Mbampin Mba Mbaôron Takeda Ne Ve Pin la

Ei. Bibilo shin ma takeda u yiase tese ér kwagh lu nahan ga.

Gbenda u i gem ivur ne ken Ubibilo mbagenev la na yô, ior mbagen hen ér Mbakristu mba sha ayange a tsuaa la yange ve eren batisema sha ci u mbakpenev. U tesen ikyav yô, i gema ivur ne ér: “Aluer mba nderen mbakpenev mayange je ga yô, ka nyi man i eren ior mbara batisema sha ci ve?”—Icighan Bibilo.

Nahan kpa, nenge ase kwagh u iorov uhar mba ve ngeren akaa sha akaa a ken Bibilo ve ôr yô. U môm mba yer iti na ér Dr. Gregory Lockwood. A kaa ér, Bibilo shin ityakeda i yiase tese ér yange or môm er batisema “sha ci u orkpen ga.” Ugen la di mba yer iti na ér Profesô Gordon D. Fee. Un kpa yange ôr kwagh za nahan. A nger ér: ‘Kwagh môm ngu ken Bibilo shin yiase u a tese ér yange i er or imba batisema ne ga. A kaa ér i ôr imbakwagh la ken Ikyuryan i He ga, shi kwagh môm ngu u a tese ér Mbakristu mba sha ayange a tsuaa la er kwagh ne shin i er kwagh nahan ken iniongo i kwaghaôndo i i bugh shighe u mbaapostoli kpe kera la kpaa ga.’

Bibilo kaa ér yange gba u mbadondon Yesu vea ‘za gema ior mba ken akuraior cii vea hingir mbahenen, vea eren ve batisema shi vea tesen ve u kuran atindi a Yesu wa ve la cii.’ (Mat. 28:19, 20) Cii ve or a hingir orhenen u nan er batisema yô, yange i gba u nana hen kwagh u Yehova man Wan Na shi nana na ve jighjigh shi nana ungwan imo ve kpaa. Kwagh ne lu kwagh u or u nan kpe, i ii nan nana fatyô u eren ga yô, shi lu kwagh u Orkristu u nan lu uma nana fatyô u eren sha ci u orkpen la ga yô.—Orpa. 9:5, 10; Yoh. 4:1; 1 Kor. 1:14-16.

Nahan lu nyi jim Paulu lu ôrono?

Ior mbagen ken Korinte yange ve kaa ér ka nderen mbakpenev ga. (1 Kor. 15:12) Paulu yange tese ve er mnenge ve la lu u shami ga yô. Yange er kwagh ne nena? A kaa ér: “Ka m tagher ishigh a ku hanma iyange.” Nahan kpa shighe ne lu uma her. Er lu tagher a akaabo nahan kpa, lu a vangertiôr ér shighe u una kpe yô, a va nder un una yem sha er Yesu nahan.—1 Kor. 15:30-32, 42-44.

Yange gba u ior mba ken Korinte mban vea fa ér, er ve lu Mbakristu mba i shigh ve mkurem yô, vea lu tagher a akaa a karen jighjigh ve hanma sev shi a gba u vea kpe cii ve a nder ve ye. Sha nahan yô, er yange ‘i er ve batisema ve hingir ken mzough vea Kristu Yesu’ yô, a gba u ‘vea kpe a na imôngo’ kpaa. (Rom. 6:3) Nahan lu u vea tagher a akaa a karen jighjigh ve shi vea kpe er Yesu nahan sha er a nder ve vea yem sha yô.

Yesu yange er batisema shighe kar ka hembe anyom ahar nahan yô, a kaa a mbaapostoli nav ér: “A va er ne batisema u i lu eren mo la.” (Mar. 10:38, 39) Yange i lu eren Yesu batisema shin mnger hen shighe ne ga. Nahan Yesu lu kaan ér, er un lu civir Aôndo sha mimi yô, kwagh la una za a na ken ku. Paulu nger ér mba i shigh ve mkurem la vea ‘ya ican vea na imôngo sha er a va ver ve sha ian i icivirigh a na imôngo yô.’ (Rom. 8:16, 17; 2 Kor. 4:17) Nahan ve kpa a gba u vea kpe, a nder ve, ve vea za lu uma sha ye.

Sha nahan yô, a fatyô u ôron mkaanem ma Paulu ôr man wang nahan ér: “Aluer ka u a nder mbakpenev ga yô, mba i lu eren ve batisema sha u ve̱ kpe la vea er nena? Aluer ka u a nder mbakpenev ga kuaa yô, ityôkyaa i ve kpa i lu eren ve imba batisema la yô ka nyi?”