Kwaghwan U Injaa U Sha Kwagh U Kwav Man Ivese

“M ngu ôron kwagh ne nahan . . . sha u né eren kwagh sha inja man né var a Ter er akaa a zan iyol aa kera lu ga yô.”—1 KOR. 7:35.

1, 2. Doo u or nana ker kwaghwan u Bibilo sha kwagh u kwav man ivaa i eren sha ci u nyi?

AKAA a se eren ken uma, a nan se msaanyol shin ishimavihin shin ishimanyian hemban kwagh u nomsoor a kwase yô, nga kpuaa tseegh. Sha nahan yô, gba u se ker iwasen hen Aôndo sha er se nôngo a mbamlu mba ken ishima mban yô. Kpa atôakyaa agen nga, a a ne ve i gbe u se er nahan yô. Alaghga Orkristu u nan lu kwav kpa i ze nan iyol ga yô, nana nenge ér tsombor u nan ngu zan nan iyol ér nana er kwase shin nana er nom. Orkristu ugen di nana soo u eren ivaa, kpa nana lu a zua a or u sha ishima i nan ga. Gba u a tese mbagenev u wan iyol sha ityom i vea va lu noov shin kasev ve vea eren la. Shi Mbakristu mba lun kwav man mba eren ivaa cii mba tagher a ameen sha kwagh u yavaor.

² Kwagh ne una bende a msaanyol wase, shi una a bende a mtil wase vea Yehova Aôndo kpaa. Ken ityough 7 ki washika u hiihii u Paulu nger hen Mbakorinte la, a wa ve kwagh sha kwagh u ivese i eren man u lun kwav. Awashima na yô, lu u una taver ve ishima ‘sha u vea eren kwagh sha inja man vea var a Ter er akaa a zan iyol aa kera lu ga yô.’ (1 Kor. 7:35) Er u lu henen sha kwaghwan sha akaa a hange hange ne, nôngo u nengen mlu wou, wea lu kwav shin wea er ivese kpaa, wer ka kwagh u una wase u ú hemba civir Yehova yô.

Kwagh u Vesen u Hanma Or Nana Tsua Yô

3, 4. (a) Ashighe agen mbamtaver ka ve va zum u i hange mbagenev tsung u ma anmgbian ve shin ijende ve nana er ivaa nena? (b) Kwaghwan u Paulu la una wase or u lun a mnenge u vough sha kwagh u ivaa i eren nena?

³ Akuraior nyian kpishi nga tesen ér ivaa i eren ka kwagh u hemban doo cii, er ityô i Mbayuda mba sha derianyom u hiihii la kpa ve tesen nahan. Anyom nga a gumor shin gumkwase nana ar sha mi man nana lu a vôso kwase shin nom ga ve, anmgbianev vea hii u wan nan kwagh yô. Ken iliam ve a nan cii, vea lu kaan a nan ér nana ker kwase shin nom i hemba er nan vanden keren la. Adooga vea tese nan ma or u ve hen ér nana doo sha ci u nan yô. Alaghga je yô, vea er ayom sha er gumor man gumkwase vea za zua ishigh yô. Ashighe agen yô, ambaakaa ne ka a va due ken ishimavihin man kunya shi ijende la i pav.

⁴ Mayange Paulu tor or ahumbe ityô ér nana lu kwav shin nana er ivaa ga. (1 Kor. 7:7) Yange doo un u civir Yehova a kwase shio, kpa gema tese icivir sha ian i mbagenev lu a mi i eren ivaa la. Nyian kpa, hanma Orkristu nan ngu a ian i tsuan a ishima i nan ér nana er ivaa shin nana lu kwav. Or môm kpa nana de kighir orgen ér nana tsua ma kwagh ga.

U Zan Ikyura ken Mlu u Kwav

5, 6. Paulu yange taver ior ishima ér ve lu kwav sha ci u nyi?

⁵ Kwagh u a dugh tseer tseer ken kwaghwan u Paulu yange wa Mbakorinte la yô, lu mnenge u vough u lu a mi sha kwagh u kwav la. (Ôr 1 Mbakorinte 7:8.) Shin er Paulu lu kwav nahan kpa, a nenge ér un hemba mba eren kasev shin noov, er mbahemenev mba Mbakristu mbaaiev, mba ve vende u eren ivaa ve nengen nahan ga. Paulu gema tese igbenda i mba pasen loho u dedoo kpishi vea fatyô u civir Aôndo, kpa mba ve er ivese vea kanshio yô. Igbenda shon ka nyi?

⁶ Orkristu u lun kwav nan hembe lun a ian i eren ityom i i ne nan ken mcivir u Yehova, a or u eren ivese. Yange i na Paulu ian i civirigh i lun “apostoli u Atôatyev.” (Rom. 11:13) Ôr Aerenakaa 13 zan zan 20 tsô u nenge er Paulu vea mba ve eren tom u mishen a na imôngo la yange ve lu pasen kwagh hen uharegh mba hev shi veren atôônanongo sha ajiir kposo kposo yô. Paulu yange wa ishima a mbamtaver ken tom na ne, mba se kpishi se tagher a mi nyian ga yô. (2 Kor. 11:23-27, 32, 33) Kpa kegh iyol u yan atsan ne cii, sha er una wase ior ve hingir mbahenen yô, nahan kwagh ne na un iember kpishi. (1 Tes. 1:2-7, 9; 2:19) Yange una vese kwase shin una lu a tsombor nahan, ma kôrcio u eren ityom i yange er la kpa? Alaghga yange ma kanshio.

 7. Tese ikyav i Mbashiada mba lun kwav, mba mlu ve ne na ve ian i suen tom u Tartor yô.

⁷ Mbakristu kpishi mba ve lu kwav yô, zua a ian i eren tom kpoghuloo sha ci u Tartor. Sara man Limbania ka anmgbianev mba kasev mba lun kwav mba ve eren tom pania ken tar u Bolivia yô. Yange ve yem hen angar ugen u i kera pase kwagh her ga anyom kpishi yô. Mlu u usu u latriki lu hen angar la ga la una lu ve zayoloo? Ve kaa ér: “Kwagh u hemba gban ior mban ishima yô, lu takerada u ôron, sha ci u redio shin televishen lu her u danen ve asema ga.” Ior mbagenev hen ijiir la tese upania mban ityakerada i Mbashiada mba Yehova igen, i i de u gberen ica i gba, kpa ve lu ôron her yô. Er hanma hunda u anmgbianev mba kasev mban vea za cii, or nan tese isharen her yô, hingir ve ican kpishi u hiden za sôron hanma or hen haregh la. Kwase u ganden ugen kaa a ve ér: “Er Mbashiada mba Yehova ve ve hen a vese nyian yô, tese ér mkur kera shi ica ga.” Ica kera gba ga tsô, mbagenev hen angar ne gba zan mbamkombo.

8, 9. (a) Lu nyi Paulu lu a mi ken ishima zum u lu ôron kwagh u lun kwav var var laa? (b) Mbakristu mba lun kwav mba a aan a injaa a nyi?

⁸ Mbakristu mba ve er ivese kpa, mba zough a akaa a injaa shighe u ve pase loho u dedoo hen uharegh mba ve tagher a mbamtaver her yô. Nahan kpa, ityom igen i upania mba lun kwav vea er la, alaghga ia taver mba ve er ivese shin ve mar mbayev yô. Paulu yange hen sha kwagh u ian i mba ken atôônanongo a hen ityônya lu a mi, i pasen loho u dedoo kpoghuloo la. Nahan a soo ér hanma or nana zua a iember er un nahan. Kwagh ne na yô, a ôr kwagh u civir Yehova ken mlu u kwav la var var.

⁹ Anmgbian u kwase ugen u lun kwav ken tar u Amerika, u a lu pania yô, nger ér: “Ior mbagenev hen ér mba ve lu kwav yô, vea fatyô u zuan a msaanyol ga. Kpa m nenge yô, msaanyol u tsôron har sha ikyaryan yase a Yehova. Shin er u lun kwav i lu nagh ku nan nahan kpa, aluer or er tom a mlu ne sha inja yô, una lu iyua i injaa kpen kpen.” A nger kwagh sha kwagh u kwav ér: “Kwav ka kwagh u nan or u msaanyol, ka kwagh u yangen a yange or msaanyol ga. M fa, Yehova nyum or môm dooshima na ga, nana lu kwav shin nana er ivese kpaa.” Hegen ngu eren tom hen haregh u kwagh a hembe gban sha mbapasenkwagh u Tartor la saan saan. Wea lu kwav yô, u fatyô u eren tom a ian i u lu a mi la sha u seer tesen mbagenev mimi kpa? We kpa, alaghga u va kav er u lun kwav la i lu iyua i doon tsung i Yehova a ne yô.

Mbaukwaav Mba Ve We Ishima u Eren Ivese Yô

10, 11. Yehova suen mba ve soo ér ma ve er kwase shin nom, kpa ve lu a zua a or u doon ve ga la nena?

¹⁰ Mba civir Yehova sha mimi kpishi ka vea luun kwav shighe a karen yô, ve ker or u vea vôso yô. Er ve fe ér gba u a wase ve sha ikyaa ne yô, ka ve sôn Yehova ér a wase ve u zuan a ikyar u dedoo.—Ôr 1 Mbakorinte 7:36.

¹¹ Wea soo u vôson or u nan lu a isharen i civir Yehova a ishima i môm er we nahan yô, sôn un kwagh ne ken msen. (Fil. 4:6, 7) Aluer gba u ú kegh gbem je kpa, de yen ishima ga. Suur sha Aôndo u dooshima la, una wase u u̱ wan ishima ken mlu wou ne.—Heb. 13:6.

12. Shighe u or kaa a Orkristu ér nan soo u vôson nan yô, doo u nana hen sha kwagh ne tsembelee sha ci u nyi?

¹² Alaghga or u mlu u nan u ken jijingi a wanger ityô ga, shin or u nan ne jighjigh ga kuaa yô, nana kaa a Orkristu u lun kwav u nan soo u eren ivese la ér nana vôso nan. Aluer kwagh er u nahan yô, umbur wer ishimavihin i u gba vôson or dang ve u nyôr ker la ia hemba vihin a mtswenem ma yange u lu kwav ve ma kôr u la. Shi er u er ivese je, a̱ lu or u dedoo shin a lu u dedoo ga kpa, i kange u vea nan, mpav ngu ga saa ku. (1 Kor. 7:27) De vôson or sha lanshima wer kper sev a av u vaa afanyô ga.—Ôr 1 Mbakorinte 7:39.

Wa Iyol i Tagher Ishigh a Mbamtaver Mba ken Ivese

13-15. Ka akaa a aa fatyô u van a ican ken ivese a nyi, i doo u mba ve soo u vôson ayol vea lam sha mi shighe u ve lu sôôr a sôôr ayol a ve laa?

¹³ Shin er Paulu wa ior kwagh ér ve civir Yehova ken mlu u kwav nahan kpa, a nenge ér un hemba mba vôson kasev shin noov ga. Nahan kpa, kwaghwan u jijingi mgbegha un nger la wase mba ve vese ayol a ve la u tagher ishigh a mbamtaver mba ken ivese, shi lun ken mzough gbem.

¹⁴ Gba u mba vôson ayol vea sôr akaa a yange ve ver ishima ér vea va er ken hemen la. Shighe u iorov uhar ve lu sôôr ayol la, alaghga vea nenge ér dooshima ve la ka u injaa tsung, nahan vea er ivese kpa a saan ve iyol kpee. Shighe u ve lu vôson ayol la, ka i saan ve iyol, ve na jighjigh ér ma kwagh u una vihi ve msaanyol je kpa ngu ga. Imba mhen la ka u mimi ga. Dooshima u hen atô u nom man kwase la ngu a sagher iyol kpe kpe, kpa dooshima ne tseegh una fatyô u wasen orkwasehe vea kwasehe u wan iyol i tagher ishigh a ican i ka i lu ken hanma ivese la ga.—Ôr 1 Mbakorinte 7:28.a

¹⁵ Ka i kpiligh mba ve sember eren ivese la iyol, shi ishima i vihi ve je kpaa, zum u ikyar ve nan lumun a ve sha akaa a hange hange agen ga yô. Alaghga vea gba anyiman sha kwagh u ijiir i tsan man sha kwagh u gbenda u vihin inyaregh shin gbenda u eren iemberyolough kua shighe u i doo u vea zaan icombor ve inya yô. Shi hanma ve nan ngu a mbamshi mba vea doo orgen la ga yô. Shighe u sôôr a sôôr ayol la, ka i lu ican ga u nengen akaa ne beelee, kpa ken masejime yô, ka a va a zayol u vesen ken ivese. Doo u mba ve lu sôôr ayol a ve la vea lam sha akaa a hange hange ne cii ve vea mase eren ivese ye.

16. Hii nan ve i doo u mba ken ivese vea gba zwa môm sha gbenda u vea sôr mbamzeyol mba ken ivesee?

¹⁶ Gba kpee u mba ve vese ayol la vea nôngo a mbamtaver vev imôngo ve ivese ve ia za ikyura ye. Ve̱ gba zwa môm sha gbenda u tsahan mbayev vev man gbenda u vea nengen sha mbamaren vev mba been iyol la. Hang u mbamtaver mba hen tsombor ka ve va a mi la a de ne nom man kwase ve hingir paleghaa a ayol a ve ga. Aluer mba dondon kwaghwan u Bibilo yô, kwagh ne una wase ve u sôron mbamzeyol kpishi, shi nôngon a mbagenev mba ve shi her la, nahan lun imôngo her saan saan.—1 Mbakorinte 7:10, 11.

17. Ka ishimanyian i sha “akaa a taregh” i nyi mba ve vese ayol la vea lu a mini?

¹⁷ Paulu shi pase mtaver ugen u ken ivese ken 1 Mbakorinte 7:32-34. (Ôr.) Or u nan er ivese yô, ka keng “ishima ka i nyian nan sha akaa a taregh”, er kwaghyan man akondo man ijiir i tsan man akaa agen a a lu akaa a ken jijingi ga la nahan. Er nan ve kwagh a lu nahan? Alaghga shighe u ma anmgbian yange nan lu kwav la, nan er tom u pasen kwagh kpoghuloo. Kpa er nan vese kwase yô, a gba u nana pande shighe la kua agee a yange nan pasen kwagh a mi la, nana nenge sha kwase u nan, sha er nana er kwagh u doon kwase u nan yô. Kape kwase kpa nana er nom ve a lu je la. Er Yehova a lu a kwaghfan yô, we mgbe u nom man kwase ne ikyo. A fa je ér cii man tsombor u za ikyura yô, ashighe kpishi ka i gba u nom man kwase vea pande shighe man agee a yange ve eren un tom a mi shighe u ve lu kwav la, vea nenge sha ayol a ve.

18. A gba u mbagenev vea sôr inja sha kwagh u iemberyolough shighe u ve er ivese kera la nena?

¹⁸ Man gema shighe u yange ve eren iemberyolough a mi la di ye? Aluer ka u nom man kwase vea pande shighe man agee a yange ve civir Aôndo a mi la vea nengen sha ayol a ve yô, a kera gba u vea pande inyaregh man akaa ve a injaa agen a yange ve eren iemberyolough a mi shighe u ve lu kwav la ga he? Aluer nom tume ityough ken anumbe a eren her dông vea mbaaboki nav nahan, kwagh la una bende a kwase na nena? Shin aluer kwase ngu vihin shighe kpishi u eren iemberyolough vea mbaaboki nan yô, a lu nom u nan nena? A huan or u i undu nan la, shi a saan nan iyol ga, nana nenge ér nan doo ikyar u nan la ishima kpaa ga. Aluer mba ve lu vôson ayol la er kwagh u ve fetyô cii sha er ikyaryan ve ia seer taver ken ivese ve yô, vea palegh zayol ne.—Ef. 5:31.

Yehova Soo Ér Se Lu a Aeren a Wang

19, 20. (a) Mba ve er ivese kpa vea fatyô u gban ken imeen i eren idya la sha ci u nyi? (b) Aluer nom man kwase mba lun paleghaa shighe gôgônan yô, kwagh ne una fatyô u vihin ivaa ve nena?

¹⁹ Mba civir Yehova kange ishima ér vea lu a aeren a wang. Mbagenev ka ve er ivese sha er vea palegh idya yô. Kpa u ngu wer, er or nan er ivese je maa nana kera gba ken idya i eren ga ze. Sha ayange a tsuaa la, gar u lun a gir yange a kura ior shighe u ve lu ker la tseegh. Yange or a due ken won u gar, ape mbanumungbenda man udangmbaiorov ve lu yô, i num nan gbenda shin i wua nan je kpaa. Mba ve vese ayol la kpa, saa vea kuran atindi a Yehova a we sha kwagh u yavaor ve, vea zua a mkor sha kwagh u idya i eren ye.

²⁰ Paulu ôr kwagh u atindi ne ken 1 Mbakorinte 7:2-5. Sha nahan yô, kwase ngu a ian i yaven a nom u nan tseegh, shi nom kpa nan ngu a ian ne sha kwase u nan tseegh. Gba u hanmô ve nana er ugen la “kwagh u i lu kpee u eren a nan la,” inja na yô, ka myav u i lu u mba vôson ayol vea yaven a ayol a ve je la. Nahan kpa, noov man kasev mbagenev ka ve lu ape shighe gôgônan, ve tôôn memyol ve za luun kwagh ve tswen shin ve luun imôngo ga sha ci u tom u uke, nahan ve nyumen ayol a ve “kwagh u i lu kpee u eren” la. Nenge er mô ve nana va gba ken imeen i Satan, nana er idya sha ci u “mban u kôron iyol tsaha” ve a vihi kpishi la. Yehova veren noov mba ve nengen sha icombor ve a u eren kwagh u una vihi ivaa ve ga la doo doo.—Ps. 37:25.

Zua a Iwasen sha u Ungwan Kwaghwan u Bibilo

21. (a) Er nan ve akaa a sha kwagh u lun kwav shin eren ivaa la a taver u tsuana? (b) Kwaghwan u ken 1 Mbakorinte ityough 7 la ngu a iwasen sha ci u nyi?

²¹ Môm ken akaa a a hembe taver u eren yô, ka u or tsuan ér nana er ivese shin nana lu kwav la. Myen ngu ken ior cii, man ka kwagh u a hembe van a zayol hen atô u ior je la. Sha nahan yô, mba i doo Yehova a ve shi a ver ve doo doo la je kpa, vea fatyô u palegh akaa a nan ve ishimavihin kuaa ga, vea lu kwav shin vea er ivaa kpaa. Aluer u dondo kwaghwan u injaa u a lu ken 1 Mbakorinte ityough 7 la yô, u lu a akaa a zan we iyol ken ivese kpuaa tseegh. Sha ishigh ki Yehova yô, wea lu kwav shin wea er ivaa kpa, u “er doo.” (Ôr 1 Mbakorinte 7:37, 38.) Kwagh u hemban cii u se fatyô u tsuan ser se er yô, ka u keren ser Yehova a lumun se. Aluer a lumun we yô, una za hemen u wasen we zan zan u kar nyôron ken tar u he la. Ken tar u he la, mbamtaver mba noov man kasev ve tagher a mi nyian ne vea kera lu ga.

[Ngeren u shin kpe]

Ú Fatyô U Nan Mlumun Kpa?

• Er nan ve i gbe u or môm kpa nana kumbur a orgen ér nana er ivaa ga?

• U civir Yehova a shighe wou zum u ú lu kwav la nena ve a hemba doono?

• Mba ve lu sôôr ayol a ve la vea wa iyol i va tagher ishigh a mbamtaver mba ken ivese nena?

• Er nan ve i lu u or a er ivese tsô maa kwagh la una kura nan sha idya i eren ga?

[Foto u sha peeji 14 la]

Mbakristu mba lun kwav ka vea vihin shighe ve sha u pasen kwagh kpoghuloo yô, i saan ve iyol

[Foto u sha peeji 16 la]

A gba u mbagenev vea sôr inja shighe u ve er ivese kera la nena?