Takeda u Mpase Ngu U a Inja Nyian Nena?

1-2. Pase ityôkyaa i hiihii i i doo u se fa akaa a takeda u Mpase u ôr la yô.

I LU nahan or na u abom u ufoto mba nan ér we u nenge vee? Se kpishi se nenge. Ka wea nengen ufoto mbara yô, u nenge a ufoto mba ior kpishi mba u vande fan ve ga yô. Nahan kpa, ka wea tôô foto ugen yô, u sôr u hidi u kenger dedoo. Sha ci u nyi? Sha ci u we kpa u ngu ken foto la. Ka wea kenger imba foto la yô, u nôngon wer u umbur shighe u yange i tôô foto shon la, shi u nôngon je wer u kav ishigh ki ior mba ve lu ken foto shon la kpaa. Foto la ka a lu u a inja kpen kpen.

² Takeda u Mpase ngu er imba foto la nahan. Sha ci u nyi? Sha ci u atôakyaa ahar. Hiihii yô, i nger takeda u Bibilo ne sha ci wase. Ivur i hiihii ken takeda u Mpase la kaa ér: “Mpase u Yesu Kristu; mpase ne due hen Aôndo sha u Yesu a̱ tese ikpan na akaa a ica ia gba ga tsô aa er yô.” (Mpa. 1:1) Sha nahan yô, kwagh u i nger ken takeda u Mpase la ngu sha ci u ior cii ga, kpa ngu sha ci u se mba se civir Aôndo la. Er se lu mbacivir Aôndo yô, akaa a se lu eren sha u kuren akaaôron a profeti a ken takeda u doon kpishi ne a de kpiligh se iyol ga. Sha nahan yô, shighe u se lu ôron takeda u Mpase yô, doo u se fa ser se kpa se mba “ken foto” u akaa a i ôr ken u la, shin akaa la nga a inja kpishi sha ci wase.

3-4. Takeda u Mpase kaa ér ka hanma shighe nahan akaaôron a profeti a i nger ker la a a kure, maa ka nyi i doo u se er sha kwagh shono?

³ Ityôkyaa i sha uhar i se soo u timen sha akaaôron a profeti a ken takeda u Mpase la yô, ka sha ci u se soo u fan shighe u mkur u akaaôron a profeti shon. Apostoli Yohane yange pase shighe u akaaôron a profeti ne a a kure la. A kaa ér: “Yange jijingi erem m lu ken iyange i Ter.” (Mpa. 1:10) Shighe u Yohane nger mkaanem man ken inyom i 96 la, “iyange i Ter” la lu a zurum tsô kpaa ga. (Mat. 25:14, 19; Luka 19:12) Kpa kwaghôron u profeti ugen ken Bibilo tese ér “iyange i Ter” la hii lu ken inyom i 1914, shighe u i ver Yesu Tor sha la. Hii ken inyom la je, akaaôron a profeti a i ôr ken takeda u Mpase, a i we nongoior u Aôndo ker la hii u kuren. Nahan, jighilii yô, ashighe a se lu ker ne ka “iyange i Ter” shon!

⁴ Er se lu uma sha shighe u akaaôron a profeti a saan iyol ne a lu kuren ne yô, doo u se hemba veren ishima sha kwaghwan u a lu ken Mpase 1:3 la, a kaa ér: “Saan or u nan ôron mkaanem man genger genger la iyol, kua mba ve lu ungwan kwaghôron u profeti ne shi ve lu eren sha kwagh u i nger ker la kpaa, gadia shighe u i ver la zurum.” Sha kpôô yô, gba u se ‘ôron mkaanem man genger genger’ shi se “ungwan kwaghôron u profeti ne” shi se “eren sha kwagh u i nger ker la.”

 5. Ka nyi takeda u Mpase u ôr u tesen ér gba u se nôngo sha afatyô wase cii ser Yehova a lumun a mcivir wase?

⁵ Ityough ki hiihii ki takeda u Mpase la je tese er Yesu a fe hanma kwagh u a lu zan hemen ken atôônango a mbadondon un cii yô. (Mpa. 1:12-16, 20; 2:1) Ilyoho i Yesu tindi hen atôônanongo ataankarahar a hen tiôntar ugen ken vegher tar u Ashia, u i yer hegen ér Asia Minor la tese er a fe hanma kwagh yô. Ken ilyoho la, Yesu ôr Mbakristu mba sha ayange a mbaapostoli la akaa a a wase ve vea civir Aôndo sha gbenda u a soo la yô. Man kwagh u yange ôr ken ilyoho la ngu sha ci u hanma or u nan civir Aôndo nyian yô. Ka nyi se hen ken kwagh ne? Orhemen wase Kristu Yesu fa mlu u hanma wase vea Yehova. Yesu ngu hemen se shi kuran se, shi ngu nengen hanma kwagh u a lu zan hemen cii. A fa kwagh u i gbe u se eren ve, se za hemen u civir Yehova sha gbenda u una lumun se yô. Ka nyi Yesu yange kaa ér mbadondon un mba sha ayange la ve eren, shi se kpa i gbe u se eren nyiana?

 6. (a) Kwagh u Yesu ôr ken Mpase 2:3, 4 la tese ér ka zayol u vesen u nyi tiônnongo u ken Efese la yange lu a mini? (b) Ka nyi se fatyô u henen ken kwagh ne?

⁶ Ôr Mpase 2:3, 4. Gba keng u se za hemen u tesen ser Yehova doo se ishima er yange doo se ishima sha hiihii la nahan. Kwagh u Yesu ôr ken loho u yange tindi hen Mbakristu mba ken Efese la tese ér yange ve lu tagher a atsan kpishi, kpa ve taver ishima shi ve gba uwer u civir Aôndo ga. Nahan kpa, ve kera lu tesen ér Yehova doo ve ishima er yange doo ve ishima sha hiihii la ga. Nahan gba u Yehova una hide a doo ve ishima er sha hiihii la nahan, gayô Yehova una kera lumun a mcivir ve ga. Nyian kpa, kape i gbe u se er kwagh a hemba di u taver ishima tseegh tsô je la. Gba u se taver ishima sha atôakyaa a injaa. Kwagh gbe Yehova sha akaa a se eren la tseegh ga, kpa kwagh ka a gba un sha atôakyaa a se eren akaa shon la kpaa. Kwagh ka a gba un sha atôakyaa a se lu a mi a eren ma kwagh yô, sha ci u a soo ér se tsua u civir un sha ci u un doo se ishima kpishi, shi un kuma u se wuese un.—Anz. 16:2; Mar. 12:29, 30.

 7. (a) Kwagh u Yesu ôr ken Mpase 3:1-3 la tese ér ka zayol u nyi mba hen tiônnongo u ken Sadisu la yange ve lu a mini? (b) Ka nyi i gbe u se ere?

⁷ Ôr Mpase 3:1-3. Gba keng u se za hemen u lun per shi lun tsevaa. Mba ken tiônnongo u ken Sadisu la yange ve lu a zayol ve kposo. Yange ve lu civir Yehova, kpa ve va de u civir un. Sha nahan yô, Yesu kaa a ve ér ve “nder.” Ka nyi se hen ken kwagh ne i i lu icintan hen a ve se? Ka mimi, Yehova una hungur a tom wase ga. (Heb. 6:10) Alaghga se hen ser se vande civir Yehova, nahan hegen sea mem u civir un je kpa ka kwagh ga. Kpa gba u se suur sha akaa a se vande eren sha ci u Yehova la tseegh ga. Aluer se kera mba a agee er yange se lu a mi la ga kpa, gba u se za hemen u eren “tom u Ter” sha afatyô wase cii, sha er se za hemen u lun per shi lun tsevaa zan zan mkur yô.—1 Kor. 15:58; Mat. 24:13; Mar. 13:33.

 8. Ka nyi se hen ken mkaanem ma Yesu ôr a anmgbianev mba ken Leodisia ma i nger ken Mpase 3:15-17 laa?

⁸ Ôr Mpase 3:15-17. Gba keng u se za hemen u civir Yehova sha gbashima man a ishima yase cii. Loho u Yesu tindi hen mba ken tiônnongo u ken Leodisia la tese ér ve kpa yange ve lu a zayol ve kposo. Mcivir ve yange “sagh a sagh,” inja na yô, tsee ga shi ndôhôr ga. Er kwagh gba ve sha mcivir ve la ga yô, Yesu kaa a ve ér ‘kwagh tser ve shi ve kôr kunya.’ Yange gba u vea tese ér kwagh u Yehova kua mcivir na gba ve ishima kpishi. (Mpa. 3:19) Ka nyi se hen ken kwagh ne? Aluer se kera mba a gbashima er yange se lu a mi la nahan ga yô, a gba u se seer tesen ser akaa a Yehova kua nongo na u ne se la cii nga se a inja kpishi. (Mpa. 3:18) Mayange doo u se yem u keren ser se tema i kpe se iyol ken tar ne, nahan se hemba veren ishima sha ambaakaa la, a akaa a se eren sha ci u Yehova la ga.

 9. Loho u Yesu tindi hen Mbakristu mba ken Pegamu man Tiatira la tese ér ka kwaghbo u nyi i gbe u se palegha?

⁹ Gba keng u se venda atesen a mba ve undu mcivir u mimi la. Yesu yange venda kwagh a mbagenev ken Pegamu mba ve lu van a mpav ken tiônnongo shi paven iniongo la wang. (Mpa. 2:14-16) Yange wuese mba ken Tiatira mba ve palegh “akaa a cimin a Satan” la, shi kaa a ve ér ve ‘kôr ave’ sha mimi “gbang.” (Mpa. 2:24-26) Mbakristu mba hen ijiir la mba yange ve taver ken jijingi ga la hii u dondon atesen a aiegh, nahan gba u vea gema ishima. Se nyian ye? Gba keng u se venda hanma ityesen i Yehova a lumun a mi ga cii. Mba ve undu mcivir u mimi la, alaghga “sha ashe yô, vea lu er ka mbacivir Aôndo nahan,” kpa ieren ve ia tese ér “mba civir Aôndo ga.” (2 Tim. 3:5) Aluer se mba henen Mkaanem ma Aôndo sha gbashima yô, a hemba lun se ican ga u fan atesen a aiegh shi vendan a.—2 Tim. 3:14-17; Yuda 3, 4.

10. Shi ka nyi igen kpa se fatyô u henen ken kwagh u Yesu ôr a tiônnongo u ken Pegamu man u ken Tiatira laa?

¹⁰ Gba keng u se palegh hanma ieren i idyaa cii. Anmgbianev mba ken Pegamu man Tiatira mbara yange ve lu a zayol ugen kpaa. Yesu yange venda mbagenev ken tiônnongo la, sha ci u ve lumun a idya i eren. (Mpa. 2:14, 20) Ka nyi se hen ken kwagh ne? Ieren i idyaa i môm i se lu a mi ve Yehova una lumun se je kpa ngi ga, aluer se civir un anyom a ngee nan nan, shi se mba eren ityom kpishi sha ci na je kpaa. (1 Sam. 15:22; 1 Pet. 2:16) A ver ishima ér se za hemen u kuran atindi a na a sha kwagh u aeren a wang la, aluer tar vihi nan nan je kpaa.—Ef. 6:11-13.

11. Ka nyi se hila hen ken ngeren nee? (Nenge ngeren u kiriki u a lu a itinekwagh ér “Akaawan a Wasen Se Nyian” la.)

¹¹ Ka nyi se hila hen ken ngeren ne? Se nenge er i gbe u se nôngo sha afatyô wase cii ser Yehova a lumun a mcivir wase yô. Aluer se mba eren ma kwagh u una na Yehova una kera lumun a mcivir wase ga yô, a gba u se de kwagh la fese sha er Yehova una lumun se yô. (Mpa. 2:5, 16; 3:3, 16) Nahan kpa, Yesu ter kwagh ugen kpaa ken ilyoho i yange tindi atôônanongo a mi la. Kwagh shon ka nyi?

12. Ka nyi se fatyô u henen ken ilyoho i Yesu tindi hen anmgbianev mba ken Semuna man Filadefia laa? (Mpase 2:10)

¹² Hegen se time sha ilyoho i Yesu tindi hen tiônnongo u hen Semuna man u hen Filadefia la. Yange ôr a Mbakristu mba sha ajiir la ér, ve de cian atsan a aa tser ve la ga, sha ci u a na ve injar sha jighjigh u nan ve la. (Ôr Mpase 2:10; 3:10) Ka nyi se hen ken kwagh la nyiana? Gba u se fa ser ka u a tôv se a ican, shi gba u se wa ishima shighe u i lu tôvon se a ican yô. (Mat. 24:9, 13; 2 Kor. 12:10) Kwaghwan ne ngu hange hange sha ci u nyi?

13-14. Akaa a i ôr ken Mpase ityough 12 la na yô, ka nyi nongoior u Aôndo u lu tagher a mi nyiana?

¹³ Takeda u Mpase kaa a vese ér a tôv nongoior u Aôndo a ican sha “iyange i Ter,” ka ayange a masejime a se lu ker hegen ne je la. Mpase ityough 12 kaa ér yange mba veren Yesu tor u Tartor u Aôndo yô, fese je maa ityav pev sha. Mikael, ka iti i Yesu Kristu shighe u hide yem sha la je la, vea mbatyomov nav lu nôngon ityav a Satan man azôv. (Mpa. 12:7, 8) Kwagh ne na yô, ityav hemba mbaihyomov mba Aôndo mbara, nahan i kôr ve i ker ve va gba shin tar. Er ve va gbe shin tar yô, mba eren ior ican je zua ga. (Mpa. 12:9, 12) Kwagh ne na yô, ka nyi ngongoior u Aôndo u tagher a mini?

¹⁴ Mpase shi ôr se kwagh ugen u Satan a lu eren yô. Er a kera lu a ian i hiden zan sha ga yô, a hemba veren ishima u tswamen mbatomov mba Aôndo a shighe ve mkurem shin tar sha u ve va lu ator ken Tartor u Aôndo, “mba i ne ve tom u eren shiada sha kwagh u Yesu la.” (Mpa. 12:17; 2 Kor. 5:20; Ef. 6:19, 20) Kwaghôron u profeti ne ngu kuren sha mi nena?

15. “Mbashiada uhar” mba i ôr kwagh ve ken Mpase ityough 11 la ka unô, man ka nyi yange i er ve?

¹⁵ Satan na yô, mbahyomov mba eren tswam a anmgbianev mba i shighe ve mkurem, ve lu hemen tom u pasen kwagh u Tartor u Aôndo la kpoghuloo. “Mbashiada uhar” mba i ôr kwagh ve ken takeda u Mpase ér i wua ve la, ka anmgbianev mban.b (Mpa. 11:3, 7-11) Ken inyom i 1918 la, i kôr anmgbianev mba ve lu hemen tom u pasen kwagh ne iorov anigheni, i wa ve mbaaie iyol, maa i wuhe ve ér ve tsa ken purusu gbem. Hen shighe la, ior kpishi nenge ér tom u anmgbianev mba i shighe ve mkurem mbara lu eren la yô, kwagh u u bee a bee je.

16. Ka kwagh u kpilighyol u nyi yange er ken inyom i 1919 la, man hii shighe la je ka nyi Satan a lu eren zan zan hegene?

¹⁶ Kwaghôron u profeti u ken Mpase ityough 11 la shi kaa ér shighe a karen kpuaa yô, “Mbashiada uhar” mbara vea hide a lu uma. Nahan yange anmgbianev mban tsa ken purusu lu a kuma inyom ga je tsô maa kwaghôron u profeti ne kure sha mi sha gbenda u kpiligh iyol kpishi. Ken uwer u Maaci inyom i 1919 la, i dugh anmgbianev mba i shighe ve mkurem mban ken purusu kera, shi i wua ijir i i wa ve la. Fese je maa anmgbianev mban shi hide hii u hemen tom u pasen kwagh u Tartor shi tesen ior la. Kpa Satan de u tswamen nongoior u Aôndo ga. Hii shighe la je, Satan ka a sua “ifi” u tôvon Mbakristu cii a ican. (Mpa. 12:15) Sha kpôô yô, gba u hanma wase nana “taver ishima shi nana lu a jighjigh u nan.”—Mpa. 13:10.

17. Ka iwasen i nyi nongoior u Aôndo u hen ér ua zua a mi ga kpa ka u zua a mi, shin er i lu ve jighilii je Satan ka a ver ishigh i eren tswam a ve nahan kpaa?

¹⁷ Mpase ityough 12 maa shi tese ér nongoior u Aôndo u zua a iwasen hen pe ve ver ishima ér vea zua a mi ga yô. Takeda u Mpase kaa ér, “tar” mena “ifi” u tôvon nongoior u Aôndo a ican u Satan sua la. (Mpa. 12:16) Man ka pe i lu vough je la. Ashighe agen mbautahav mba tar u Satan ne mbagenev, er mbaajiriv nahan, mbagenev ka ve hemba henen kwagh sha inja, nahan ve war nongoior u Aôndo. Nongoior u Yehova hemba ajir kpishi ken koti, a a ne ve lu a ian gbangelaa yô. Mba eren kwagh a ian i ve lu a mi gbangelaa ne nena? Mba eren kwagh a ian shon sha kwaghfan sha u eren tom u Yehova a ne ve la kpoghuloo. (1 Kor. 16:9) Tom la wa nyi man nyi kere?

18. Ka tom u vesen u nyi se lu a mi ken ayange a masejime nee?

¹⁸ Yesu yange tsenga ôron ér mbadondon un vea pase “loho u dedoo u Tartor [u Aôndo]” vea tser tar cii man mkur una va ye. (Mat. 24:14) Shighe u ve lu pasen kwagh yô, ortyom shin mbatyomov ka ve wasen ve, mbatyomov mba i kaa ér mba a “loho u dedoo u tsôron, u vea yôô hen mba ve tem sha tar . . . hen hanma ikyurior man hanma ipyaven man hanma zwa man hanma nongoior” la.—Mpa. 14:6.

19. Ka loho ugen u nyi kpa i gbe u mba Yehova a doo ve ishima la vea pase keng ne?

¹⁹ Ka loho u dedoo u sha kwagh u Tartor u Aôndo la tseegh i gbe u nongoior u Aôndo ua pase ga. Gba u vea sue shin vea wase u eren tom u mbatyomov mba i ôr kwagh ve ken takeda u Mpase, hii ityough 8 zan zan 10 la kpaa. Mbatyomov mbara mba yôôn mbamzeyol kposo kposo mba, mba ve venda Tartor u Aôndo la vea tagher a mi yô. Sha nahan yô, Mbashiada mba Yehova mba pasen loho u ijirigh u u lu er “awombo man usu,” shi u lu pasen ajiraôron a Aôndo una va a mi sha mbautahav kposo kposo mba tar u ifer u Satan ne la. (Mpa. 8:7, 13) Gba ior vea fa er mkurtar a zurum yô, sha er vea sôr akaa ken uma ve fele fele, nahan vea va war iyugh sha iyange i Yehova yô. (Sef. 2:2, 3) Kpa ior kpishi soo loho ne ga. Nahan gba u sar se taver ishima ve, se yôô u ye. Sha shighe u zegecan la, a mase pasen ior loho u ijirigh ne sha gbenda u ishima ia hemba vihin ve yô.—Mpa. 16:21.

20. Ka nyi se lu timen sha mi ken ngeren mba uhar mba ve dondo laa?

²⁰ Sha kpôô yô, gba u se eren sha kwagh u “kwaghôron u profeti ne” a kaa la, sha ci u se kpa mkur u akaaôron a profeti a i nger ken takeda u Mpase la wa se ker. (Mpa. 1:3) Kpa se er nan ve shighe u i lu tôvon se a ican kpa se wa ishima a jighjigh u nan, shi se za hemen u taver ishima pasen ilyoho nee? Akaa a ahar ne aa wase se u taver ishima: hiihii yô, ka kwagh u takeda u Mpase u ôr sha kwagh u mbahyomov mba Aôndo la. Sha uhar yô, ka averen a aluer se za hemen u civir Aôndo sha mimi ve se va zua a mi ken hemen la. Se lu timen sha akaa a ahar ne ken ngeren mba uhar mba ve dondo la.