Eren Kwagh Er Marnya U Tartor U Aôndo Nahan!

“Mlu wen a̱ kuma sha loho u dedoo.”—FIL. 1:27.

Ú NA MLUMUN WER NYI?

Ka unô vea fatyô u lun marnya u Tartoro?

Ka nyi i gbe u se ser sha kwagh u zwa u Tartor man yiase i u man atindi a u?

Mba ve lu marnya u Tartor la ka ve tese ér atindi a Aôndo doo ve ishima nena?

1, 2. Kwaghwan u Paulu wa tiônnongo u ken Filipi la yange lu ve a inja tsung sha ci u nyi?

APOSTOLI PAULU yange taver anmgbianev mba ken tiônnongo u ken Filipi la ishima ér: “Mlu wen a̱ kuma sha Loho u Dedoo.” (Ôr Mbafilipi 1:27.) Ishember i ken zwa Grika i “mlu,” i í gem ken mkaanem ma ma kaa ér “mlu wen a̱ kuma sha loho u dedoo” la, a fatyô u geman i kpaa ér, “u eren kwagh er marnya nahan.” Mkaanem mara yange ma wanger anmgbianev mba ken tiônnongo u ken Filipi la wang. Sha ci u nyi? Sha ci u ikyav tese ér gar u Filipi lu môm ken agar a Tartor u Roma na ior mba ker ian i lun marnya u ú la. Yange ian ne doo ior mba ve lu marnya u Tartor u Roma, mba ve lu ken gar u Filipi la, kua mba ve lu sha ajiir agen ken tartor la jimin cii, sha ci u atindi a Tartor la kuran ve.

² Mba ve lu ken tiônnongo u ken Filipi la yange ve hemba lun a ityôkyaa i lun saan saan cii. Paulu yange umbur Mbakristu mba i shighe ve mkurem mbara ér: “Se yô, tar wase ngu Sha.” (Fil. 3:20) Yange ve lu marnya u ma tartor u uumace ga, kpa ve lu marnya u Tartor u Aôndo. Sha nahan yô, ve zua a mkor man mbamtsera mba ma gomoti u orumace môm kpa ma fatyô u nan ve ga yô.—Ef. 2:19-22.

 3. (a) Ka unô vea fatyô u lun marnya u Tartor u Aôndo? (b) Ka nyi se time sha mi ken kwaghhenen nee?

³ Jighilii yô, kwagh u Paulu a kaa ér “mlu wen a̱ kuma sha Loho u Dedoo” la ngu sha ci u mba vea za tema tor a Kristu imôngo sha la. (Fil. 3:20) Nahan kpa, kwaghwan la wa mba vea lu sha ikyev i Tartor u Aôndo shin tar la kpa ker. Sha ci u nyi? Sha ci u se cii ka Tor môm se lu eren un tom yô, ka Yehova je la, shi gba u se cii se kuran atindi a á we sha ci u mbacivir un la. (Ef. 4:4-6) Nyian ne, ior ka ve nôngo kpoghuloo ér vea hingir marnya u tar u u lu a kwagh a ve yô. Sha nahan yô, doo u ian i lun marnya u Tartor u Aôndo la ia hemba gban se kwagh cii! De se time sha akaa agen a ugomoti mba uumace ka ve ver ishima ér mba ve lu marnya u tar ve ve̱ eren, a a lu kwaghmôm a akaa a i gbe u mba ve lu marnya u Tartor u Aôndo kpa vea eren la. Nahan se nenge er ian i se lu a mi i lun marnya u Tartor u Aôndo la i lu i vesen yô. Se been yô, se time sha akaa atar, a i gbe kpee u se er ve se za hemen u lun marnya u Tartor u Aôndo la.

AKAA A I GBE U IOR MBA VE LU SHA IKYEV I TARTOR U AÔNDO VEA EREN LA

 4. Ka nyi i lu zwa u wang laa, man se mba “lamen” u nena?

⁴ Hen zwa u tar la. Ugomoti mba uumace mbagenev ka ve wa tindi ér mba ve soo u hingir marnya u tar ve yô, ve hen zwa u tar la. Ior ka vea va hingir marnya u tar la je kpa, ve za hemen u nôngon anyom imôngo ér vea fa zwa u tar shon tsembelee. Alaghga vea ngôôr fan atindi a zwa shon ga, kpa a gema a tôô ve shighe u fan u yilan atiakaa a ken zwa shon tsembelee. Tartor u Aôndo kpa wa tindi ér ior mba ve soo u hingir marnya u ú yô, ve hen zwa u he. Bibilo yila u ér “zwa u wang.” (Ôr Sefania 3:9.) Ka nyi i lu zwa u wang laa? Zwa u wang la ka mimi u Bibilo i tese sha kwagh u Aôndo man mbaawashima nav la. Inja i u lamen zwa u wang la yô, ka u kuran atindi a Aôndo shi dondon akaawan a na ken uma wase. Er se lu marnya u Tartor u Aôndo yô, se fatyô u henen atesen a vesen a Bibilo i tese la fele, shi a er se batisema. Nahan kpa, shighe u se er batisema kera la je kpa, a gba u se nôngo kpoghuloo se seer fan u “lamen” zwa u wang la tsembelee. Se er kwagh ne nena? Gba u hanmô wase nana eren kwagh u nan hen ken Bibilo la.

 5. Doo u se fa hanma kwagh u se fetyô u fan sha kwagh u nongo u Yehova cii sha ci u nyi?

⁵ Hen yiase i tar la. Aluer or soo u hingir marnya u ma tar yô, alaghga a gba u nana fa yiase i tar shon. Kape mba ve soo u hingir marnya u Tartor u Aôndo kpa i gbe u vea fa hanma kwagh u ve fetyô cii sha kwagh u Tartor u Aôndo je la. Hen ase kwagh u ônov mba Kora, mba ve eren tom u Aôndo ken Iserael sha ayange a tsuaa la. Yange ve soo Yerusalem kua ijiir i civir Aôndo, i i lu ker la, nahan í doo ve u ôron ior tsegh ku gar la. Lu iengem i gar la hemba doon ve ishima ga, kpa lu sha ci u Yerusalem lu “gar u Zegetor,” Yehova. Gar ne lu ijiir i mcivir u mimi. Lu hen ijiir ne i tesen ior Tindi u Yehova shi ve civir un kpaa ye. Ka ior mba Tor u ken Yerusalem hemen ve la Yehova yange lumun ve shi ve doo un ishima ye. (Ôr Pasalmi 48:1, 2, 9, 12, 13.) Nyian kpa Aôndo ngu a nongo shin tar. Nahan doo u se hen yiase i ior mba Aôndo shi se pase mbagenev kwagh ve kpaa, vough er ônov mba Kora kpa yange ve er nahan. Er se lu seer fan kwagh u nongo u Aôndo, man er a suen u la, kape Tartor u Aôndo kpa ua seer lun se kwagh u kpôô kpôô je la. Shi a seer saren we u pasen ior loho u dedoo u Tartor kpaa.—Yer. 9:24; Luka 4:43.

 6. Doo u se ver ishima ser Yehova a wa se atindi a se hen se fa sha ci u nyi?

⁶ Fa atindi a tar la. Ugomoti mba uumace ka ve soo ér mba ve lu marnya u tar ve cii ve fa atindi a tar ve shi ve kuran a kpaa. Nahan doo u se ver ishima ser Yehova kpa una wa mba ve lu marnya u Tartor na atindi a vea hen vea fa a shi vea kuran a kpaa. (Yes. 2:3; Yoh. 15:10; 1 Yoh. 5:3) Atindi a uumace kpishi ka a lu a mshi, shi a za kpe kpaa. Kpa “Atindi a TER nga vough je.” (Ps. 19:7) Atindi a Aôndo ka kwagh u gban se ishima shi se mba er Mkaanem nam hanma iyange kpa? (Ps. 1:1, 2) U henen atindi a Aôndo ayol a ase la ka cii gbenda u se kôrcio u fan á je la. Orgen môm nana er kwagh ne sha ci wase ga.

MBA VE LU MARNYA U TARTOR LA MBA WE ATINDI A AONDO IKYO

 7. Mba ve lu marnya u Tartor la mba kor atindi a Aôndo sha ci u nyi?

⁷ Gba u se fa atindi a Aôndo shi aa doo se ishima ve se za hemen u lun marnya u Tartor na ye. Ior kpishi mba ve lu sha ikyev i ugomoti mba uumace ka ve kaa ér ve lumun u kuran atindi a tar u ve lu ker la. Kpa ka vea nenge ér ma tindi taver ve yô, ve per tindi shon shighe u ve hen ér or ngu nengen ga yô. Ashighe kpishi ior mban ka ve lu “mbadoon ityough a ior.” (Kol. 3:22) Mba ve lu marnya u Tartor u Aôndo yô, mba kor atindi a na sha ityôkyaa igen kposo. Ka i doo se u kuran atindi a Aôndo shighe u mbagenev ve lu nengen ga je kpaa. Sha ci u nyi? Sha ci u Aôndo u a lu Orwan se atindi la doo ve ishima.—Yes. 33:22; ôr Luka 10:27.

8, 9. Aluer atindi a Aôndo doo u ishima sha mimi nahan u fa sha nyi?

⁸ Aluer atindi a Aôndo doo u ishima sha mimi nahan, u fa sha nyi? U fa sha u gbidyen kwar sha kwagh u ka u er, shighe u i we u kwagh sha ikyaa i u nenge wer, ka kwagh u or a tsua u eren a ishima i nan shin eren ga la, er gbenda u ú wuhan iyol la nahan. Cii man u̱ hingir marnya u Tartor yô, alaghga yange u wuhan iyol tsembelee ga, shin u wuhan iyol sha gbenda u kenden isharen i ijimbagh ken mbagenev. Er Aôndo lu doon we ishima seer la, ú hen u wuhan iyol tsembelee sha er u na un icivir yô. (1 Tim. 2:9, 10; 1 Pet. 3:3, 4) Alaghga a lu u er u gema wuhan iyol akuma akuma hegen nahan. Kpa aluer ma ortamen kaa a we ér mbapasenkwagh kpishi ken tiônnongo nenge ér iyolwuhan you la doo ga nahan, u er nena? U gba keren ishô shin ishima ia vihi u ker, shin u venda u geman gbenda u ú wuhan iyol laa? Môm ken atindi a vesen a i gbe u mba ve lu marnya u Tartor u Aôndo vea kuran yô ka u dondon Kristu. (1 Pet. 2:21) Paulu nger kwagh u ikyav i Yesu ver la ér: “Hanmô wase nana̱ nôngo u eren kwagh u doon or u nan we ndor a nan la i̱ lu sha gbenda u doon man shi u maan nan a maa kpaa. Gadia Kristu kpaa ker kwagh u doon sha ci Na ga.” (Rom. 15:2, 3) Orkristu u nan vighe ken jijingi yô, hanma shighe ka nan kegh iyol u eren kwagh u una vihi mbagenev ga yô, sha er bem una lu ken tiônnongo yô.—Rom. 14:19-21.

⁹ Shi hen ase sha ieren you sha kwagh u myav u yaven a kwase man ivaa i eren kpaa. Alaghga mba ve lu a hingir marnya u Tartor ga la vea lumun a ieren i nomsoor yaven a nomsoor ugen la, shi vea nenge ér u nengen ufoto mba ijimbagh ka kwaghbo ga shi idya man ivaapaven cii ka kwagh u or a tsua u eren a ishima i nan yô. Kpa mba ve lu marnya u Tartor yô, ka ve hen sha kwagh u una due ken ieren ve la, man er mbagenev ve nenge ieren ve la kpaa. Cii ve mbagenev hingir Mbakristu yô, ve eren ijimba kpishi, kpa hegen mba nengen myav u yaven a kwase man ivaa i eren ér ka iyua i Aôndo a ne yô. Atindi a Yehova doo ve ishima, shi ve fa er mba ve peren atindi a Aôndo a we sha kwagh u ivaa i eren man myav u yaven a kwase la cii vea fatyô u lun marnya u Tartor na ga yô. (1 Kor. 6:9-11) Heela tseegh ga, shi ve fa er ishima i we atseregh yô. (Yer. 17:9) Nahan doo ve kpishi er i te ve icin sha akaa a vea palegh ve, vea kôrcio u kuran atindi a Aôndo la yô.

MBA VE LU MARNYA U TARTOR LA MBA ONGO ICINTAN

10, 11. Ka icintan i nyi Tartor u Aôndo u lu tan se sha shighe voughlo, man se nengen icintan ne nena?

¹⁰ Ashighe agen ugomoti mba uumace vea ta ior icin sha kwagh u mcimbim man akaayan. Nahan kpa, ka mcimbim man akaayan cii a lu a bo ga. Kpa aluer ma kwaghyan shin icigh nôngo u wuan ior yô, gomoti una ta ior mba ve lu sha ikyev na la icin sha er kwagh a er ve ga yô. Aluer gomoti ta ior icin ga yô, una lu a ibo. Kape Tartor u Aôndo kpa u te se icin sha aeren a bo kua akaabo a ken jijingi sha shighe vough je la. U tesen ikyav yô, Intanet hingir ijiir i ior ve lamen a mbagenev shi ve henen makeranta shi ve keren iemberyolough yô. Nongo u Aôndo ngu eren tom a Intanet sha u eren akaa a dedoo kpishi. Nahan cii kpa, ajiir nga sha Intanet kpishi, a i doo u mba ve soo u eren kwagh u vough sha ishigh ki Aôndo vea za her ga yô. Ajiir a sha Intanet a a lu a ufoto mba ijimbagh la doo sha ci u mba ve soo u lun marnya u Tartor la ga. Nongo u wanakiriki u jighjigh la ta se icin sha kwagh u ajiir ne anyom imôngo hegen. Man doo se kpishi er i te se icin sha akaa a vihin mlu wase vea Yehova la nahan!

¹¹ Ken anyom a a sember karen ne, ajiir agen due sha Intanet, a ior kpishi ve ze her yô. Aluer or er akaa hen ajiir ne sha kwaghfan yô, aa lu nan a iwasen kpishi. Mba yer a ér, ajiir a sha Intanet a lamen a ior her. Er ajiir ne a lu a iwasen nahan cii kpa, akaabo kpa ban her ga. Or a fatyô u kôron azende a bo hen ajiir ne. (1 Kor. 15:33) Ka nahan ve, nongo u Aôndo u lu tan se icin sha er se lu a mnenge u vough sha kwagh u ajiir ne ye. U ôr ngeren mba wanakiriki u jighjigh a nger sha kwagh u ajiir a sha Intanet, a lamen a ior her la cica cii vee? Aluer or hii u eren akaa hen ajiir a sha Intanet ne, a u vanden ôron ngeren mbara shio yô, nan er kwagh sha ibume kpishi!a Or a er nahan yô, a lu inja er nan mena icigh ki taver kpishi, a u vanden ôron icintan i í nger sha mi la shio nahan.

12. Er nan ve u̱ vendan icintan la i lu ieren i ibume?

¹² Aluer or venda u ungwan icin i nongo u wanakiriki u jighjigh u lu tan se la yô, nana va a kwaghtseren sha iyol i nan kua mbadoon nan ishima cii. Ieren i nengen ufoto mba ijimbagh la ya tor ken mbagenev, shin ve er idya je kpaa, kpa ve gema ve hen ér Yehova ngu nengen a ieren ve la ga. Aluer se mba henen ser Yehova una fatyô u nengen a ieren yase ga yô, a lu mhen u ibume kpishi! (Anz. 15:3; ôr Mbaheberu 4:13.) Aôndo soo u wasen ambaaior la, nahan ka a mgbegha mbatamen ve wase a. (Gal. 6:1) Nahan kpa, Yehova una lumun ér mba ve ze hemen u peren atindi a na la ve lu sha ikyev i Tartor na ga, di er gomoti u uumace kpa ka a yange mba ve peren atindi a tar na u lun marnya u tar la nahan.b (1 Kor. 5:11-13) Kpa Yehova zungu mhôônom. Sha ityôkyaa ne yô, mba ve gem ishima shi ve de asorabo a ve cii vea fatyô u hiden yan ikyar a na doo doo, nahan vea za hemen u lun marnya u Tartor na. (2 Kor. 2:5-8) Nenge er se lu a ian icivirigh i civir Tor u lun a dooshima la sha wono!

KWAGHHENEN DOO MBA VE LU MARNYA U TARTOR LA

13. Mba ve lu sha ikyev i Tartor la vea tese ér ityesen i ve lu zuan a mi la gba ve kwagh nena?

¹³ Ugomoti mba uumace kpishi ka ve nôngo kwagh kpoghuloo sha u tesen mba ve lu sha ikyev ve la. Ve ver imakeranta i tesen ior u fan takerada u ôron man kwaghngeren, shi mba tesen ior ityomaveegh kpaa. Mba ve lu sha ikyev i Tartor u Aôndo la ka ve tese iwuese ve sha imakeranta ne, nahan ve hen u ngeren kwagh shi ôron takerada tsembelee, shi ve hen tomaveegh u vea eren, vea koson ayol a ve kpaa. Yehova ngu tesen mba ve lu marnya u Tartor la sha ikyev i nongo na. U tesen ikyav yô, nongo u Yehova ngu taver mbamaren asema ér ve ôron takerada vea mbayev vev. Hanma uwer yô, nongo u wanakiriki u jighjigh la ka u gber ngeren mba pasen Bibilo kpishi ken Iyoukura. Aluer u ngu ôron upeeji kpuaa hanma iyange yô, u fatyô u ôron Iyoukura jimin cii been ken atô u uwer môm. Kwagh ne una na yô, u za hemen u zuan a iwasen ken ityesen i Yehova a lu tesen se ne.

14. (a) Ka i tsaase se nena? (b) Ka mbamhen mba i dugh a mi ken ityakerada yase sha kwagh u Mcivir u hen Tsombor mba han u lu dondono?

¹⁴ Hanma kasua yô, ka i tsaase se ken mbamkombo mba se eren ken atôônanongo a ase la. U tesen ikyav yô, Makeranta u Henen Tom u Hemen u Aôndo la wase se u tesen ior Mkaanem ma Aôndo tsembelee hemba anyom 60 hegen. U nyôr makeranta ne vee? Ken anyom a a sember karen ne, nongo u wanakiriki u jighjigh la ôr var var er i lu hange hange u se eren Mcivir u hen Tsombor u aikighe la ken hanma kasua yô. Kwaghhenen u hen tsombor ne ka a wase icombor i hemba lun ken mzough. U ngu dondon mbamhen mba i dugh a mi ken ityakerada yase sha kwagh u Mcivir u hen Tsombor la kpa?c

15. Ka ian i vesen i eren nyi se lu a mini?

¹⁵ Mba ve lu sha ikyev i ma gomoti u uumace ka ve er kyampen je ve za sha ihinda ihinda kpaa, sha u keren nongo. Nahan mba ve lu sha ikyev i Tartor la mba hembe suen Tartor u Aôndo cii. Ka ve yôô angwe u ú sha akômaigbenda man sha uya uya je kpaa. Man er se vande teren ken ngeren u karen la nahan, magazin u Iyoukura, u a yôôn Tartor u Yehova la, ka magazin u i hembe samber a mi sha tar cii nyian yô! Ian i se lu a mi i pasen mbagenev kwagh u Tartor u Aôndo la, ka i vesen kpen kpen. Ú ngu eren tom ne sha gbashima kpa?—Mat. 28:19, 20.

16. U tese wer u ngu marnya u Tartor u Aôndo, u ungwan tindi nena?

¹⁶ Ica a gba ga tsô, a lu Tartor u Aôndo tseegh ua lu hemen tar ye. A lu atindi a Tartor la tseegh uumace vea lu dondon hen shighe la ye. Ú lu sha ikyev i Tartor la hen shighe la nahan u ungwan tindi kpa? Ka hegen i lu shighe u ú tesen wer u va lu or u ungwan tindi hen shighe la ye. Ken akaa a u eren ayange ayange la cii, eren a sha ci u icivir i Aôndo, nahan tese wer u ngu eren kwagh er or u nan lu marnya u Tartor u Aôndo, nan ongo tindi nahan.—1 Kor. 10:31.

[Ngeren mba shin kpe]

[Mkaanem ma sha peeji 14 la]

U ongo icin i wanakiriki u jighjigh a te sha kwagh u Intanet la kpa?

[Ufoto mba sha peeji 12 la]

Mcivir u mimi doo u ishima kua yiase i mcivir la, er ônov mba Kora nahan kpa?

[Ufoto mba sha peeji 15 la]

Mcivir u hen Tsombor u ú eren aikighe la, una fatyô u wasen we man tsombor wou u hingir marnya u Tartor