“Wasen Nen Ayol a En”
1 Apostoli Paulu yange taver mbananjighjigh a na imôngo asema sha afatyô na cii. (Aer. 14:19–22) Se kpa, anmgbianev ka vea tagher a mbamzeyol yô, ka i vihi se nahan se soo ser ma se wase ve. Bibilo tese ér hanma wase yô kwagh u orgen a gba nan ishima. Ka mbatamen tseegh vea er kwagh ne ga. (Rom. 15:1, 2) Nenge ase igbenda ihiar i se fatyô u dondon kwaghwan u sha dooshima u i we se ne, i kaa a vese ér: “Taver nen ayol a en asema, wasen nen ayol a en.”—1Tes. 5:11.
2 Fa Mgbe u Mbagenev: Mkaanem ma Aôndo kaa ér Dorka yange “lu a aeren a dedoo kpishi, man iwua i nan kpaa.” (Aer. 9:36, 39) Yange a fa mba kwagh a gbe ve la, shi a nôngo sha afatyô na a wase ve. Nahan a ver se ikyav i dedoo kpen kpen! Alaghga tsô ú nenge wer gba u a za tôô anmgbian u beenyol a za mkombo. Shin ú nenge wer ma pania ngu zuan a or u nana due kwaghpasen a nan atetan sha ma iyange i tom ga. Aluer ú fa wer ma anmgbian ngu a imba mzeyol ne man ú na iwasen nahan, sha mimi yô ishima a taver nan ker je a zua ga!
3 Lamen sha Akaa a ken Jijingi: Shi se fatyô u maan mbagenev sha kwaghôron wase kpaa. (Ef. 4:29) Ortamen ugen u lun a mkav tsema tsema kaa wener: “Aluer ka u pe taver or ishima yô, lamen a nan sha akaa a ken jijingi. U fatyô u hiin kwaghôron a or u una maa nan yô sha u pinen nan mpin u taver ga, wer: ‘U fa mimi nena?’ ” Tese agumaior a ken tiônnongo wer kwagh ve gba u ishima. Zaan ikyua a mba ve ure kua mba cian ashe kpaa. (Anz.12:25) Mayange de lumun wer iliam i lamen sha uyôughyôugh mba tar ne u eren la i̱ yange u u lamen sha akaa a dedoo a ken jijingi la a mbananjighjigh a we imôngo ga.—Rom.1:11, 12.
4 Ka nyi nahan i doo i u ter ken kwaghôron wou ve una maa mbageneve? Ú sember zuan a ma kwaghwan ken Bibilo you i ôron kua kwaghhenen wou u a wase u u seer wuese Yehova kpa? Mase zan ú ungwa kwagh ken kwaghôron u ken igbar shin Iyoukura i henen u a taver we ishima yôô? Shin u ungwa ma vande-eren u doon tsung u a taver jighjigh wou yôô? Aluer ú ver ishima sha akaa a injaa a ken jijingi er angan nahan yô, mayange je ú ban a kwagh u taver mbagenev asema a mi ga.—Anz. 2:1; Luka 6:45.
5 Se za nen hemen u maan mbagenev sha u wasen ve jighilii, shi yaren tom a nombor wase sha kwaghfan kpaa.—Anz. 12:18.