Agumaukase, Nôngo Hingir Nen Kasev mba Dondon Ikyav i Yesu

 1. Ka nyi se er ve se hingir mbadondon ikyav i Yesu?

KA I kpiligh se iyol u nengen er wanye ka nan vese nan hingir organden yô. Kwagh la ka i lu inja er ka a maren wanye yô, nan gbaa vesen tsô, a kwagh u eren sha mi shio nahan. Kpa aluer se soo u lun or u dondon ikyav i Yesu sha mimi yô, a gba u se nôngo kwagh kpoghuloo.b (1 Kor. 13:11; Heb. 6:1) U se er kwagh ne yô, saa se ya ijende a Yehova kôôsôô. Shi a gba u icighan jijingi u Aôndo una wase se sha er se lu a aeren a doon un, shi se fa u eren akaa, shi se wa ago iyol sha ityom i alaghga a va gba u se er ken hemen yô.—Anz. 1:5.

 2. Ka nyi se hen ken kwagh u i ôr ken Genese 1:27 laa, man ka nyi se lu timen sha mi ken ngeren nee?

² Yehova gba uumace cii, or ka nana lu nomsoor gayô i lu kwase. (Ôr Genese 1:27.) Mluashe u nomsoor kaha kposo a u kwase je ka ashe tugh ga. Ve kaha kposo sha igbenda igen kpaa. Ikyav i tesen yô, Yehova gba nomso man kasev shi na ve ityom i i kom sha a ve la vough vough, nahan gba u nomso vea lu a aeren man mfe u una wase ve u eren ityom ve yô, kasev kpa nahan. (Gen. 2:18) Ken ngeren ne, se lu timen sha kwagh u gumkwase u ken tiônnongo nana er ve nana hingir kwase u dondon ikyav i Yesu yô. Ken ngeren u a dondo la di, se time sha kwagh u agumaior aa er yô.

3-4. Ka han anmgbianev mba ve lu agumaukase la vea zua a kasev mba mbainjaav mba vea dondo ikyav ve? (Shi nenge foto kpaa.)

³ Bibilo ôr kwagh ter kasev mba injaav kpishi mba yange Yehova doo ve ishima shi ve civir un yô. (Nenge ngeren u sha jw.org u a lu a itinekwagh ér “Women in the Bible—What Can We Learn From Them?” la.) Yange ve tese ér mba a aeren a i ter ken ivur i itinekwagh i ngeren ne i har sha mi la; ve lu kasev mba “eren kwagh akuma akuma,” shi ve “eren akaa cii sha mimi.” Dugh ve kera kpa, anmgbianev mba kasev vea fatyô u zuan a kasev mbagenev ken tiônnongo mba Yehova a doo ve ishima tsung, mba vea fatyô u henen akaa kpishi hen a ve yô.

⁴ Agumaukase, ne fa anmgbianev mba kasev mba ve ver ikyav i dedoo i ne fatyô u dondon yôô? Ver ishima nengen aeren a ve a doon tsung a ve lu a mi la. Maa hen sha igbenda i we kpa, u fatyô u dondon aeren a ve shon yô. Ken akumahiange a a dondo ne, se lu timen sha aeren atar a i gbe u anmgbianev mba kasev vea lu a mi yô.

 5. Er nan ve i gbe u saa anmgbian u kwase nana hide a iyol i nan ijime ve nana fatyô u dondon ikyav i Yesu?

⁵ Gba u se cii se lu mbahiden a iyol ijime ve se fatyô u dondon ikyav i Yesu la ye. Aluer anmgbian u kwase nan ngu hiden a iyol ijime yô, kwagh la una wase nan u lun kôôsôô a Yehova, shi lun ken mzough vea mbagenev kpaa. (Yak. 4:6) Ikyav i tesen yô, kwase u Yehova a doo nan ishima yô, ka nan dondo kwagh u i nger ken 1 Mbakorinte 11:3, ape Yehova a pase or u nan lu ityough ki tiônnongo, man or u nan lu ityough hen tsombor la. Gba u se dondo kwaghwan u Yehova ne ken tiônnongo kua hen tsombor kpaa.c

 6. Rebeka yange tese ér un ngu kwase u hiden a iyol ijime nena, man ka nyi anmgbianev mba ve lu agumaukase la vea fatyô u henen ken ieren na laa?

⁶ De se nenge ikyav sha kwagh u Rebeka. Rebeka yange lu kwase u bughun ashe, shi ken uma na cii yange er akaa a a tese ér a taver ishima yô. Sha nahan yô, yange a fa shighe u i doo u una er kwagh, man gbenda u una er kwagh shon la kpaa. (Gen. 24:58; 27:5-17) Nahan cii kpa, yange naan ior icivir, shi a kegh iyol u dondon i ityesen i mba ve lu hemen la. (Gen. 24:17, 18, 65) Aluer we kpa u hide a iyol ijime er Rebeka nahan, shi u ngu suen gbenda u Yehova a sôr akaa a ver ér Kristu a lu ityough ki tiônnongo, nom di a lu ityough ki tsombor la yô, a tese ér u ngu veren mba ken tiônnongo man mba hen tsombor wou ikyav i dedoo i vea dondo yô.

 7. Anmgbianev mba kasev mba ve lu agumaukase la vea dondo ikyav i Eseter i norom sha kwagh ga la nena?

⁷ Gba u Mbakristu cii vea lu mba norom sha kwagh ga. Bibilo taver se ishima ér se lu mbahiden a iyol ijime, shin mba norom sha kwagh ga. (Anz. 11:2) Eseter yange lu kwase u civir Aôndo sha mimi, shi norom sha kwagh ga yô. Er vande lun kwase u norom sha kwagh ga yô, shighe u va lu torkwase la je kpa, lu kwase u gengese iyol ga. Yange ungwa kwaghwan u Mordekai u lu anmgbian na la shi er sha mi kpaa. (Eseter 2:10, 20, 22) We kpa u fatyô u eren kwagh nahan sha u keren kwaghwan hen mbagenev, nahan dondon mbamhen vev mbara.—Titu 2:3-5.

 8. Kwaghwan u ken 1 Timoteu 2:9, 10 la tese ér aluer anmgbian u kwase nan ngu eren kwagh akuma akuma yô, kwagh la una wase nan u wuhan iyol shi eren hwe sha kwaghfan nena?

⁸ Shi Eseter yange tese sha gbenda ugen kpaa ér un eren kwagh akuma akuma. Eseter yange “kuma ashe, [shi] dooashe kpaa.” Nahan kpa, yange eren kwagh sha inja i mbagenev vea hemba veren ishima sha mluashe na ga. (Eseter 2:7, 15) Anmgbian u kwase nana dondo ikyav i Eseter ne nena? Gbenda môm u nana er kwagh ne yô, ka u dondon kwagh u i nger ken 1 Timoteu 2:9, 10 la. (Ôr.) Apostoli Paulu yange wa kasev mba ve lu Mbakristu cii kwagh ér ve wuhan iyol akuma akuma man sha kwaghfan. Ishember i ken zwa Grika i i gem ér akuma akuma, kua i kwaghfan la, tese ér gba u kasev vea wuhan iyol sha gbenda u u tese icivir yô. Shi gba u vea wa mnenge u mbagenev ikyo shighe u ve lu tsuan ikyondo i vea hua yô. Doo se a ven kpishi ne anmgbianev mba kasev mba ne wuhan iyol akuma akuma la!

 9. Ka nyi se fatyô u henen ken ieren i Abigail laa?

⁹ Gba u anmgbianev mba kasev vea lu a mkav ve vea fatyô u lun mba dondon ikyav i Yesu ye. Ka nyi i lu mkava? Or u lun a mkav ka nan fa kwagh u a lu u dedoo man u bo yô, nahan nan tsua u eren kwagh u a lu dedoo la. De se nenge ikyav sha kwagh u Abigail. Nom na yange tsua u eren kwagh u bo u yange nôngo u nyôron a ior mba hen ya na cii ken zayol u vesen yô. Kpa kwase na Abigail er kwagh kpase. Er Abigail lu kwase u lun a mkav yô, yange er kwagh u yiman ior mba hen ya na cii. (1 Sam. 25:14-23, 32-35) Shi mkav ka a wase se u fan shighe u i gbe u se lam, shin se lu ving yô. Shi ieren ne ka i wase se u wan mbagenev ikyo, kpa geman palegh u eren kwagh u una na a hagher ve ken ishima yô.—1 Tes. 4:11.

10-11. Aluer u fa u ôron takeda shi ngeren kwagh tsembelee yô, kwagh la una wase u kua mbagenev nena? (Shi nenge foto kpaa.)

¹⁰ Gba u anmgbian u kwase nana hen u eren akaa a aa wase nan ayange ayange yô. Akaa a wanyekwase nan hen shighe u nan lu yev la, ka a za hemen u wasen nan ken uma u nan cii. De se tese ikyav sha akaa kpuaa.

¹¹ Hen u ôron takeda shi ngeren kwagh tsembelee. Sha ajiir agen yô, i nenge ér gba u kasev vea hen u ôron takeda shi ngeren kwagh keng ga. Nahan kpa, gba hange hange u hanma Orkristu cii nana hen u ôron takeda shi ngeren kwagh tsembelee.d (1 Tim. 4:13) Sha nahan yô, de deen wer kwagh môm a yange u u henen takeda u ôron shi ngeren kwagh tsembelee ga. Kwagh ne una wase u nena? Una wase u u zuan a tom u u fatyô u eren nengen sha iyol you yô. Shi aluer u fa u ôron takeda shi ngeren kwagh tsembelee yô, kwagh ne una wase u u henen Bibilo shi tesen mbagenev kpaa. U hemban cii yô, er u lu ôron Bibilo shi henen sha mi la, kwagh la una wase u seer kporom ikyua hen Yehova.—Yos. 1:8; 1 Tim. 4:15.

12. Ka nyi u hen ken Anzaakaa 31:26?

¹² Hen u lamen a ior shi keghen ato a ve tsembelee. Gba u Mbakristu vea fa u lamen a ior tsembelee shi vea keghen ato a ve kpaa. Apostoli Yakobu yange ôr kwagh u una wase se sha gbaa ne yô, a kaa ér: “Hanma or nana̱ lu tsev tsev sha u keghen ato ungwan kwagh, kpa nana̱ gema a ngôôr a kwaghôron” (Yak. 1:19) Ka sea kegh ato a mbagenev shighe u ve lu lamen yô, kwagh la a tese ér kunya kôr se a ve, shin se mba ‘zungwen a ve imôngo.’ (1 Pet. 3:8) Aluer or ngu lamen a we man u kav kwagh u nan lu ôron la ga, shin u kav er i lu nan ken ishima la jighilii ga yô, pine nan mbampin sha kwaghfan. Maa hen sha kwagh u u soo u ôron la zulee cii ve u mase ôron ye. (Anz. 15:28) Maa pine iyol you wer: ‘Kwagh u m soo u ôron ne ka kwagh u mimi, una taver or u m lu lamen a na ne ishima nena? Kwagh ne una tese ér m na or la icivir, shi m lam a na kundu kundu je kpa?’ Dondo ikyav i anmgbianev mba kasev mba ve vie, mba ka ve kegh ato a or zulee shighe u nan lu lamen a ve shi ve lam a nan kundu kundu la. (Ôr Anzaakaa 31:26.) Ver ishima nenge gbenda u ka ve lam a ior, man kwagh u ka ve ôr la. Aluer u fa u lamen a ior tsembelee yô kwagh ne una wase u, a lu u ican ga u yan ijende a ior shi lun ken bem vea ve kpaa.

13. U er nan ve u fa u nengen sha ya? (Shi nenge foto kpaa.)

¹³ Hen u nengen sha ya. Sha ajiir kpishi yô, ka kasev ve hemban eren ityom i hen ya ye. Alaghga ngô u gayô ma anmgbian u kwase nana tese u tom u nengen sha ya tsembelee. Anmgbian u kwase ugen, iti na ér Cindy. A kaa ér: “Kwagh u injaa ugen u ngôm yange tesem yô, lu u eren tom kpoghuloo. Yange wasem u nengen er or ka nana eren tom kpoghuloo ve nan zua a msaanyol yô. A tesem u yôron iwer shi sôron ya shi koron kwagh, shi tesem u vihin inyaregh sha inja shighe u m lu yamen akaa yô, nahan kwagh ne wasem u nengen sha iyol yam shi seer eren Yehova tom kpaa. Shi ngôm yange tesem u nan ior kwagh, kwagh ne na yô, m fa anmgbianev mba nomso man mba kasev mba ve lu a aeren a dedoo a me fatyô u kaven yô.” (Anz. 31:15, 21, 22) Kwase u nan eren tom kpoghuloo, shi nan we nagh shi nan fe u nengen sha ya tsembelee yô, ka nan na i saan ior mba hen ya u nan, kua mba ken tiônnongo cii iyol.—Anz. 31:13, 17, 27; Aer. 16:15.

14. Ka nyi u hen ken kwagh u yange er Crystal laa, man ka nyi i gbe u u umburu?

¹⁴ Hen u eren akaa iyol you. Gba hange hange u Mbakristu cii vea hen u eren akaa a ayol a ve. (Fil. 4:11) Anmgbian u kwase ugen, iti na ér Crystal. A kaa ér: “Mbamaren av yange ve wasem u tsuan akaa a me hen ken makeranta ve aa va lum a inja ken hemen yô. Terem yange kaa ér mo m hen tom kashia, sha er me fa u eren tom u nengen sha inyaregh ki kômpeni yô, nahan kwagh la wasem kpen kpen.” Doo u u fa u keren inyaregh tseegh ga, kpa gba u u fa u vihin ki sha inja sha er u vihi a hemba kwagh u u lu a mi la ga yô. (Anz. 31:16, 18) Aluer kwagh u u lu a mi la kuma u, shi u ngu yamen akaa a a gande u ga yô, kwagh la una wase u u eren akaa a u we ishima u seer eren sha ci u Yehova la.—1 Tim. 6:8.

15-16. Er nan ve anmgbianev mba kasev mba lun kwav ve gbe se kwagh yumu? (Marku 10:29, 30)

¹⁵ Aluer u ngu henen u lun a aeren a a doo Yehova shi u fa u eren akaa yô, kwagh ne una wase u u tsuan akaa a injaa a u er ken uma wou yô. Nenge ase akaa agen a u fatyô u eren yô.

¹⁶ U fatyô u tsuan u lun kwav hen anshighe kpuaa. Yesu yange kaa ér mbagenev vea tsua u lun kwav. Nahan anmgbianev mba kasev mbagenev vea tsua u lun kwav aluer mba eren nahan hen ijiir ve ga je kpaa. (Mat. 19:10-12) Alaghga mbagenev vea lu kwav sha ci u atôakyaa agen. Nahan kpa, lu a vangertiôr wer Yehova man Yesu mba nengen we ér u gba kwagh ga sha ci u u vôso nom ga ze. Anmgbianev mba kasev mba lun kwav kpishi sha tar mba eren akaa a dedoo kpishi a a lu wasen tiônnongo ve yô. Er mbagenev ken tiônnongo ve doo anmgbianev mba kasev mban ishima, shi ve we ve ikyo yô, ve hingir mba ken tiônnongo mban er ka ungô shin anmgbianev vev mba kasev nahan.—Ôr Marku 10:29, 30; 1 Tim. 5:2.

17. Anmgbian u kwase u nan lu gumkwase nana wa iyol hegen u va eren tom u pasen kwagh hanma shighe la ken hemen nena?

¹⁷ U fatyô u eren tom u pasen kwagh hanma shighe la. Ka anmgbianev mba kasev ve lu hemban eren tom u pasen kwagh la ye. (Ps. 68:11) U fatyô u wan ago iyol hegen u va eren tom u pasen kwagh hanma shighe la kpa? U fatyô u lun pania, shin wasen tom u maan kwagh, gayô za eren tom shin Betel. Er msen sha kwagh u u we ishima u eren la. Lam a anmgbianev mba ve vande eren kwagh u u we ishima u eren la, shi hen sha akaa a u er ve u kuma u eren tom u pasen kwagh hanma shighe la yô. Maa hen er u er ve u kure awashima wou la yô. Aluer u hii u eren tom u pasen kwagh hanma shighe la yô, kwagh la una wase u u eren ityom kpishi sha ci u Yehova.

18. Er nan ve i gbe u anmgbian u kwase nana ver ishima tsembelee nana tsua or u nana vôso la sha kwaghfana? (Shi nenge foto kpaa.)

¹⁸ U fatyô u tsuan wer u er nom. Aeren a se tim sha mi, kua akaa a se fatyô u henen a se lam sha mi ken ngeren ne la cii aa wase u u va lun kwaseya u injaa. Aluer u ngu a awashima u eren nom yô, tsua or u u vôso la sha kwaghfan. Ngun kpa ka kwagh u vesen ugen u i gbe u u tsua ken uma wou yô. Umbur wer, u va eren nom yô, a gba u u dondon hemen u or u u vôso nan la. (Rom. 7:2; Ef. 5:23, 33) Sha nahan yô pine iyol you wer?: ‘Or u m soo u vôson ne, henen kwagh shi eren kwagh er Yesu nahan kpa? Veren kwagh u Yehova hiihii ken uma na kpa? Eren kwagh sha kwaghfan kpa? Lumun ibo sha kwagh je he? Eren kwagh a kasev sha icivir kpa? Una fatyô u wasen mo ér m za hemen u lun vea Yehova kôôsôô, shi nengen sha mbamgbe av mba sha iyol shi nengen mo ér m ngu ijende na i ishima ishima kpa? Eren tom na tsembelee kpa? Ikyav i tesen yô, ka ityom i nyi nahan a eren ken tiônnongo, man eren i nena?’ (Luka 16:10; 1 Tim. 5:8) Aluer u soo u va zuan a nom u injaa yô, a gba u u wa iyol hegen sha er u va lu kwase u injaa yô.

19. Tom u “orwasen” la ka u icivirigh sha ci u nyi?

¹⁹ Bibilo kaa ér kwase u injaa ka “orwasen u lun er [nom u] nan nahan.” (Gen. 2:18) Kwagh ne ka u tesen ér kwase gba kwagh gaa? Ei, ka nahan ga. Tom u Yehova a ne kwase ér nana lu orwasen u nom u nan la ka u icivirigh kpen kpen. Umbur wer, Yehova je kpa Bibilo yila un ér, “orwasen.” (Ps. 54:4; Heb. 13:6) Kwase ka nana wasen nom u nan yô, nan lu nom u nan la ijende i mimi. Ikyav i tesen yô, shighe u nom a lu tsuan akaa a a er hen tsombor yô, kwase ka nan sue nan sha er awashima ve la una kure sha mi vough yô. Er Yehova a doo nan ishima yô, ka nan nôngo kpoghuloo sha er nana wase mbagenev u nengen a aeren a dedoo a nom u nan a lu a mi la yô. (Anz. 31:11, 12; 1 Tim. 3:11) U fatyô u wan iyol i va lun kwaseya hegen sha u yan ijende a Yehova kôôsôô, shi lun orwasen mbagenev hen tsombor kua ken tiônnongo kpaa.

20. Ka kwagh u injaa u nyi ngô ka nan er sha ci u tsombor u nana?

²⁰ Alaghga u va mar wan shin ônov nahan u hingir ngô. U vôson nom kera yô, alaghga we vea nom u ne mar ônov. (Ps. 127:3) Nahan doo u u hen sha kwagh u u er ve u va lu ngô u dedoo yô. Aeren a se tim sha mi, kua akaa a se fatyô u henen, a se lam sha mi ken ngeren ne la cii aa wase u va lun kwaseya shin ngô u injaa, aluer u er nom shi u mar mbayev yô. Aluer tsombor wou doo u ishima, shi u ngu eren kwagh a ve kundu kundu shi wan ishima a ve yô, a saan mba hen tsombor wou cii iyol shi ishima ia nyian ve sha ma kwagh ga.—Anz. 24:3.

21. Se mba nengen anmgbianev asev mba kasev nena? (Nenge foto u sha igbende.)

²¹ Anmgbianev mba kasev, ne doo se ishima shi se wuese ne kpishi sha hanma kwagh u ne eren sha ci u Yehova kua ior nav la. (Heb. 6:10) Ne mba nôngon kpoghuloo ner ne lu a aeren a dedoo, shi ne fa u eren akaa a aa wase ne kua mbagenev sha er a hemba kpen ne iyol ken uma yô. Shi ne mba wan ago iyol kpoghuloo u eren ityom i alaghga a va gba u ne er yô. Ne gba nongo u Yehova kwagh kpen kpen!