Lu A Mnenge U Vough Sha Ivaa I I Lu A Msaanyol Ga La

“Mba ve vande eren kasev kera yô, m ngu tan ve icin man kera ka mo m lu tan ve ga, kpa ka Ter je.”—1 KOR. 7:10.

Ú FATYÔ U PASEN KPA?

Aôndo zua nom man kwase ken ivese sha nyi gbenda?

Mbatamen vea fatyô u wasen Mbakristu mba ve lu a mbamzeyol ken ivese ve la nena?

Doo u se nengen ivese nena?

 1. Mbakristu mba nengen ivaa i eren nena, man ka sha ci u nyi?

SHIGHE u Mbakristu ve zough ivaa yô, ve tsegha zwa sha ishigh ki Aôndo, man ka tom u vesen je Aôndo a we ve sha ikyev ye. (Orpa. 5:4-6) Lu Yehova ver ivese ye, nahan ka un yange “zua” kwase man nom ivaa ye. (Mar. 10:9) Tar u nom man kwase ve dugh her la ua lu a atindi sha kwagh u ivesegh nan nan je kpa, ve yô, i zua ve ve hingir iyôugh i môm. Mbacivir Yehova ve̱ nengen ivaa ve la ér ka kwagh u Ter a zough yô, vea lu mbacivir Yehova sha shighe u yange ve er ivese la shin vea lu ga kpaa.

 2. Ka mbampin mba nyi se lu timen sha mi ken ngeren nee?

² Ivese i i ze vough yô, ka i mgbough a msaanyol kpishi. Kpa aluer ivese ngi a msaanyol ga yô, ka nyi i doo u a ere? A fatyô u taver imba ivese la je he? Ka sha nyi gbenda nahan a fatyô u wasen mba ve zough a bem ken ivese ve ga laa?

IVAA NE IA DOO SHIN IA DOO GA?

3, 4. Aluer or tsua u vôson kwase shin nom sha ibume yô, ka nyi ia ere?

³ Ivaa i Orkristu ka ia za a doo yô, ka nan zua a iember shi nan va Yehova a icivir kpaa. Kpa ka ia za a doo ga yô, nan nyôr ken ijungwen i i gande u ôron yô. Orkristu u lun kwav u nan soo u eren ivaa la, nana fatyô u hiin ivese i nan sha gbenda u doon, aluer nan dondo kwaghwan u Aôndo yô. Kpa aluer Orkristu tsua u vôson nom shin kwase sha ibume yô, alaghga nana nyôr ken ishimavihin man ijungwen. U tesen ikyav yô, agumaior agen ka a hii u sôôr ayol a ve, man a lu a kuma u eren ityom i hen tsombor ga. Mbagenev ka ve zua a ishiôr sha Intanet, maa ve torough eren ivaa, ica a gbaan ga yô, i kera saan ve iyol ken ivese shon ga. Mbagenev er idya shighe u ve lu sôôr a sôôr ayol a ve la, nahan ve vôso ayol a ve, kpa kera mba a icivir hen ayol a ve ga.

⁴ Mbagenev vôso kasev shin noov, kpa ve kera vôso “ken Ter tseegh” ga, nahan ve nyôr ken mnyoon u ken ishima sha ci u or u ve vese la ka or u civir Yehova ga. (1 Kor. 7:39) Aluer ka kwagh u er u la yô, sôn Aôndo sha er una de u a kwaghbo wou shi una wase u yô. Una kar a mvihi u ieren you ia va a mi la kera ga, kpa una wase u u̱ nôngon a mbamzeyol ou, aluer u gema ishima yô. (Ps. 130:1-4) Na ishima you u eren ishima na hegen, man gbem sha won kpaa, nahan ‘iember i u ember ter la ia lu agee a ou.’—Neh. 8:10.

SHIGHE U MBAMZEYOL VE VE KEN IVAA YÔ

 5. Doo u se palegh mhen u nyi sha kwagh u ivese i i lu a msaanyol ga laa?

⁵ Alaghga mba i saan ve iyol ken ivese ve ga yô, vea pine ér: ‘Aluer m sôr mbamzeyol mba ken ivese yam nahan a wasem je he? Kam er mea vôso orgen yô ma i hembe kpen mo iyol nahan!’ Alaghga vea hen ér aluer ve undu or u ve vese la yô, a hemba wasen ve, nahan vea kaa a ishima ve ér: ‘M soo u hiden lun sha tseeneke wam! Er nan m pav ivaa ne ga? Mea zua a ityôkyaa i paven ivaa, i Ruamabera a lumun a mi ga je kpa, me fatyô u undun or u m vese ne hiden keren mkpeyol wam.’ Doo u Mbakristu vea yem henen sha ambaakaa la ga, kpa hemba doon u vea nôngo sha afatyô ve cii vea wa ishima a mlu ve la shi vea dondo akaawan a Aôndo kpaa.

 6. Pase kwagh u Yesu yange ôr, u i nger ken Mateu 19:9 la.

⁶ Aluer Orkristu pav ivaa yô, alaghga Ruamabera una lumun shin una yange nan u hiden vôson nom shin kwase ugen. Yesu kaa ér: “Hanma or u nana pav a kwase u nan, kpa a lu sha ci u idya ga man nana gema á er kwase ugen yô, ka idya je nan er ye.” (Mat. 19:9) Ishember i “idya” la wa myav u or undun nom shin kwase u nan za yaven a orgen u nan lu nom shin kwase u nan ga la, kua asorabo agen a sha kwagh u yaven a or cii ker. Aluer Orkristu soo u paven ivaa a kwase u nan shin nom u nan, u nan er idya ga yô, ka hange hange u nana er msen hen Aôndo ér a tese nan kwagh u nana er yô.

 7. Ivaa i Mbakristu ka ia vihi yô, ior mba ken inya ve hen ér nyi?

⁷ Ivaa i or ka ia vihi yô, kwagh ne a tese ér kwagh za iyol sha ikyar i nan ye vea Yehova la. Apostoli Paulu yange pine mpin u vesen ne ér: “Aluer or nana fa u nengen sha ya u nan ga yô, á er nan man nana kura nongo u Kristu u Aôndo?” (1 Tim. 3:5) Sha kpôô yô, ivaa i mba ve senge ér ve mba Mbakristu la ka ia vihi yô, mba ken inya ve kaa ér amba a ior la nga dondon kwagh u ve pasen ior la ga.—Rom. 2:21-24.

 8. Shighe u Mbakristu mba ve vese ayol a ve la, ve soo u paven ivaa shin undun ayol a ve yô, ka nyi ka i nôngo u lun zayolo?

⁸ Aluer Mbakristu mba ve vese ayol a ve soo u paven ivaa shin undun ayol a ve, sha ityôkyaa i Ruamabera a lumun a mi ga yô, a̱ shi nan kpa kwagh za iyol sha ikyar i ve ye vea Aôndo la. Alaghga ve cii, shin mô ken atô ve nan kera ngu dondon atindiakaa a Bibilo ga. Luun er mba ‘suur sha Yehova a ishima ve cii’ yô, ma ve kercio u sôron mbamzeyol mba ken ivese ve.—Ôr Anzaakaa 3:5, 6.

 9. Mbakristu mbagenev wa ishima a mbamzeyol mba ken ivese, nahan ve zua a mtsera nena?

⁹ Avese agen kpishi yange lu inja er aa vihi nahan, kpa va hide doo je zua ga. Mbakristu mba ve tagher a mtaver ken ivaa ve kpa ve we ishima, ve undu i ga yô, ashighe kpishi ka ve zua a mbamtsera mgbeghaa. U tese ikyav yô, nenge ase kwagh u una fatyô u eren aluer kwase ngu a nom u nan ne jighjigh ga yô. Apostoli Peteru nger ér: “Ne kasev di kpaa ungwan nen amo a noov enev sha er aluer mbagenev ken ve, vea lu mbawan kwaghôron u Aôndo ikyo ga je kpa, á urugh ve sha mlu u kasev vev la, á kera lu sha kwaghôron kpee ga, er ve nengen mlu wen u wang u cian Aôndo la yô.” (1 Pet. 3:1, 2) Ieren i dedoo i kwase ia na yô, nom u nan u̱ nan ne jighjigh ga la nana hingir u fan mimi. Mbakristu mba ve kor ivese ve, ve ze hemen u lun vea or u ve vese la yô, vea va Aôndo a icivir shi tsombor ve jimin cii ua zua a iveren.

10, 11. Ka akaa a nyi aa fatyô u geman ken ivese kpoolo, kpa Orkristu nana fatyô u lun a vangertiôr ér nyi?

¹⁰ Mbakristu kpishi mba lun kwav mba ve soo u eren ishima i Yehova yô, ka ve tsua u vôson Orkristu u nan er batisema yô. Nahan je kpa, akaa aa fatyô u geman kpoo. U tesen ikyav yô, alaghga nom shin kwase nana hii u lun a mbamzeyol mba ken ishima mba vesen. Shin zum u i er ivaa kera cii yô, alaghga nom shin kwase nana hingir u hôron tom. Imba kwagh ne yange i er anmgbian u kwase ugen u pasen kwagh sha ishimatseen, u lu ngô kpaa yô. Mba yer un ér Linda.a Nom na yange va hii u eren akaa a Bibilo i lumun a mi ga yô, kpa fa kwagh u una er ga. Er nom na ne gema ishima ga yô, i dugh un ken tiônnongo kera. Alaghga Mbakristu mba ve lu a imba mzeyol ne ken ivese ve yô, vea nenge ér kwagh hemba a hemba ve je. Nahan ka nyi i doo u vea ere?

¹¹ Alaghga u pine iyol you wer: ‘A lu nyi je ia er kpa, gba u me za hemen u nôngon mer ivese yam i doo?’ Or môm nana fatyô u ôron we kwagh u ú er sha ikyaa ne ga, shi or môm kpa nana̱ de eren nahan ga. Nahan kpa, atôakyaa a injaa nga, a i ne ve i doo u se wa ishima ken ivese i i lu inja er ia fatyô u doon ga la yô. Or shin kwase u cian Aôndo u nan we ishima a atsan ken ivese sha ci u imo i nan i ken ishima yô, nan doo Aôndo ishima kpishi. (Ôr 1 Pet. 2:19, 20.) Aluer Orkristu nan nôngo sha afatyô u nan cii ér ivese i nan i doo yô, Yehova una wase nan sha jijingi na man Mkaanem nam.

MBATAMEN KEGH IYOL U WASEN WE

12. Aluer u ker iwasen hen mbatamen yô, vea nenge u nena?

¹² Aluer u ngu a mbamzeyol ken ivese yô, de timbir u pinen Mbakristu mba ve vie la wer ve na u iwasen i ken jijingi ga. Mbatamen ka mbakuran mba ken tiônnongo, man a doo ve kpishi u tesen we kwaghwan u Aôndo a ne i nger ken Ruamabera la. (Aer. 20:28; Yak. 5:14, 15) De nengen wer, aluer u ker iwasen i ken jijingi hen mbatamen shi u ôr ve zayol wou u vesen u ú lu a mi ken ivese la yô, we man or u ú vese la ne kera lu a icivir hen a ve ga ze. Kpa kwagh wou una seer doon ve ishima, er ve nenge u lu nôngon tsung wer u er ishima i Aôndo yô.

13. Ka kwaghwan u nyi a lu ken 1 Mbakorinte 7:10-16?

¹³ Aluer Orkristu u nan vese or u nan jighjigh ga, nan pine mbatamen iwasen yô, ve tese nan akaawan a ken Bibilo a sha kwagh u ivesegh, er kwaghwan u Paulu ne nahan, a kaa ér: “Kpa mba ve vande eren kasev kera yô, m ngu tan ve icin man kera ka mo m lu tan ve ga, kpa ka Ter je: Kwase nana̱ de dugh hen nom u nan kera ga. Kpa aluer nana duen kera yô, nana̱ lu kwav, gayô nana̱ hime a nom u nan; nom kpaa, nana̱ de paven a kwase u nan ga. . . . Gadia we kwase, u fa nana, alaghga ú va yima nomu shinii? Man we nom kpaa, u fa nana, alaghga ú va yima kwase wou shinii?” (1 Kor. 7:10-16) Nom shin kwase u nan ne jighjigh ga la ka nana hingir u civir Yehova nahan, tsombor la u zua a averen kpishi.

14, 15. Ka hanma shighe nahan Kwasekristu nana tsua u duen hen nom u nan kera, kpa hii nan ve i lu hange hange u nana hen sha ikyaa ne zulee shi nana er msen sha mini?

¹⁴ Ka atôakyaa a nyi nahan aa na ve a gba u Kwasekristu ‘nana due kera’? Mbagenev tsua u undun or u ve vese la sha ci u nan venda u suen tsombor u nan sha apera. Kasev mbagenev di undu noov vev sha ci u noov mbara ka ve er ipila kpishi, je ve nôngo u vihin ve iyol shin wuan ve a wua kuaa, gayô ka ve hendan a kasev vev taveraa je ve kera fatyô u civir Yehova ga.

¹⁵ Ka kwase la iyol i nan nana tsua u duen hen nom u nan kera shin duen ga ye. Nahan kpa, gba u nom shin kwase u nan er batisema la nana hen sha ikyaa ne zulee shi nana er msen sha mi kpaa. U tesen ikyav yô, ka or u nan ne jighjigh ga la tseegh nan lu yangen Orkristu la u civir Yehova yee? Shin Orkristu la kpa nan ngu a ibo sha ci u nan henen Bibilo sha tseeneke u nan hanma shighe ga, shi nan ze mbamkombo hanma shighe ga shi nan dugh kwaghpasen hanma shighe ga yumu?

16. Er nan ve i doo u Mbakristu vea tsua u paven ivaa gaegh ga?

¹⁶ Er ikyar i se ye vea Aôndo la i gbe se kwagh, shi se lu a iwuese sha iyua i ivesegh i a ne se la yô, doo u se gba paven ivese gaegh ga. Er se civir Yehova yô, se soo u tseghan iti na sha u eren kwagh u una na ior vea hen kwagh na sha gbenda u bo la ga. Sha ityôkyaa ne yô, mayange se kôr ave se pav a or u se vese la sha er se za vôso orgen ga.—Yer. 17:9; Mal. 2:13-16.

17. Ka hanma shighe nahan a fatyô u kaan ér Aôndo yila Mbakristu mba ve vese ayol a ve la sha ci u beme?

¹⁷ Gba u Orkristu u nan vese or u nan ne jighjigh ga la nana nôngo sha afatyô u nan cii sha er ivese i nan ia seer taver yô. Nahan kpa, aluer Orkristu nôngo kwagh kpishi sha er nana kura ivaa i nan, kpa or u nan ne jighjigh ga la lumun u zan hemen a ivese la ga yô, Orkristu la nana de nengen ér nan ngu a ibo ga. Paulu nger ér: “Aluer u nan ne jighjigh ga la nan soo u paven yô, i̱ de nan nana̱ pav. Sha imbagbenda ne yô, i kighir anmgbian u nomso shin anmgbian u kwase la ga. Gadia ka sha u lun bem bem je Aôndo A ver ne ye.”—1 Kor. 7:15.b

SUUR SHA YEHOVA

18. Aluer u fatyô u kuran ivese you ga je kpa, ka nyi i dedoo ia fatyô u duen ken iniôngon you laa?

¹⁸ Shighe u ú lu nôngon a ma zayol ken ivese yô, sôn Yehova a na u ishimataver shi suur sha a na kpaa. (Ôr Pasalmi 27:14.) Nenge ase kwagh u Linda, u se vande ôron kwagh na sha ijime la. Shin er yange nôngo anyom kpishi ér una kura ivese na nahan kpa, ken masejime yô hingir u paven ivaa la. Yange lu un er a vihi a vihi shighe na yôô? A kaa wener, “Mayange ga cii. Sha ci u iniôngon yam la yange i lu shiada u dedoo hen mbagenev. Shi m ngu a imoshima i wang. Kpa kwagh u vesen u a dugh ker yô, anyom a yange m lu nôngon mer me kura ivese yam la wase wan wase u kwase u tilen ken mimi dông. A vese a hingir Kwaseshiada u Yehova, u tseen ishima, u a er batisema yô.”

19. Aluer se nôngo sha afatyô wase cii ser, se kura ivaa yase yô, ka nyi adooga ia due kere?

¹⁹ Kwasekristu ugen, mba yer un ér Marilyn, yange suur sha Aôndo shi nôngo sha afatyô na cii sha er una kura ivese na yô, nahan saan un iyol kpishi. A kaa ér: “Yange lum er m undu nomom nahan, sha ci u de u wasen mo sha inyar shi kera wa ikyo sha akaa a ken jijingi ga. Kpa, nomom vande lun ortamen ken tiônnongo cii ve mase hiin u eren kpenga u sha inja ga ye. Nomom yange hii u bunden mbamkombo, shi se de u lamen a ayol a ase kpaa. Shighe u mbatswamev ta num sha gar wase la, yange cier mo iyol kpishi je yô, m kera faantyô u lun vea mbagenev imôngo ga. Nahan m hingir u kaven mer, mo kpa m ngu a ibo sha kwagh ne. Tsô se hide se hii u lamen shi se hide se hii Bibilo i henen hen tsombor shi se gema zan mbamkombo nduuruu kpaa. Mbatamen mba ken tiônnongo wase se shi ve er kwagh a vese kundu kundu kpaa. Yange hide saan se iyol kpishi, lu inja er ivaa yase hide hii hegh nahan. Shighe kar yô, i hide i na nomom ityom ken tiônnongo. Yange m hen kwagh sha gbenda u nyoon kpishi, kpa kwagh u dedoo gema due ker.”

20, 21. Ka nyi i doo u se kange ishima u eren sha kwagh u iveseghe?

²⁰ Sea lu kwav shin sea vôso nom shin kwase kpa, se eren nen kwagh sha ishimataver shi se suur sha Yehova kpaa. Shighe u se tagher a mbamzeyol ken ivese yô, se nôngo nen kpoghuloo se sôr nen mbamzeyol mba shon, se umbur nen ser mba i zough ve ken ivese yô, “mayange ve kera mba uhar ga, kpa ka iyôgh i môm je.” (Mat. 19:6) Shi se umbur nen kpaa ser, aluer se mba a nom shin kwase u nan civir Yehova ga, nahan se mba yan ican kpa se taver ishima yô, alaghga a doo se kpishi zum u se wase or shon nan hingir u civir Yehova yô.

²¹ Mlu wase una lu nan nan kpa, doo u hanma shighe yô, se eren kwagh u una lu shiada u dedoo hen mba ve lu ken tiônnongo ga la yô. Aluer se mba a mbamzeyol mba vesen ken ivese yase, man ka se ape undun shin paven ivaa la yô, gba kpee u se hen sha atôakyaa a a ne ve se soo u eren nahan la sha mimi. Shi doo u se er msen kpoghuloo shi se gbidye kwar sha avur a Ruamabera zulee shi se ker iwasen hen mbatamen mba ken tiônnongo kpaa. Kpa, u hemban cii je yô, se kange nen ishima u eren ishima i Yehova Aôndo ken akaa cii, shi se tese ser iyua i ivesegh i a ne se la gba se kwagh tsung.

[Ngeren mba shin kpe]

[Mkaanem ma sha peeji 10 la]

Mbakristu mba ve tagher a mtaver ken ivese kpa ve we ishima yô, ashighe kpishi ka ve va zua a mbamtsera mgbeghaa

[Mkaanem ma sha peeji 12 la]

Hanma shighe yô, suur sha Yehova shi sôn un a na u ishimataver

[Foto u sha peeji 9]

Yehova veren Mbakristu mba ve nôngon sha afatyô ve cii ér vea kura ivese ve la doo doo

[Foto u sha peeji 11]

Nongo u Kristu ua fatyô u surun se asema shi wasen se kpaa