Ikyaior, Nôngo Nen Ior Cii Ve Nenge Mzehemen Wen
“Nôngo sha akaa ne, penda ishima sha mi sha u ior cii vea nenge mzehemen wou yô.”—1 TIM. 4:15.
1. Kanyi Aôndo a soo sha ci u ikyaioro?
TOR u fan kwagh Solomon, u hemen Mbaiserael sha ayange a tsuaa la nger ér: “Ember, wanyekwaor, sha iyev ou, ishima kpaa i̱ lu u saan saan sha ayange a u lu iyev yô.” (Orpa. 11:9) Yehova Aôndo u loho ne u dugh her a na jighilii la soo ér i saan ne ikyaior iyol sha ayange a ne lu iyev ne tseegh ga, kpa kua shighe u ne va hingir mbaganden la kpaa. Nahan kpa, ka shighe u or lu iyev la je ka nan hemba nzughul kwagh sha gbenda u anzughul la aa fatyô u benden a msaanyol u nan ken hemen ye. Ka nahan ve orjighjigh Yobu kpa yange vaa afanyô sha ci u ‘lanegh ku iyev nav la’ ye. (Yobu 13:26) Shighe u or hian a hia man shighe u or we ikyondo pav la ka shighe u wanyekwaor u Mimi nana tsua akaa a injaa a nana er ve a wase uma u nan ken hemen je la. Kpa aluer nan er nahan hen shighe la ga yô, a saan nan iyol ga, shi nana nyôr ken mbamzeyol mba vea bende a nan ken uma u nan jimin cii yô.—Orpa. 11:10.
2. Ka kwaghwan u Bibilo u nyi una wase ikyaior ia kera eren akaa nzughul nzughul ga?
2 Nahan kpa, gba u ikyaior ia yaren tom a mkav u ken ishima sha u tsuan akaa a dedoo a vea er yô. Nenge ase kwaghwan u apostoli Paulu yange wa Mbakorinte ne. A nger ér: “De kera luun nen yev yev sha mhen wen ga . . . Kpa sha mhen yô, lu nen mbavesen.” (1 Kor. 14:20) Aluer ikyaior ngi eren sha kwagh u i we ve ér ve henen kwagh er mba mbaganden nahan la yô, vea kera eren akaa nzughul nzughul ga.
3. U er nyi ve u henen kwagh sha inja man sha kwaghfana?
3 Wea lu wanyekwaor yô, umbur wer gba u ú nôngo kwagh kpoghuloo ve u henen kwagh sha inja man sha kwaghfan kpaa ye. Paulu wa Timoteu kwagh ér: ‘Ma or nana̱ de lahan we er u ngu wanye ga, kpa hingir mbananjighjigh ikyav sha kwaghôron man sha zende man sha dooshima man sha jighjigh u nan man mlu u wang kpaa. Ver ishima u ôron ior Bibilo man u wan kwagh man shi u tesen . . . Nôngo sha akaa ne, penda ishima sha mi sha u ior cii vea nenge mzehemen wou yô.’ (1 Tim. 4:12-15) Gba u ikyaior i ken Kristu ia vese ken mimi sha er ior cii vea nenge mzehemen ve yô.
Mzehemen Kanyi?
4. U or zan hemen ken mimi la wa nyi man nyi kere?
4 U zan hemen ka “u vesen shi geman hingir sha mlu u hemban doon.” Paulu yange lu wan Timoteu kwagh ér a ver ishima a za hemen sha kwaghôron man sha zende man sha dooshima man sha jighjigh man sha mlu u wang man sha u tesen ior Bibilo kpaa. Yange lu u Timoteu una nôngo a gema uma na una hingir mbananjighjigh ikyav i dondon. Nahan gba u una za hemen sha u vesen ken mimi.
5, 6. (a) Ka hanma shighe yange ior hii u nengen a mzehemen u Timoteu? (b) Wanyekwaor nana dondo Timoteu hegen nan ve nana za hemen ken mimi?
5 Shighe u Paulu nger kwaghwan ne shin inya ken atô u inyom i 61 man 64 la, Timoteu lu iyev ken tom u ortamen ga. Yange hii a hii u zan hemen ken mimi ga. Alaghga Timoteu kuma er anyom 20 nahan ken inyom i 49 shin 50 la; hen shighe la, “anmgbianev mba ve lu ken Lisetera man Ikonium” vande nengen a mzehemen na ken mimi, nahan ve “lu wuese un.” (Aer. 16:1-5) Lu hen shighe la Paulu kua a Timoteu ve yem tom mishen ye. Er Timoteu lu vea Paulu iwer imôngo man Paulu nenge ér a seer zan hemen ken mimi yô, a tindi un ken Tesalonika sha u a̱ taver Mbakristu mba ve lu ken gar la asema shi a̱ nyôôso jighjigh ve u nan kpaa yô. (Ôr 1 MbaTesalonika 3:1-3, 6.) Ikyav tese wang je ér ior hii u nengen a mzehemen u Timoteu ken mimi shighe u lu iyev la je.
6 Ne ikyaior i ken tiônnongo cii, ker nen u lun a aeren a a na ne mzehemen ken mimi la hegen, sha er ior vea nenge a mzehemen wen ken Kristu wang shi vea nenge er ne kom u tesen mimi yô. Yesu kpaa yange kom anyom 12 yô, a “lu yemen hemen hemen sha mfe.” (Luka 2:52) De se time nen sha igbenda itiar i ior vea fatyô u nengen mzehemen wen ken mimi sha ayange a uma wen yô: ka (1) shighe u ú tagher a mbamzeyol la man (2) shighe u ú soo u eren ivaa la man (3) shighe u ú lu nôngon wer u lu “[orpasenkwagh] u dedoo” la.—1 Tim. 4:6.
Nôngo a Mbamzeyol Ou sha “Kwaghfan”
7. Mbamzeyol mba nan ishimanyian vea bende a ikyaior nena?
7 Wanyekwase ugen ken Kristu u lun anyom 17, mba yer un ér Carol, yange kaa ér: “Shighe gen ishima ka i vihim ker je sev a av kpa, i lum pe moughon hen gambe sha ga.”a Er nan ve ishima za un iyol yum nahana? Shighe u Carol lu anyom pue la, mbamaren nav pav ivaa, nahan gba u una lu vea ngô na, man ngô na waan atesen a Bibilo a sha kwagh u aeren a wang la ikyo ga. Alaghga tsô we kpa u tagher a mbamzeyol mba vea pever we shin ishima shighe môm ga, er Carol nahan.
8. Ka mbamzeyol mba nyi Timoteu yange tagher a mini?
8 Timoteu kpa yange wa ishima a mbamzeyol kpishi shighe u lu vesen ken mimi la. Ikyav i tesen yô, iyav yange mbu zaan un iyol, nahan ‘ukorkor kenden un ken iyol sha ashighe ashighe.’ (1 Tim. 5:23) Shighe ugen la, ior mbagenev ken tiônnongo u ken Korinte lu puun mbaapostoli, nahan Paulu tindi Timoteu ér a za sôr mzeyol la. Er Paulu lu tindin Timoteu ken Korinte yô, a wa tiônnongo la kwagh ér, zum u Timoteu una va hen a ve yô, ve̱ nôngo Timoteu a̱ de lu ken a ve a “mciem iyol ga.” (1 Kor. 4:17; 16:10, 11) A shi nan kpa Timoteu yange lu wanyekwaor u cian ashe, shin nengen ér un yina.
9. Kwaghfan kanyi, man ngu kposo a kwaghcian nena?
9 Paulu yange ôr kwagh u taver Timoteu ishima kaa ér: ‘Ka jijingi u cian kwagh, Aôndo A ne se ga, kpa ka u ageegh man u dooshima man u kwaghfan.’ (2 Tim. 1:7) Inja i “kwaghfan” yô, ka u̱ eren kwagh tsev tsev, kua u̱ zan hemen ken mimi, shin a lu sha ian i doon ga je kpaa. Ikyaior igen ka jijingi u cian kwagh la i lu a mi ye, nahan ka ia nôngon ér mbamzeyol vev ve pever ve ken ishima yô, ve nyôr mnyam ma yaven a yav kyamaa shin televishen i nengen kpesee man u menan mcimbim ma bov shin man msôrom hunden man u zan uiniongo, gayô ijimba i eren. I wa Mbakristu kwagh ér ve “venda mwe u i wa Aôndo ikyo ga la man asaren a taregh kpaa, [ve̱] zenden [sha kwaghfan] man sha jighjigh man sha mciviraôndo kpaa ken tar u ainge ne.”—Titu 2:12.
10, 11. Kwaghfan una wase se u suur sha tahav mbu Aôndo nena?
10 Bibilo wa “mbayevikyaior” kwagh ér “ve̱ lu tsev tsev sha akaa cii.” (Titu 2:6) Gbenda u ungwan kwaghwan ne yô, ka u eren msen shi suur sha tahav mbu Aôndo. (Ôr 1 Peteru 4:7.) Aluer u ngu eren nahan yô, u lu a vangertiôr “sha agee a Aôndo A ne” la.—1 Pet. 4:11.
11 Lu sha kwaghfan man msen u eren Carol zua a iwasen ye. A kaa wener: “Uma u ijimbagh u ngôm eren la yange zam iyol kpishi. Kpa msen u eren wasem kpen kpen. M fa mer Yehova ngu a mo, nahan kwagh môm kera zam iyol ga.” Umbur wer, mzeyol una na u hemba sôron mlu wou shi una na u agee kpaa. (Ps. 105:17-19; Ukwe. 3:27) Hanma mzeyol u ú tagher a mi cii kpa, Aôndo una undu u ga. Una ‘wase u.’—Yes. 41:10.
U Wan Iyol i Va Eren Ivaa
12. Doo u Orkristu u nan we iyol i eren ivaa nana er tom sha kwaghwan u a lu ken Anzaakaa 20:25 la sha ci u nyi?
12 Mbayevikyaior mbagenev hia wa ikyondo ica ngi a gba, maa ve sase eren ivaa. Ve hen ér ivaa ia na ve msaanyol, shi vea kera lu tswen ga shi uma a kera due ve ishima ga shi vea sôr mbamzeyol mba hen ya kpaa. Nahan kpa, ityendezwa i ivesegh ka kwagh u numben sha mi ga. Ior mba sha ayange a i ngeren Bibilo la mbagenev yange ve hen kwagh u a lu ken ityendezwa i ve lu eren ga maa ve tôndo zwa u eren icighan kwagh gagher. (Ôr Anzaakaa 20:25.) Shighe ugen mbayevikyaior ka ve kera wa ikyo u keren gbenda u vea nôngo ve ivaa ve ia doo ga. Shighe a karen yô, ve mase kaven er ivaa i lu kwagh u kôron uwegh môm ga yô.
13. Ka mbampin mba nyi i doo u mba ve soo u vôson ayol a ve la vea time sha mi, man vea zua a kwaghwan hana?
13 Nahan yô, cii man u hii kwase u sôôr yô, pine iyol you wer: ‘Er nan ve m soo u eren ivaa? Ka akaa a nyi nahan m lu veren ishima u zuan a mi ken ivaa yama? Ka or shin kwase u m soo u vôson nee? M kuma u me er ivaa nahan me eren ityom i i lu sha ci wam ken ivaa la kpa?’ “Wanakiriki u jighjigh man u fan kwagh” nger akaa sha itinekwagh ne jighilii sha u wasen we ér u time sha mlu wou tsemberee.b (Mat. 24:45-47) Fa wer, ngeren mbara ka kwaghwan u Yehova a lu nan we yô. Nahan ver ishima, gbidye kwar sha mi shi er tom a mi kpaa. Mayange de lu “er nyinya shin alfadari, mba ve lu a kwaghfan ga nahan ga.” (Ps. 32:8, 9) Zua a kwaghfan sha kwagh u ivaa i kuma u. Aluer u nenge wer u kuma u sôôr kwase yô, umbur u lun mbagenev “ikyav . . . [sha] mlu u wang.”—1 Tim. 4:12.
14. Mzehemen wen ken mimi una wase ne shighe u ne vese ayol a en la nena?
14 Aluer ne vôso ayol a en kera man ne mba vesen ken mimi yô, ivaa yen ia doo. Orkristu u nan vie ken mimi ka nan nôngon ér nana ar sha “ikyaren i mluyol u m-iv u Kristu la.” (Ef. 4:11-14) Ka nan nôngon kpoghuloo je ér nana eren kwagh sha inja i Kristu. Kristu u a ver se ikyav i dondon la yange “ker kwagh u doon sha ci Na ga.” (Rom. 15:3) Nahan aluer ikyar ú u ken ivese nan ngu keren kwagh sha ci u nan iyol i nan tseegh ga, kpa ka sha ci u ikyar i nan kpaa yô, ivaa la ia doo shi ia hôm kpaa. (1 Kor. 10:24) Nom nana tese kwase u nan dooshima u tangen iyol ga la, kwase di kpa nana kange ishima u ungwa imo i nom u nan, vough er Yesu kpa a ongo imo i Aôndo u a lu Ityough nagh la nahan.—1 Kor. 11:3; Ef. 5:25.
“Er Tom u [Kwaghpasen], Kure u Doo Doo”
15, 16. Ú er nan ve ior vea nenge mzehemen wou ken tom u pasen kwagh laa?
15 Er ishima lu Paulu sha tom u vesen u Timoteu lu eren la yô, a nger un ér: “M ngu wan we kwagh sha ishigh ki Aôndo man Kristu Yesu . . . yôô kwaghôron Na wa iyol sha mi keghen a kegh.” A seer kaan a na ér: “Er tom u [Kwaghpasen], kure u doo doo.” (2 Tim. 4:1, 2, 5) Yange gba u Timoteu una “[ide] sha akaaôron a sha jighjigh” ve una er tom la ye.—Ôr 1 Timoteu 4:6.
16 Or nana fatyô u “[iden] sha akaaôron a sha jighjigh” nena? Paulu nger ér: “Ver ishima u ôron ior Bibilo man u wan kwagh man shi u tesen. Nôngo sha akaa ne, penda ishima sha mi.” (1 Tim. 4:13, 15) Ka kwaghhenen u sha tseeneke a ne or ze hemen ken mimi ye. Ishember i “penda ishima” la i̱ tese u or nan ishima i nan jimin cii sha u eren ma kwagh. Ú henen kwagh sha tseeneke kpa? Ú pendan ishima sha “akaacimin a Aôndo” kpa? (1 Kor. 2:10) Shin ka u nôngo di sha icia i tan tsô maa u de kera. Aluer u ngu gbidyen kwar sha kwagh u ú hen la yô, ishima ia tsuwe u ker u eren sha akaa a u hen la.—Ôr Anzaakaa 2:1-5.
17, 18. (a) Ka akaa a nyi nahan i doo u or a hen u erene? (b) U lun a imba ishima i Timoteu lu a mi la una wase u ken tom u pasen kwagh nena?
17 Wanyekwase ugen u a lu pania yô, mba yer un ér Michelle, a kaa wener: “M soo u fan tom u pasen kwagh la tsembelee, nahan m henen kwagh sha tseeneke wam sha aan a m ser m ver la vough vough, shi m bundu mbamkombo ga. Sha ityôkyaa ne yô, m ngu vesen ken mimi ayange ayange.” Sha mimi yô, tom u pania ua na a kera taver we u yaren tom a Bibilo ken tom u pasen kwagh ga, shi ua na u za hemen ken mimi kpaa. Nôngo fa u ôron takerada tsembelee shi naan mbamlumun mba injaav ken mbamkombo mba Mbakristu kpaa. Er u lu wanyekwaor u nan vie ken jijingi yô, a doo ú u tesen mzehemen wou ken mimi sha u wan iyol sha kwaghôron u i ne u ken Makeranta u Henen Tom u Hemen u Aôndo la tsembelee, shi dondon kwagh u i nger la lianaa kpaa.
18 “Tom u pasen kwagh” la ka gbenda u tsaase kwaghpasen wou shi wasen mbagenev kpa ve zua a myom. Nahan gba u ú fa “ityesen” ve u kôr cio u eren kwagh ne ye. (2 Tim. 4:2) Aluer u sôr ian sha u nyôron iyol ken tom u pasen kwagh vea mba ve vie ken tom ne tsemberee la yô, u fa er ka i pase kwagh yô, vough er Timoteu kpa yange fa kwaghpasen tsema tsema sha u eren tom vea Paulu imôngo nahan. (1 Kor. 4:17) Paulu ôr kwagh u mba yange wase ve u fan mimi la kaa wener, yange un na ve loho u dedoo u Aôndo tseegh ga, kpa zan zan kua ‘uma na’ kpaa, shin un yar tom a uma na jimin cii sha u wasen ve, gadia ve hingir mbadoon un ishima kpishi. (1 Tes. 2:8) Gba u ú lu a ieren i Timoteu lu a mi la ve u fatyô u dondon ikyav i Paulu la ken tom u kwaghpasen ye; Timoteu yange wa mbagenev ikyo sha mimi shi ‘er tom sha ci u loho u dedoo.’ (Ôr Mbafilipi 2:19-23.) Ú ngu eren er Timoteu nahan ken kwaghpasen wou kpa?
Mzehemen u Mimi Ne Msaanyol
19, 20. U nôngon wer u za hemen ken mimi la ngu a na msaanyol sha ci u nyi?
19 Ka ican kpishi u zan hemen ken mimi. Kpa aluer u ngu nôngon fan igbenda i tesen mimi yô, u va zua a ian i civirigh i “geman mbagenev kpishi hingir mbanyarev,” nahan vea hingir ‘iember you shin tsar wou u ihyagh u sha ityou.’ (2 Kor. 6:10; 1 Tes. 2:19) Orgen u a pasen kwagh hanma shighe yô, mba yer un ér Fred, a kaa wener: “M hemba zuan a shighe sha u wasen mbagenev cii. Sha kpôô yô, u nan a na kwagh la hembe saan iyol a u ngohol a ngohol kwagh.”
20 Wanyekwase ugen ngu pania, mba yer un ér Daphne, a ôr kwagh u iember na man msaanyol u un zough a mi er un lu vesen ken mimi yô, a kaa wener: “Er m seer henen kwagh u Yehova yô, m hemba yan ikyar a na kôôsôô cii. Ka wea nôngon sha afatyô wou cii wer u eren kwagh sha ishima i Yehova nahan i saan we iyol kpen kpen!” Alaghga uumace vea nengen a mzehemen u or ken mimi hanma shighe ga, kpa Yehova yô, nengen shi ka kwagh u injaa sha ishigh nagh. (Heb. 4:13) Akperan nga ga, ne ikyaior i ne lu ken mimi cii ne fatyô u van Ter wase u sha la a iengem man iwuese. Er ne nôngon ner ior ve nenge mzehemen wen ken mimi nahan, za nen hemen a iniôngon yen la, i saan Yehova iyol.—Anz. 27:11.
[Ngeren mba shin kpe]
a I gema ati agen.
b Ôr itinekwagh i i kaa ér “Is This Person Right for Me?” ken takerada u Questions Young People Ask—Answers That Work, Volume 2 man “Kwaghwan u Aôndo sha u Tsuan Or u Ú Vôso Yô,” ken Iyoukura i Jun 1, 2001, kua “How Wise Is a Teenage Marriage?” ken Awake! u Setemba 22, 1983 la.
Ú Hen Nyi?
• U zan hemen ken mimi la wa nyi man nyi kere?
• Ior vea nenge mzehemen wou ken mimi . . .
shighe u ú tagher a mzeyol la nena?
shighe u ú we iyol i eren ivaa la nena?
ken tom u pasen kwagh nena?
[Foto u sha peeji 15]
Msen u eren una wase ú u nôngon a mzeyol
[Foto u sha peeji 16]
Mbayevikyaior mba pasen kwagh vea fa igbenda i dedoo i pasen kwagh nena?