‘Ka We Tseegh u Til sha Mimi Ye’

 1, 2. Er nan ve se fatyô u kaan se Tor Davidi yange lan kwagh u m-ban u mimi ga?

TOR DAVIDI yange lan kwagh u m-ban u mimi ga. Sha shighe u lu tor la mbamzeyol mem un ga; shighe ugen la je yô ior mbagenev ken ityô na zua zwa ér vea wua un. Shi ior nav mba ma ve lu ikyua a na la je kpa, er kwagh a na sha mimi ga. U tesen ikyav yô, nenge ase kwagh u Mikal, weregida u Davidi yange er a na ne. Sha hiihii la, “Davidi doo Mikal . . . ishima,” man a̱ shi nan kpa yange sue un ken ityom na i lu tor ve lu eren la kpaa. Kpa ken masejime yô, “a laha un ken ishima” na, Davidi hingir un “vough er gbilinor u lun a kunya ga” nahan.—1 Samuel 8:20; 2 Samuel 6:16, 20.

² Shi orgen u er kwagh a Davidi dang yô, lu Ahitofel, ijende na u waan un kwagh la. I nengen kwaghwan na er ka kwaghwan u hen Yehova jighilii nahan. (2 Samuel 16:23) Kpa shighe va kar yô, ijende i Davidi i sôngo sôngo ne tsuwe kohol mbaahendanev mba Davidi. Lu di an nan hii ahendan nee? Lu Abesalom, wan u Davidi iyol na je! Wan na u lu keghen a kegh ér ian i due una er ishima na la, lu “ngohol nomsombaiorov mba Iserael asema,” nahan á ver iyol na ér un ngu tor. Ihyembeato i Abesalom ne i hingir zegekwagh, tsô gande Tor Davidi yevese un.—2 Samuel 15:1-6, 12-17.

 3. Ka vangertiôr u nyi Davidi lu a mini?

³ Ken ican i Davidi ne cii or môm lu u eren kwagh a na sha mimi ga shinii? Jighilii yô, Davidi yange fa wener or ngu u nan undu un ken ican i yan na ne ga yô. Lu ana? Lu Yehova Aôndo iyolna lu a na ye. Nahan Davidi ôr kwagh u Yehova wener: “Or u mimi yô, U tese nan mimi [“mtil sha mimi,” NW ] Wou je.” (2 Samuel 22:26) Kanyi i lu mtil sha mimi, man Yehova tese se ikyav i hemban cii i ieren ne nena?

 4, 5. (a) Kanyi i lu “mtil sha mimi”? (b) Ka sha nyi gbenda nahan mimi u akaa a igbetar, a a lu a uma ga la a kaha kposo a mtil sha mimi u orumace?

⁴ Ikyav i “mtil sha mimi” er i yar tom a mi ken Ruamabera u ken zwa Heberu la nahan yô, ka erdoo u or ka nan var eren a orgen zan zan nan kar kuren awashima u nan lu a mi ve nan lu eren erdoo a nan la. Or u mimi yô ka or u nan eren kwagh sha dooshima a mbagenev yô. Orpasalmi yange yila uwer u sha kwavaôndo ér ka ‘orshiada u Sha u mimi’ sha ci u hanma tugh yô ngu dugh sha kwavaôndo, ngu gbe inya ga. (Pasalmi 89:37) Sha nahan yô, a fatyô u kaan ér uwer ngu eren kwagh sha mimi, shi a fatyô u nan ú jighjigh kpaa. Kpa uwer ua fatyô u tilen sha mimi er orumace ka nan tile sha mimi nahan ga. Sha ci u nyi? Sha ci u aluer or tile sha mimi hen orgen yô, kwagh la tese ér nan ngu a dooshima hen a nan—kpa akaa a igbetar a a lu a uma ga la yô, aa fatyô u tesen or dooshima nahan ga.

⁵ Gbenda u Ruamabera a er kwagh u ieren i mtil sha mimi la wase se u fan ér ieren ne ka i tesen dooshima. Ieren ne tese ikyaryan i hen atô u or u nan til sha mimi la man or u i lu eren kwagh a nan sha mimi la. Mayange je ieren i mimi ne i̱ gem ga. Ngi er ka agôndo a zegemnger a ahumbe nga a shi daase a mi la ga. Mbamzeyol ka vea lu nan nan je kpa, mtil sha mimi shin ishoon i soon or sha mimi la ngi tenger mayange ga.

 6. (a) Uumace ban a mimi nena, man Bibilo kpa ôr kwagh ne nena? (b) Ka sha gbenda u hemban doon u nyi nahan se fa kwagh u a lu mtil sha mimi, man ka sha ci u nyi?

⁶ Sha kpôô yô, mimi ban ainge kpen kpen. Ashighe kpishi ahuraior a sôngo sôngo je kpa nga a shi eren akaa a ‘timin a tim ayol a ve.’ Ka se shi ungwan kwagh u noov mba ve undu kasev vev shin kasev mba ve undu noov vev yô. (Anzaakaa 18:24; Malaki 2:14-16) Aeren a mimi ga dumbur ayange ne kpishi, nahan alaghga se kpa se mba er kwagh er ngise profeti Mika kpa ôr nahan; a kaa wener: “Ormimi saa ishe hen tar kera.” (Mika 7:2) Shin er uumace ve kanen shio u eren kwagh a mbagenev sha mimi ashighe kpishi nahan kpa, Yehova yô, mgbough a ieren ne. Jighilii yô, aluer se soo u fan kwagh u ieren i mtil sha mimi ne vighe vighe yô, hemba doon u se nenge er Yehova a eren ieren ne a mbagenev yô, gadia ngi vegher u vesen u dooshima na.

 7, 8. Er nan ve se fatyô u kaan ser mtil sha mimi u Yehova hemba ciilii?

⁷ Ka Yehova tswen a til sha mimi tsung ye. Er nan ve i lu nahana? Uumace man mbatyomov kpa ashighe agen ka ve tile sha mimi dông ga he? (Yobu 1:1; Mpase 4:8) Man gema Yesu Kristu di ye? Ka un a lu “or u mimi” u vesen u Aôndo ga zee? (Pasalmi 16:10, NW ) Nahan yô, er nan ve i kaa ér ka Yehova tswen a tile sha mimi dông-no?

⁸ Hiihii yô, umbur wer mtil sha mimi ka ieren i i dugh ken dooshima yô. ‘Aôndo ka dooshima’—inja na yô, ngu dooshima iyol na—nahan ka an je nana hemba tilen sha mimi a Yehova? (1 Yohane 4:8) Sha mimi yô, mbatyomov man uumace mba a aeren a Aôndo, kpa ka Yehova tseegh a hembe mimi sha won cii ye. Er un a lu “or u tsan sha won” yô, ieren ne hemba tsan ken a na a akaa a á gbe a la cii, a shin tar ne man a sha kpaa. (Daniel 7:9) Nahan yô, aluer mba ôron kwagh u mtil sha mimi yô ka Yehova jighilii je i lu ôron kwagh na ye. Eren ieren ne sha gbenda u or môm môm nana fatyô u eren i ga yô. De se nenge nen akav agenegh a a tese kwagh ne nahan yô.

 9. Yehova ‘eren mimi ken ityom na cii’ nena?

⁹ Yehova “eren dedoo [“mimi,” NW ] ken ityom Na cii.” (Pasalmi 145:17) Sha nyi gbenda? Pasalmi 136 na se mlumun sha mpin ne. Ityough kin ôr kwagh u igbenda i Yehova ngise yima ior yô. Shi ki ôr kwagh u myom u vesen u á yima Mbaiserael shin Zegemnger u Nyian la kpaa. Hanma ivur i pasalmi ne yô, i mase kuren sha ishember i i kaa ér: “Gadia erdoo [shin mtil sha mimi] Na ka u tsôron gbem sha won” la. I nger pasalmi ne ken Mbampin mba Henen sha Kwagh mba ve lu sha peeji 289 la. Er ú lu ôron avur ne yô, igbenda kposo kposo i Yehova a er erdoo a ior nav la ia kôr ú ken ishima tsung je. Sha mimi yô, Yehova eren mimi a mbacivir un mba jighjigh mbara sha u ungwan mliam vem ma ve vaan a na ér a̱ yima ve la, shi ngu a yima ve sha shighe kpaa. (Pasalmi 34:6) Mbacivir Yehova ka vea de u tilen sha mimi hen a na ga yô, un kpa ngu a za hemen u soon ve sha mimi heregh.

10. Yehova tese mimi na sha atindiakaa a na nena?

¹⁰ Shi kwagh ugen yô, mgem u atindiakaa a Yehova a gem ga la kpa ka gbenda ugen u a eren kwagh sha mimi a mbacivir un yô. Mayange je Yehova gem gbenda u a nengen kwagh u dedoo man u bo la ga, un ngu er ka uumace mba ve til sha kwagh môm ga, mba kwagh u ishima i kende ve ér ve er cii ka ve gba eren eren la ga. Hii ngise la je zan zan hegen mnenge na sha akaa anza er kwagh u mbaimev man akombo a civir man iwoo-or nahan cii ngu a gema ga, shin er anyom a kar hegen udubu udubu nahan kpaa. Yehova ngise ôr kwagh sha ikyev i profeti na Yesaia wener: “Zan zan iyol i been kpaa Me lu her nahan vough.” (Yesaia 46:4) Nahan se fatyô u lun a vangertiôr ser, aluer se dondo akaawan a ken Mkaanem ma Aôndo yô se zua a mtsera.—Yesaia 48:17-19.

11. Ôr akav a tesen ér Yehova eren kwagh sha mimi sha u kuren uityendezwa nav vough.

¹¹ Yehova shi kur uityendezwa nav kpaa, sha gbenda ne kpa ngu a tese mtil sha mimi na. Ka una ôr kwagh yô, kwagh la a kure shami vough. Nahan Yehova kaa wener: “Kwaghôron Wam, u a dugh ken zwa Wam, . . . una hide her a Mo gbilin ga, kpa una er kwagh u M we ishima yô, ikôr ia lagh un sha kwagh u M tindi un u eren yô.” (Yesaia 55:11) Mgem u Yehova a gem zwa kposo sha kwagh u a ôr ga la, tese mimi na hen ior nav. Mayange je haren ve ishima sha kwende sha u tôndon zwa a ve sha kwagh u a we ishima u eren a ve ga ze. Yehova eren kwagh vough sha gbaa ne, ka nahan ve ortom na Yosua yange kaa wener: “Ma kwagh u dedoo môm u Aôndo ôr ya u Iserael cii bunde ga, akaa cii kure sha mi vough” ye. (Yosua 21:45) Nahan yô, se lu nen a vangertiôr ser mayange je se va ahenge sha ci u Yehova kure uityendezwa nav a vese ga yum ga.—Yesaia 49:23; Mbaromanu 5:5.

12, 13. Ka sha nyi igbenda nahan erdoo u Yehova a lu u ‘tsôron gbem sha wono’?

¹² Er se vande ôron nahan, Bibilo kaa a vese ér erdoo u Yehova “ka u tsôron gbem sha won.” (Pasalmi 136:1) Erdoo na ka u tsôron gbem sha won nena? Kwagh ne ka nahan, sha ci u Yehova ka una de se asorabo a ase yô i lu gbekeke. Er i vande ôron ken Ityough 26 nahan, Yehova ka una de or asorabo yô, kera ker nan kwar sha a ga. Er se cii se ‘er isholibo, nahan se kera lu a iengem i Aôndo ga’ yô, hanmô wase nana̱ ember sha er erdoo u Yehova a lu u tsôron gbem sha won yô.—Mbaromanu 3:23.

¹³ Kpa ka sha gbenda u i tér sha heen ne tseegh erdoo u Yehova a lu u tsôron gbem sha won ga. Mkaanem nam kaa ér orperapera nana hingir “er kon u i môôr hen ukungômbamngerev, u u um sha shighe u u yô, ika i u kpaa ngi usu ga; hanma kwagh u nan eren kpaa, nana kure un vough.” (Pasalmi 1:3) Nenge ase yô, ijiir ne ngi ôron kwagh u kon u i kpe u iyol, u ikya i u i usu mayange ga yô! Kape se kpa, aluer Mkaanem ma Aôndo gba se ishima tsung yô, se tsa ku, se lu bem bem shi se za ikyura kpaa je la. Averen a Yehova a ne mbatomov nav mba jighjigh sha ci u mimi na a ve la ka a tsa gbem sha won. Sha mimi yô, Yehova una er erdoo a uumace mba ve ongo imo na la ken tar u he u una va a mi la gbem sha won.—Mpase 21:3, 4.

14. Yehova wuese aeren a mimi a mbatomov nav nena?

¹⁴ Yehova gbe uwegh u eren kwagh a vese sha mimi ga. Er Yehova a eren kwagh á veren gbenda sha won ga yô, m-er u a eren kwagh a mbatomov nav mba jighjigh sha mimi la una pande mayange ga. Orpasalmi nger wener: “Ngise m lu iyev, hegen m bee iyol, nahan kpaa, mayange m ngu a nenge i ta orperapera kera ga, shin tsombor u nan kpaa u sônon kwaghyan ga; Gadia kwagh u mimi doon TER ishima, man shi te mba i doo Un a ve la kera ga. Mba koson ve gbem, kpa tsombor u mbaerenafer yô, á tim ve kera.” (Pasalmi 37:25, 28) Mimi yô, er i lu Yehova a gbe se yô, a kuma u se na un icivir. (Mpase 4:11) Nahan kpa, er un a eren kwagh a vese sha mimi yô, aeren a ase a perapera a a tese ér se mba civir un la doo un ishima tsung je.—Malaki 3:16, 17.

15. Pase er gbenda u Yehova ngise eren kwagh a Mbaiserael la u tese mimi Na wanger wanger yô.

¹⁵ Hanma shighe u ior mba Yehova ka vea yaan ican yô, erdoo na ngu a mgbegha un nahan á yima ve. Orpasalmi kaa a vese wener: “Un koson uuma mba mba i doo Un a ve la [“mba ve til sha mimi la,” NW ], A yima ve sha ikev i mbaaferev.” (Pasalmi 97:10) Hide hen sha kwagh u aeren a na a ikyurior i Iserael la. Zum u Yehova er ivande, Mbaiserael per Zegemnger u Nyian yande la yô, ve wa icam ve wuese Yehova, ve kaa ér: “Sha erdoo Wou, U hemen ior mba U paa ve yô.” (Ekesodu 15:13) Sha kpôô yô, myem u Yehova yima ve hen Zegemnger u Nyian la tese ér á soo ve sha mimi. Nahan yô, Mose kaa a Mbaiserael ér: “Ka mngee, ne hembe ngeen a ma ikurior igen man TER A pende ishima sha a ven A tsough ne kpaa ga, gadia ne hemba gban ijime a akuraior cii; kpa ka sha ci u ne doo TER ishima man sha ci u A we ishima u kuren mbum u A bum a uter enev la, TER A dugh a ven sha uwegh ku ageegh A paa ne ken ya u ikpan sha ikev i Farao, tor u Igipiti ye.”—Duteronomi 7:7, 8.

16, 17. (a) Mbaiserael yange ve wuese erdoo u Yehova a ve ga kareghaa nena, kpa Yehova lu zungwen ve mhôônom nena? (b) Mbaiserael kpishi tese ér ‘gbenda u vea war kera lu ga’ nena, man ieren ve la ngi se icintan nena?

¹⁶ Kpa ikyurior i Iserael jimin cii yange i̱ wuese erdoo u Yehova a ve la ga, gadia er i yima ve kera yô “ve zer eren [Yehova] asorabo, ve lu hendan a Uhembansha.” (Pasalmi 78:17) Ve za hemen a ihyembeato ve ne uderimbaanyomov imôngo, ve undu Yehova ve yem civir mbaaôndo mbaaiev shi ve lu eren aeren a mbafanaôndoga, a a lu hôngor ve a hôngor tseegh la. Nahan cii kpa, Yehova vihi ikyuryan na a ve ga. Er Yehova ma er nahan yô, a zamber a ve sha ikyev i profeti na Yeremia ér: “Hide, we Iserael u u undu mimi wou la, . . . Me kera kenger we a iyugh ga, gadia Mo M ngu u zungwen mhôônom je.” (Yeremia 3:12) Er se vande pasen ken Ityough 25 nahan, Mbaiserael kpishi, icile tsô tenger ve ga. Kpa, “ve gema ve se mbatyomov mba Aôndo, ve laha kwaghôron Na, ve nenge sha uprofeti Nav kpenenene.” Lu nyi i due ken ieren ve nee? Ken masejime yô, “iyugh i TER mough sha ior Nav je, gbenda u vea war kera lu ga.”—2 Kroniku 36:15, 16.

¹⁷ Kwagh ne tese se nyi? A tese se ér er Yehova a til sha mimi hen ior nav nahan kpa, ongo ato sha kwagh gbem ga, shi or a fatyô u bumen un ga. Sha mimi yô, Yehova ‘mgbough a erdoo,’ shi ka i doo un u zungwen ior mhôônom zum u a nenge wener doo u una er nahan yô. Kpa or ka nana tume ityou ken ifer a lu kwagh u nana tsa a de ga nahan, ka nyi ka i eree? Ka a lu nahan yô, Yehova ngu a er sha atindi a na a perapera, nahan a tsaha imba or la. Er Yehova yange ôr a Mose nahan, “u tsahan yô, deen ga.”—Ekesodu 34:6, 7.

18, 19. (a) Mtim u Yehova a timin mbaaferev la tseegh kpa ka ieren i mimi nena? (b) Yehova una tese mimi na a mbacivir un mba i tev ve a ican zan zan i ar ken ku la nena?

¹⁸ Tsaha u Aôndo a tsahan mbaaferev la kpa ka gbenda u tesen mtil sha mimi na. Sha nena yô? Kwagh u i nger ken takerada u Mpase u Yehova yange kaa a mbatyomov mba shaav utaankaruhar ér ve er la wase se u fan kwagh ne nahan. A kaa a ve ér: “Za nen za haa nen agbande a ataankarahar a iyugh i Aôndo i lu shimi la shin tar.” Ortyom u sha utar la hee gbande na “shin uifi man amboramnger” yô, maa ma hingir awambe. Tsô ortyom la maa kaa a Yehova ér: ‘We, U ngu u perapera, We u U lu hegen, ngise kpaa U lu la, U ngu wang sha ajir a ôron a Ou ne. Gadia ve haa awambe a uicighanmbaiorov man uprofeti kpaa, nahan U na ve awambe Wer, ve̱ ma. Kwagh ne kuma sha a ve je.’—Mpase 16:1-6

¹⁹ A lu ú ver ishima yô, ortyom ne ôr kwagh ken loho na u ijirigh la kaa ér Yehova “ngu u perapera.” Er nan ve a ôr kwagh nahana? Sha ci u mtim u Yehova una tim mbaaferev la gema tese ér un ka u perapera, u a eren kwagh sha mimi a mbacivir un mba ve kpishi i tev ve a ican zan zan je i ar ken ku la. Yehova wa amba ne ken ishima na, ngu umbur ve her zan zan. Sar un kpishi u hiden nengen a mbajighjigh mba ve kpe mban, man Bibilo kaa a vese ér á wa ishima ér una nder ve shin ku. (Yobu 14:14, 15) Mayange je Yehova hungur mbatomov nav mba mimi sha ci u kera mba uma ga yum ga. Kpa sha mnenge na yô ‘ve cii mba uma.’ (Luka 20:37, 38) Mwe u Yehova a we ishima wener una nder mba kwagh ve a lu un ken ishima ve, á lu umbur ve her la, ka ikyav i vesen i tesen mimi na.

20. Ka unô ve lu “ikav mbi i zungu mbi mhôônom” laa, man Yehova er kwagh sha mimi a ve nena?

²⁰ Er yange i gba tar je tsô, Yehova kôr eren kwagh a uumace mba jighjigh cii sha mimi tsung je. Sha kpôô yô, Yehova kôr ‘wan ishima tsung a ikyav mbi iyughuv mbi i ver mbi sha ci u mtim la’ anyom udubu udubu hegen. Ngu eren nahan ér nyi? Ngu eren nahan ‘sha er una tese iengem Na i ngeen yum la sha ikyav mbi i zungu mbi mhôônom mbi A vande veren mbi sha ci u iengem la’ yô. (Mbaromanu 9:22, 23) “Ikav mbi i zungu mbi mhôônom” ne ka mba i sar ve pe zuan a uma u tsôron, mba icighan jijingi a ver ve ér ve ya dyako u Tartor a Kristu imôngo la. (Mateu 19:28) Er Yehova a bugh gbenda u myom sha ci u ikyav mbi i zungu mbi mhôônom la yô, ngu eren kwagh sha mimi a Aberaham, gadia ngise Yehova ya ikyur a na kaa ér: “Akuraior a sha won cii aa zua a iveren ken tsombor wou, sha ci u, u we imo Yam iko yô.”—Genese 22:18.

21. (a) Yehova ngu eren kwagh a “zegeikpelaior” i mba ve lu a ishimaveren i duen ken “zegecan la” sha mimi nena? (b) Mimi u Yehova la mgbegha ú ér u er nyi?

²¹ “Zegeikpelaior” i mba ve lu a ishimaveren i va duen ken “zegecan la,” lun uma ken Paradiso shin tar gbem sha won la kpa Yehova ngu eren kwagh a ve sha mimi. (Mpase 7:9, 10, 14) Shin er mbacivir Yehova ve lu vough ga nahan kpa, a er kwagh a ve sha mimi sha u nan ve ian i lun uma gbem sha won ken paradiso shin tar. A er kwagh ne nena? A er kwagh ne sha ikyev i naagh ku ipaa, ku ku lu gbenda u vesen u Yehova a hembe tesen se mimi na cii la. (Yohane 3:16; Mbaromanu 5:8) Mimi u Yehova a lu a mi ve a eren erdoo a vese la ngu a urugh mba kwagh u perapera a gbe ve ishima la a va a ve hen a na. (Yeremia 31:3) Mtil sha mimi u Yehova a tese shi i lu una va tese ken hemen la na ka u ape kporom ikyua a na gaa? Er i sar se u kporom a Aôndo yô, se kange nen ishima se er un tom sha mimi, nahan se lu tesen ser se wuese dooshima na a vese la.