ITYOUGH 60
Za Hemen u Lun Kôôsôô a Yehova
Bibilo i u hen ne tese u akaa kpishi sha kwagh u Yehova. Akaa a u hen sha kwagh na la na yô a doo u ishima kpishi je yô, alaghga u tsegha iyol you sha ci na shi u er batisema. Wea lu a er ga kpa, alaghga u ngu wan agoyol a ica ia gba ga tsô u er yô. Kpa u er batisema maa kwagh kure ga. A gba u u za hemen u lun kôôsôô a Yehova gbem sha won. Nahan u er kwagh ne nena?
1. Er nan i doo u u za hemen u lun kôôsôô a Yehova?
Gba u se nôngo kpoghuloo se za hemen u taver ijende i se ye a Yehova la. Sha ci u nyi? “Sha er mayange se kua se kar ihyongo” se undu un “ga yô.” (Mbaheberu 2:1) Nahan ka nyi ia wase se, se za hemen u civir Yehova sha mimi? Gba u se za hemen u pasen kwagh hanma shighe shi se keren igbenda igen i se fatyô u seer eren Aôndo tom yô. (Ôr Mbafilipi 3:16.) U civir Yehova ka kwagh u hemban doon cii!—Pasalmi 84:10.
2. Ka nyi igen kpa i gbe u u za hemen u erene?
Er hegen u lu been kwaghhenen wou nahan kpa, uma wou u Orkristu yô, kure ga. Bibilo kaa ér gba u se ‘haa or u he iyol.’ (Mbaefese 4:23, 24) Er u lu henen Mkaanem ma Aôndo shi zan mbamkombo mba tiônnongo la, u lu henen akaa a he sha kwagh u Yehova man aeren a na seer a seer. Ker igbenda i u seer eren kwagh er Yehova nahan ken uma wou yô. Za hemen u sôron mlu wou sha er u na a saan Yehova iyol yô.
3. Yehova una wase u u za hemen u civir un nena?
Bibilo kaa ér: “Aôndo . . . iyol na una tsaase ne una bee. Una na ne tile dông, una na ne taver ishima, una na ne tenger ga.” (1 Peteru 5:10) Se cii mba meen se. Yehova tese se kwagh u se er ve se hemba ameen ne yô. (Pasalmi 139:23, 24) A tôndo zwa ér una na se isharen kua tahav mbu civir un sha mimi.—Ôr Mbafilipi 2:13.
HEN KWAGH I ZA SHIMI
Nenge kwagh u u er ve u za hemen u civir Yehova man er una ver u doo doo yô.
4. Za hemen u lamen a Ijende you i ishima ishima la shi ungwan imo Na
Bibilo i henen man msen u eren, wase u u hingir ijende i Yehova. Nahan akaa ne aa wase u u za hemen u seer lun kôôsôô a na nena?
Ôr Pasalmi 62:8, maa lam nen sha mpin ne:
U er nan ve mbamsen ou vea hemba doon sha er u seer lun kôôsôô a Yehova?
Ôr Pasalmi 1:2, maa lam nen sha mpin ne:
U ôr Bibilo nena ve u hemba zuan a akaa a a wase u u seer lun kôôsôô a Yehova?
U hen kwagh sha tseeneke wou nena ve u hemba zuan a akaa a wasen we? Wea soo u fan igbenda igen i u er kwagh ne yô, nenge VIDIO i i lu heen ne, maa lam nen sha mbampin mba ve dondo ne.
Ka kwagh u i ter ken vidio la u han u soo wer u dondo?
Ka atineakaa a nyi u soo u henen kwagh sha mini?
5. Tsua akaa a u er sha u seer civir Yehova yô
Aluer u tsua akaa a u er ken mcivir u Yehova yô, kwagh la una wase u u za hemen u lun kôôsôô a Yehova. Nenge VIDIO i i lu heen ne, maa lam nen sha mpin u a dondo ne.
Ken vidio la, Cameron tsua akaa a una er ken nongo u Yehova nahan wase un nena?
Ka hanma or nana fatyô u za pasen kwagh ken tar ugen ga. Nahan kpa, se cii se fatyô u tsuan akaa a a hemba se u eren ga yô. Ôr Anzaakaa 21:5, maa nenge akaa a u fatyô u tsuan wer u er . . .
ken tiônnongo yô.
ken kwaghpasen yô.
Kwagh u i we se ken ivur ne la, una wase u u eren kwagh u u tsough la nena?
Akaa a u fatyô u eren yô
Nôngo mbamsen ou ve hemba doon.
Ôr Bibilo jimin cii bee.
Nôngo fa hanma or u ken tiônnongo wou.
Nôngo hii Bibilo i henen a or.
Nôngo er ishuen pania shin pania u keke.
Aluer u ngu anmgbian u nomso yô, nôngo hingir orshiren tiônnongo.
6. U fatyô u lun uma gbem sha won shi a saan we iyol!
Ôr Pasalmi 22:26, maa lam nen sha mpin ne:
U er nan ve a saan we iyol hegen shi u fatyô u va lun uma gbem sha wono?
KA NYI U HENE?
Za hemen u seer lun kôôsôô a Yehova shi tsua akaa a u fatyô u eren ken mcivir na yô. U er nahan yô, u lu uma gbem sha won shi a saan we iyol!
Mbampin mba umbur kwagh u i hen yô
Er nan ve u fatyô u lun a vangertiôr wer Yehova una wase u u civir un sha mimi?
U er nan ve ijende you vea Yehova ia hemba tavera?
Aluer u tsua akaa a u er ken mcivir u Yehova yô, kwagh la una wase u u seer lun kôôsôô a na nena?
SEER HENEN KWAGH
Ka nyi i hembe gban Yehova kwagha, ka u eren kwagh u vesen kwa môm u civir un shin ka u civir un hanma sev sha ayange a uma wase ciili?
Or u nan civir Yehova sha mimi je kpa shighe gen a kera saan nan iyol ga. Nenge kwagh u nana er ve a hide a saan nan iyol yô.
Hide Zua a Msaanyol sha u Henen Kwagh shi Gbidyen Kwar (5:25)
U er nan ve u tsua akaa a u er ken mcivir u Yehova shi u er akaa shono?
“Wuese u A Gbe U la sha Akaa a U Tsough U Eren ken Mcivir Na La” (Iyoukura, Julai 15, 2004)
Er nan i gbe hange hange u Orkristu nana via ken jijingi, man u er nan ve u via ken jijingi?
“Za Nen Hemen Sha Mlu U Vian La, Gadia ‘Iyange I Vesen I Ter Mgbôghom’” (Iyoukura, Mei 15, 2009)