Kwagh u Yehova ka a hen sha mi cii ve a nenge aluer or kuma u una de nan a kwaghbo yô, ka a nenge aluer or la yange nan fa dedoo ér kwagh u nan lu eren la ka kwaghbo yô. Yesu yange pase kwagh ne wang ken Luka 12:47, 48. Aluer or vande wan iyol u eren kwagh u ifer, man nan fa dedoo ér kwagh u nan lu eren la ka kwagh u vihin Aôndo yô, nan ngu eren isholibo i vesen. Alaghga Yehova una de imba or la isholibo i nan ga. (Mar. 3:29; Yoh. 9:41) Yehova una fatyô u den imba kwaghbo la je kpa? Een! Yehova shi ka a nenge aluer orsholibo la nan gema ishima sha mimi yô. Ka a kaa ér or gema ishima yô, “nan gema mhen u nan, shin ieren i nan, shin awashima u yange nan lu a mi la.” Heela tseegh ga, ka nan vaa afanyô, shi ishima i vihi nan kpishi sha akaabo a yange nan er la, shin sha akaa a dedoo a yange ma nan er kpa nan er ga la. Or u nan gema ishima yô, ishima vihin nan sha akaabo a nan er la tseegh ga, kpa ishima ka i vihi nan er nan lu vea Yehova kôôsôô ga ve nan za hingir u eren ambaakaa la yô. w22.06 5-6 ¶15-17

Mbaihyomov asev ka ve samber a mbaaie sha kwagh u anmgbianev mba ve lu hemen ken nongo u Yehova la shi ve ôr akaa a mimi ga sha iyol ve, man ka sha igbenda i i samber a abaver, kua sha ajiir a i lamen a ior sha Intanet la je ve eren kwagh ne ye. (Ps. 31:13) Ka i kôr anmgbianev mbagenev i za wa ve ijir ér mba mbaaferev. Mbakristu mba hiihii mbara kpa yange ve tagher a imbakwagh ne, shighe u i wa apostoli Paulu kwagh iyol shi i kôr un la. Shighe u i wuhe apostoli Paulu ken purusu ken Roma la, Mbakristu mbagenev sha ayange la de u wasen un. (2 Tim. 1:8, 15; 2:8, 9) Hen ase er yange a lu Paulu ken ishima la. Yange tagher a mbamzeyol kpishi, kpa taver ishima her, je yô mbamzeyol mbara war wuan un. (Aer. 20:18-21; 2 Kor. 1:8) Mayange se lu nen er ior mba ve undu Paulu la nahan ga! Nahan i de kpiligh se iyol er i hii ve i lu anmgbianev mba ve hemen hen atô wase la je Satan a lu hemban tan num sha a ve ga. A soo ér anmgbianev mban ve de u suur sha Yehova, shi mciem ma gba se iyol. (1 Pet. 5:8) Za hemen u wasen anmgbianev ou, shi mayange de undun ve ga.—2 Tim. 1:16-18. w22.11 16-17 ¶8-11

Iferor u va gema ishima u i mande un ikyua a Yesu la yange una lu Oryuda. Mbayuda yange ve civir Aôndo môm tseegh, kpa ior mba ken akuraior na mbaaôndo kpishi jighjigh. (Eks. 20:2, 3; 1 Kor. 8:5, 6) Iferor la yange una lu or u ken akuraior yô, ngura ma pine mpin u a lu ivur i sha iyange i nyian ne ér, “Mbaaôndo je kpa u cie gaa?” Heela tseegh ga, yange i tindi Yesu lu hen ior mba ken akuraior ga, kpa lu “hen iyôngo i ya u Iserael i i saa la tseegh.” (Mat. 15:24) Shi Aôndo pase Mbaiserael fa er un lu va nderen mbakpenev shin ku yô. Iferor u va gema ishima la yange una fa kwagh ne, shi mkaanem nam mara tese je ér yange tôô ér Yehova ngu va nderen Yesu shin ku ér a lu Tor u hemen Tartor u Aôndo. Kwagh ne tese ér or la yange lu a ishimaverenkeghen ér Aôndo una va nder un shin ku. Er iferor u gema ishima ne lu Oryuda yô, yange una fa kwagh u Adam man Ifa. Sha nahan yô, iferor la yange una fa dedoo je ér Paradiso u Yesu ôr kwagh na ken Luka 23:43 la una lu ijiir i doonashe shin tar.—Gen. 2:15. w22.12 8-9 ¶2-3