Palegh To U Diabolo!

“War to u diabolo.”—2 TIM. 2:26.

Ú NA MLUMUN WER NYI?

Aluer hanma shighe se mba lamen sha anmgbianev asev dang yô, doo u se er nyi?

Ikyav i Pilatu man Peteru la wase se u henen nyi sha kwagh u mkighir u mbakov man mcie u cian or laa?

U palegh ishima i nan or ibo karen ikyaa inya la nena?

1, 2. Ka uhôn mba Diabolo mba nyi se time sha mi ken kwaghhenen nee?

DIABOLO ka a nôngo ér una kôr mbacivir Yehova. Awashima na ka u wuan se er ortato ka nan wua inyam nahan ga. Kpa awashima u Diabolo yô, ka u kôron or uma, nahan geman nan ér nana er ishima na.—Ôr 2 Timoteu 2:24-26.

² Ortato ka nan hôn inyam i nan soo u kôron la sha gbenda u nana fatyô u imbishi i̱ yô. Alaghga nana nôngo ér inyam la i due ken igbar, sha er nana kôr i sha kwar yô. Shin nana hôn inyam sha hôn u lun a ipyoson ken myer sha er nana kôr i̱ gaegh, a mfe u i̱ shio yô. Kape Diabolo kpa a eren tom a uhôn sha er una kôr mbacivir Aôndo je la. Aluer se soo ser a̱ kôr se ga yô, gba u se lu tsevaa shi se ungwan icintan sha kwagh u to kua uhôn mba Satan a hônon se a mi la. Ngeren ne una time sha uhôn utar mba Diabolo a ker ior a mi la, man er a ze ikyura la kpaa. Uhôn mba shon yô, ka (1) kwaghôron u gaegh man (2) mciem man mkighir u mbakov kua (3) ishima i nan or ibo karen ikyaa inya. Ngeren u una dondo la di una seer timen sha uhôn mba Satan uhar.

PIR USU U KWAGHÔRON U GAEGH LA

3, 4. Aluer se kôr nombor wase tsaha ga yô, ka nyi ia ere? Tese ikyav.

³ Ortato ka nana soo u numun inyam sha er nana wua i yô, ka nan ta usu sha idyô-toho nan nande, nahan ishôso i i lu ker la ia nguren anden yô, nan gba mi kôron i. Kape Diabolo kpa una soo u tan usu sha tiônnongo u Kristu je la. Aluer a kôrcio u eren nahan yô, una zenda mba ken tiônnongo vea due hen ijiir i kundun iyol la kera, vea hingir u za gban ken to na. Alaghga se wase Satan u haan usu ne ken tiônnongo a mfe wase shio nena?

⁴ Orhenen Yakobu tôô nombor kar sha usu. (Ôr Yakobu 3:6-8.) Aluer se kôr nombor wase tsaha ga yô, adooga a lu se je se keer usu ken tiônnongo ye. Se keer usu ken tiônnongo nena? Nenge ase ikyav i i dondo shin heen ne: I yôô ken mkombo ugen ken tiônnongo ér anmgbian u kwase ugen hingir pania u keke. Mba dugh mkombo yô, anmgbianev mba kasev uhar gba lamen sha kwaghyôôn la. Môm ken a ve pase er i saan un iyol kpishi sha ci u pania u he la yô. Ugen la di kaa ér awashima u pania u he la yô, ka u keren icivir ken tiônnongo tseegh. Ka hanmô ken anmgbianev mba kasev mba uhar mbara ú soo wer nana lu ijende youwe? Taver se u fan u nana keer usu ken tiônnongo la ga cii.

 5. Aluer se soo u pirin usu u kwaghôron u gaegh la yô, ka nyi i gbe u se eree?

⁵ Se pir usu u kwaghôron u gaegh la nena? Yesu kaa ér: “Ka sha m-iv u ken ishima man zwa u er kwagh ye.” (Mat. 12:34) Nahan kwagh u i gbe u se hii eren yô, ka u tôvon ishima yase. Se mba palegh mbamhen mba bov mba ka ve va a iliam i bo la kpa? U tesen ikyav yô, aluer se ungwa ser ma anmgbian nan ngu eren tom ken tiônnongo kpoghuloo nahan, ka se hen ser nan ngu eren tom kpoghuloo sha er nana na i saan Yehova iyol kpa? Shin ka se hen ser nan ngu eren nahan sha ci u mtsera u nanaa? Aluer hanma shighe yô, se mba henen ser anmgbianev asev mba civir Yehova sha ci u mbamtsera mba vea zua a mi la tseegh yô, doo u se umbur ser, kape Diabolo kpa yange ôr kwagh u Yobu u yange civir Aôndo sha jighjigh la vough je la. (Yobu 1:9-11) U ma se hen kwagh u ma anmgbian wase dang la yô, hemba doon u se time sha ityôkyaa i i ne ve se lu henen kwagh u nan dang la. Se mba a ityôkyaa i dedoo i henen kwagh u ma anmgbian wase dang-naa? Shin ieren i lun a dooshima ga i i dumbur ken ayange a masejime ne la ngi tsaren se?—2 Tim. 3:1-4.

6, 7. (a) Ka atôakyaa a nyi nahan alaghga aa na ve se lam sha mbagenev caveraa? (b) Shighe u or laha se yô, doo u se er nena?

⁶ Nenge ase atôakyaa agen a aa na ve alaghga se lam sha mbagenev caveraa yô. Alaghga a lu sha ci u se soo ser ior ve hemba nengen a kwagh u se eren la. Sha nahan yô, se hii u lamen sha mbagenev sha u tesen ser se hemba gban kwagh a ve. Gayô se lu keren ishô sha ci u kwagh i gbe u ma se er, kpa se kanshio u eren yô. Aluer se mba lamen sha mbagenev dang sha ci u ihyagh shin iyuhwe shin sha ci u se na ayol a ase jighjigh ga kpa, kwagh u una due ker la una vihi kpishi.

⁷ Alaghga se hen ser se mba a ityôkyaa i dedoo i lamen sha ma or caveraa. Adooga or shon kpa nan vande lamen sha iyol yase dang. Aluer kwagh ngu nahan je kpa, u se oron iyev la ka ieren i shami ga. U eren nahan la una seer vihin a vihi kwagh, man ka kwagh u Diabolo a soo ér se er je la, kpa gema ka kwagh u Aôndo a soo ér se er la ga. (2 Tim. 2:26) Hemba doon u se dondo ikyav i Yesu la. Zum u i laha un kpa, “A or iyev sha mlaha la ga, . . . kpa A gema A wa sha ikev i Un u A er ijir sha mimi la.” (1 Pet. 2:21-23) Yesu yange na jighjigh ér Yehova una nenge sha zayol la sha gbenda u a soo la man sha shighe na kpaa. Doo u se kpa se na Aôndo jighjigh er Yesu nahan. Ka sea ôron akaa a maan a maa mbagenev yô, se wase u kuran ‘bem man mzough’ u tiônnongo wase.—Ôr Mbaefese 4:1-3.

PALEGH IMGBE I MCIEM MAN MKIGHIR

8, 9. Pilatu yange ôr Yesu ijir i kuu sha ci u nyi?

⁸ Inyam i i gbe ken to yô, kera ngi a tahav mbu zan mape ga. Kape or ka nana gba ken to u mciem man mkighir u mbakov ve nan kera lu a tahav sha uma u nan ga je la. (Ôr Anzaakaa 29:25.) De se time sha akav a iorov uhar kposo kposo mba yange ve gba ken to u mciem man mkighir u mbakov man kwagh u se hen sha kwagh ve yô.

⁹ Gomna Pontiu Pilatu, u lu Orromanu la yange fa er Yesu er ma kwaghbo ga yô, nahan a soo u eren un kwagh u vihin ga. Pilatu yange kaa ér Yesu er “ma kwagh man i lu wuan un ga.” Nahan Pilatu na zwa ér i wua un. Sha ci u nyi? Yange lu sha ci u Pilatu de ikpelaior kighir un. (Luka 23:15, 21-25) Mbaahendanev mbara genger amo ér: “Aluer u pase or ne yô, u ngu ikar u Shisar ga,” sha nahan yô, ve kighir Pilatu er ishima ve. (Yoh. 19:12) Alaghga tsô Pilatu yange cia ér aluer un ta ikyaa a Kristu yô, una kera lu gomna ga shin a wua un je kpaa. Sha ityôkyaa ne yô, a de i kighir un nahan a hingir u eren ishima i Diabolo.

10. Ka nyi yange i na ve Peteru nyiman Kristu?

¹⁰ Apostoli Peteru yange lu ijende i Yesu i ishima ishima je. Shi pase gbar gbar ér Yesu ka Mesiya. (Mat. 16:16) Shighe u mbahenen mba Yesu mbagenev kav ityesen na igen ga ve, ve de u zan a na ityô la, Peteru za hemen u dondon Yesu her. (Yoh. 6:66-69) Shighe u mbaihyomov va u va kôron Yesu la kpa, Peteru tsua sanker sha u kuran Orvesen na ne. (Yoh. 18:10, 11) Nahan kpa, ken masejime yô, Peteru de mcie u cian or mgbegha un hingir u nyiman Yesu Kristu. Apostoli ne yange gba ken to u mcie u cian or la ngôôr ga, nahan de ér kwagh ne a yange un u eren kwagh sha ishimataver.—Mat. 26:74, 75.

11. Ka akaabo a nyi alaghga a gba u se hendan a mi?

¹¹ Gba u Mbakristu cii vea hendan a imeen i eren kwagh u una vihi Aôndo ishima la. Alaghga ior mba hen ijiirtom yase shin mbagenev vea kighir se ér se er kwagh sha anyighe, shin se er idya je kpaa. Adooga mbayevmakeranta mbagenev vea kighir Mbakristu mba ve ze makeranta a ve imôngo la ér ve ii ikyaren shin ve nenge ufoto mba ijimbagh shin ve ma taav shin ve ma mcimbim ma bom shi ve ma msôrom gayô ve er idya je kpaa. Nahan yô, ka nyi ia wase se ve se palegh mcie u cian or man mkighir u mbakov, nahan se kera er kwagh u una vihi Yehova ga?

12. Ka nyi se hen sha kwagh u Pilatu man Peteru?

¹² De se nenge ase kwagh u se hen sha kwagh u Pilatu man Peteru la yô. Pilatu yange fa kwagh u Kristu cuku tseegh. Yange fa er Yesu lu a ibo ga shi lu kposo a uumace mbagenev cii yô. Kpa Aôndo u mimi yange doo Pilatu ishima ga shi ban a iyol i hiden a mi ijime. Nahan taver Diabolo u mgbeghan Pilatu u eren ishima ga. Aôndo yange doo Peteru ishima shi fa un tsembelee kpaa. Nahan kpa, ashighe agen yange a er kwagh gaegh, shin a cia ior, nahan a er kwagh u shami ga. Cii ve i kôr Yesu yô, Peteru sue kwagh ér: “Shin á lu ve cii á na ve anzughul kpaa, mo yô, ze.” (Mar. 14:29) Luun er Peteru yange una suur sha Aôndo er orpasalmi nahan yô, yange ma wa iyol sha ameen a lu u una va tagher a mi la. Orpasalmi la yange wa icam kaa ér: “TER ta ikyaa a mo, me kera cia ga, ka nyi je or á ereme?” (Ps. 118:6) Hen tugh mbu Yesu mase lun uma shin tar la, a kua a Peteru man mbaapostoli mbagenev uhar, yem a ve ken atô u sule u Gesemane la. Yesu kaa a Peteru man mbaapostoli mbagenev mbara ér ve lu per ve kuran, kpa ve cii ve gba mnyam. Yesu va nder ve, kaa a ve ér: “Kuran nen, eren nen msen, sha er né gba ken imeen ga yô.” (Mar. 14:38) Nahan kpa, Peteru shi gba mnyam. Ken masejime yô a cia ior, a er kwagh u shami ga.

13. Se hendan a imeen i eren kwaghbo nena?

¹³ Shi se fatyô u henen kwagh u vesen ugen sha kwagh u Pilatu man Peteru la: Gba u se lu a mfe u Aôndo shi se hiden a iyol ijime shi se eren kwagh gaegh ga shi Aôndo una doo se ishima, nahan se cian Yehova, a lu ior ga. Aluer jighjigh u nan wase la har sha mfe u mimi yô, se pasen mbagenev akaa a se ne jighjigh a mi la vangertiôr. Kwagh ne una wase se u hendan a mkighir u mbakov shi se de u cian ior kpaa. Nahan doo u mayange se hen ser se gande u gban ken imeen ga. Kpa doo u se hiden a iyol ijime hanma shighe cii, shi se umbur ser a iwasen i Aôndo shio yô, se fatyô u hemban imeen ga. Gba u se eren msen ser Yehova a na se jijingi na shi se dondon atindiakaa a na sha ci u a doo se ishima, nahan se palegh u eren kwagh u van a ilyahan sha iti na. Shi gba u se vande wan iyol i hendan a ameen kpaa. U tesen ikyav yô, aluer se vande eren msen vea mbayev asev shi se wa ve ago iyol yô, vea fa kwagh u vea er shighe u mbagenev ve soo u kighir ve ér ve ma kwaghbo yô.—2 Kor. 13:7.a

PALEGH HÔN U CAGHEN A CAGH KWAGH LA, KA ISHIMA I NAN OR IBO KAREN IKYAA INYA JE LA

14. Diabolo una soo ér se hen nyi sha kwagh u asorabo ase a tse laa?

¹⁴ Kwaghhônon ugen ngu, mba yer un ér shire, ka i ta kor sha ankon shin iwen i yuhwan, i zer sha kon hen gbenda u inyam i karen sha mi fele fele yô. Inyam i i fe ga ka ia va taan sha kwar u i zer mape la yô, iwen shin ankon u i zer sha la a osough a cagh inyam shon. Ishima i nan or ibo karen ikyaa inya la ia fatyô u hingir ikyav mbi yuhwan mbi caghen a cagh se kuaa je. Aluer se zer henen sha asorabo ase a tse la yô, alaghga se ‘ure kpishi, shi a kunda se iyol tsung.’ (Ôr Pasalmi 38:3-5, 8.) Satan una soo ér we u kure ikyaa wer u vihi gande u Yehova una zungwe u mhôônom shi u fatyô u kuran atindi a Yehova kpaa ga.

15, 16. U palegh hôn u ishima i nan or ibo karen ikyaa inya la nena?

¹⁵ U palegh hôn u caghen a cagh kwagh la nena? Aluer u er isholibo i vesen yô, ker gbenda u hiden himen a Yehova fele fele. Lam a mbatamen ve wase u. (Yak. 5:14-16) Er kwagh u ú fetyô cii sha er u sôr akaa a u er sha mi ga la yô. (2 Kor. 7:11) Aluer i tsaha u je kpa, mayange de yen ishima ga. Tsaha ka ikyav i tesen ér u doo Yehova ishima. (Heb. 12:6) Kange ishima wer u kera kimbir eren kwagh u yange u er ve gba u a tsaha la ga, shi er nahan kpaa. Shighe u ú gem ishima shi u de asorabo ou a tse la kera yô, na jighjigh wer, mimi je nagh ku ipaan ku Yesu Kristu kura kua fatyô u cirin asorabo a ou.—1 Yoh. 4:9, 14.

¹⁶ Mbagenev ka a de ve isholibo ve je kpa, ve de ér ishima i zer nan ve ibo kpii. Aluer kape kwagh wou a lu la yô, umbur wer Yehova yange de Peteru man mbaapostoli mbagenev mbara isholibo ve, shin er ve yevese ve undu Yesu shighe u kwagh tser un la nahan kpaa. Shi Yehova yange de orgen u i dugh un ken tiônnongo u ken Korinte kera sha ci u a er idya i ndôhôrshima, kpa va gema ishima la isholibo na. (1 Kor. 5:1-5; 2 Kor. 2:6-8) Mkaanem ma Aôndo ôr kwagh u ior mba yange ve er asorabo a vesen kpa Aôndo de ve asorabo ve, shighe u ve va gema ishima yô.—2 Kron. 33:2, 10-13; 1 Kor. 6:9-11.

17. Nagh ku ipaan kura kua er nyi sha ci wase?

¹⁷ Aluer u gema ishima sha mimi shi u na jighjigh wer Yehova una zungwe u mhôônom yô, una de u asorabo ou, una kera umbur a ga. Mayange de henen wer nagh ku ipaan ku Yesu kura kua fatyô u tôôn asorabo ou kera ga ze. Aluer u hen nahan yô, u gba ken hôn u Satan ugen. Diabolo soo ér we u na jighjigh wer Yehova una fatyô u den asorabo cii sha ci u nagh ku ipaan kura ga. Nahan kpa, nagh ku ipaan kura kua fatyô u cirin asorabo a hanma or u nan gem ishima la vindi vindi. (Anz. 24:16) Aluer se na nagh ku ipaan kura jighjigh yô, ishima ia de u nan se ibo karen ikyaa inya, nahan se seer zuan a tahav mbu civir Aôndo a ishima yase cii man a uma wase cii man a mfe wase cii.—Mat. 22:37.

SE LAN AYOM A SATAN GA

18. Se palegh uhôn mba Diabolo nena?

¹⁸ Ka hôn u se gbe ker la kwagh a gbe Satan sha mi ga, kpa er a ker se je kuma un. Kpa er se lan ayom a Satan ga yô, se fatyô u den ser a ya mtsera sha a vese ga. (2 Kor. 2:10, 11) Aluer se sôn ser Aôndo a na se kwaghfan sha er se hendan a ameen yô, se gba ken uhôn mba Satan ga. Yakobu nger ér: “Aluer kwaghfan una yina mô wen yô, nana̱ sôn Aôndo u ka A na ior cii wuee, A kera kôhôn ashe ga la, tsô á na nan di je.” (Yak. 1:5) Se eren msen kera cii yô, se henen Mkaanem ma Aôndo sha tseeneke wase hanma shighe shi se eren sha kwagh u se hen la kpaa. Ityakerada i pasen Bibilo i wanakiriki u jighjigh man u fan kwagh a gber la ngi wasen se u fan uhôn mba Diabolo shi palegh ve kpaa.

19, 20. Gba u se kôr kwaghbo ihyom sha ci u nyi?

¹⁹ Ka sea eren msen shi sea henen Bibilo yô, kwagh ne a wase se u soon kwagh u dedoo. Kpa ka hange hange u se kôr kwaghbo ihyom kpaa. (Ps. 97:10) Aluer se mba henen sha kwaghbo u se waan ayol a ase ikyo tseegh ve una due tser se la yô, kwagh ne una wase se u palegh kwaghbo shon. (Yak. 1:14, 15) Gba u se hen u kôron kwaghbo ihyom kpa geman soon kwagh u dedoo. Aluer se er nahan yô, uhôn mba Satan mbara vea kôr se ga.

²⁰ Se mba a iwuese kpishi er Aôndo a wase se sha er Satan una ya mtsera sha a vese ga yô! Yehova eren tom a jijingi na man Mkaanem nam kua nongo na sha u yiman se “sha ikyev i orbo.” (Mat. 6:13, NW) Ken ngeren u a dondo ne, se va hen er i gbe u se palegh uhôn mbagenev uhar mba Diabolo a ker ior mba Aôndo a mi uma yô.

[Ngeren u shin kpe]

[Ufoto mba sha peeji 21 la]

Aluer se kôr nombor wase tsaha ga yô, se gbihi tiônnongo ken mbamzeyol

[Ufoto mba sha peeji 24 la]

U fatyô u panden ikyav mbi ishima i nan or ibo karen ikyaa inya la