Kwaghwan U Aôndo Sha U Tsuan Or U Ú Vôso Yô
“Me pase u, shi Me tese u gbenda u ú za kpaa; Me wase u henen; ishe Yam ia lu sha a we.”—PASALMI 32:8.
1. Ka akaa a nyi a lu hange hange sha u ivese ia za a doo?
MBAAGBANDEV haa ave sha agbande a ve. Kwase u wan icam maa tôô icam a ikyenge i doon tsung zua sha agbande la kôngolôô. Kwagh ne na ityogholough mbila doo ungwan ken ato kpishi. Iorov uhar mba dughun ukôtôn mba ikyav mbi kasua shin zege mato ne. U môm la ka a ker ikyar na kôtôn, ngula di a kôr tsong a gema a ver kera shi a kegh iyol a ugen. Akaa a eren angan cii nga inja er ka akaa a taver ga nahan. Kpa ka an nana fatyô u karen gban eren kwagh ne a u vanden henen shio, ikyar i fan tom tsembelee kpa a mi ga, shi hemban cii je yô, imba kwaghwan u sha inja shin ityesen kpa nana zua a mi ga yôô? Alaghga ivese i dedoo kpaa kape ia lu inja er ka kwagh u abu je la. Nahan kpa, í kpaa í har sha ikyar i dedoo man sha iniôngon i sha inja i̱ iorov uhar man hemban cii je yô kwaghwan u dedoo. Sha mimi yô, kwaghwan u sha inja ka kwagh u hange hange.
2. (a) Ka ana yange nan ver kwagh u iveseghe, man lu sha ci u nyi? (b) Mba eren akaa a ivesegh agenegh nena?
2 Hii sha igbetar je gumor ka nana lu kwav shin kwase nana lu wankwase yô, nan henen kwagh u or u nana vôso yô—ka ikyar i nana lu a mi sha ayange a uma u nan cii je la. Er yange Yehova Aôndo ver ivese i nomsoor man kwase je tsô, ndera lun kwagh u vough u ior vea eren yô. Kpa Adam or u hiihii la, yange tsua kwase na ga. Yehova yange tese dooshima sha u nan un kwase. (Genese 2:18-24) Lu u mbahiihii mbara vea seer ingyegh zan zan tar ua kar ivin a uumace shimi cii. Mzough u ivesegh u hiihii la been kera yô, ivaa i eren hemban lun kwagh u sha ikyev i mbamaren mba kwase la man mba nomsoor la, sha ashighe agen yô i vande keren ishima i mba kwagh a lu sha ityough vev jim jim la. (Genese 21:21; 24:2-4, 58; 38:6; Yosua 15:16, 17) Er i lu keren kwase shin nom sha ci u ior ken ityar igen her shi i lu aeren a uter nahan kpaa, mbakpishiv nyian ka ve tsua or u vea vôso la ayol a ve.
3. Doo u or a tsua or u nan soo u vôson la nena?
3 Doo u or a tsua kwase shin nom u nana vôso la nena? Kwagh u a doon mbagenev yô ka kumashe—ka kwagh u ve nenge a doo ve sha ashe la. Mbagen ka ve keren mbamtsera mba iyolough, man or u nana nenge sha a ve tsembelee man u nana fatyô u kuren ugbayol vev kua asaren a ve yô. Kpa mô ken akaa ne una fatyô u van a msaanyol kua mkom ken mlu imôngo la kpa? Anzaakaa 31:30 kaa ér: “Kumashe ka icugh, dooashe ka gbilinkwagh, kwase u cian TER yô, ka nan á wuese nan ye.” Man kape tamenkwagh a lu kpaa je la: De te Yehova ken jime shighe u ú lu tsuan or u ú vôso la ga.
Kwaghwan u sha Dooshima u A Dugh hen Yehova Yô
4. Ka iwasen i nyi Aôndo a ne sha kwagh u or tsuan or u nana vôso laa?
4 Yehova, Ter wase u doon ishima, na se Mkaanem nam ma i nger sha u wasen se sha akaa cii yô. A kaa ér: “TER Orpaan wou, Icighan u Iserael, ngu kaan nahan er: Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la.” (Yesaia 48:17) Nahan, u zuan a atindi a tesen gbenda a sha shighe vough ken Bibilo sha kwagh u or tsuan or u nana vôso la ka kwagh u kpilighyol ga. Yehova soo ér ivaa yase i̱ tsa gbem shi i̱ lu saan saan kpaa. Sha nahan yô, a na se iwasen sha u se kav shi se yar tom a atindi a tesen gbenda ne yô. Ka kwagh u se ver ishima ser Orgban se u doon ishima la a̱ er ne gaa?—Pasalmi 19:8.
5. Kanyi i lu hange hange sha u van a msaanyol u ken ivese gbem sha wono?
5 Shighe u yange Yehova ver kwagh u ivesegh la, lu ishima na u i lu kwagh u gbekeke. (Marku 10:6-12; 1 Mbakorinte 7:10, 11) Kape i lu ve ‘a ker ivaa i paven ihom,’ á ne ian ér saa i lu sha ci u “idya” tseegh i̱ pav í la. (Malaki 2:13-16; Mateu 19:9) Sha nahan yô, u or tsuan or u nana vôso la ka môm ken akaa a vesen a i lu u se er yô, man ka u a tôô ér ka beerkwagh ga. Ka akaa a tsuan kpuaa tseegh a lu a tahav mbu nan se msaanyol shin nan se mzungu er ivese nahan ye. Er u tsuan nom shin kwase u injaa una fatyô u nan uma u or mkpeyol man mkom nahan kpa mtsough u sha inja ga la una fatyô u van a ijungwen i been mayange ga. (Anzaakaa 21:19; 26:21) Sha u msaanyol a̱ za hemen yô, ka hange hange u tsuan or u ú vôso la sha kwaghfan shi nán nàn ishima you tôôn ave sha gbem sha won, sha ci u Aôndo yange ver ivese ér i̱ lu mzough u zan hemen sha ijoughzwa man ijoughave.—Mateu 19:6.
6. Er nan ve i hembe doon u igyumior man igyumukase ia sule iyol tsembelee shighe u i lu tsuan or u vea vôso la, man vea tsua u a hembe doon la nena?
6 Hemban je yô, gba u agumaior man agumaukase aa kura ayol a ve sha e̱r ulum u kôron taveraa man mdoom ma iyolough mara ma a nzughul a mhen ve shighe u ve lu tsuan or u vea vôso la ga yô. Sha mimi yô, mlu imôngo u a har sha ambaakaa ne yô una fatyô u been kera fese, una gema a due ken ilyahan shin ihyom i kôron je kpaa. (2 Samuel 13:15) Kpa sha vegher ugen yô, se nguren fan or u se vese nan la kure kure shi se nguren kaven ayol ase seer a seer yô, se hingir u lun a dooshima u lun gbem la kpaa. Shi gba u se kav kpaa ser alaghga kwagh u a hembe doon sha ci wase la una lu kwagh u á lu sha ishima yase sha hiihii la ga. (Yeremia 17:9) Kape i lu ve icighan kwaghwan u a lu ken Bibilo la a lu hange hange yum je la. Ka a wase se u kaven er se fatyô u tsuan kwagh u a hembe lun sha kwaghfan cii ken uuma asev yô. Orpasalmi tile sha ityough ki Yehova kaa nahan ér: “Me pase u, shi Me tese u gbenda u ú za kpaa; Me wase u henen; ishe Yam ia lu sha a we.” (Pasalmi 32:8; Mbaheberu 4:12) Er ivese ia fatyô u ivin isharen yase i dooshima i sha marami man mlu imôngo la nahan kpaa, shi ka í va a mbamzeyol mba i gbe u or a via shi nana lu a mkav ve nana nôngo a ve yô.
7. Er nan ve mbagen ka ve venda kwaghwan u a har sha Bibilo sha kwagh u tsuan or u vea vôso laa, kpa imba gbenda ne ia za a ve hana?
7 U ungwan kwaghôron u Orhiin ivese a er sha kwagh u tsuan or u or nan soo u vôson la ka gbenda u kwaghfan. Nahan kpa, alaghga se yuwe zum u mbamaren shin mbatamen mba ken Kristu ve we se kwagh u a har sha Bibilo yô. Alaghga a lu se er ve kav se tsembelee ga nahan, shi isharen i ken ishima i ka i taver tsung la ia fatyô u mgbeghan se u dondon kwagh u a sar ishima yase la. Nahan kpa ashe a va nyian yô, alaghga se gba vaan afanyô e̱r yange se ungwa kwaghwan u sha kwaghfan u yange i wa se sha ci u iwasen yase la ga yô. (Anzaakaa 23:19; 28:26) Alaghga se kperegh iyol yase ken ivese i í lu a dooshima shio yô, shi alaghga se lu a mbayev mba se fe er se yese ve kpaa ga yô, shi alaghga je yô ikyar yase u ken ivese la una lu a jighjigh u nan a vese imôngo kpaa ga. Aluer mserakaa u ma a ve se a msaanyol la una gema a hingir gbenda u van se a ican nahan, nenge er a lu kwagh u vihin sha wono!
Mciviraôndo—Ka Kwagh u Vesen
8. Mciviraôndo ka a wase ivese u lun gbem shi van a msaanyol nena?
8 U̱ ôron kwagh sha mimi yô, ulum iyolough ka u wase sha u taver ivese gbang. Kpa mzough u inja i or zuan vea ikyar i nan la hemba ngun a inja sha u wasen mzough u ken ivese u lun gbem shi van a msaanyol cii. U civir Yehova Aôndo imôngo la ka kwagh u hemban van a mzough u tsan man u taver cii u̱ ma kwagh môm ugen una fatyô u van a mi ga yô. (Orpasenkwagh 4:12) Aluer Mbakristu mba ve vese ayol a ve la ver ishima ve sha u civir Yehova sha mimi yô, ka ve lu ken mzough ken jijingi man ken mhen man sha inja i dedoo kpaa. Ka ve henen Mkaanem ma Aôndo imôngo. Ve eren msen imôngo, man kwagh la zough asema a ve kpaa. Ka ve za mbamkombo mba Mbakristu imôngo, shi ken tom kwaghpasen kpaa ve lu imôngo. Akaa ne cii ka a wase u nyôôso mkange u ken jijingi u a kporom a ve ikyua a ayol a ve la. U hemban lun a inja je yô, kwagh ne ve a iveren i Yehova.
9. Yange Aberaham er nyi kwagh sha gbaa u keren kwase sha ci u Isaka la, man kanyi yange i va kere?
9 Er tertamen Aberaham lu or u civir Aôndo yô, a ker u eren kwagh u sha ishima i Aôndo shighe u gba u una ker kwase sha ci u wan na Isaka yô. Aberaham kaa a wanakiriki na u jighjigh la ér: “M̱ er a we, bum TER, Aôndo u Sha man Aôndo u tar, wer, ú er wan wam kwase ken ônkasev mba Mbakanaan, mba m tem hen ve ne, ga; kpa ú za ken tar wam, ken ityô yam, ka keera man ú za er wan wam Isaka kwase ye. . . . Ka [Yehova] je Una tindi ortyom Na Una hemen we, ú za er kwase keera ú na wan wam ye.” Yange Rebeka lu kwase u fan kwagh kpishi u yange doo Isaka ishima tsembelee yô.—Genese 24:3, 4, 7, 14-21, 67.
10. Ka akaa a nyi aa a har sha Ruamabera i gbe u noov man kasev vea ere?
10 Aluer se mba Mbakristu mba se lu kwav yô, mciviraôndo una wase se se lu a anza a aa na se kuma sha atindi a Ruamabera a we ér i dondon ken ivese la yô. Ken atô u ityom i noov man i kasev mbayaav vea eren la yô ka akaa a apostoli Paulu yange nger ne, ér: “Kasev, ungwan nen imo i noov enev er ka Ter nahan . . . Ne noov, kasev enev ve̱ doo ne asema di er Kristu kpaa, nongo Na u doo Un ishima man A ne iyol Na sha ci u u nahan . . . Noov kpaa, kasev vev ve̱ doo ve ishima keng er ayol a ve nahan . . . Nahan ne kpaa, hanma or kwase u nan a̱ doo nan ishima er iyol i nan nahan, kwase kpaa, a̱ cia nom u nan.” (Mbaefese 5:22-33) Er se nenge nahan, icighan mkaan i Paulu a nger ne pase var var e̱r kwagh a gbe sha dooshima man icivir yô. U yaren tom sha kwaghwan ne wa mcie u cian Yehova kpa ker sha mi. Kwagh ne gba u ú na orgen ishima you sha mimi cii ken ashighe a doon man a bo kpaa. Mbakristu mba ivese i lu saren ve yô i lu mba vea fatyô u tôôn tom ne yô.
U Tsuan Shighe u Eren Ivaa
11. (a) Kanyi kwaghwan i we sha kwagh u shighe u eren ivese la ken Ruamabera? (b) Kanyi ikyav i lu i tesen ér doo u dondon kwaghwan u ken Bibilo u i nger ken Mbakorinte 7:36 laa?
11 U fan shighe u se wa ago iyol a eren ivaa la ka kwagh u hange hange. Er kwagh ne a kahan hen ior kposo kposo yô, Ruamabera kera ver a ver anyom keng ga. Nahan kpa, a tese ér hemba kan sha inja u keghen zan zan se “kar sarbang u uye,” u asaren a yaven a kwase shin nomsoor ka a lu taveraa man i lu u aa fatyô u pirin ashe a mhen u or la. (1 Mbakorinte 7:36, NW ) Wanyekwase u i yilan iti na ér Michelle yô kaa ér: “Yange mea nenge azende am aa ningir a asôôr a ve shi vea eren ivaa, shin er mbakpishiv ken a ve lu mba ve yen anyom ikundu nahan, yange taver mo u yaren tom sha kwaghwan ne kpishi. Kpa m kav e̱r kwaghwan la a dugh hen Yehova man i lu kwagh u lun se a iwasen tseegh a er se yô. Er mlu keghen shighe u me va er nom la, m nôngo u veren ishima yam sha mlu wam vea Yehova shi zuan a mfe seer sha kwagh u uma u alaghga ú fatyô u zuan a mi shighe u ú lu anyom pue í kar a kar la ga yô. Anyom nga karen yô, m hemba lun a ago iyol u tôôn ikyav mbi ken ivese kua mbamzeyol mba i mbara kpaa.”
12. Er nan i doo u gban torough eren ivaa ga?
12 Ashighe kpishi mba ve tsue ve tum ken ivese shighe u ve lu iyev her la ka ve mase va kaven ken ganden e̱r ugbayol vev ve gem kua asaren a ve yô. Ka ve mase kaven e̱r akaa a yange ishima usan ve sha mi yum la a kera lu ve a inja ga kuaa yô. Gum Kwasekristu ugen yange har ishima na cii sha u eren nom sha anyom 16. Ka anyom a ngô na u tamen yange lu ve vôso nom je la, shi ngô u maren un jim la kpa sha zwa la. Yange ishôôr na la vende ér una vôso un sha shighe la ga yô, wankwase ti lumun orgen u lu keghen a kegh un yô ér a̱ vôso un. Kpa ken masejime yô, a vaa afanyô sha ieren na i yange torough eren la.
13. Ior mba ve er ivese iyev yev yô, kanyi ka i yina ve?
13 Shighe u i lu saren we u eren ivaa yô, a lu a inja kpishi u lun a mkav u vian tsembelee sha hanma kwagh u a lu ker cii. Ivaa i eren kôugh la ngi ve a mbamzeyol kpishi mba ior mba ve vese ayol a ve iyev yev la ka ve kan shio u sôron yô. Alaghga vea lu a mfe man mvie u a lu hange hange sha u nôngon a mbamtaver mba ken ivese shi yesen mbayev la ga. Ior ve̱ er ivaa shighe u mweyol ve man mhen ve man mlu ve u ken jijingi cii a kom u nyôron ken ikyaryan i tsan gbem la tseegh.
14. Kanyi i̱ lu hange hange sha u sôron zayol mba ken ivese?
14 Yange Paulu nger ér mba ve er ivaa yô “vea ya ican ken iyol.” (1 Mbakorinte 7:28) Mbamzeyol vea mough sha ci u ka ior ihiar kposo kposo ve zough ye, man mbamnenge vev kpaa vea kaha. Sha ci u myen u se yina la yô, alaghga a taver u ivin tom wase u Ruamabera a ne se ken mlu u ivesegh la. (1 Mbakorinte 11:3; Mbakolose 3:18, 19; Titu 2:4, 5; 1 Peteru 3:1, 2, 7) Gba u or nana via shi nana taver ken jijingi ve nana ker icighan kwaghwan shi nana dondo sha u kuren zayol mba nanden ityough kpishi sha dooshima ye.
15. Kanyi tom nahan mbamaren vea fatyô u eren sha u wan mbayev vev ago a eren ivaa? Tese ikyav.
15 Mbamaren vea fatyô u wan mbayev vev ago a ivesegh sha u wasen ve u kaven er u dondon icighan kwaghwan la i lu hange hange yô. Mbamaren vea fatyô u yaren tom a Ruamabera man ngeren mba Mbakristu sha u wasen mbayev vev u fan er ve shin mba i lu u vea vôso la vea na ayol a ve ken ivese yô.a Yange Blossom lu wankwase u lun anyom 18 tsô gba henen ér awambe zua un a gumor ugen ken tiônnongo na. Wanyekwaor ne lu or u eren tom pania hanma shighe la, maa ve soo u eren ivese je. Kpa mbamaren nav kaa ér a̱ wa ishima inyom i̱ kar i môm ve, ve lu henen ér ngu iyev yum. Ken masejime yô, Blossom nger ér: “M ngu a iwuese kpishi sha er yange m wa ikyo sha kwaghwan u dedoo la nahan. Inyom kpa yange i kar ga tsô, m hii u vian seer, tsô m gba nengen er gumor ne yange lu a anza a doon kuman u lun or u dedoo u kwase a vôso ga yô. Ken masejime yô, maa wannomso la undu nongo ne kuaa, nahan m war kwagh u yange ma vam a aahe ken uma wam la. Nenge i doo u lun a mbamaren mba lun a mhen u ú fatyô u suur sha mi sha wono!”
‘Er Ivaa ken Ter Tseegh’
16. (a) Alaghga a kar Mbakristu sha kwagh u i kaa ér i̱ ‘er ivaa ken Ter tseegh’ la nena? (b) Shighe u ishima i tsue Orkristu ker u vôson or u nan ne jighjigh ga yô, nana gbidye kwar sha nyi?
16 Kwaghwan u Yehova a we Mbakristu ngu wang, ér: ‘Er ivaa ken Ter tseegh.’ (1 Mbakorinte 7:39) Alaghga kwagh ne una lu ikyaren hen mbamaren mba ve lu Mbakristu la man mbayev vev kpaa. Sha nena yô? Alaghga ivaa ia sar agumaukase shin agumaior je kpa vea lu zuan a noov shin kasev mba sha ishima ve ken tiônnongo ga. Man ka í lu inja er kape kwagh a lu la yô. Alaghga ijiir igen yô, nomsombaiorov vea yina iyenge sha ukase, shin amba a a lu sha ishima ve la aa lu hen ningir la ga. Tsô alaghga gumor ugen u a lu ken tiônnongo ga una gba soon gumkwase Kristu (shin alaghga a lu kwase nana soo gumor ye), man a lu kumbur a nan ér nana̱ undu atindi a Yehova a we la. Aluer kwagh ngu nahan yô, a doo kpishi u gbidyen kwar sha ikyav i Aberaham la. Kwagh u yange er u lun a mlu u dedoo vea Aôndo yô lu u veren ishima sha er wan na Isaka una er kwase u civir Yehova sha mimi yô. Kape Isaka kpa yange va er di a wan na Yakob vough je la. Hanmaor cii yange nan nôngo kwagh je yina nan ga, kpa kwagh la gema doo Aôndo ishima man a ver ve iveren kpaa.—Genese 28:1-4.
17. Er nan ve alaghga ivaa i kangen vea or u nan ne jighjigh ga la ia va a afanyô a vaan, man ityôkyaa ivesen i i kaa er i̱ ‘er ivaa ken Ter tseegh’ yô kanyi?
17 Ka i kar a kar ve or u nan ne jighjigh ga la nan mase va hingir Orkristu ye. Nahan kpa, ashighe kpishi ivaa i kangen vea or u nan ne jighjigh ga la ngi kur ken afanyô a vaan. Ior mba i zough ve sha igbur i lun kwagh môm ga la mba lun a jighjigh u nan kwagh môm ga, atindi kpa nahan, man shi ishimaveren ve kpaa. (2 Mbakorinte 6:14) Kwagh ne una fatyô u van a zayol sha iliam ve ayolave kua msaanyol u ken ivese kpaa. Sha ikyav i tesen yô, kwase Kristu ugen vaa iyol tsung wener ka una ungwa kwagh ken mkombo u maan un a maa una bee yô, un kera fatyô u yemen ken ya za teman imôngo sha akaa a ken jijingi la vea nom na u a ne jighjigh ga la ga. Kpa kwagh u a hembe lun a inja je yô, u or ‘eren ivaa ken Ter tseegh’ la ka kwagh u tesen mte u nan te ikyaa a Yehova yô. Shighe u ka sea dondon Mkaanem ma Aôndo yô, asema ase ka a na se ibo ga, sha ci u se mba eren kwagh u a “doon Un” yô.—1 Yohane 3:21, 22.
18. Shighe u or nan lu nôngon u tsuan or u nana vôso la yô, kanyi akaa nahan i doo u nana ver ishima sha mini, man ka sha ci u nyi?
18 Kwagh u a hemba veren ishima sha mi zum u or lu tsuan or u nan soo u vôson yô, i lu ieren i dedoo man mlu u nan u ken jijingi la. Mlu u Orkristu kua shi mdoo u Aôndo a doo nan ishima man mcivir u nan civir un a ishima i môm la hemba kan akaa a injaa aa ulum yolough ca je. Ior mba i doo ve u eren ci ve sha u lun akar a taver ken jijingi yô, mba zough a mlumun u Aôndo. Man tahav mbu vesen mbu mba ve vese ayol a ve la vea fatyô zuan a mi yô, ka sha u civir Orgbanakaa imôngo shi lumun u dondon ityesen na vangertiôr la. Ka a̱ lu nahan yô, Yehova a zua a icivir, shi ivaa la i wa tyô sha imaagh ki ken jijingi nahan i wase í u lun kangenaa gbem.
[Footnote]
a Nenge ken Iyoukura (zwa Buter) u Febewari 15, 1999, peeji 4-8 la.
Ú Na Mlumun Wer Nyi?
• Er nan ve kwagh a gbe or sha ityesen i Aôndo sha u nana tsua or u nan soo u vôson laa?
• Mciviraôndo una wase u taver mlu u ken ivese nena?
• Mbamaren vea wa mbayev vev ago iyol sha u eren ivaa nena?
• Er nan i lu hange hange u ‘eren ivaa ken Ter tseegh’ le?
[Pictures on page 9]
U yaren tom a kwaghwan u Aôndo sha u tsuan or u ú vôso la ve a msaanyol kpishi
[Pictures on page 10]
U ‘eren ivaa ken Ter tseegh’ la ve a averen kpishi