Mayange De Vende Tsaha U Yehova Ga
“De lahan mtsaha u Yehova ga.”—ANZAAKAA 3:11.
1. Er nan i doo u se lumun tsaha u Aôndo?
TOR SOLOMON u Iserael u tsua la na hanmô wase ityôkyaa i dedoo i se lumun tsaha u Aôndo yô. Solomon kaa ér: “Wan wam de lahan mtsaha u TER ga, ishima i̱ de vihin we sha myange Na kpaa ga; gadia or u nan doo TER ishima yô, ka nan A tsahan nan ye, er ter ka nan er a wan u doon nan nahan.” (Anzaakaa 3:11, 12) Sha kpôô yô, Ter wase u sha la ka a tsaha se sha ci u se doo un ishima.
2. I pase inja i “tsaha” ér nyi, man a tsaha or nena?
2 Inja i “tsaha” yô, ka mkôôm shin kwaghwan shin ityesen. Apostoli Paulu nger wener: “Hanma mkôôm yô, sha shighe la ka i bee er ka kwagh u iember ga, kpa i lu kwagh u ijungwen, kpa ken masejime yô, ka a ume atam a perapera bem bem sha ci u mba i tsaase ve a tsaase sha mi la i var ve yô.” (Mbaheberu 12:11) Aluer se lumun tsaha u Aôndo shi se er sha mi yô, ua wase se u dondon gbenda u perapera shi kporom hen Yehova, Aôndo u wang. (Pasalmi 99:5) Anmgbianev asev vea fatyô u kôôm se sha akaaôron a se ongo ken mbamkombo mba Mbakristu la, shi Bibilo i henen kpa ia kôôm se kua ityakerada i “orkuranya u jighjigh” la. (Luka 12:42–44) Aluer ú fa ape i gbe u ú sôr inja nahan, a doo u ga he? Kpa aluer or gema er kwaghbo u vesen yô a tsaha nan nena?
Er i Hii Ve Ka i Dugh Mbagenev ken Tiônnongo Kera Yô
3. Ka hanma shighe nahan ka i dugh or ken tiônnongo kera?
3 Mbatomov mba Aôndo mba henen Bibilo shi mba er ityakerada i Mbakristu kpaa. Ka i ôr atindiakaa a Yehova ken mbamkombo vev man ken mbamkohol vev mba kiriki kua mba vesen cii. Sha nahan yô, Mbakristu cii mba sha ian i fan akaa a Yehova a soo hen a ve la. Ka i dugh or ken tiônnongo kera zum u nan er kwaghbo u vesen man nan vende u geman ishima yô.
4, 5. Ka ikyav i dughun or ken tiônnongo kera i nyi i tese heenee, man er nan ve i wa Mbakorinte kwagh ér ve hide a or la ken tiônnongo?
4 Nenge ase ikyav igen i ken Bibilo i yange i dugh orgen ken tiônnongo kera yô. Tiônnongo u ken Korinte yange de ‘idya lu hen atô ve, imba idya i ken atôatyev je kpaa i lu ga yô, orgen lu a kwase u ter na je.’ Nahan Paulu wa ve kwagh ér “i̱ na imbaor la sha ikyev i Satan sha u á vihi iyol i nan kera, kpa jijingi u nan yô, a̱ war yô.” (1 Mbakorinte 5:1–5) Nahan ka a dugh or ken tiônnongo kera yô, i lu inja er i wa nan sha ikyev i Satan yô, nahan shi nan hide nan lu sha ikyev i tar u Diabolo. (1 Yohane 5:19) Ka a dugh orisholibo ken tiônnongo kera yô, kwagh la a na tiônnongo a kera lu a acôghor iyol ga shi “jijingi” u Aôndo shin tahav nav kpa mbu lu hen tiônnongo la nahan a za hemen u eren aeren a Aôndo.—2 Timoteu 4:22; 1 Mbakorinte 5:11–13.
5 Shighe kar yô, Paulu shi wa Mbakristu mba ken Korinte kwagh ér ve hide a or la ken nongo u Kristu. Sha ci u nyi? Apostoli ne kaa ér ka sha ci u “Satan a de ye mtsera sha a ve ga yô.” Hen shighe ne Orisholibo la de asorabo a na shi hide lu eren aeren a wang. (2 Mbakorinte 2:8–11) Nahan aluer Mbakorinte mban venda u hiden a or u gema ishima ne yô, Satan una ya mtsera sha a ve, gadia vea kera lu a ishima i den or kwaghbo ga, man a lu sha ishima i Diabolo vough je la. A̱ shi nan kpa, yange ve ‘de or shon kwaghbo shi ve sur un ishima kpaa.’—2 Mbakorinte 2:5–7.
6. Ka a dugh or ken tiônnongo kera nahan kwagh ne a wase sha nyi gbenda?
6 Ka a dugh or ken tiônnongo kera nahan kwagh ne a wase u eren nyi? Ka a yange ilyahan i ior ma ve ve a mi sha icighanti u Yehova la shi a kura iti i dedoo i ior nav kpaa. (1 Peteru 1:14–16) Ka a dugh or u nan er kwaghbo man nan vende u geman ishima ken tiônnongo kera yô, kwagh la a tese ér mba eren sha atindiakaa a Aôndo shi mba kuran tiônnongo u Kristu ér a lu wang ken jijingi. Shi kwagh ne ka a wase nan nan fa er kwagh u nan er la a lu kwagh u vihin tsughun yô.
Saa Or Nana Gema Ishima Ve A Hide A Nan ken Tiônnongo Ye
7. Kanyi yange i er Davidi shighe u lu a pase akaabo na ga laa?
7 Mbagenev er isholibo i vesen kpa ve gema ishima sha mimi, nahan i kera dugh ve ken tiônnongo kera ga. Kpa ka i taver tsung u or nana gema ishima sha mimi. Nenge ase kwagh u Davidi, Tor u Iserael, u yange nger Pasalmi 32 la. Icam la tese ér Davidi yange pase kwaghbo u vesen u er vea Batesheba la fese ga. Kwaghbo na la yange na yô zungwe kpishi, nahan mshiam nam uma, vough er ikyon ka i ndoor ikya sha shighe u wangernyom nahan. Davidi yange ya ican sha iyol man ken ishima, kpa er va ‘pase isholibo na yô, Yehova de un akaabo a na.’ (Pasalmi 32:3–5) Kwagh ne na Davidi wa icam ér: “Saan or u TER A ne nan ibo sha ifer i nan ga la, iyol.” (Pasalmi 32:1, 2) Nenge imba er mhôônom ma zungwen ma Aôndo ma kpilighyol sha wono!
8, 9. Or ka nan tese ér nan gema ishima nena, man mgemshima ngu hange hange sha u hiden a or ken nongo u Kristu nena?
8 Nahan gba u orsholibo nana gema ishima cii ve Aôndo una zungwe nan mhôônom ye. Aluer kunya kôr or shin nan ngu cian ér nana pase isholibo i nan yô, ior vea fa yô, ngula tese ér nan gema ishima ga. Kpa, “mgemshima” yô “ka u or vaan afanyô sha kwaghbo u nan er la shi kangen ishima ér nana kera kimbir un ga.” Or u nan gem ishima yô, nan ngu a ‘ishima i zamber i i ur tsughun yô’ man nan soo u “den kwaghbo u nan er la” kpaa.—Pasalmi 51:17; 2 Mbakorinte 7:11, NW.
9 Aluer or soo ér i hide a nan ken tiônnongo u Kristu yô, gba u nana gema ishima. Ka a dugh or ken tiônnongo u Kristu kera yô, mba gbe hiden a nan di tsô ér nan tsa ken mtsaha u nan la yum ga. Cii man i hide a nan yô, nana vande geman ishima i nan vindi vindi. Saa nana fa er isholibo i nan la i lu kwagh u vihin kpishi, man i ve a ilyahan sha iti i Yehova kua tiônnongo jimin cii yô. A gba u orisholibo la nana gema ishima nana er msen kpoghuloo ér Aôndo a de nan isholibo i nan la, shi nana za hemen u dondon atindi a Aôndo a wang la kpaa. Shighe u orisholibo la nan zamber ér i hide a nan yô, saa nana tese ér nan gema ishima shi nan ngu eren “aeren a a kom mgemshima la” kpaa.—Aerenakaa 26:20.
Er i Hii Ve i Doo u Ú Pase Isholibo You Yô
10, 11. Er nan i doo u se yer isholibo yase ga?
10 Mbagenev mba ve er isholibo yô alaghga vea hen ér: ‘Aluer m pase isholibo yam yô, ior vea pinem mbampin mba vea na me va ahenge kpishi yô, shi adooga a dughum ken tiônnongo kera je kpaa. Kpa aluer m ôr or ga yô or a fatyô u pinen mo mbampin mba vea nam ahenge a van ga, shi a dughum ken tiônnongo kpaa ga.’ Or ka nana henen nahan yô nan hungur a akaa a injaa agen. Kanyi akaa laa?
11 Yehova ka “Aôndo u mgboughon a mhôônom ma zungwen kua mrumun u sha mhôôn, u wan ishima man u lun a erdoo man mimi wuee je, u eren a ior udubu imôngo dedoo, u deen ifer man tindi u peren man isholibo.” Nahan kpa, den u tsahan ior nav “akuma akuma” ga. (Ekesodu 34:6, 7; Yeremia 30:11) Aluer u er isholibo i vesen man u ngu yeren i nahan a er nan man Aôndo una zungwe u mhôônomo? Yehova fa er u er isholibo yô, man una gba den we i tsô ga.—Anzaakaa 15:3; Habaku 1:13.
12, 13. Aluer se mba yeren asorabo ase yô, kanyi ia due kere?
12 Aluer u er isholibo i vesen man u pase isholibo you la yô, u hide u lu a imoshima i wang. (1 Timoteu 1:18–20) Kpa aluer u pase ga yô, kwagh la una na u kera lu a imoshima i wang ga, nahan u hingir u eren asorabo a vesen je kpaa. Fa wer ka orumace shin tiônnongo tseegh u er ve kwaghbo ga. Ka Aôndo jighilii u er un kwaghbo ye. Orpasalmi yange wa icam wener: “Ikyônough ki torough ki TER ki Sha; ashe Na nga kenger, akurashee a Na nga karen ônov mba iorov. TER ngu karen orperapera kua iferor kpaa.”—Pasalmi 11:4, 5.
13 Hanma or u nan soo u pasen asorabo a vesen a nan er la ga, kpa nan gem nan soo u lun ken tiônnongo u Kristu u wang la cii nana zua a iveren i Yehova ga. (Yakobu 4:6) Sha nahan yô, aluer u er kwaghbo man u soo u geman ishima yô, de timbir u pasen asorabo ou ga. Kpa aluer u er nahan ga yô, hanma shighe u i lu ôron kwagh sha imba ieren la cii yô ishima ia zaan we iyol. Man aluer Yehova ngohol jijingi na hen a we kera er yange er a Tor Saulu nahan di ye? (1 Samuel 16:14) Aluer Aôndo dugh jijingi na ken a we kera yô, u hemba eren asorabo a vesen cii.
Suur sha Anmgbianev Ou mba Jighjigh
14. Doo u orisholibo nana dondo kwaghwan u a lu ken Yakobu 5:14, 15 la sha ci u nyi?
14 Kanyi i doo u or u nan er isholibo nana eree? “Nana̱ yila mbatamen mba nongo u Kristu, ve̱ er msen sha ci u nan, ve̱ shighe nan mkurem ken iti i Ter. Msen u sha jighjigh u nan la una yima oruange la man Ter Una mough a nan sha.” (Yakobu 5:14, 15) Gbenda môm u orsholibo nana tese ér nan ngu ‘umen ityamegh ki ki kom mgemshima yô’ ka u za lamen a mbatamen. (Mateu 3:8) Anmgbianev mba jighjigh mba ve lu a bemshima ne vea ‘er msen sha ci u nan, vea shighe nan mkurem ken iti i Yehova.’ Akaawan ve a ken Bibilo a a lu er ka mkurem la aa sur or u nan gem ishima sha mimi la ishima.—Yeremia 8:22.
15, 16. Er i tese ken Esekiel 34:15, 16 nahan, mbatamen mba ken Kristu mba dondon ikyav i Aôndo nena?
15 Yehova, orkuran wase man Ter wase u dooshima ver se ikyav i dedoo shighe u due a Mbayuda ken uikyangen ken Babilon ken inyom i 537 C.S.Y. (Cii man Shighe u Yesu) la. Shi a ver se ikyav i dedoo shighe u due a Iserael u ken Jijingi ken ikyangenev mbi “Zegebabilon” ken inyom i 1919 la kpaa! (Mpase 17:3–5; Mbagalatia 6:16) Sha nahan yô, a kure ityendezwa na ne, a kaa ér: “Mo iyol Yam Me koso iyôngo Yam, man Me na ia yav inya, . . . Me ker kwagh u a saa yô, man Me hide a kwagh u a tsum kera la, man Me kange kwagh u a kever yô, man Me taver kwagh u a gbe angev yô.”—Esekiel 34:15, 16.
16 Yehova koson iyôngo na i sha ikyav ne shi ne ngi yaven ken bem, shi i i saa la kpa ngu a ker a hide a mi. Kape mbakuran mba ken Kristu kpa ve koson iyôngo i Aôndo ken jijingi je la. Mbatamen ka ve ker iyôngo i i tsum i undu tiônnongo la. Er Aôndo ka a ‘kange kwagh u a kever’ la nahan, kape mbatamen kpa ka ve “kange” iyôngo i i kever sha ci u mkaanem ma orgen shin sha ci u aeren a orgen je la. Shi er Aôndo ka a “taver kwagh u a gbe angev” nahan, kape mbatamen kpa ka ve wase or u nan hingir uange ken jijingi sha ci u kwaghbo u nan je la.
Gbenda u Mbakuran Ve Wasen Yô
17. Er nan i doo u se timbir u keren iwasen i ken jijingi hen mbatamen ga?
17 Mbatamen mba dondon kwaghwan u a kaa ér: “Zungwe nen ve mhôônom a mciem iyol” la. (Yuda 23) Mbakristu mbagenev er idya man kwagh ne ka isholibo i vesen kpen kpen. Kpa, aluer ve gema ishima sha mimi yô, mbatamen vea zungwe ve mhôônom shi vea wase ve sha dooshima sha er vea hide a taver ken jijingi yô. Paulu ôr kwagh u mbatamen cii, kua un iyol na kpaa, ér: “Ka er se mba yan tor sha kwagh u jighjigh wen u nan ga, kpa se mba eren tom a ven imôngo sha ci u né ember yô.” (2 Mbakorinte 1:24) Nahan mayange je se timbir u keren iwasen i ken jijingi hen anmgbianev mban ga.
18. Mbatamen ka ve er kwagh a mbananjighjigh mba ve er isholibo la nena?
18 Aluer u er isholibo i vesen je kpa, er nan i doo u u suur sha mbatamene? Ka sha ci u ve mba mbakuran ikyumile i Aôndo. (1 Peteru 5:1–4) Ma orkuran iyôngo sha dooshima môm u nana gbidye iyôngo i nan sha ci u i vihi iyol je kpa nan ngu ga. Shighe u mbatamen ka vea tema u lamen a anmgbian u nan er kwaghbo je kpa, mba hembe veren ishima sha mtsaha u vea na nan la ga. Ka ve hemba veren ishima sha u wasen nan sha er nana nenge a isholibo i nan la yô, shi ka ve nôngo ér vea wase nan nana hide a civir Aôndo sha mimi. (Yakobu 5:13–20) Mbatamen ka ve ôr ijir sha perapera shi mba ‘eren ikyumuile ican ga.’ (Aerenakaa 20:29, 30; Yesaia 32:1, 2) Gba u Mbakristu cii, kua mbatamen kpaa, vea ‘eren kwagh u mimi shi vea soon u zungwen mhôônom, shi vea hiden a iyol ijime er ve zenden vea Aôndo ve la.’ (Mika 6:8) Aeren ne nga hange hange zum u i lu tsuan kwagh u a gbe a zough a uma man icighantom i ‘iyôngo i [Yehova] A koson’ la i eren yô.—Pasalmi 100:3.
19. Mbatamen mba ken Kristu ka ve kôôm mhen u or nena?
19 Ka icighan jijingi ka a tsua mbakuran mba ken Kristu ye, shi ka un a hemen ve kpaa ye. Nahan “aluer a kohol or a ma gbev mbu nôngon ave”—sha ci u nan vande wan iyol ga yô—ne mba ne lu ken jijingi yô, “kôôm nen imbaor la sha ishima i legh legh.” (Mbagalatia 6:1; Aerenakaa 20:28) Er mbatamen ka ve kôôm mhen u imbaor la sha ishima i legh legh nahan kpa, shi ka ve er kwagh a nan sha atindi a wang a Aôndo la, vough er or ka nana sombo nguhar ve ortwer u fan twer nan zor ku sha kwaghfan sha er a nyoon nan kpishi ga, kpa nan er sha er ku a bee fele nahan. (Mbakolose 3:12) Er mbatamen ka ve er msen shighe u ve lu ôron ijir shi ve nenge ken Ruamabera cii ve ve mase zungwen or mhôônom shin ve tsaha nan yô, ka ve kure ijir sha ishima i Aôndo vough.—Mateu 18:18.
20. Ka hanma shighe nahan i lu hange hange u a yôô ken tiônnongo ér i wa or ken mkôômôô?
20 Aluer or er kwaghbo man ior kpishi nôngo u fan shin ka u vea va fa ken hemen yô, hemba doon u a yôô mtsaha u i ne nan la ken tiônnongo sha er a vihi iti i tiônnongo ga yô. Shi aluer i tsaha or man hingir hange hange u a pase tiônnongo kwagh sha mi yô, a gba u a yôô. Shighe u or u i we nan ken mkôôm nan hide nan lu taver jighjigh u nan yô, a fatyô u tôôn nan karen sha or u nan vihi iyol keheleee nan lu moughon uange, u i gbe u nana kera er akaa agen ga yô. A hemba doon aluer or u nan er kwaghbo la nan kera ngu wan zwa ken mbamkombo ga kpa nan ngu ungwan a ungwa yô. Mbatamen vea sôr ian sha er a hen Bibilo a imba or la sha er a hide a ‘kpe jighjigh u nan la iyol’ yô. (Titu 2:2) Ka ve er akaa ne cii sha dooshima, ka i lu u tsahan a tsaha or u nan er kwaghbo la ga.
21. A nenge sha akaabo a mbagenev ve er la nena?
21 Mbatamen vea fatyô u nan iwasen i ken jijingi sha igbenda kposo kposo. U tesen ikyav yô, tôô wer ma anmgbian yange nan maan msôrom kpishi kpa nan va de, kpa shighe kar yô nan hide nan ma ma kpishi kwa môm shin kwa har zum u nan lu hen ya tswen yô. Shin ma anmgbian ugen yange nan de taav u man, kpa shighe u nan kera taver ken jijingi ga yô nan hide nan ma un kuma kwa môm shin kwa har nahan. Aluer nan er msen sha kwagh ne shi nan na jighjigh ér Aôndo una de nan kwaghbo u nan la je kpa, doo u nana ôr mbatamen kwagh sha mi sha er vea wase nan sha er isholibo la ia ya tor ken a nan ga yô. Ortamen môm shin uhar ve nenge sha ikyaa shon. Nahan kpa ortamen la shin mbatamen mbara ve ôr ortamen u hemen la kwagh u a lu zan hemen la sha er aluer kwagh ugen ngu u a er kpa vea fa yô.
Za Hemen u Ngohol Tsaha u Aôndo
22, 23. Er nan i doo u ú za hemen u ngohol tsaha u Aôndo?
22 Cii man Aôndo a lumun se yô, saa se Mbakristu cii se lumun tsaha u Yehova. (1 Timoteu 5:20) Sha nahan yô, kange ishima u eren sha akaa a zough a mi shighe u u lu henen Mkaanem ma Aôndo shin shighe u u lu henen ityakerada i Mbakristu man shighe u u lu ungwan kwaghwan ken mbamkombo shin sha mbamkohol mba kiriki man mba vesen mba ior mba Yehova la cii. Lu tsevaa sha u eren ishima i Yehova. Aluer u lumun tsaha u Aôndo yô ua wase u u taver ken jijingi er ka kpekpe u i maa a taver dông yô, nahan kwagh ne una wase ú u palegh isholibo.
23 Tsaha u Aôndo u ú lumun la ua wase u u za hemen u lun ken dooshima u Aôndo. Ka mimi, i dugh mbagenev ken tiônnongo u Kristu kera, kpa u fatyô u palegh kwagh ne aluer u ngu “kuran ishima you” shi u ngu ‘zenden er ka mba fankwagh nahan’ yô. (Anzaakaa 4:23; Mbaefese 5:15) Aluer u kera ngu ken nongo u Kristu ga yô, er nan u nenge sha er a hide a we ga? Aôndo soo ér mba ve tsegh ayol a ve sha u civir un yô ve civir un sha mimi man “a ishima i saan saan kpaa.” (Duteronomi 28:47) Aluer u lumun tsaha u Yehova yô, u fatyô u civir un a ishima i saan saan gbem sha won.—Pasalmi 100:2.
U Na Mlumun Wer Nyi?
• Er nan ve ka i dugh mbagenev ken tiônnongo u Kristu kera?
• Mgemshima u mimi wa nyi man nyi kere?
• Er nan i doo u se pase asorabo ase a vesene?
• Mbatamen mba ken Kristu ka ve wase or u nan gem ishima, nan pase asorabo a nan la nena?