“Me Tenger Akuraior Cii”

1-2. Ka mtenger u nyi profeti Hagai yange tsenga ôron ér una za hemen sha shighe wase nee?

KEN inyom i 2015 la, tar tenger ken tar u Nepal je, orgen ken mba yange ve war ku yô, kaa ér “ken miniti kpuaa tseegh, yange ushôôpu man ayou yôhôr haa inya.” Orgen di kaa ér “yange mciem gba ior iyol hanma ijiir cii . . . Ior kpishi kaa ér yange tar tenger kuma er miniti uhar nahan. Kpa mo yô lum er u tenger gbem yô.” Aluer imba kwagh u cieryol ngula nahan er u yô, alaghga a tsa sha won kpa a hungur we ga.

² Nahan kpa, hegen er se lu ôron kwagh ne je mtenger ugen kposo ngu zan hemen, man ka hen geri môm shin hen tar môm tseegh ga, kpa ka ken akuraior cii, man mtenger ne hii ica i gba hegen. Profeti Hagai yange tsenga ôron kwagh u mtenger ne. Yange nger ér: “TER u akum a Sha ngu kaan nahan ér: Mase shin [kwa] môm, kera shi ca ga tsô, Me tenger Sha man tar man zegemnger man iombortar.”—Hag. 2:6.

 3. Mtenger u Hagai ôr kwagh na la ngu kposo a mtenger u tar nena?

³ Mtenger u Hagai pase la ngu er mtenger u tar u ka a vihi akaa tseegh tsô la nahan ga. Kpa ka mtenger u ka a na akaa a dedoo a er yô. Yehova iyol na kaa a vese ér: “Me tenger akuraior cii, nahan akaainjaa a akuraior cii aa va, nahan Me iv iyou ne a iengem.” (Hag. 2:7) Lu u mtenger ne una bende a ior mba sha ayange a Hagai la nena? Man mtenger shon una bende a vese nyian nena? Se lu timen sha mbamlumun mba sha mbampin mban, shi se time sha gbenda u se tenger akuraior nyian yô.

 4. Er nan ve Yehova yange tindi profeti Hagai hen ior Nava?

⁴ Yehova yange na profeti Hagai tom u hange hange ugen ér a er. Hen ase sha akaa a yange er cii man shighe ne yô. A shi nan kpa, Hagai lu ken Mbayuda mba i pase ve ken uikyangen ken Babilon, ve hide ken Yerusalem, shighe u shi anyom 537 u a mar Yesu la. Mbacivir Aôndo sha mimi mban mba va nyer ken Yerusalem yô, ve ngôôr ga maa ve wa ityô i iyou i Yehova, ka tempel je la. (Esera 3:8, 10) Kpa ica i gbe ga yô, ve tagher a zayol u vihin kpishi. Ior mbagenev hen ijiir la lumun ér ve maa tempel la ga, maa iyol kpe ve, ve de u maan. (Esera 4:4; Hag. 1:1, 2) Nahan shighe u shi anyom 520 u a mar Yesu la, Yehova kaa a Hagai ér a taver Mbayuda asema ve er tom u maan tempel la sha gbashima ve kure.b—Esera 6:14, 15.

 5. Ka keng loho u Hagai la yange ua taver Mbayuda ishima sha ci u nyi?

⁵ Loho u Hagai ôr la lu sha ci u taver Mbayuda asema ve seer nan Yehova jighjigh. Profeti ne yange taver ishima ôr a Mbayuda mba iyol kpe ve la ér: “Taver nen shima, ne ior mba hen tar ne cii, er nen tom, kape TER A kaa ne, gadia M ngu a ven, kape TER u akum a Sha A kaa ne.” (Hag. 2:4) Ka keng ishember i “TER u akuma a Sha” la yange ia na ishima a kera za ve iyol ga. Yehova ngu a mbatyomov kpishi mba ve lu mbautyaav nav shi a hemen ve yô, nahan gba u Mbayuda vea suur sha a na ve, vea er tom la ye.

 6. Lu u mtenger u Hagai tsenga ôron la una na yô, nyi ia ere?

⁶ Yehova yange tindi Hagai ôr loho u u pase mtenger u akuraior cii sha injakwagh yô. Kwagh u Hagai nenge a mi ken mpase u sha mnenge ne yange na yô, mbamaan tempel mba iyol kpe la fa dedoo je ér ka u Yehova una tenger tartor u Peshia, u sha ayange la lu tartor u hemban tahav sha tar cii, shi ityar kpishi lu sha ikyev i u la. Lu mtenger shon una na yô, nyi ia ere? Hiihii yô, ior mba Aôndo vea er tom u maan tempel la vea bee. Nahan atôatyev kpa aa gema civir Yehova ken tempel u i hide i maa la vea Mbayuda imôngo. Loho la yange ua taver ior mba Aôndo ishima kpen kpen!—Sek. 8:9.

 7. Ka tom u tenger nyi se lu eren nyiana? Ta iwanger.

⁷ Kwaghôron u profeti u Hagai la ngu benden a vese nyian nena? Kwa ne kpa Yehova ngu tenger akuraior cii, man kwa ne yô, se mba eren tom shon vea na imôngo. Hen sha kwagh u yange er ne: Ken inyom i 1914 la, Yehova ver Yesu Kristu Tor u Tartor Na u sha. (Ps. 2:6) Yange gomoti u Tartor la hiin tom yô, doo mbahemenev mba tar ne ga. Sha ci u “shighe u i ver akuraior,” u ma tor hemen ior sha ityough ki Yehova ga la, yange kure, shin bee. (Luka 21:24) Sha ityôkyaa ne yô, ken inyom i 1919 la je, Mbashiada mba Yehova hii u pasen ior cii er i lu Tartor u Aôndo la tseegh ua va bee a mbamzeyol mba uumace cica cii yô. “Loho u dedoo u Tartor” u i lu pasen ne ngu tenger tar cii.—Mat. 24:14.

 8. Kwagh u i ôr ken Pasalmi 2:1-3 tese ér akuraior kpishi ungwa loho ne nahan, nga eren nena?

⁸ Ior ka vea ungwa loho ne nahan ve er nena? Ior kpishi ka ve venda u. (Ôr Pasalmi 2:1-3.) Akuraior nga kumbur, shin a hingir kera ke kera. Ve venda Tor u Yehova a tsua la. Ve nenge “loho u dedoo” u Tartor u se lu pasen ne ér ka loho u dedoo ga. Jighilii yô, ugomoti mba ityar igen cir tom u pasen kwagh la! Shin er mbahemenev mba ityar shon kpishi ve kaan ér ve mba civir Aôndo nahan kpa, ve soo ér Tartor u Aôndo u hemen ve ga. Sha nahan yô, er mbahemenev mba sha ayange a Yesu la er nahan, nyian kpa mbahemenev mba tar ne mba hendan a Un u Yehova a Tsough la sha u tan num sha mbadondon un mba mimi.—Aer. 4:25-28.

 9. Akuraior venda loho u Tartor nahan, ka nyi Yehova a er sha u wasen ve?

⁹ Akuraior venda loho u Tartor la nahan, Yehova er nena? Pasalmi 2:10-12 na mlumun ér: “Nahan yô, ne utor, lu nen a mfe, ungwa nen ityesen, ne mbaajiriv mba tarev. Civir nen TER a mciem, ember nen a akarkase iyol. Suse nen Wan zwa, sha er [Aôndo] A̱ de yugh man né saa ishe sha gbenda ga yô; gadia ka Un ican u yuwen ga. Mba ve suur sha a Na cii saan ve iyol!” Yehova ngu wan ishima a mbahemenev mba tar ne. A na ve shighe ér ve tsua u eren kwagh u vough. Vea fatyô u geman ishima, lumun Tartor u Yehova. Nahan kpa, shighe la kera shi vese ga. Se mba ken “ayange a masejime” a tar ne. (2 Tim. 3:1; Yes. 61:2) Hegen hingir torough torough kpishi u ior vea ker u fan mimi shi civir Yehova.

10. I pase ken Hagai 2:7-9 ér ior vea lumun a tom u tenger akuraior ne nena?

¹⁰ Ior mbagenev lumun a tom u tenger akuraior u Hagai yange tsenga ôron la. A kaa ér mtenger shon una na yô, “akaainjaa [ka mbalun a ishima i mimi je la] a akuraior cii aa va” civir Yehova.c (Ôr Hagai 2:7-9.) Yesaia kua Mika kpa yange ve tsenga ôron ér kwagh ne una er ken “ayange a masetyô.”—Yes. 2:2-4; Mika 4:1, 2.

11. Anmgbian ugen yange ungwa loho u Tartor hiihii nahan, er nena?

¹¹ Nenge ase kwagh u anmgbian ugen hen afishi a shin itine, iti na ér Ken, yange er shighe u ungwa loho u tenger akuraior ne yô. Zan zan hegen kpa ka a umbur loho u Tator u yange hii ungwan la wang, er i tse i kom anyom 40 nahan kpaa. Ken kaa ér: “Yange m ungwa mimi u Mkaanem ma Aôndo yô, saan mo iyol kpishi u fan mer se mba ken ayange a masejime a tar ne. Shi m fa mer saa me undu tar u u i eren kwagh a ior ker sha mimi ga ne, me var a Yehova gbang ve una lumun mo, shi me zua a uma u tsôron ye. Nahan m er msen hen Yehova sha kwagh shon, shi m er nahan. M undu tar, m yevese m va yer ken Tartor u Aôndo, u mayange ua tenger ga la.”

12. Tempel u Yehova u ken jijingi la iv a iengem ken ayange a masjime ne nena?

¹² Ikyav tese wang ér Yehova ngu suen ior nav. Ken ayang a masejime ne, se nenge er mbacivir un ve seer ngeen kpishi yô. Ken inyom i 1914 la, se lu iorov dubu kpuaa tseegh. Kpa hegen ne, ior mba ve lu civir Aôndo sha mimi la hemba miliôn anigheni. Shi hanma inyom yô, ior mbagenev umiliôn imôngo ka ve kohol a ve imôngo sha u umbur ku u Yesu. Sha nahan yô, “akaainjaa a akuraior cii” iv ken ityembe i ken tempel u Yehova u ken jijingi u shin tar, u a lu mcivir u wang u Yehova a lumun a mi ne. Er mbacivir Yehova mban ve de uma u yange ve eren la, ve haa or u he iyol yô, akwagh la ngu van iti i Yehova a icivir kpishi je.—Ef. 4:22-24.

13. Kwagh u mbacivir Yehova ve seer ngeen hegen kpishi la ka mkur u kwaghôron u profeti u han man hana? (Nenge foto u sha igbende.)

¹³ Akaa doon a a lu eren ne kure akaaôron a profeti agen, er u i nger ken Yesaia ityough 60 la nahan. Ivur i sha 22 ken ityough kira kaa ér: “U kiriki una hingir kweior, man u hemban ndahar una hingir ikyurior i ageegh; Mo TER, Me er kwagh ne fefa zum u shighe á kuma yô.” Er ior kpishi ve hii u civir Yehova hegen yô, kwagh u doon tsung ngu eren. “Akaa a injaa” shin mbacivir Yehova mban ka ve hii u civir un a mfe kua agee a ve lu a mi u eren akaa kposo kposo la, shi ve kegh iyol u pasen “loho u dedoo u Tartor.” Kwagh ne na yô, nongoior u Yehova ngu eren kwagh a mfe ve shon, u Yesaia yila ér “atumba a akuraior” la. (Yes. 60:5, 16) Iwasen i nomso man kasev mba injaa mban na yô, mba pasen kwagh ken ityar 240 hegen, shi gberen ityakeda i pasen Bibilo ken ijô i hemban 1,000.

14. Ka nyi i gbe u ior vea tsua u eren hegene?

¹⁴ Ken ayange a masejime ne, loho u u lu tenger akuraior ne na yô, gba u ior vea tsua kwagh u vea er yô. Vea tsua u suen Tartor u Aôndo shin vea tsua u suur sha ugomoti mba tar nee? Gba hange hange u hanma or nana tsua kwagh môm ken akaa a ahar ne. Shin er mbacivir Yehova ka ve dondon atindi a gomoti u hanma tar u ve lu ker cii nahan kpa, mba we ave sha akaa a taregh ga, er akaa a patii nahan ga. (Rom. 13:1-7) Ve fa dedoo er i lu Tartor u Aônod la tseegh ua va bee mbamzeyom mba uumace cii yô. Tartor la ka u shin tar ne ga.—Yoh. 18:36, 37.

15. Takeda u Mpase tese ér a kar jighjigh u mbacivir Yehova kpoghuloo nena?

¹⁵ Takeda u Mpase ôr er mbacivir Yehova vea va tagher a atsan a karen jighjigh ve ken ayange a masejime yô. Kwagh la una na yô, a zer hendan a vese shi tôvon se a ican kpoghuloo. Ugomoti mba tar ne vea soo ér se civir ve, nahan vea tôv mba ve venda u suen ve la a ican kpoghuloo. (Mpa. 13:12, 15) Vea “kighir ior cii—mbakiriki kua mbavesen, mbanyarev man mbaibanave man mba ve lu ikpan ga yô, kua ikpan—ér i̱ ver ve ikyav sha uwegh vev ku yanegh gayô sha icul.” (Mpa. 13:16) Sha ayange a tsuaa la, i ver ikpan ikyav i gbekeke u tesen or u i lu ikpan i nan yô. Nyian kpa, kape hanma wase cii a ver ishima ér ma nan lu a ikyav i sha injakwagh sha uwegh ku nan shin sha icul je la. Vea soo ér hanma or nana tese sha gbenda u nan henen kwagh la man sha ieren i nan cii ér, nan ngu ken ma pati, shi nan ngu suen ugomoti mba tar ne.

16. Gba hange hange u se var a Yehova hegen taveraa sha ci u nyi?

¹⁶ Se lumun ser i ver se ikyav i sha injakwagh shi se sue ugomoti mba tar nee? Mba ve vende ér i de veren ve ikyav shon ga la cii vea ya ican shi kwaghbo una tser ve. Takeda u Mpase shi kaa ér: ‘Or môm nana fatyô u yamen kwagh shin teen kwagh ga, saa or u nan lu a ikyav la tseegh.’ (Mpa. 13:17) Kpa mbacivir Aôndo yô, ve fa kwagh u una er a mba i ver ve ikyav i i ôr ken Mpase 14:9, 10 la yô. Uwegh vev ku ve vende ér i de veren ve ikyav i suen ugomoti mba tar ne sha mi ga la, vea gema a nger sha ku ér, “Kwagh u TER.” (Yes. 44:5) Gba u hegen se nôngo se var a Yehova taveraa sha er kwagh môm una fatyô u paven se a na ga yô. Aluer se er nahan yô, a saan Yehova iyol u kaan ér se mba kwagh na!

17. Ka nyi i gbe u se umbur er Yehova a lu wan ishima a ior hegen nee?

¹⁷ Ken ayange a masejime ne, Yehova ngu wan ishima a ior je gande. A soo ér or môm nana tim ga. (2 Pet. 3:9) A na ior cii shighe ér ve gema asema shi ve tsua u civir un. Kpa una wa ishima gbem sha won ga. Mba ve vende u suen Tartor u Aôndo cii vea va tagher a imba kwagh u yange er Farao sha ayange a Mose la. Yehova yange kaa a Mose ér: “Hegen ma M naregh uwegh Agh ma M hee u kua ior ou cii bouange, ma M tim u sha won kera kpaa. Kwagh u M de u u lu her je yô, ka sha u Me tese u agee Am man á pase iti Yam sha won cii kpaa yô.” (Eks. 9:15, 16) Ken masejime yô, akuraior cii aa fa er i lu Yehova tseegh a lu Aôndo u mimi yô. (Esek. 38:23) Kwagh ne una er nena?

18. (a) Ka mtenger u nyi i ôr ken Hagai 2:6, 20-22? (b) Er nan ve se fe ser kwagh u Hagai tsenga ôron ne una va kure ken hemene?

¹⁸ Profeti Hagai yange kpe anyom nga karen uderi imôngo yô, apostoli Paulu va nger Mbaheberu mba ve hingir Mbakristu la washika ôr ker ér, kwaghôron u profeti u ken Hagai 2:6, 20-22 la una va kure ken hemen. (Ôr.) Paulu nger ér: “Hegen a tôndo zwa ér: ‘Shi me mase tenger, a kera lu tar tseegh ga, a kua usha kpaa.’ Nahan kwagh u i kaa ér, ‘shi me mase’ la, tese ér a kar a akaa a i tenger a mi la kera, ka akaa a i er la je la, sha er akaa a i tenger a mi ga la aa lu her yô.” (Heb. 12:26, 27) Mtenger ne ngu kposo a u i ôr ken Hagai 2:7 la. Ka u Yehova una va masen tenger yô, mba ve venda ian i a lu a mi u hemen ve, er Farao yange venda nahan la cii, vea tim, vea kera lu ga gbem sha won.

19. Ka nyi a tenger a mi ga, man se fa nahan sha ci u nyi?

¹⁹ Ka nyi a tenger a mi ga, shin a kar a mi kera ga? Paulu shi kaa ér: “Er i gbe u a na se Tartor u a tenger a mi ga la yô, se tile nen sha mimi her sha er Aôndo una za hemen u tesen se erdoo u sha mhôôn, nahan se fatyô u eren un icighantom sha gbenda u a lumun a mi la, a mciem man sha icivir kpaa yô.” (Heb. 12:28) Mtenger u sha kwa u masetyô ne una been yô, a lu Tartor u Aôndo tseegh ua mase lun ye. U yô, ua tenger mayange ga!—Ps. 110:5, 6; Dan. 2:44.

20. Ka nyi i gbe u ior vea tsua keng ne, man se wase ve nena?

²⁰ A gba u ior vea tsua kwagh môm ken akaa a ahar ne keng: Aluer ve tsua ér vea za hemen u eren kwagh er tar ne u tesen la yô, a tim ve kera. Aluer ve tsua u civir Yehova shi ve de akaa agen ken uma ve sha er vea eren ishima na yô, vea zua a uma u tsôron. (Heb. 12:25) Tom u pasen kwagh u se lu eren ne ua na yô, se fatyô u wasen ior vea tsua kwagh u hange hange ne. Se wase nen ior mba injaa mbagenev kpaa ve tsua u suen Tartor u Aôndo. Shi se umbur nen mkaanem ma Ter wase Yesu man hanma shighe cii, a kaa ér: “A pase loho u dedoo u Tartor ne a tser tar sha u u lu shiada hen akuraior cii, ka zum la mkur una va ye.”—Mat. 24:14.