Akaa a Se Fatyô u Henen ken Uwashika Uhar mba Peteru Nger la Yô

 1. Ken ayange a masejime a apostoli Peteru la, ka tom u nyi Yehova yange na unu?

APOSTOLI Peteru yange civir Yehova sha mimi anyom kpishi. Yange zenden vea Yesu shighe u Yesu lu eren tom na u pasen kwagh shin tar la. Peteru shi va hii tom u pasen kwagh hen ior mba ken akuraior, mba ve lu Mbayuda ga la. Ken masejime yô, Peteru shi va lu ken mbahemenev mba shin itine. Ken ayange a na a masetyô, shighe u fa ér zurum u una kpe la, Yehova shi na un tom ugen. Er ken inyom i 62-64 la nahan, Peter nger akaa a Yehova ôr un yô ken uwashika uhar, ka ityakeda i Bibilo i i yer ér Peteru u Hiihii man Peteru u sha Uhar la je la. Peteru lu a ishimaveren ér una va kpe kera kpa, uwashika mban vea wase Mbakristu.—2 Pet. 1:12-15.

 2. Er nan ve uwashika mba Peteru nger la lu a inja sha ayange a mbaapostoli la yumu?

² Peteru yange nger uwashika nav mban shighe u anmgbianev nav mba nomso man mba kasev lu ‘zungwen sha atsan atô kposo kposo’ yô. (1 Pet. 1:6) Aferaior lu nôngon aa nyôr a atesen a aiegh man aeren a ndôhôrshima ken tiônnongo u Kristu. (2 Pet. 2:1, 2, 14) Hen shighe ne, zurum u Mbakristu mba ken Yerusalem vea tagher a “mkur u akaa cii.” Inja na yô, lu u ica a kera gba ga je shoja i Mbaroma ia va tim gar u Yerusalem kua tar u Mbayuda cii. (1 Pet. 4:7) Uwashika mba Peteru mban yange ve wase Mbakristu sha ayange la je ka u henen a hen ga; ve wase ve u fan er vea za hemen u civir Yehova sha mimi shighe u ve tagher a ican la yô, man er vea wa ago iyol sha atsan a vea va tagher a mi ken hemen la kpaa.b

 3. Gba u se time sha uwashika mba Peteru mbara sha ci u nyi?

³ Shin er Peteru nger uwashika mban lu sha ci u Mbakristu mba sha ayange a mbaapostoli la nahan kpa, Yehova wa uwashika mban ken Mkaanem nam, ve hingir ityakeda i Bibilo. Nahan hegen kpa uwashika mban vea fatyô u wasen se. (Rom. 15:4) Se mba ken tar u aeren a ndôhôrshima a ngee kpishi, shi se lu tagher a atsan a ka a na i taver se u civir Yehova yô, er Mbakristu mba hiihii mbara nahan. Heela tseegh ga, ica a kera gba ga tsô, se tagher a ican i i hembe ican i ngise i tim tar u Mbayuda cii kera la yô. Akaa a vesen nga ahar ken uwashika mba Peteru la, a i gbe u se umbur yô. Akaa la aa wase se u wan ishima keghen mkur u tar ne, shi se de u cian kwagh u ior vea hen sha a vese shin vea er se la, shi se doo ayol a ase sha mimi. Shi aa wase mbatamen u fan er vea nenge sha anmgbianev mba nomso man mba kasev ve, vea za hemen u tilen dông yô.

 4. Kwagh u i ôr ken 2 Peteru 3:3, 4 la tese ér, ka nyi ia na jighjigh wase una kera taver ga?

⁴ Ior kpishi na jighjigh a akaa a Bibilo i tsenga ôron ér aa va er ken hemen la ga. Alaghga mbahendan a vese vea lu nahan se tar sha ci u se ndera keghen mkurtar ica i gba hegen, kpa ngu a va ga. Ior mbagenev ka ve kaa ér mkurtar una va mayange ga. (Ôr 2 Peteru 3:3, 4.) Aluer orya gayô or u nan yaren tom hen ijiir i môm a vese shin or u hen tsombor wase nan ôr kwagh la a vese shighe u se lu pasen nan kwagh yô, alaghga se kera na jighjigh ser mkur zurum ga.

 5. Ka nyi ia wase se ve se za hemen u wan ishima keghen mkur u tar nee? (2 Peteru 3:8, 9)

⁵ Alaghga mbagenev vea nenge ér Yehova timbir u karen a tar u ifer ne kera yum. Kpa kwagh u Peteru ôr ne una wase se u lun a mnenge u vough, sha ci u mkaanem mara umbur se er gbenda u Yehova a nengen shighe la u kaha kposo a mnenge u uumace yô. (Ôr 2 Peteru 3:8, 9.) Sha mnenge u Yehova yô, anyom 1,000 ka di iyange i môm tsô. Yehova ngu wan ishima, a soo ér or môm nana tim ga. Nahan kpa, iyange na ia vaan yô, tar ne ua kar kera. Se mba a ian i icivirigh kpishi i pasen ior mba ken akuraior a sha tar cii kwagh, hen shighe u a mase shin her ne.

 6. Se er nan ve iyange i Yehova ia “lu [se] sha ishima”? (2 Peteru 3:11, 12)

⁶ Peteru kaa a vese ér iyange i Yehova “i lu [se] sha ishima.” (Ôr 2 Peteru 3:11, 12.) Se er nan ve ia lu se ishima? Hanma iyange yô, se nôngon u henen sha averen a se va zua a mi ken tar u he la. Hen ase er shighe la ahumbe a se ôôn a mi ne aa lu wang, shi se yaan kwaghyan u injaa, man er se lu ngohol ior asev mba a nder ve shin ku la, shi se lu tesen mbagenev mba yange ve kpe anyom uderi imôngo ken ijime la er akaaôron a profeti a Bibilo yange va kure sha mi la yô. Aluer u ngu henen sha akaa ne yô, kwagh la una wase u u veren ashe keghen shighe la, shi nan jighjigh wer mkurtar zurum. Aluer se “tsenga fan” akaa a ken hemen ne yô, mbatesen mba aiev vea fatyô u ‘tsumen a vese ga.’—2 Pet. 3:17.

 7. Aluer se mba cian ior yô, kwagh la una bende a vese nena?

⁷ Er se fe ser iyange i Yehova zurum yô, gba u se nôngo sha afatyô wase cii se pase ior loho u dedoo. Nahan kpa, alaghga ashighe agen a cier se iyol u pasen kwagh. Sha ci u nyi? Sha ci u se lu cian kwagh u ior vea hen sha a vese shin vea er a vese la. Kwagh ne yange er Peteru. Hen tugh mbu i lu ôron Yesu ijir la, Peteru cia u kaan ér un ngu orhenen u Yesu, je yô a tuna kwa tar ér un fa Yesu ga! (Mat. 26:69-75) Nahan kpa, shighe karen yô, apostoli ne iyol na shi ôr a jighjigh u nan ér: “De cie nen kwagh u a cier ve iyol la ga, ishima kpa i̱ de ze ne iyol ga.” (1 Pet. 3:14) Kwagh u Peteru ôr ne tese er se fatyô u den ieren i cian ior la yô.

 8. Ka nyi ia wase se ve se de u cian ioro? (1 Peteru 3:15)

⁸ Ka nyi ia wase se ve se de u cian ioro? Peteru kaa a vese ér: “Tsegha nen Kristu ken asema a en.” (Ôr 1 Peteru 3:15.) Kwagh ne wa u henen sha ian i Ter man Tor wase Kristu Yesu a lu sha mi la, kua tahav nav. Aluer ian due i u pase loho u dedoo kpa ka cier we iyol yô, umbur kwagh u Tor wase. Ta ashe nenge a na ken ishima er a tem tor sha, man er mbatyomov umiliôn imôngo ve lu vea na yô. Umbur wer ngu a “tahav sha akaa a sha man a shin tar cii,” shi ka u una luun “a [we] ayange ayange, zan zan shighe u mkur u tar ne.” (Mat. 28:18-20) Peteru wa se kwagh ér se ‘waan iyol se keghen a kegh’ u pasen kwagh u se ne jighjigh a mi ken Bibilo yô. A doo u u pasen or kwagh hen ijiirtom you shin ken makeranta wou shin hen ijiir igen hanma shighe u ian i dugh kpa? Tsenga henen sha kwagh u shighe u u fatyô u eren nahan yô, maa wa iyol sha kwagh u u ôr a or la keghen a kegh. Er msen, sôn Yehova wer a na u ishimataver, shi na jighjigh wer Yehova una wase u u de u cian ior.—Aer. 4:29.

 9. Kwagen la, Peteru kera tese dooshima ga nena? (Shi nenge foto kpaa.)

⁹ Peteru yange hen u tesen dooshima. Yesu yange kaa ér: “M ngu wan ne tindi u he, mer doo nen ayol a en; er ne doom ishima nahan, kape ne kpa doo nen ayol a en vough je la.” (Yoh. 13:34) Yesu ôr kwagh ne Peteru kpa lu her. Kpa shighe karen yô, Peteru va nyôr u cian ior, maa venda u yan kwaghyan vea anmgbianev mba nomso man mba kasev mba ve lu Mbayuda ga yô. Apostoli Paulu yila kwagh u Peteru er ne ér ka “atseregh.” (Gal. 2:11-14) Peteru yange ngohol kwaghwan u Paulu la shi hen kwagh ker kpaa. Ken uwashika nav mba uhar mbara cii, a ôr var var er i gbe u anmgbianev asev mba nomso man mba kasev vea doo se ishima tseegh tsô ga, kpa se tese dooshima la yô.

10. Ka nyi ka i wase se ve se hingir u soon anmgbianev asev “sha mimi, er ka anmgbianev mba hen tsombor nahan”? Ta iwanger. (1 Peteru 1:22)

¹⁰ Peteru kaa ér anmgbianev asev mba nomso man mba kasev mba ken tiônnongo cii ‘se soo ve sha mimi, er ka anmgbianev mba hen tsombor nahan.’ (Ôr 1 Peteru 1:22.) Aluer se mba eren akaa a i tesen se ken “mimi” la cii yô, a tese ér se soo anmgbianev asev cii sha mimi. Ityesen igen ken mimi ne kaa ér “Aôndo sangen a sange ga.” (Aer. 10:34, 35) Aluer se ver a ver anmgbianev mba se tese ve dooshima ken tiônnongo, se mba tesen mbagenev dooshima ga yô, se fatyô u kaan ser se mba dondon tindi u dooshima u Yesu a we la ga. Alaghga se hemba lun kôôsôô a mbagenev, er Yesu kpa lu nahan. (Yoh. 13:23; 20:2) Kpa Peteru umbur se ér, er ka se soo anmgbianev asev mba hen tsombor cii, shi se luun vea ve imôngo sar sar nahan, kape i gbe u se soo anmgbianev asev mba nomso kua mba kasev cii vough je la, sha ci u se cii se mba tsombor môm.—1 Pet. 2:17.

11. Se tese ser se ‘doo a anmgbianev asev tsung, a ishima i môm’ nena?

¹¹ Peteru kaa a vese ér se ‘doo ayol a ase tsung, a ishima i môm.’ U doon ayol a ase “tsung” la inja na yô, ka u eren kwagh a hanma anmgbian u nomso shin u kwase cii sha gbenda tesen ser nan doo se ishima, kua shighe u i taver u eren nahan je kpaa. Ikyav i tesen yô, aluer anmgbian nan hii se iyôngo shin nan er kwagh a vese dang ye? Sha hiihii la, alaghga se kera tese nan dooshima ga, kpa se soo u eren kwagh a nan ser i nyoon nan. Kpa Yesu tese Peteru ér ieren la doo Aôndo ga. (Yoh. 18:10, 11) Peteru nger ér: “De eren nen or ifer sha ifer i nan er ne ga, shin or a̱ laha ne kpa, ne de lahan nen nan ga. Kpa gema sôn nen iveren sha ci u nan.” (1 Pet. 3:9) Aluer anmgbianev ou doo u ishima tsung yô, shighe u anmgbian ugen nan er kwagh a we i nyoon we je kpa, dooshima la una na u er kwagh a nan kundu kundu, shi u zungwe nan mhôônom.

12. (a) Aluer se doo ayol a ase tsung yô, kwagh la una na se er nyi igen kpaa? (b) Er i tese ken vidio i Kura Mzough Wase u a Lu Iyua Injaa i Yehova a Ne Se la nahan, ka nyi u soo wer u nôngo kpoghuloo u ere?

¹² Ken washika u Peteru hii ngeren la, a kaa ér aluer anmgbianev asev doo se ishima tsung yô, dooshima la una wase se u den ve kwaghbo shin cirin asorabo a ve, man a lu asorabo kpuaa tseegh ga, kpa a lu “asorabo kpishi.” (1 Pet. 4:8) Adooga Peteru yange umbur kwagh u Yesu tese un anyom a karen ken ijime, sha kwagh u den ior kwaghbo la. Shighe la, adooga Peteru na jighjigh ér, aluer un kaa ér una deen anmgbian kwaghbo ‘kwa taankaruhar’ yô, a nenge ér un ngu or u fan kwagh kpishi. Kpa Yesu tese un kua se cii ér se de or kwaghbo i kuma “kwa 77.” Inja na yô ér, se deen ior kwaghbo a ikighir shio. (Mat. 18:21, 22) Aluer taver we u dondon kwaghwan ne kpa, iyol i de kpen we ga! Mbacivir Yehova mba ve yen ne cii, ashighe agen ka i taver ve u den or kwaghbo. Kpa kwagh u vesen yô, nôngo sha afatyô wou cii, er akaa a i gbe u u er ve u de anmgbian wou kwaghbo, shi u hime iyôngo vea na yô.c

13. Ka nyi ia na ve alaghga a taver mbatamen u zuan a shighe taver anmgbianev mba nomso man mba kasev ishima?

¹³ Shighe u Yesu nder shin ku kera la, a ôr a Peteru ér: “Kuran mo anyôngov.” (Yoh. 21:16) Kwagh ne hungur Peteru mayange ga. Wea lu ortamen yô, fa wer we kpa ka kwagh u Yesu a kaa ér we u er je la. Nahan kpa, alaghga a taver ortamen ugen u zuan a shighe u eren tom u vesen ne. Gba keng u mbatamen vea hii nengen ér icombor ve ngi a akaa a kwagh a gbe sha mi hange hange la, shi vea nôngo hanma ôr hen tsombor ve nana nenge ér i wa nan ikyo, shi vea wase tsombor ve u lun vea Yehova kôôsôô. Mbatamen shi ka ve ver ikyav i dedoo sha tom u pasen kwagh la, man sha u wan iyol sha mbaasaimenti shi nan akaaôron ken mbamkombo kua sha mbamkohol mba kiriki man mbamkohol mba vesen. Shi mbatamen mbagenev ka ve lu ken Ukômatii mba Wasen sha Kwagh u Iyouci, gayô ve eren tom vea Gbaatom u Nengen sha Tom u Maan Kwagh hen Haregh u Branci. Sha kpôô yô, mbatamen ka ve ngee a ityom!

14. Ka nyi ia mgbegha mbatamen u kuran iyôngo? (1 Peteru 5:1-4)

¹⁴ Peteru kaa a anmgbianev nav mba ve kpa ve lu mbatamen la ér: “Kuran nen ikyumile i Aôndo.” (Ôr 1 Peteru 5:1-4.) Wea lu ortamen yô, se fa anmgbianev ou mba nomso man mba kasev doo u ishima, shi u soo u kuran ve. Nahan kpa, alaghga ashighe agen u lu a ityom kpishi gayô a tume u iyol je yô, u kera fatyô u eren tom u kuran la ga. Nahan u er nena? Er msen hen Yehova, pase un akaa a a ze u iyol la cii, shi ôr un er i sar u kpishi u wasen anmgbianev ou mba nomso man mba kasev yô. Peteru nger ér: “Aluer or ngu eren tom u wasen mbagenev yô, nana̱ eren u sha inja i nan ngu suur sha tahav mbu Aôndo ka a na la.” (1 Pet. 4:11) Alaghga anmgbianev ou mba nomo man mba kasev vea lu yan ican a mbamzeyol mba a fatyô u sôron ken tar u hegen ne been ga yô. Kpa umbur wer, Yesu Kristu, u a lu “orkuran u tamen la,” una wase ve sha gbenda u orgen môm nana fatyô ga yô. Una fatyô u wasen ve hegen kua ken tar u he kpaa. Kwagh u Yehova a soo ér mbatamen ve er yô, ka u ve tese ér anmgbianev vev doo ve ishima, shi ve kuran anmgbianev vev, shi ve gema ve lu “ikyumuile ikyav.”

15. Ortamen ugen kor iyôngo nena? (Shi nenge foto kpaa.)

¹⁵ Anmgbian ugen u a lu ortamen ica i gbe yô, iti na ér William, a kav er i gbe hange hange u a kura anmgbianev yô. Shighe u angev mbu Korona va la, un kua mbatamen mbagenev hen tiônnongo ve la cii, kwagh u ve lu hemban eren yô, lu u yilan mbapasenkwagh mba ken iniongo ve i duen kwaghpasen la asange asange hanma kasua, lamen a hanma ve. A kaa ér: “Yange anmgbianev mbagenev lu tswen hen uya vev, nahan lu ishima ia ngôôr yinan ve ga.” Anmgbian u nomso shin u kwase ka nana pasen William zayol u nan yô, a kegh ato a nan zulee, sha er una fa kwagh u a ze nan iyol la, man iwasen i nan soo yô. Maa a ker ityakeda shin uvidio mba sha jw.org, sha er una zua a kwagh u wasen nan yô. A kaa ér: “Gba u se hemba kuran anmgbianev hegen cii. Ka se er tom kpoghuloo u wasen ior mba ve fe Yehova ga, shin ve lu anmgbianev asev ga yô; kape tom u kuran iyôngo la kpa i gbe u se er u kpoghuloo je la. Se wase iyôngo i Yehova i lu ken mimi her.”

16. Ka sha igbenda i nyi nahan se fatyô u dondon akaa a se hen ken uwashika mba Peteru laa?

¹⁶ Se hila time sha akaa a se fatyô u henen ken uwashika mba uhar mba Peteru nger la kpuaa di tsô. Alaghga u nenge a kwagh u u soo u seer sôron ken uma wou yô. Ikyav i tesen yô, u soo wer hegen u gema henen sha averen a se va zua a mi ken tar u he la fele fele i hemba ave a tsee? U wa ishima wer u pasen mbagenev kwagh shighe u u yar tom, shin u ze makeranta, shin hanma shighe u ian i dugh ciilii? U nenge a igbenda i u fatyô u seer tesen wer anmgbianev ou mba nomso man kasev doo u ishima tsung yôô? Mbatamen, ne soo ner ne za hemen u kuran iyôngo i Yehova inja er i kighir ne a kighir ga, kpa maa ne iyol u eren nahana? Aluer u tôv iyol you sha mimi yô, alaghga u nenge a mbamyen ou sha akaa agen. Kpa iyol i de kpen we ga. Er “Ter a doo” yô, una wase u u nyôôso ape u yen la. (1 Pet. 2:3) Peteru kaa ér: ‘Aôndo iyol na una tsaase we una bee. Una na u tile dông, una na u taver ishima, una na u tenger ga.’—1 Pet. 5:10.

17. Aluer se gba uwer ga, shi se de ser Yehova a tsaase se a bee yô, ka nyi ia due kere?

¹⁷ Hen shighe ugen la, Peteru nenge ér un kuma u lun vea Wan u Aôndo imôngo ga. (Luka 5:8) Kpa er Peteru doo Yehova kua Yesu ishima yô, ve wase un za hemen u dondon Kristu sha mimi; mayange gba uwer ga. Sha nahan yô, Yehova na Peteru “zua a ian i icivirigh tsung, i nyôron ken Tartor u tsôron u Ter man Oryiman wase Yesu Kristu.” (2 Pet. 1:11) Kwagh ne ka injar i doon kpen kpen! Aluer u gba uwer ga er Peteru nahan, shi u de wer Yehova a tsaase we yô, we kpa u zua a injar i uma u tsôron. U “zua a myom u a lu awashima u jighjigh u nan [wou] la.”—1 Pet. 1:9.