpaa, shi a er hwe iyol sha zenaria man awen a injaa man utagbede kpaa ne, 17 gadia sha ihwa i môm tseegh tsô i vihi imbaikpelainyar ne cii. Mbakôômutso cii man mbaperen zegemnger man mbaeren tom sha utso man mbazenden shin zegmnger cii, ve tile ken ica. 18 Mba nengen mnyim ma mhie na yô, ve genger imo ve kaa er: Ka hanma gar a kom sha zegegar nee? 19 Tsô ve haa vuluvuu sha ityouv vev, ve vaa, ve zungwe, ve kaa er: Kwagh tser un ye, kwagh tser un ve, zegegar ne, mba ve lu a utso shin zegemnger cii ve hingir mbanyarev sha akaa a na a injaa la. Gadia ken ihwa i môm tseegh tsô i yôhor un kera cii. 20 We Sha, man ne uicighanmbaiorov man mbaapostoli man uprofeti, ember nen sha kwagh na ne, gadia Aôndo kure ijir yen a na ve. 21 Tsô ortyom u Sha ugen u taver iyol tôô iwen er zegenase nahan kende shin zegemnger, kaa er: Kape á mgbegha zegegar u Babilon kera sha agee, á kera zua a na ga je ne. 22 Á kera ungwa imo i mbakuhwanadiguve ken we ga, shin mbawanatsam shin mbatôngonamar shin mbatôngonikor kpaa ga. Man á kera zua a ma or u fan eev u eren ma tom u sha kwaghfan ken we kpaa ga, á kera ungwa iov i nase ken a we kpaa ga. 23 Ma imenger ia kera ta iwanger ken a we kpaa ga, á kera ungwa imo i orkwasehe man shi kwasehe ken a we kpaa ga. Gadia mbakasuav ou lu ashagbaior shin tar, akuraior cii tsume sha ahir a ou la. 24 Ka ken a na man i zua a awambe a uprofeti kua uicighanmbaiorov man mba i wua ve shin tar cii la ye.

19:1 Ken masetyô u akaa ne m ungwa er ka zegeimo u zegeikpelaior Sha lu kaan er: Haleluya! Myom man iengem man agee ka a Aôndo wase, 2 gadia ajir a Na a ôron ka a mimi, nga jighjigh kpaa; gadia A kure ijir i zegeidyakwase u a lu vihin tar sha idya na ne, A or un iyev sha ci u awambe a mbatomov Nav la. 3 Shi ve kimbir u kaan er: Haleluya! Mnyim nam ma kôndon sha gbem sha won. 4 Tsô mbatamen mba ikundu kar unyiin la man akaauma a anyiin la gba inya ve cir ishigh inya ve civir Aôndo u A tem sha ikônough ki torough kira, ve kaa er, Amen, Haleluya! 5 Imo kpaa due ken ikônough ki torough kira kaa er: Wuese nen Aôndo wase, ne mbatomov Nav cii, ne mba ne cie Un ne, mbakiriki kua mbavesen cii. 6 Tsô m ungwa ihuran er ka zegeikpelaior nahan, shi lu er ihuran i mngerem ma vesen nahan, shi lu er ihuran i idyuran i taver taver nahan, i lu kaan er: Haleluya! Ter wase Aôndo, Uhembanagee, tema tor ve. 7 Se lu nen saan saan, se ember nen, se civir nen Un, gadia ivaa i zuan i Waniyôngo kuma ve, kwase Na kpaa kohol iyol ve. 8 I rumun un er a̱ wuha iyol sha akondo a pupuu a dedoo a engem ashe man a wang kpaa — gadia akondo a pupuu a dedoo la yô, ka aeren a perapera a uicighanmbaiorov. 9 Tsô ortyom u Sha kaa a mo er: Nger wer: Mba i lehe ve iniongo i kwasehe i Waniyôngo yô, saan ve iyol. Shi a kaa a mo er: Angan ka akaaôron a Aôndo a mimi. 10 Nahan m gba inya, m cir ishigh inya hen angahar a na, sha u me civir un. Kpa a kaa a mo er: De eren nahan ga! M ngu ortom a we imôngo kua anmgbianev ou mba ve lu a shiada sha kwagh u Yesu la kpaa. Civir Aôndo. Gadia ka shiada u sha kwagh u Yesu a lu jijingi u akaaôron a profeti ye. 11 Tsô m nenge Sha lu ivegher, nenge, nyinya u pupuu lu. Un u A tema sha mi la i yilan Un er Jighjigh man Mimi. Un er ijir sha perapera, shi nenge ityav kpaa. 12 Ashe a Na ka nomborusu; sha ityough Nagh yô, ader a tor lu imôngo. I nger Un iti i ma or nan fe i ga, saa Un iyol Na tsô. 13 Ngu a riga iyol u i we un shin awambe yô, mba yer iti Na er, Imo i Aôndo. 14 Akumautya a Sha dondo sha a Na, ve lu sha anyinya a pupuu, ve haa akondo a pupuu a dedoo a kungun a wang iyol. 15 Sanker u esen tsor tsor due ken zwa Na sha u Una gber akuraior yô. Ka Un Una tema tor sha a sha tôgh ku iyôôgh ye. Shi ka Un kpaa Una shoghor ihungwa i wain i iyugh i sha ishima i vihin i Aôndo Uhembanagee la. 16 I nger iti sha riga Na man sha namegh Nagh er: Tor u utor man Ter u uter. 17 Shi m nenge ortyom u Sha tile sha iyange, lu yilan inyon i purugh sha kwavaôndo cii sha zegeimo er: Va kohol nen hen zegeiniongo u Aôndo ne, 18 va ya nen inyam i utor man inyam i anyinya kua mba ve hende a yô, man inyam i ior cii, ônov man ikpan, mbakiriki kua mbavesen cii. 19 Shi m nenge inyam la man utor mba shin tar man akumautya a ve, ve kohol sha u nôngon ityav a Un u A tem sha nyinya la man shi akumautya a Na. 20 Tsô i kôr inyam la man shi profeti u aie la kpaa, un u a lu eren uivande sha ishigh ki inyam, a lu tsughun ior mba ve ngohol ikav i inyam la man shi mba ve civir eev mbu i la kpaa, i gbihi ve uhar cii uma ken berusu u a lu yeghen sha sulfur la. 21 Mbagenev mba ve shi her yô, i wua ve sha sanker u Un u A tem sha nyinya la, ka sanker u a lu duen ken zwa Na la, inyon cii kpaa ide sha inyam ve la.

11 Tsô m nenge Sha lu ivegher, nenge, nyinya u pupuu lu. Un u A tema sha mi la i yilan Un er Jighjigh man Mimi. Un er ijir sha perapera, shi nenge ityav kpaa.

14 Akumautya a Sha dondo sha a Na, ve lu sha anyinya a pupuu, ve haa akondo a pupuu a dedoo a kungun a wang iyol. 15 Sanker u esen tsor tsor due ken zwa Na sha u Una gber akuraior yô. Ka Un Una tema tor sha a sha tôgh ku iyôôgh ye. Shi ka Un kpaa Una shoghor ihungwa i wain i iyugh i sha ishima i vihin i Aôndo Uhembanagee la. 16 I nger iti sha riga Na man sha namegh Nagh er: Tor u utor man Ter u uter.

19 Shi m nenge inyam la man utor mba shin tar man akumautya a ve, ve kohol sha u nôngon ityav a Un u A tem sha nyinya la man shi akumautya a Na. 20 Tsô i kôr inyam la man shi profeti u aie la kpaa, un u a lu eren uivande sha ishigh ki inyam, a lu tsughun ior mba ve ngohol ikav i inyam la man shi mba ve civir eev mbu i la kpaa, i gbihi ve uhar cii uma ken berusu u a lu yeghen sha sulfur la. 21 Mbagenev mba ve shi her yô, i wua ve sha sanker u Un u A tem sha nyinya la, ka sanker u a lu duen ken zwa Na la, inyon cii kpaa ide sha inyam ve la.

11 Kwagh u a shi yô, anmgbianev, ember nen, sôr nen mbamlu enev, ungwa nen kwaghwan, lu nen ishima i môm, lu nen bem bem man Aôndo u dooshima man u bem Una lu a ven ye.

6 Gadia i mar se Wan, i na se Wan u nomso; tarkuran ngu sha vandegh Nagh; mba yer iti Na er: Orwasenmhen u Kpilighyol, Aôndo u Ageegh, Ter u tsôron, Wantor u Bem.

3 Ker nen TER, ne mbaasemaleghlegh mba sha tar cii, ne mba ne we atindi a Na iko; ker nen perapera, ker nen ishima i legh legh, tsô alaghga á yer ne sha iyange i iyugh i TER la.

20:1 Shi m nenge ortyom u sha lu senen sha, lu a ishindan u ihungwa i i ze kweng la shi lu a ishiligh ku vesen ken uwegh nagh kpaa. 2 Tsô a kôr darakon, ka tseyô u a lu diabolo man Satan kpaa la, a kange un, una lu uikangen zan zan anyom dubu, 3 a kende un shin ihungwa i i ze kweng la a cir i a ver ikyav sha mi sha u a̱ de kera tsughun akuraior ga, saa anyom dubu aa kuma ve. ken masejime yô, á shi á pase un anshighe kpehgee keng. 4 Tsô m nenge mkônom ma torom, ior tema sha mi, i na ve ijir i ôron sha ikyev. Shi m nenge uuma mba ior mba igber ve ityough sha ci u shiada u Yesu man sha ci u mkaanem ma Aôndo la, ka mba ve civir inyam la ga shin eev mbu i kpaa ga, ve ngohol ikav i i sha atsul a ve ga, shin sha ave a ve kpaa ga. Ve nder ve tema tor a Kristu imôngo kuma anyom dubu je. 5 Mbakpenev mbagenev mba ve shi her yô, ve nder ga saa anyom dubu la aa kuma ve. Ka mnder u hiihii je ne. 6 Or u nan lu a ci sha mnder u hiihii ne yô, saan nan iyol, nan ngu icighanor kpaa. Mban yô, ku u sha uhar la ngu a tahav sha a ve ga, vea gema vea lu upristi mba Aôndo man mba Kristu kpaa, vea tema tor a Na imôngo sha anyom dubu la. 7 Zum u anyom dubu la aa bee yô, á sagh Satan ken gaadi na kera. 8 Una due sha u tsughun akuraior a ken azongo a tar anyiin la, ka Gogi man Magogi je la, ka sha u una kohol ve sha ci u utya. Ingeegh vegh kuma er waarawa u shin zegemnger nahan. 9 Ve tange van sha tar iooo, ve va kase afo a uicighanmbaiorov man shi gar u doon ishima la kpaa. Tsô usu sen sha hia ve kera cii. 10 Diabolo u a lu tsughun ve la kpaa i kende un ken ber u usu, ape inyam man profeti u aie ve lu la; á eren ve ican atetan kpaa tugh kpaa gbem sha won. 11 Shi m nenge zegeikôn u pupuu u tor. Un u A tema sha mi la yô, tar man Sha yevese sha ishigh Nagh kera, ian kera lu sha ci ve mape ga. 12 Tsô m nenge mbakpenev tile sha ishigh ki ikônough ki torough kira, mbavesen kua mbakiriki cii. Nahan i bugh uruamabera. I shi i bugh ruamabera ugen kpaa, ka ruamabera u uma je la. Tsô i ôr mbakpenev ijir sha akaa a i nger ken uruamabera mbara, sha aeren a ve. 13 Zegemnger na mbakpenev mba ve lu shin a na la. Ku man Hade kpaa na mbakpenev mba ve lu shin ve la. I ôr hanma or ijir sha aeren a nan ser ser. 14 Ku man Hade yô, i kende ve ken berusu. Ka ku u sha uhar, ka berusu je la. 15 Man aluer i nenge i nger or ken ruamabera u uma la ga yô, i kende nan ken berusu je.

21:1 Tsô m nenge Sha u he man tar u he kpaa, gadia Sha u hiihii man tar u hiihii la kar kera, zegemnger kpaa kera lu ga. 2 Shi m nenge icighangar, ka Yerusalem u he je la, lu senen Sha, a due her Aôndo, i sôr un er kwasehe u i er un hwe iyol sha ci u nom na yô. 3 Shi m ungwa zegeimo due ken ikônough ki torough kira kaa er: Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve. 4 Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera. 5 Un u A tema sha ikônough ki torough la kaa er: Nenge M ngu geman akaa cii hingir a he. Shi A kaa er: Nger, gadia akaaôron ne ka a jighjigh man ka a mimi kpaa. 6 Shi A kaa a mo er: I kure ve! Mo M ngu Alefa man Omega, mhii man mkur. Or u imura i ker nan yô, Mo Me na nan mngerem ma imbormnger i uma la gbilin. 7 Or u nan hembe yô, nana ya dyako sha akaa ne, Me lu Aôndo u nan, nan di kpaa nana lu wan Wam. 8 Kpa mbaciankwagh man mbanan jighjigh ga, man mba kwagh ve a [ndôhôr] ishima la man mbawuanior man mbadyarev man mbaahiriv man mbacivirakombo man mbaerenaie cii, kwar ve ngu ken ber u a lu hian sha usu man sulfur, ka ku u sha uhar je la. 9 Tsô u môm ken mbatyomov mba Shaav mba utaankaruhar mba ve lu a agbande ataankarahar a a iv a atsan a ataankarahar a masetyô la, a va ôr kwagh a mo, a kaa er: Va heen, m̱ tese u kwasehe, ka kwase u Waniyôngo je la. 10 Tsô a yem a mo ken Jijingi a za a mo sha zegewo u taven Sha, a tesem icighangar, ka Yerusalem u he je la, lu senen Sha; a due her Aôndo, 11 lu a iengem i Aôndo je, iwanger na lu er ka iwen i injaa kpishi nahan, lu er iwen i yasepi i wanger er krusetalu nahan. 12 Lu a zegegilgar u taven sha, shi lu a ihinda pue kar ihiar kpaa, mbatyomov mba Shaav pue kar uhar kpaa lu sha ihinda la. I nger ati sha mi, ka ikwe i Iserael pue kar ihiar je la. 13 Vegher u sha ityoughkitaregh ihinda lu itiar, ken imbusutarimese ihinda lu itiar, ken imbusutariyan ihinda lu itiar man shin ityôtar kpaa ihinda lu itiar. 14 Gilgar u gar la lu a amagh pue kar uhar, i nger ati pue kar ahar a mbaapostoli mba pue kar uhar mba Waniyôngo sha mi. 15 Un u a lu ôron kwagh a mo la lu a iyiagh ki karen kwagh a mi ki sha zenaria, sha u una kar gar man ihinda na man ugilmbaagarev nav kpaa. 16 Gar la lu akuku, iniembe na man igbanger na lu kwagh môm. Tsô a kar gar la sha iyiagh nagh ki karen kwagh a mi la, lu mail dubu môm man deri utaan. Iniembe na man igbanger na man ityaven na lu kwagh môm. 17 Shi a kar gilgar na kpaa, lu aseva deri man akunduahar kar anyiin sha ikaren i or, ka u ortyom u Sha je la. 18 I maa gilgar la sha awen a yasepi. Gar la lu zenaria eng er gelase u lun wang nahan. 19 Amagh a gilgar u gar la i er hwe sha mi sha awen a injaa anza kposo kposo. Imagh ki hiihii lu yasepi, ki sha uhar lu safir, ki sha utar lu kalekido, ki sha unyiin lu semaragidu, 20 ki sha utaan lu sardoniku, ki sha ataratar lu sardiu, ki sha itiankarihiar lu kruselitu, ki sha anigheni lu beril, ki sha itiankarinyiin lu topashi, ki sha pue lu krusoperasu, ki sha pue kar môm lu hiakinto, ki sha pue kar uhar lu ametise. 21 Ihinda pue kar ihiar la lu utagbede pue kar uhar. Hanma hunda lu tagbede môm jimin, igbenda i gar la lu zenaria eng, er gelase u ananene nahan. 22 Tempel yô, m nenge a mi ker ga, gadia ka Ter Aôndo Uhembanagee la A lu tempel na ye, man shi Waniyôngo kpaa ka imenger na. 23 Kwagh gba gar la a iyange shin uwer sha u ve̱ ta ker ga, gadia iengem i Aôndo ngi wanger ker, Waniyôngo kpaa ka imenger na. 24 Akuraior aa zenden ken iwanger na, utor mba shin tar kpaa ve nyôr a iengem ve ker. 25 Ihinda na kpaa á wuhen i atetan ga, gadia tugh mbua kera ile ker je ga. 26 Shi á va nyôr a iengem man icivir i akuraior ker kpaa. 27 Ma kwagh u lun wang ga shin ma or u eren akaa a ndôhôr ishima shin u eren aie vea nyôr ker ga, saa mba i nger ve ken ruamabera u uma u Waniyôngo la vea nyôr ker ye.

22:1 Tsô a tesem ifi u mngerem ma umam, lu wang er krusetalu nahan, lu duen ken ikônough ki torough ki Aôndo man ki Waniyôngo la. 2 Ken atô u gbenda u ken gar la man shi ifi yande ne kua yande la kpaa kon u uma lu umen atam kwa pue kar uhar, hanma uwer u umen atam. Ika i kon la kpaa lu sha u been akuraior angev. 3 Ma kwagh u i we un ifan una kera lu ga, kpa ikônough ki torough ki Aôndo man ki Waniyôngo kia lu ker, mbatomov Nav vea civir Un. 4 Vea nenge a ishigh Nagh, iti Na kpaa ia lu sha atsul a ve. 5 Tugh mbua kera ile ga, kwagh una kera gba ve a iwanger i imenger shin iyange kpaa ga, gadia Ter Aôndo Una ta iwanger sha a ve, vea tema tor gbem sha won. 6 A shi A kaa a mo er: Akaaôron angan ka a jighjigh, ka a mimi kpaa. Ter Aôndo u ujijingi mba uprofeti tindi ortyom Na sha u a̱ va tese mbatomov Nav akaa a aa er fefa keng la. 7 Nenge, M ngu van fefa. Or u nan we akaaôron a profeti a ken ruamabera ne iko yô, saan nan iyol. 8 Mo Yohane ne, ka mo m ongo shi m nenge akaa ne kpaa ye. Zum u m ungwa shi m nenge a yô, m gba inya m cir ishigh inya hen angahar a ortyom u Sha u a lu tesen mo akaa ne. 9 Kpa a kaa a mo er: De eren nahan ga. M ngu ortom a we imôngo kua anmgbianev ou kpaa, ka uprofeti je la, man shi mbara mba ve we akaaôron a ken takerada ne iko yô. Civir Aôndo. 10 Shi a kaa a mo er: De cirin akaaôron a profeti a ken ruamabera veren ikav sha mi ga, gadia shighe mgbôghom. 11 Or u eren ifer yô, nana̱ seer a seer eren ifer, or u nan we ibinga yô, nana̱ seer ibinga, or u perapera yô, nana̱ seer a seer eren perapera, u nan lu icighanor yô, nana̱ seer a seer lun icighanor. 12 Nenge, M ngu van fefa, injar Yam kpaa ngi a Mo, sha u Me na hanma or er tom u nan u lu yô. 13 M ngu Alefa man Omega, u hiihii man u masetyô, mhii man mkur kpaa. 14 Mba ve ee akondo sha u vea lu a ian sha kon u uma man shi u nyôron ken ihinda i gar la yô, saan ve iyol. 15 Ken won yô, ka iwa man mbaahiriv man mbadyarev man mbawuanior man mbacivirakombo man mba aie a doo ve ishima shi ve eren un kpaa la. 16 Mo Yesu, M tindi ortyom Wam sha u a̱ er ne shiada sha akaa ne ken iniongo i Kristu. Mo M ngu mise man tsombor u Davidi man shi Ishan i sha use i engem la. 17 Jijingi man kwasehe mba kaan er: Va! Or u nan lu ungwan kpaa nana̱ kaa er: Va! Or u imura i ker nan yô, nana̱ va. Or u i sar nan kpaa, nana̱ va, nana̱ va ngohol mngerem ma umam gbilin. 18 Hanma or u nan ongo kwaghôron u profeti u ken ruamabera ne yô, m ngu eren nan shiada je mer: Aluer or nan seer kwagh sha mi yô, Aôndo Una seer nan atsan a i nger a ken ruamabera ne. 19 Aluer or nana pande kwagh ken uramabera u profeti ne kera yô, Aôndo Una pande kwar u nan u sha kon u uma la kera man shi sha icighangar kpaa er i nge kwagh ve ken ruamabera ne nahan. 20 Un u A er shiada sha akaa ne ngu kaan er: Een, M ngu van fefa. Amen, va, Ter Yesu. 21 Mrumun u sha mhôôn u Ter Yesu a̱ lu sha a ven cii.

Tsô m nenge Sha u he man tar u he kpaa, gadia Sha u hiihii man tar u hiihii la kar kera, zegemnger kpaa kera lu ga. 2 Shi m nenge icighangar, ka Yerusalem u he je la, lu senen Sha, a due her Aôndo, i sôr un er kwasehe u i er un hwe iyol sha ci u nom na yô. 3 Shi m ungwa zegeimo due ken ikônough ki torough kira kaa er: Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve. 4 Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera. 5 Un u A tema sha ikônough ki torough la kaa er: Nenge M ngu geman akaa cii hingir a he. Shi A kaa er: Nger, gadia akaaôron ne ka a jighjigh man ka a mimi kpaa.

17 Jijingi man kwasehe mba kaan er: Va! Or u nan lu ungwan kpaa nana̱ kaa er: Va! Or u imura i ker nan yô, nana̱ va. Or u i sar nan kpaa, nana̱ va, nana̱ va ngohol mngerem ma umam gbilin.

6 M shi m nenge ortyom u Sha ugen lu purugh sha kwavaôndo lu a Icôronloho u Dedoo u yôôn hen mba ve tem shin tar cii, hen hanma ikurior man hanma nongo man hanma zwa man hanma nongoior.

3 Se mba nan ityôkwagh i nôngon gbev sha ma gbenda môm je ga, sha u i̱ de teren tom wase sha kwagh u dang ga yô, 4 kpa se mba pasen ayol a ase ken akaa cii je er se lu mbatomov mba Aôndo yô: ken ishima i wan tsung, man ken atsan, man akaa a tseren, man uzayol,

19 Shin er m lu uikangen hen ma or ga nahan kpaa, m gema iyol yam m hingir kpan u ior cii sha u me hemba kôron ior yô. 20 Mbayuda yô, m hingir ve er Oryuda nahan sha u me kôr Mbayuda yô. Mba ve lu sha tindi yô, m hingir ve er ka or u sha atindi nahan, sha u me kôr mba ve lu sha atindi la, shin er mo iyol yam m lu or u sha atindi ga nahan kpaa. 21 Mba ve lu sha atindi ga yô, m hingir ve er ka or u sha atindi ga yô, sha u me kôr mba ve lu sha atindi ga la, nahan kpaa m ngu or u sha atindi a Aôndo ga ze, m ngu sha atindi a Kristu. 22 Aseeraior yô, m hingir ve er ka isheeror nahan sha u me kôr aseeraior yô. Ior cii m hingir ve hanma kwagh cii, sha u a lu nan nan kpaa, me yima mbagenev yô. 23 M er akaa cii sha ci u Loho u Dedoo sha u me zua a kwar sha mi yô.