Iyua i I Hembe Uiyua Mbagenev Cii Yô

ORGEN iti na ér Jordan. Shighe u lu wanye la, organden ugen na un kwagh u horon pensel a mi, i er un lu er ka tso nahan. Sha ashe a mbagenev yô, kwagh ne lu kwagh u ikyoo ga, kpa Jordan yô, kwagh ne lu môm ken akaa a na a yange hemba gban un kwagh cii yô. A kaa wener: “Ka Russell, organden ugen u lu vea tsombor wase kangenaa yô, yange nam kwagh ne shighe u m lu iyev la ye.” Russell va kpen kera yô, Jordan mase kaven er shighe u lu uma la, lu uwegh ku yanegh ku mbamaren mba un Jordan man shi ter na u tamen, shi lu taver ve ishima ken ashighe a ican yô. Jordan kaa ér: “Er m seer fan kwagh u Russell ne, ankwagh u cuku u yange nam ne hemba gban mo kwagh hegen cii.”

Kwagh u Jordan ne tese ér iyua ia fatyô u lun kwagh u lahan hen ishigh ki mbagenev. Kpa or u i ne nan i la, aluer ka or u wuese kwagh yô, ia lu nan kwagh u injaa, je a hemba akaa agen cii. Bibilo pase kwagh u iyua igen i hemban sha won cii ken mkaanem ma i fe ma wuee ne, ma kaa ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.”—Yohane 3:16.

Iyua igen ngi i or a zua a mi ve nana lu uma gbem sha won yô! Ma iyua igen ngi i i hembe i yôô? Shin er alaghga mbagenev vea fa iwasen i iyua la ga nahan kpa, Mbakristu mba mimi yô, ve nenge ér ka iyua i “taver ishe.” (Pasalmi 49:8; 1 Peteru 1:18, 19) Nahan kpa, er nan ve Aôndo yange na tar iyua sha Wan naa?

Apostoli Paulu pase ityôkyaa la ken mkaanem man, ér: “Isholibo nyôr shin tar sha or môm, man ku gema va sha ci u isholibo . . . , nahan ku va sha ior cii sha ci u ve cii ve er isholibo yô.” (Mbaromanu 5:12) Adam, or u yange i hii gban la va hemba Aôndo ato, nahan a nyôr ken mtsaha u kuugh. Adam va a ku sha ônov nav cii, ka uumace sha won cii je la.

“Injar i isholibo i kimbin yô, ka ku, kpa iyua i sha mlumun u sha mhôôn u Aôndo yô, ka uma u tsôron ken Kristu Yesu Ter wase.” (Mbaromanu 6:23) Er Aôndo soo u duen a uumace ken ku kera yô, a tindi Wan na Yesu Kristu va shin tar, va na naagh sha uma na u vough la, sha ci u tar cii. Ka sha ci u naagh ku shon ku i yer ér “mpaa” shin ipaan ne, i lu u uumace mba ve ne Yesu jighjigh cii vea va zua a uma u tsôron ye.—Mbaromanu 3:24.

Paulu pase kwagh u averen a Aôndo una va na uumace sha ikyev i Yesu Kristu la kaa ér: “I̱ wuese Aôndo sha ci u iyua Na i i gande u ôron la.” (2 Mbakorinte 9:15) Sha kpôô yô, iyua la i kpilighyol je gande u ôron. Kpa ken uiyua mba Aôndo a ne uumace sha mhôôn la cii, er nan ve iyua i ipaan la i hembe ciilii? I̱ kaha kposo a uiyua mbagenev mba Aôndo a ne la sha nyi gbenda?a Man se tese iwuese sha i nena? Se mba taver we ishima ser ôr mbamlumun mba Bibilo i ne sha mbampin mban la, ken ngeren mbauhar mba ve dondo ne.