Henen Mkaanem ma Aôndo Vighe Vighe

1-2. Ka hanma gbenda u hembe doon u ôron Bibilo shi henen i? Tese ikyav.

TÔÔ wer u soo u yamen ya. Ka nyi u soo wer ma u nenge a mi sha ya la cii ve u yam unu? A lu di foto u ishigh ki ya shon tseeghlee? Ka keng u soo wer ma u ze hen ya shon iyol you, ma u za zende ma u nenge un. Ma u nenge er ayou shon a lu kimi, man er a gbanger a lu yô. Shi alaghga u soo wer u tôv u fa er yange i maa iyou shon la je kpaa. U soo wer ma u fe hanma kwagh sha ya u u soo u yamen la je ka u henen a hen ga.

² Se fatyô u eren kwagh nahan shighe u se lu ôron Bibilo shi timen ker yô. Ortimen sha akaa a ken Bibilo ugen kaa ér, Bibilo ngi er ka “zegeyou u taven sha u a kehe, shi i we i ityo i ze shin inya kpishi nahan.” Nahan se er nan ve se fa akaa a a lu ken Bibilo la tsembelee? Aluer u ôr i ayem ayem yô, u fa akaa a mimi a ka i hii fan la tseegh; ka ‘akaa a ka i hii henen ken icighan loho u Aôndo la’ je la. (Heb. 5:12) Kpa er ka i gba u u nyôr ken iyou ve u seer fan kwagh u i nahan, kape i gbe u u time ken Bibilo zulee, sha er u fa i tsembelee je la. Gbenda u hemban doon u henen Bibilo yô, ka u nengen er avur a Bibilo a u lu ôron la a zough sha avur agen la. Nôngo u kaven kwagh u u ne jighjigh a mi la, kua atôakyaa a u ne jighjigh a kwagh shon la kpaa.

 3. Ka nyi apostoli Paulu yange ôr a anmgbianev nav mba ken tiônnongo ér ve ere, man lu sha ci u nyi? (Mbaefese 3:14-19)

³ Kwagh u una wase se u fan Mkaanem ma Aôndo tsembelee yô, ka u timen sha kwagh u ma ôr la zulee. Apostoli Paulu yange taver anmgbianev nav mba ken tiônnongo ishima ér ve henen Mkaanem ma Aôndo vighe vighe sha er vea “[fa] igbanger man iniembe man ityaven man mze” u mimi “la vindi vindi” yô. Vea er nahan yô, jighjigh ve una seer ‘wan amise gbang.’ (Ôr Mbaefese 3:14-19.) Se kpa, gba u se er nahan. De se nenge er se time ken Mkaanem ma Aôndo zulee ve, se fa kwagh u ma tese kpôô kpôô la yô.

 4. Se er nan ve se seer kporom hen Yehova? Tese ikyav sha igbenda kposo kposo.

⁴ Er se lu Mbakristu yô, se soo ser se kav akaa a or ka nan hii fan ken Bibilo la tseegh ga. Kpa se soo ser se fa “mbamhen mba Aôndo mba ve cimin la je kpaa.” Man se fatyô u eren kwagh ne sha iwasen i icighan jijingi. (1 Kor. 2:9, 10) U fatyô u timen ken Bibilo vighe vighe, a awashima u seer kporom ikyua a Yehova. Ikyav i tesen yô, u fatyô u seer timen nengen er Yehova yange tese mbacivir un mba sha ayange a tsuaa mbara dooshima na yô, man er kwagh la a tese ér we kpa u doo un ishima yô. U fatyô u tôvon sha gbenda u Yehova yange soo ér ikyurior i Iserael i civir un la, man er kwagh la a zough sha gbenda u a soo ér se civir un nyian yô. Gayô u fatyô u timen sha akaaôron a profeti a yange kure sha Yesu, shighe u lu eren tom na u pasen kwagh shin tar la vighe vighe.

 5. Kwagh ngu u u soo u seer timen sha mi vighe vighe ken kwaghhenen wou u sha tseeneke yôô?

⁵ Mbagenev mba ve soo u timen ken Bibilo vighe vighe yô, ka ve ôr akaa kpuaa, a ve soo u seer timen sha mi fan vighe vighe yô. U fatyô u nengen a akaa agen a ve ôr ér vea time sha mi la ken ngeren u kiriki u a lu a itinekwagh ér, “Akaa a Timen sha Mi Vighe Vighe ken Kwaghhenen u sha Tseeneke” la. Aluer u ngu timen sha atôakaa ne a Takerada u Tôvon sha Kwagh ú Mbashiada mba Yehova la yô, a saan we iyol kpishi. Aluer u ngu timen ken Bibilo zan shimi nahan yô, kwagh la una seer taver jighjigh u nan wou, shi “mfe u fan Aôndo kpaa, ú zua a mi.” (Anz. 2:4, 5) De se nenge akaa a mimi agen a zan shimi a Bibilo i ôr, a se fatyô u timen sha mi vighe vighe yô.

 6. (a) Mkposo u awashima man gbenda u kuren awashima la ka nyi? (b) A fatyô u kaan ér awashima u Yehova u sha kwagh u uumace man tar la ka u “tsôron” sha ci u nyi? (Mbaefese 3:11)

⁶ Ikyav i tesen yô, time sha kwagh u Bibilo i kaa ér ka awashima u Aôndo la. U lun a awashima u eren kwagh la, kaha kposo a gbenda u u soo u eren kwagh shon la. Se fatyô u kaan ser gbenda u eren kwagh yô, ka inja er ka u tsuan gbenda u u yem sha mi u za nyôr hen ijiir i u soo u zan la nahan. Kpa aluer kwagh yisa gbenda shon yô, u fatyô u karen sha u za nyôron ape u soo u zan la ga. Awashima yô, se fatyô u kaan ser ngu er ka ijiir i u soo u zan la nahan. Se fa ape se soo u zan la jighilii, kpa igbenda gema ngi kposo kposo i se fatyô u karen sha mi zan her yô. Aluer kwagh za yisa se sha gbenda ugen yô, se fatyô u hiden karen sha gbenda ugen. Kwagh er doo yô, Yehova pase se “awashima na u tsôron” la ken Bibilo kure kure. (Ef. 3:11) Yehova una fatyô u tsuan igbenda kposo kposo i kuren awashima na. Bee kera yô, “eren hanma kwagh sha awashima na.” (Anz. 16:4, NWT) Shi kwagh u a due ken kwagh u Yehova a er cii yô, una lu her gbem sha won. Awashima u Yehova ka nyi? Man ka nyi akaa nahan a er sha u nôngon kuren awashima naa?

 7. Yehova yange gema gbenda u kuren awashima na shighe u uumace mba hiihii mbara hendan a na la nena? (Mateu 25:34)

⁷ Yehova yange pase uumace mba hiihii mbara awashima u lu a mi ve gba ve yô. Yange gba ve ér ve ‘mar kpishi, ve seer ngeen, ve iv tar, ve gema u, u̱ lu sha ikyev ve; hanma kwagh u uma u a zenden sha tar cii, ve̱ lu sha ikyev ve.’ (Gen. 1:28) Er Adam vea Ifa ve va hemba Yehova ato, ve tsombor u uumace cii u hingir mbaasorabo nahan kpa, kwagh la yange Yehova u kuren awashima na ga. Kpa a gema gbenda u yange soo u kuren awashima na la. Ave ave la je, Yehova tsua ér una ver Tartor sha, nahan Tartor shon u va kure awashima na u yange hii lun a mi ve gba uumace kua tar la. (Ôr Mateu 25:34.) Shighe u Yehova ver la va kom yô, a tese er tar ne u doo un ishima yô, a tindi Wan na u hiihii shin tar ér a va tese ior kwagh u Tartor la, shi a na uma na, nahan a paa se sha ikyev i isholibo man ku kera. Yesu va kpen sha ci wase kera yô, Yehova nder un shin ku hide kôndo yem sha, ér a za tema Tor u Tartor u Aôndo. Kpa ka cii la ga, akaa agen kpa nga, a se fatyô u henen sha kwagh u awashima u Aôndo yô.

 8. (a) Ka nyi i lu kwagh u vesen ken loho u Bibilo? (b) Mbaefese 1:8-11 kaa ér, ka nyi igen kpa Yehova una er sha u kuren awashima naa? (Nenge foto u sha igbende.)

⁸ Kwagh u vesen u a lu ken loho u Bibilo jimin cii yô ka un ne: Yehova una va kure awashima u yange gba tar a mi la sha ikyev i Tartor u Kristu a lu hemen la, sha u tesen er akaa a vihin a i ôr sha iyol na la cii, i lu mimi ga yô. Awashima u Yehova la una gema kposo mayange ga. A tôndo zwa ér hanma kwagh cii una er, er un kaa la vough. (Yes. 46:10, 11; Heb. 6:17, 18) Shighe u Yehova a ver la una va kuman yô, una gema tar ua hingir paradiso. Shighe la, uumace mbaperapera mba lun a myen môm môm ga, mba ve dugh ken tsombor u Adam la cii, vea tema sha tar, vea “lu uma gbem” sha won. (Ps. 22:26) Kpa awashima u Yehova saa sha kwagh ne tseegh ga. Una zua mbatyomov kua uumace cii vea lu gungur môm. Shighe la, hanma or cii nana lumun ér ka Yehova a lu Tor ye, shi nana lu ungwan imo na sha mimi. (Ôr Mbaefese 1:8-11.) Gbenda u doon u Yehova una va kure awashima na ne ka kwagh u kpiligh we iyol gaa?

 9. Aluer se mba ôron Bibilo yô, se fa akaa a ken hemen a kighir nan je?

⁹ Time ase sha kwaghôron u profeti u Yehova ôr ken sule u Eden, i nger ken Genese 3:15 la.b Kwaghôron u profeti la ôr akaa a yange lu u anyom a kar udubu imôngo cii ve aa hii u eren sha u kuren awashima u Aôndo yô. Ikyav i tesen yô, Aôndo kaa a Aberaham ér orgen nana va due ken tsombor na, u nana lu Kristu yô. Kpa lu u anyom a kar uderi imôngo cii ve kwagh ne una er ye. (Gen. 22:15-18) Nahan ken inyom i 33 la, i cagh Yesu ikishinguhar, er i tsenga ôron nahan. (Aer. 3:13-15) Kpa vegher kwaghôron u profeti ne, u a ôr kwagh u caghen Satan ityough la yô, zan zan hegen kpa ngu a kure ga, una va kure sha mi ken hemen. (Mpa. 20:7-10) Bibilo shi seer ôron akaa agen kpishi a aa va er, zum u tar u Satan u u soo nongo u Yehova ga ne, ua kôr nongo ne ihyom kpishi je ua ta num sha u yô.

10. (a) Ka akaa a ken hemen a nyi nahan ica a gba ga tsô aa ere? (b) Se wa iyol se keghen a kegh shighe u akaa ne aa va er la nena? (Nenge ngeren u shin kpe.)

¹⁰ Hen sha akaa a kpilighyol a Bibilo i tsenga ôron ér aa er ne. Hiihii yô, akuraior aa yôô ér “bem gba, zayol kera ngu ga!” (1 Tes. 5:2, 3) Maa “fese” je zegecan una hii. Zum la, ugomoti mba tar ne vea ta num sha ukwaghaôndo mba aiev cii. (Mpa. 17:16) Kwagh ne una eren kera yô, a nenge “Wan u or una gba van sha abeen a sha kwavaôndo a tahav man iengem i kpilighyol.” (Mat. 24:30) Yesu una ôr uumace cii ijir, una pav mba ve lu iyôngo la una ver ve kposo a mba ve lu ivo la. (Mat. 25:31-33, 46) Hen shighe ne kpa, Satan una lu hendan kwagh a Yehova her. Er a ker ior mba Aôndo ihyom kpishi yô, una tuur mzough u akuraior, u Bibilo i yer ér Gogi, u ken tar u Magogi la, ér a ta ityav sha ior mba Yehova. (Esek. 38:2, 10, 11) Kwagh ne una nguren eren yô, a kura mba i shighe ve mkurem mba vea shi shin tar la cii, a yem a ve sha, vea za kohol Kristu vea shoja na i sha la, vea nôngo ityav mbi Armagedon. Kape zegecan maa una kuusu je la.c (Mat. 24:31; Mpa. 16:14, 16) Kwagh ne una eren kera yô, maa Hemen u Kristu u Anyom Dubu la ua hii sha tar.—Mpa. 20:6.

11. Ishimaverenkeghen i sha kwagh u va zuan a uma u tsôron la wase u nena? (Shi nenge foto kpaa.)

¹¹ Hen ase sha kwagh u una za hemen shighe u anyom dubu la aa bee kera la. Bibilo kaa ér Aôndo u a gbe se la shi “ver mtsôr ken asema a [ase].” (Orpa. 3:11) Hen ase er kwagh ne una wase u kua ijende i u ye vea Yehova la yô. Takeda u Kporom hen Yehova, peeji 319 la ôr kwagh u sagher iyol ne, ér: “Shighe u se va lu uma anyom uderi imôngo shin udubu udubu shin umiliôn gayô u ubiliôn imôngo la, se fa kwagh u Yehova Aôndo a hemba er se fe hegen nahan la ica je. Hen shighe la je kpa, akaa a kpilighyol kpishi aa lu a se lu a fa ga yô. . . . Uma u tsôron una doo je a gande ôron shi akaa aa lu kposo kposo a eren—shi una na se ian i dedoo i seer kporom ikyua ikyua a Yehova kpaa.” Er shighe la a lu a va ga, shi se lu henen Mkaanem ma Aôndo her yô, ka nyi igen kpa se fatyô u timen sha mi vighe vighee?

12. Se gbir ashe se nenge akaa a sha nena? Tese ikyav.

¹² Mkaanem ma Aôndo pande tsever se kwagh u mlu u Yehova u “sha” la. (Yes. 33:5) Bibilo pase se akaa a kpilighyol sha kwagh u Yehova, kua vegher u nongo na u sha la. (Yes. 6:1-4; Dan. 7:9, 10; Mpa. 4:1-6) Ikyav i tesen yô, i ôr se akaa a kpilighyol a Esekiel nenge a mi shighe u “i bugh Sha maa [a] nenge mbampase mba Aôndo” la.—Esek. 1:1.

13. U nenge tom u Yesu a lu eren sha er i pase ken Mbaheberu 4:14-16 la nahan, ka u ken ishima nena?

¹³ Hen sha kwagh u Yesu a lu eren sha ci wase sha la kpaa. Er hegen a lu Tor man Pristi u Vesen u a lu zungwen a vese imôngo ne, se fatyô u kporom “hen ikyônough ki torough ki erdoo u sha mhôôn” ki Aôndo la ken iti i Yesu ken msen, nahan sônon ser a zungwe se mhôônom shi a wase se “sha shighe vough.” (Ôr Mbaheberu 4:14-16.) Gba u hanma iyange yô, se henen sha kwagh u Yehova kua Yesu ve er sha ci wase, kua kwagh u ve lu eren sha hegen sha ci wase la kpaa. Dooshima u ve lu tesen se la a mgbegha se u eren Yehova tom shi civir un sha gbashima.—2 Kor. 5:14, 15.

14. Ka nyi i vesen igen se fatyô u eren u tesen ser se wuese Yehova kua Yesu? (Shi nenge ufoto kpaa.)

¹⁴ Gbenda ugen u vesen u se tese ser se wuese Aôndo man Wan na yô, ka u nôngon kpoghuloo wasen mbagenev sha u ve kpa ve hingir Mbashiada mba Yehova man mbahenen mba Yesu. (Mat. 28:19, 20) Ka kwagh u apostoli Paulu yange er u tesen ér un wuese Aôndo man Kristu je la. Yange fa dedoo je ér awashima u Yehova yô, ka u “i̱ yima ior cii shi ve̱ zua a mfe u mimi u vough la.” (1 Tim. 2:3, 4) Yange er tom u pasen kwagh la kpoghuloo u wasen ior kpishi er fatyô la cii, ‘sha er una nôngo sha afatyô na cii una yima mbagenev yô.’—1 Kor. 9:22, 23.

15. Pasalmi 1:2 kaa ér, ka nyi se er ve a saan se iyolo?

¹⁵ Or u a nger ityough ki pasalmi ki hiihii kira kaa ér, or u i saan nan iyol, u ka nan hii kwagh shi nan kure un vough yô, ka or u ‘atindi a TER a lu kwagh u gban nan ishima’ la, shi ka or u nan “zeren henen a ken ishima tugh kua tetan kpaa” la. (Ps. 1:1-3) Orgen u a gem Bibilo yô, iti na ér Joseph Rotherham, a ôr kwagh u avur ne ken takeda na, u i yer ér Studies in the Psalms la, a kaa ér, gba u or nana “soo kwaghwan u Aôndo kpishi je yô, nana keren un, shi nana timen sha mi, shi nana tôôn shighe kpishi nana henen sha mi.” Shi a kaa ér: “Aluer sev av man or ôr Bibilo ga zan zan nan de iyange la kar yô, nan er kwagh u injaa ken iyange la ga.” Aluer u soo wer Bibilo i doo u u henen yô, ker u fan akaa a injaa kpishi a i ôr la vighe vighe, shi nenge er akaa shon a zough sha agen la. Aluer u ngu tôôn shighe timen ken Mkaanem ma Aôndo vighe vighe nahan yô, a saan we iyol kpishi!

16. Ka nyi se lu timen sha mi ken ngeren u a dondo laa?

¹⁶ Akaa a mimi a doon a Yehova a tese se ken Mkaanem nam la, a taver gande u kaven ga. Ken ngeren u a dondo la, se lu timen sha akaa a mimi agen a Bibilo i ôr sha kwagh u zege tempel u Yehova u ken jijingi, u Paulu a ôr kwagh na ken washika u nger hen Mbaheberu mba ve lu Mbakristu la. Yô, time sha itinekwagh la vighe vighe, nahan i saan we iyol.