Ka Nyi i Lu Tartor u Aôndo?

 1. Ka msen u ior ve fe un wuee u nyi se lu timen sha mini?

IOR umiliôn imôngo fa msen u Ter Wase la. Yesu yange er msen ne sha u tesen mbahenen nav er vea eren msen yô. Yange er msen ne sôn nyi man nyi? Msen ne ngu se a inja nyian sha ci u nyi?

 2. Ka akaa atar a hange hange a nyi Yesu yange tese se ér se sônon ken msene?

² Yesu yange kaa ér: “Eren nen msen nahan, ner: Ter wase u Sha, i̱ tsegha iti You, tartor Wou u̱ va, i̱ er ishima You shin tar kpaa vough er i eren i Sha nahan.” (Ôr Mateu 6:9-13.) Yesu yange tese se u eren msen sônon akaa a atar ne sha ci u nyi?—Nenge Ngeren u Seer Tan Iwanger u sha 20, peeji 216.

 3. Ka nyi i gbe u se fa sha kwagh u Tartor u Aôndo?

³ I pase ken ityough ki sha 1 ér iti i Aôndo ér Yehova. Shi se hen kwagh u awashima u Aôndo sha ci u uumace man tar. Kpa kwagh u Yesu kaa ér: “Tartor Wou u̱ va” la inja na ér nyi? Se lu timen sha kwagh u a lu Tartor u Aôndo yô, man kwagh u ua er sha ci wase la, kua er ua tsegha iti i Aôndo la kpaa.

 4. Ka nyi i lu Tartor u Aôndo, man ka an nan lu Tor u Tartor shono?

⁴ Yehova ver gomoti na sha, gema tsua Yesu ér a lu Tor u gomoti shon. Bibilo yila gomoti ne ér Tartor u Aôndo. Yesu ka “Tor u utor man Ter u uter kpaa.” (1 Timoteu 6:15) Yesu hemba fan u eren akaa a dedoo a hanma tor u shin tar ne cii, shi hemba ngun a tahav a ator a tar ne jimin ci.

 5. Gomoti u Aôndo la due hana, man una hemen hana?

⁵ Yange i nder Yesu shin ku, ayange nga kar akunduahar yô, a hide a yem sha. Shighe kar yô, Yehova ver un Tor sha Tartor na la. (Aerenakaa 2:33) Nahan gomoti u Aôndo la due ka sha, kpa una gema a hemen tar cii. (Mpase 11:15) Ka nahan ve Bibilo i yer Tartor u Aôndo ér ‘Tartor u Sha’ ye.—2 Timoteu 4:18.

6, 7. Ka nyi i ne ve Yesu a hembe lun Tor u injaa a hanma orumace u nan lu tor ciili?

⁶ Bibilo kaa ér Yesu hemba utor mba uumace cii, sha ci u “ka un tseegh A lu u kpen ga ye.” (1 Timoteu 6:16) Utor mba uumace cii ka ve va kpe, kpa Yesu yô, una kpe mayange ga. Kwagh ne tese ér akaa a dedoo a Yesu una er la cii a tsa gbem sha won.

⁷ Kwaghôron u profeti u ken Bibilo kaa ér Yesu una lu Tor u perapera man u zungwen mhôônom. “Jijingi u TER Una lu sha a Na, ka Jijingi u kwaghfan man u mkav, Jijingi u wasen henen kwagh man u ageegh, Jijingi u mfe man u cian TER. Á doo Un iyol a mcie u cian TER la; Una gba ôron ijir sha kwagh u A nenge sha ashe tsô ga, kwagh kpaa Una gba kuren sha er A ongo sha ato Na tsô ga, kpa ka sha perapera Una ôr ijir i mbaatsanev ye.” (Yesaia 11:2-4) Sar u u lun a imba Tor laa?

 8. Er nan se fe ser Yesu una hemen tswen ga?

⁸ Aôndo tsua uumace mbagenev ér ve za tema tor vea Yesu sha. U tesen ikyav yô, apostoli Paulu yange kaa a Timoteu ér: “Aluer se wa ishima yô, sé ya tor a Na imôngo.” (2 Timoteu 2:12) Ka iorov ume vea va tema tor a Yesu imôngôô?

 9. Ka iorov ume vea za tema tor vea Yesu, man lu hanma shighe Aôndo hii u tsuan ve?

⁹ Se time ken Ityough ki sha 7 se fa ser, yange i na apostoli Yohane mpase u sha mnenge, nahan a nenge a Yesu tema Tor sha vea iorov 144,000. Iorov mba 144,000 mban ka unô? Yohane pase ér “i nger iti [i Yesu] man shi iti i Ter Na sha atsul a ve.” Shi a kaa ér: “Ka ve ve lu dondon Waniyôngo hen ape A ze cii ye, ka mba i paa ve ken ior” yô. (Ôr Mpase 14:1, 4.) Iorov 144,000 mban ka Mbakristu mba jighjigh mba Aôndo a tsough ve ér ve “tema tor sha tar” vea Yesu imôngo yô. Ka vea kpe yô, i nder ve shin ku, ve yem ve za lu sha. (Mpase 5:10) Hii sha shighe u mbaapostoli la je, Yehova hii u tsuan Mbakristu mba jighjigh mban sha u ve iv iyenge i ator 144,000 ne.

10. Er Yehova a soo ér Yesu man iorov 144,000 ve hemen se yô, tese ér a wa se ikyo sha ci u nyi?

¹⁰ Yehova wa se ikyo kpishi, ka nahan ve a soo ér uumace mbagenev vea Yesu ve hemen se ye. Yesu una lu orhemen u dedoo sha ci u a fa kwagh wase. A fa mlu u orumace man ican i nan ye la cii. Paulu yange kaa ér mhôônom ma ker Yesu a vese, una fatyô u “zungwen a vese imôngo ken aseer a ase,” shi i “mee Un sha hanma gbenda cii vough er se nahan.” (Mbaheberu 4:15; 5:8) Mba 144,000 mbara kpa fa mlu u orumace. Ve kpa ve nôngo a mbamyen vev shi ve wa ishima a iangev atô kposo kposo. Se nan jighjigh ser Yesu kua mba 144,000 mban kav er i lu se ken ishima yô, shi ve fa mbamzeyol mba se tagher a mi la kpaa.

11. Er nan ve Yesu wa mbahenen nav kwagh ér ve sôn i gema eren ishima i Aôndo sha?

¹¹ Yesu yange wa mbahenen nav kwagh ér ve sôn i gema eren ishima i Aôndo sha. Sha ci u nyi? I pase ken Ityough ki sha 3 ér Satan Diabolo yange hemba Yehova ato. Yange hembe ato yô, Yehova de un vea mbatyomov mbagenev mba hemban ato mbara, ka azôv je la, ve lu sha anshighe wa karen. Nahan kwagh ne tese ér mbagenev ken mbatyomov mba shaav lu eren ishima i Aôndo ga. Se va seer henen kwagh u Satan man azôv ne ken Ityough ki sha 10 kira

12. Ka akaa a vesen ahar a nyi i er kwagh u a ken Mpase 12:10?

¹² Bibilo kaa ér yange mba ne Yesu Tor u Tartor u Aôndo yô, kera ngôôr ga maa nôngo ityav a Satan. (Ôr Mpase 12:7-10.) Ivur i sha 10 la pase akaa a vesen ahar a yange er yô. Hiihii yô, Yesu Kristu hii u hemen sha Tartor u Aôndo. U sha uhar yô, i daa Satan sha i gbihi un shin tar. Er se va nenge nahan, akaa ne cii vande eren kera.

13. Lu nyi i za hemen shighe u i daa Satan sha laa?

¹³ Bibilo pase msaanyol u mbatyomov mba jighjigh mbara yange ve zua a mi zum u i daa Satan man azôv a na sha i gbihi shin tar la. I̱ kaa ér: “Ember nen ne Usha, man shi ne mba ne tem ker kpaa.” (Mpase 12:12) Mbatyomov mba shaav cii mba ken bem man mzough hegen, sha ci u hanmô ve nan ngu eren ishima i Aôndo.

14. Er i daa Satan sha i gbihi un shin tar yô, ka zayol u nyi a ve a mini?

¹⁴ Kpa shin tar yô, kwagh ngu nahan ga. Ior mba tagher a mbamzeyol mba vihin tsung “gadia diabolo sen shin” tar, shi “ishima vihi un tsung gadia a fa er shighe na a kera vese ga yô.” (Mpase 12:12) Ishima vihi Satan ker. I daa un sha i gbihi shin tar shi a fa ér ica a gba ga tsô a tim un kera. Nahan ngu nôngon sha afatyô na cii ér tar u iv a zayol man mnyoon man ican.

15. Ka nyi Aôndo a we ishima u eren sha ci u tara?

¹⁵ Kpa Aôndo gema awashima na sha ci u tar ga. Hegen kpa a soo ér uumace mba lun vough ve lu uma gbem sha won ken paradiso shin tar. (Pasalmi 37:29) Tartor u Aôndo ua er kwagh ne nena?

16, 17. Daniel 2:44 pase se nyi sha kwagh u Tartor u Aôndo?

¹⁶ Kwaghôron u profeti u i er ken Daniel 2:44 la kaa ér: “Sha ayange a utor mbara, Aôndo u Sha Una ver tartor ugen u ua gba mayange ga yô, man shi tahav mbu u kpaa mbua hingir sha ikyev i ma ikyur igen ga, kpa ua hembe ityartor igen ne cii avur avur, ua tim i, kpa u yô, ua lu gbem sha won.” Kwaghôron u profeti ne tese se nyi sha kwagh u Tartor u Aôndo?

¹⁷ Hiihii yô, kwaghôron u profeti la kaa ér Tartor u Aôndo ua hii u hemen “sha ayange a utor mbara.” Inja na yô, ugomoti mba tar ne vea lu her shighe u Tartor la ua hii u hemen la. U sha uhar yô, a pase se ér Tartor u Aôndo ua lu gbem sha won, ma gomoti ugen una kar a tile sha ityough ki u mayange ga. Man u sha utar yô, kwaghôron u profeti la kaa ér Tartor u Aôndo ua nôngo ityav a ugomoti mba tar ne. Kpa Tartor u Aôndo ua hemba, nahan a lu u tseegh ua lu gomoti u hemen tar cii ye. Hen shighe la uumace vea lu a gomoti u hemban doon, u i gbe je ve lu a zua a mi ga yô.

18. I yila ityav mbi masetyô mbi Tartor u Aôndo ua nôngo a ugomoti mba tar ne la ér nyi?

¹⁸ Ka nyi Tartor u Aôndo ua er cii man ua kar a hemen tar ciili? Cii man i̱ nôngo ityav mbi masetyô mbi i yer ér Armagedon la yô, azôv aa bume “utor mba sha tar sha won cii sha u kohol ve ijiir i môm sha ci u ityav mbi iyange i vesen i Aôndo, Uhembanagee la.” Ugomoti mba tar ne vea nôngo ityav a Tartor u Aôndo.—Mpase 16:14, 16; nenge Ngeren u Seer Tan Iwanger u sha 10.

19, 20. Er nan ve i sar se u Tartor u Aôndo u hemen tara?

¹⁹ Sar se u Tartor u Aôndo u va sha ci u nyi? Atôakyaa nga kpishi, kpa se ter atar tseegh. Ityôkyaa i hiihii yô, se mba mbaasorabo, nahan ka se gba angev shi se kpe. Kpa Bibilo kaa ér shighe u Tartor u Aôndo ua lu hemen se la, se lu uma gbem sha won. Yohane 3:16 kaa ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.”

²⁰ Ityôkyaa i sha uhar i i sar se u Tartor u Aôndo u va yô, ka sha ci u mbaaferev kase se wa atô. Ior kpishi mba a mimi iyol ga, mba nyighen ior shi ve wa ijimba kpaa. Se tseegh se fatyô u karen a ve kera ga, kpa Aôndo yô una fatyô. Ior mba ve ze hemen u eren aferakaa la a va tim ve sha shighe u Armagedon la. (Ôr Pasalmi 37:10.) Ityôkyaa i sha utar yô, ugomoti mba uumace yina, shi ve wa ipila kua anyighe kpaa. Kwagh gba ve u wasen ior ér ve ungwa imo i Aôndo ga. Bibilo kaa ér “or ka nana lu a tahav sha orgen yô, nan eren nan ican.”—Orpasenkwagh 8:9.

21. Tartor u Aôndo ua na a gema eren ishima i Aôndo shin tar nena?

²¹ Armagedon una karen kera yô, Tartor u Aôndo ua na a gema eren ishima i Aôndo shin tar. U tesen ikyav yô, ua tim Satan man azôv a na kera. (Mpase 20:1-3) Ken masejime yô, or môm nana kera gba angev shin nana kpe ga. Naagh ku ipaan ku Yesu kura kua na yô, uumace mba jighjigh cii vea fatyô u lun uma ken paradiso shin tar gbem sha won. (Mpase 22:1-3) Tartor la ua tsegha iti i Aôndo. Inja na yô, shighe u gomoti u Aôndo una hemen tar cii la, uumace cii vea na iti i Yehova icivir.—Nenge Ngeren u Seer Tan Iwanger u sha 21, peeji 216.

22. Hii nan se fe ser Yesu yange hingir Tor shighe u lu shin tar la ga, shi shighe u i nder un shin ku la kpa i na un Tor ave ave ga?

²² Yesu yange tese mbahenen nav ér ve eren msen ve sônon ér: “Tartor Wou u̱ va.” Kwagh ne lu tesen ér gomoti u Aôndo la una va a lu ken hemen. Lu u Yehova una hii veren gomoti shon sha, shi una ver Yesu ér a lu Tor u gomoti shon. Yange Yesu hide yem sha je maa i ver un Tor ave avee? Ei, yange gba u una kegh. Shighe u i nder Yesu shin ku ica lu a gba ga la, Peteru man Paulu cii yange ve pase shighe u kwaghôron u profeti u i nger ken Pasalmi 110:1 la una kure la wang. Yehova kaa a Yesu ken kwaghôron u profeti la ér: “Temam ken uwegh ku yanegh, zan zan Me gema mbaihyomov Ou, vea hingir We kwagh u pendan angahar sha mi.” (Aerenakaa 2:32-35; Mbaheberu 10:12, 13) Lu u Yesu una kegh a kuma shighe nena ve a na un Toro?

23. (a) Lu hanma shighe i ver Yesu Tor hii u hemen ken gomoti u Aôndo laa? (b) Ka nyi se lu timen sha mi ken ityough ki ki dondo nee?

²³ Cii man inyom i 1914 yô, annongo u Mbakristu mba mimi tsenga fan anyom imôngo ken ijime ér kwaghôron u profeti u vesen una kure ken inyom shon. Akaa a a ze hemen sha tar hii ken inyom i 1914 la je tese ér mfe ve la lu u mimi. Lu ken inyom la i ver Yesu Tor hii u hemen ye. (Pasalmi 110:2) Ica kera gba ga maa i daa Satan sha i gbihi shin tar, nahan ‘shighe u Satan kera shi vese ga.’ (Mpase 12:12) Ken ityough ki dondon kin, se seer timen sha akav a a tese ér se mba ken ayange a masejime yô. Shi se nenge er ica a kera gba ga tsô Tartor u Aôndo ua na a gema eren ishima i Aôndo shin tar la kpaa.—Nenge Ngeren u Seer Tan Iwanger u sha 22, peeji 217.