Za Hemen u “Eren Akaa a Dedoo”
1 Yange ú er lu kwagh u dedoo zum u yange ú hingir or u civir Yehova Aôndo la. Nahan kpa, kwagh u a taver u eren ken ashighe a ican ne yô, ka u zan hemen u “eren akaa a dedoo” la. (Gal. 6:9) Er ka i gba u saa or a nôngo kwagh tsung ve nana kôr cio u eren kwagh ne nahan kpa, ú fatyô u eren. Inja nena?
2 Lu a Mhen u Yesu Kpa Yange Lu a Mi La: Aluer ishimaverenkeghen you har sha Tartor la yô, we kpa ú fatyô u wan ishima a ameen di er Yesu kpa yange er nahan. (Heb. 12:2, 3) Fa dedoo wer ú doo Yehova ishima, shi a soo ér u̱ zua a mhembe kpaa. (2 Pet. 3:9) Suur sha a na tôô ave sha, shi lu a vangertiôr wer una wase ú. (1 Kor. 10:13) Taver ishima sha msen u eren, sônon Yehova wer a̱ wase ú ú wa ishima. (Rom. 12:12) Ember sha vangertiôr u ú lu a mi wer ishimawan you la ia na ú mlumun sha ishigh ki Aôndo la. (Rom. 5:3-5) Jighjigh u nan wou u lun a ‘ishima i môm sha inja i Kristu Yesu’ la una na ú mkom shi una na a saan Yehova iyol kpaa.—Rom. 15:5; Anz. 27:11.
3 Za Hemen u Eren Aeren a Dedoo: Yar tom a mbamne mba Yehova a ne ior nav u wasen ve u eren akaa a dedoo la vindi vindi. Za hemen a ieren you i ôron Mkaanem ma Aôndo sha tseeneke wou shi henen ityakerada i haren sha Bibilo í wanakiriki u jighjigh man u fan kwagh a ne la. Kpe iyol waan ago iyol a mbamkombo mba tiônnongo cii, shi zaan ve shi waan zwa kpaa. Lu vea anmgbianev ou mba nomso man mba kasev mba ken jijingi ikyooso ikyooso shighe u mbamkombo mba Mbakristu ve lu a̱ hii ga la man shighe u ve kur la kpaa. Tsua akaa a ú kôr cio u eren ken tomshiren wou a aa na ú hemba lun a ci u injaa ken tom u kwaghpasen shi ú seer tsaase mfetom wou ken mpase u pasen ior loho u dedoo yô.
4 Kape ú er ve ú za hemen u eren akaa a dedoo shi ú zua a iember kpishi hen shighe shon kpaa je ne. Anmgbian ugen ken tar u Italia kaa sha kwagh ne nahan ér: “Sha mimi yô ka mea shile Yehova tom iyange jimin, iyange ia bee mea hide hen ya yô, ka m vôr kpishi. Kpa ka i saan mo iyol, shi m sugh Yehova er a nem iember i or môm kpa nana fatyô u ngohol ga yô.” Er kwagh ne a lu nahan yô, za hemen u eren akaa a dedoo, nahan we kpa ú zua a iember i vesen ne.