Ka An Nan Lu Antikristuu?

I NDERA nan utor man ufiim kua akaa cii iti i “antikristu” la ka kwagh u nyian a mi ga. Sha nahan yô, hanma or je kpa nana pine ér: Ka an jim nan lu antikristuu? Ka orumace nan lu antikristu nyian yee? Mimi je, ijiir i injaa i se hii u tôvon ve se fa antikristu jighilii yô, ka ken Bibilo, sha ci u i ter iti ne ker kwa taan.

Ken mbageren Bibilo cii, ka apostoli Yohane tseegh a ter ishember i “antikristu” la ye. A pase ér antikristu ka ana? Nenge ase mkaanem ma yange nger ken washika u hiihii u i yer sha iti na ne: “Mbayev, ka shighe u masetyô je ne, man er ne ungwa ner Antikristu ngu van yô, shin hegen je kpaa Mbaantikristu due, mba imôngo je, ka nahan man se fe er i lu shighe u masetyô je ne ye. Ve due ken vese, kpa ve lu mba ken a vese ga . . . Ka an nan lu or u aieghe, saa di u nan nyiman er Yesu ka Kristu ga la? Ka nan je nan lu Antikristu ye, u nan nyiman Ter man Wan la.”—1 Yohane 2:18, 19, 22.

Ka nyi se hen ken mkaanem mana? Yohane ôr kwagh u “mbaantikristu” sha u tesen je ér antikristu ka or môm tseegh ga, ka iorov imôngo i zom i yer nahan ye. Ior shin mbamzough mba ve kohol ve lu antikristu la mba samber a mbaaie. Ka ve nyiman ér Yesu ka Kristu shin Mesiya ga, shi ka ve nôngon ér vea yer mimi sha kwagh u mlu u Aôndo vea Wan na Yesu Kristu la kpaa. Mba ve lu antikristu la ka ve kaan ér ka ve ve lu Kristu shin mbatomov nav ye, kpa er ve ‘dugh ken a vese’ yô, ve venda atesen a Bibilo a mimi la. Heela tseegh ga, nongo u antikristu ne yange u lu sha ayange a apostoli Yohane nger washika na sha “shighe u masetyô,” u alaghga lu shighe u mbaapostoli kpe bee la.

Lu nyi igen Yohane nger sha kwagh u antikristuu? Zum u Yohane lu ôron kwagh u uprofeti mbaaiegh yô, a ta icin ér: “Ka sha kwagh ne man ne fe Jijingi u Aôndo ye: hanma jijingi u a pasen er Yesu Kristu va ken iyol i or yô, ka her Aôndo a dugh ye. Kpa hanma jijingi u a pase Yesu ga yô, ka ken Aôndo a dugh ga, ka u Antikristu je, u ne ungwa ner ngu van la, hegen je kpaa ngu sha tar.” (1 Yohane 4:2, 3) Shi Yohane ôr ken washika na u sha uhar la var var ér: “Mbaicughuv kpishi due sha tar, mba pasen er Yesu Kristu va ken iyol i or ga. Ka orcugh, ka Antikristu je la.” (2 Yohane 7) Kwagh ne tese wang ér Yohane yange fa er mba ve lu samber a atesen a kwaghaôndo a aiegh sha kwagh u Yesu Kristu kua atesen a na la cica cii ve kohol ve lu antikristu yô.

Cii man Yohane va nger kwagh sha kwagh u mba ve tsughun ior sha atesen a kwaghaôndo ne yô, Yesu Kristu vande wan mbadondon un kwagh sha ikyaa shon ica i gba, ér: “Kura nen ayol a en sha uprofeti mba aiev mba ve ve her a ven a akôv a iyôngo iyol, kpa ken atô ve yô, gema ka ugbaseela mba huav je.” (Mateu 7:15) Kape apostoli Paulu kpa yange ta Mbakristu mba ken Tesalonika icin je la, ér: “Ne yô, ma or môm nana̱ de tsughun ne sha nyityôkwagh kpaa ga, gadia saa m-undu u hiden ijime la una vande van ve, man saa á pase or u vendan atindi, ka wan u mtim je la.”—2 Mbatesalonika 2:3.

Sha nahan yô, sha ayange a mbaapostoli la je uprofeti mba aiegh man mbavendan atindi due lu tsughun ior, keren gbenda u vihin tiônnongo u Kristu. Lu mba ve lu samber a mbaaie man atesen a kwaghaôndo a mimi ga sha kwagh u Yesu Kristu kua atesen a na la Yohane zom ve cii yila ér “antikristu” ye. Yohane zom ve cii yila ér “wan u mtim” sha u tesen ér kape Yehova a nengen ve je la.

Nyian di ye? Ior kua mbamzough mba ve kohol ve lu antikristu la mba hendan a Kristu kua atesen a na her di tsô. Mba samber a mbaaie shi tsughun ior ér ve de fe mkposo u Ter, Yehova Aôndo, man Wan Na, Yesu Kristu ga. Se mba a ityôkyaa i injaa i palegh atesen a kwaghaôndo a aiegh a ngara nahan. De se nenge ikyav sha akaa ahar.

Ucôôci samber a ityesen i Aôndo Utar ken Môm shin Triniti la anyom uderi imôngo hegen. Ka ve kaa ér Ter man Wan ka Aôndo môm. Sha nahan yô, antikristu tsume a ior shi a na ve kera fa or u nan lu Yehova Aôndo man Yesu Kristu kpôô kpôô ga. Kwagh ne ngu yangen ior mba ve lu a ishima i mimi la u dondon ikyav i Yesu Kristu shi kporom hen Aôndo, er Bibilo i kaa ér ve er la.—1 Mbakorinte 11:1; Yakobu 4:8.

U seer sha mtsum ne yô, ucôôci mba samber a Ubibilo mba i dugh iti i Aôndo, i Yehova la ker sha yô. Mba eren kwagh ne, shin er i nger iti ne ken ngeren mba Bibilo mba hiihii mbara je i kom er kwa 7,000 nahan kpaa. Ka nyi i dugh kere? Ve pase ior or u nan lu Aôndo u mimi la wang ga.

Kpa er ior kpishi mba ve civir Aôndo sha mimi mbara ve fe iti na i Yehova la yô, kwagh la wase ve u kporom hen Aôndo. Lu kwagh u wase orgen u i yer un ér Richard la je ne. A umbur er yange un lam vea Mbashiada mba Yehova iorov uhar yô. A pase ér: “Yange ve tesem ken Bibilo ér iti i Aôndo u mimi la ka Yehova. Er m fa mer Aôndo ngu a iti na kpôô kpôô yô, kwagh la doom kpishi. Lu kwagh u m vande ungwan mayange ga yô.” Hii hen shighe la je, de akaa agen ken uma na sha er una gema dondon atindi a Bibilo shi a doo Yehova a na yô. A kaa ér: “Er m fe iti i Aôndo yô, kwagh la wasem u lun a na kôôsôô.”

Antikristu yange ior umiliôn umiliôn u fan akaa a ken jijingi anyom uderi imôngo nyian. Kpa aluer se mba henen Bibilo i i lu Mkaanem ma Aôndo la yô, se fa antikristu kpôô kpôô nahan se due ken atesen a kwaghaôndo a aiegh man icugh na la kera.—Yohane 17:17.