Akaa A Van A Msaanyol Hen Tsombor

Yese Ônov Ou sha Gbenda u Vea Lu a Inja i Dedoo Yô

George:a “Hanma aikighe yô, yange i lu di kwagh shon môm tsô. Michael, wan wam u lu anyom anyiin la, yange a undu ikyav nav mbi iniumbev hen inya ken iyou sarem sarem. Nahan m soo mer a kura mbi cii man una za yav ye. Mea kaa mer, a̱ kura mbi yô, á gba vaan ngoron sha ishimavihin. Ashighe agen i lanem ishima a Michael kpishi, nahan m nande a na, kpa kwagh ne yange a na se cii ishimavihin tseegh tsô. Yange m soon mer shighe wase u yaven la a lu shighe u msaanyol. Nahan m gema kuran ikyav nav mbi iniumbev mbira iyol yam.”

Emily: “Mzeyol ne yange hii zum u Jenny, wan wam u kwase u lu anyom 13 la, kav gbenda u tica na soo ér a̱ er tom ugen u a na un ken makeranta la ga yô. Jenny yange hide makeranta iyange la, tsô gba vaan, vaa je kuma ihwa i môm. M taver Jenny ishima mer a̱ za lam a tica na la, kpa Jenny venda ér tica la vihi kwagh yum, nahan cier un iyol u za lamen a na. Ishima tsuwem ker er m kar sha ishimavihin m za sha makeranta la m za kaa tica la akaa nahan. M tôô mer or môm tsô nan ngu a ian i vihin andoon wam ishima ker nahan ga!”

ASHIGHE agen ishima ka i lu u ker er George man Emily nahanaa? Er mbamaren mba uhar mban nahan, mbamaren kpishi wan ve ka nana nôngon a ma mzeyol shin a saan nan iyol ga nahan i doo ve ga cii. Mnenge u mbamaren ve nôngon ér vea kura ônov vev la ka kwagh u sha gbaaôndo. Kpa, kwagh u yange er mbamaren mba uhar mban ne, na ve ian i ma ve tese ônov vev mban ityesen i injaa i wasen ve u lun a inja i dedoo. Kpa, ityesen i injaa i wan u anyom anyiin nana hen la kaha a i wan u anyom 13 nana hen yô.

Kpa sha mimi yô, u za hemen u lun vea wan wou hanma shighe sha er ú kuran un sha ikyev i mbamtaver mba una tagher a mi ken uma na la ga. Wanye ka nan va hingir u undun ter man ngô u nan, nahan nan hingir ‘u tôôn ikyav mbi’ nan iyol i nan. (Mbagalatia 6:5; Genese 2:24) Aluer mbamaren soo ér ônov vev ve nenge sha ayol a ve tsembelee yô, gba u vea ver ishima sha u tesen ve sha gbenda u vea vese vea hingir mbaganden mba tangen iyol ga, man mba wan mbagenev ikyo shi lun a inja i dedoo kpaa yô. Kwagh ne ka tom u kiriki ga!

Kpa kwagh er doo yô, Yesu ver mbamaren ikyav i doon tsung sha gbenda u yange eren kwagh a mbahenen nav la. Yesu yange lu a ônov ga. Kpa ityôkyaa i Yesu tsua ior mba vea lu mbahenen nav shi tese ve yô, lu sha u wan ve agoyol sha er vea za hemen a tom na, kua sha shighe u una hide a yem sha la kpaa yô. (Mateu 28:19, 20) Kwagh u Yesu er ne ngu kwagh môm a awashima u hanma ormaren ka nan lu a mi sha u nana yese ônov mba lun a inja i dedoo la. Time ase sha akaa atar tseegh ken ikyav i Yesu yange ver mbamaren la.

Ver Ônov Ou “Ikyav” Shighe u ku u Yesu lu mgbôghom la, Yesu kaa a mbahenen nav ér: “M ver ne ikyav i tesen sha er ne kpaa er nen er M er [a ven] nahan.” (Yohane 13:15) Nahan mbamaren kpa, gba u vea pase ônov vev kwagh u a lu inja i dedoo yô, shi ve ayol a ve kpa vea lu a inja i dedoo sha er ônov vea nenge ikyav ken a ve yô.

Pine Iyol You Wer: ‘Hanma shighe yô, m er kwagh u ityom yam i m eren la sha inja kpa? M er kwagh u msaanyol u ka m zua a mi sha u eren tom kpoghuloo sha ci u mbagenev la kpa? Shin m gbe ahon hanma shighe shi m karen iyol yam sha mba i lu inja er mba yan tar kpishi laa?’

Sha kpôô yô, or môm ngu vough, a mshi shio ga. Se cii, mbamzeyol mba yoho se ikyav ashighe agen. Kpa ikyav you i u veren ônov ou la hemba kan gbenda u vesen u ú wase ve u nengen er inja i dedoo i lu kwagh u injaa, u lun a iwasen kpishi yô.

KAR KWAGH NE: Aluer gba sha mi yô, ashighe agen ú tôô wan wou ú za a na hen ijiirtom you, ú za tese un kwagh u ú eren ú zough a inyaregh ki koson tsombor a mi la. Kua a wan wou za wase nen ma or u nan soo iwasen yô. Ne hiden cii yô, lam nen sha msaanyol u ne zough a mi ken tom shon la.—Aerenakaa 20:35.

Lu a Ishimaveren i Vough Yesu yange fa ér shighe una kar cii ve mbahenen nav vea mase kuman u eren ityom kua akaa agen a yange lu veren ishima ér ve̱ er la ye. Yange kaa a ve sha anshighe ugen la ér: “Akaa shim kpishi a ma M er ne yô, kpa ne kôr a cio hegen ga.” (Yohane 16:12) Yesu yange kaa a mbahenen nav ér ve̱ er ma kwagh ayol a ve shighe u ve hingir mbahenen nav sember sember la ga. Kpa a tôô shighe a tese ve akaa kpishi. Yange va fe ér mbahenen nav kuma u una fatyô u tindin ve tom ve tseegh yô, maa a tindi ve hen shighe la.

Nahan mbamaren kpa, aluer ve hii u nan mbayev vev ityom i mbaganden, i ve lu a kuma u eren ga yô, a doo ga. Nahan kpa, er ônov ve lu vesen la, mbamaren vea fatyô u wan ve ityom i í kom sha a ve yô. U tesen ikyav yô, gba u mbamaren vea tese ônov vev u eren akaa a aa wase ve u lun tsembelee sha iyol, shi esen ruum-you ve ker shi eren kwagh sha shighe shi vihin inyaregh sha inja kpaa. Zum u wanye nan hii makeranta yô, doo u mbamaren vea wase wan la nana nengen tom u ken makeranta, u i ne nan ér nana va er hen ya la ér ka tom u injaa u i gbe u nana er keng yô.

Gba u mbamaren vea na wan ve tom maa vea aa nan a mi ga. Gba u shi vea wase wan ve la sha er nana kôr cio u eren u yô. George, ter u Michael u se vande ôron kwagh na la, yange va hingir u fan ityôkyaa i môm i yange una kaa a Michael ér a̱ kura ikyav nav mbi iniumbev mbira ve i vihi un yô. Tom la yange u ngee un yum. George kaa ér, “u gban ngoron a Michael tsô mer a̱ kura ikyav nav mbi iniumbev mbira kera la, doo ga, nahan m nôngo u tese un gbenda u una kar ve una er tom ne yô.”

Kanyi jighilii yange George eree? A kaa ér, “hiihii yô, m ver shighe u una kuran ikyav nav mbi iniumbev mbira kera hanma tugh yô. Hanma tugh yô m er tom ne imôngo vea Michael, se er u kure kure se tser ruum-you jimin cii. M gema tom ne hingir iniumbe, je yô se gema gban gesa u or nana vande been la. Ica gba ga je tsô, kwagh ne hingir kwagh u se eren cii man se yaven ye. M tôndo zwa a Michael mer hanma shighe u a bee tom ne fese yô, me hemba ôron un akaa a uter mba tsev cii man una yav ye. Kpa aluer a bee fele ga yô, me ôr un akaa a uter mba tsev kpuaa tseegh.”

KAR KWAGH NE: Gbidye kwar fa tom u hanma wan wou nana kôr cio u eren sha er akaa aa za hemen hen ya wou sha inja yô. Pine iyol you wer: ‘Akaa nga a m lu eren ônov av heregh, a vea fatyô u eren ayol a ve yôô?’ Aluer ka nahan yô, eren akaa ne vea ônov ou zan zan ú va nengen wer ve̱ kuma u eren ityom ne ayol a ve hegen yô, maa undu ve a mi. Pase ve wang wer, aluer ve er tom u ú we ve la tsembelee yô u na ve injar i dedoo, kpa vea er u nahan ga yô, vea zua a injar i bo. Nahan, ve̱ zua a kwagh u i doo u vea zua a mi la, a̱ lu injar i bo shin i dedoo kpaa.

Tese Ve Kwagh u i Lu u Vea Er Jighilii Yô Yesu lu er atica a injaa agen nahan, gadia a fa dedoo ér gbenda u hemban doon u henen kwagh yô, ka u eren kwagh shon. U tesen ikyav yô, Yesu yange va fe ér shighe kuma u una tindi mbahenen nav yô, á tindi ve “uhar uhar er, ve̱ hira hemen ve̱ za hen hanma gar man hanma idiôya i i lu Un ka zan her la yô.” (Luka 10:1) Nahan kpa, yange kenden ve a u ôron ve kwagh u vea er shio ga. Cii man a̱ tindi ve yô, a ôr ve kwagh u i lu u vea er jighilii yô. (Luka 10:2-12) Zum u mbahenen za hide, gba va ôron Yesu er tom la u ze yô, á wuese ve shi a taver ve ishima kpaa. (Luka 10:17-24) Yange ôr kwagh u tesen vangertiôr na ken a ve, shi pase ve er un lumun ve yô.

Ka a gba u ônov ou vea er ityom i taver nahan ka u er nena? Ka u nôngo wer u yange ve u tagher vanger a ityom i cier ve iyol, shi u kura ve sha er vea ya kunya ga shi kwagh u ve lu eren la una hemba ve ga yôô? Alaghga kwagh u hiihii u ú soo u eren yô, á lu u karen ngohol tom la eren u iyol you.

Kpa hen sha kwagh ne: Hanma kwa u ú kar kpase ú er tom u i gbe u ônov ou vea er la yô, ieren you la ngi kaan a ve ér nyi? U ngu tesen ve wer u ngu a vangertiôr ken a ve shi u na jighjigh wer vea fatyô u eren kwagh ayol a ve je kpa? Shin u ngu kaan a ve wer, zan zan hegen kpa u nenge wer mba er anikyundanev mba lun a mpe iyol ga, mba i lu u ú wasen ve sha hanma kwagh cii yôô?

U tesen ikyav yô, Emily u se vande ôron kwagh na la, yange sôr mzeyol u wan na u kwase la nena? Er ma wa uwegh sha kwagh ne yô, de wener Jenny a̱ za lam a tica na la iyol na. Nahan Emily tema vea Jenny ve nger mbampin mba Jenny una za a mi ken makeranta yô. Mba ngeren ve cii yô, ve ôr shighe u una za kohol tica la una lam a na yô. Shi ve wa agoyol sha gbenda u alaghga iliam shon ia za la. Emily kaa ér, “Jenny zua a ishimataver i za lamen a tica na; tica la wuese un er a va lam a na yô. Kwagh ne yange doo Jenny kpishi, shi mo kpa doom a na kpen kpen.”

KAR KWAGH NE: Nger ma mtaver u wan wou nan lu tagher a mi hegen yô. Nger kwagh u ú er ve ú wase nan nana hemba mtaver shon, ú gema u yange nan a yange u tagher ishigh a mi ga yô. Nger kwagh ne ikyua a ijiir i u nger mtaver shon la. Tema imôngo vea wan wou, wa nen agoyol sha igbenda i nana kar sha mi ve nana hemba mtaver ne yô. Ôr kwagh u tesen wer u ngu a vangertiôr ken a nan.

Aluer hanma shighe cii, u ngu yangen ônov ou u tagher ishigh a mbamtaver yô, alaghga u lu yangen ve u zuan mfe u sôron mbamzeyol vev. Hemba doon u ú wa ônov ou agoyol sha u yesen ve sha gbenda u vea eren ityom ve ayol a ve yô. U er nahan yô, u lu nan ve kwagh u a lu môm ken akaa a hemban doo cii aa u na ve yô.

[Ngeren u shin kpe]

PINE IYOL YOU WER . . .

▪ Akaa a m ver ishima mer ônov av ve eren la ka akaa a vea fatyô u eren mimi yôô?

▪ M er ve shi m tesen ve er vea kar ve vea kôr cio u eren ma kwagh kpa?

▪ Ka hanma kwa nahan, m mase taver wan wam ishima sha kwagh shin m wuese unuu?