Anmgbianev Asev mba Ve Bee Iyol la Ve Gba U Kwagh

1-2. (a) Anzaakaa 16:31 tese ér, doo u se nengen mbabeenyol mba ve civir Yehova sha mimi la nena? (b) Ka mbampin mba han se lu nan mlumun sha mi ken ngeren nee?

DAIMONDI ka iwen i injaa i ka i er akaa a hwegh a mi, a engem kpishi yô. Kpa shighe u i lu a er ambaakaa la a iwen ne ga yô, ngi engem nahan ga. Nahan aluer u vande fan daimondi ga yô, u nenge a iwen i injaa ne hen inya kpa u kar u yem kwagh wou.

² Anmgbianev asev mba ve beel iyol la mba er daimondi nahan; mba se a inja kpishi. Mkaanem ma Aôndo tôô ivu ve i sha ityou la kar sha tsar u sha ityou u icivirigh. (Ôr Anzaakaa 16:31; 20:29) Nahan kpa, aluer se kenger mba ve gbe kwagh yum ne sha iyol tseegh yô, se kaa ser kera mba ityôkyaa ga. Agumaior ka a kav er mbabeenyol mban ve lu a inja tsung la yô, ve zua a kwagh u injaa u a hemba inyaregh yô. Ken ngeren ne, se lu nan mlumun sha mbampin utar: Yehova nengen mbabeenyol mba ve civir un sha mimi la ér ve gba kwagh sha ci u nyi? Er nan ve anmgbianev asev mba ve bee iyol la ve gbe nongo u Yehova kwagh yumu? Se er nan ve se fatyô u henen kwagh ken ikyav ve laa?

 3. Pasalmi 92:12-15 tese ér mbabeenyol mba ve civir Yehova sha mimi la gba un kwagh kpishi sha ci u nyi?

³ Mbabeenyol mba ve civir Yehova Aôndo sha mimi la ve gba un kwagh kpen kpen. Ka a nenge or u ve lu kimi jim jim la. A fa ve sha aeren a dedoo a ve lu a mi la, shi ve doo un ishima kpishi. Mbabeenyol mban ka vea wasen agumaior ér a lu a kwaghfan u ve zua a mi ken ayange a ve civir Yehova ken uma ve la nahan, i doo Yehova kpen kpen. (Yobu 12:12; Anz. 1:1-4) Ishimawan ve la kpa gba Yehova kwagh kpishi. (Mal. 3:16) Ve ban a mbazeyol ken uma ve ga, kpa mba suur sha Yehova her taveraa. Hegen mba a ishimaverenkeghen sha kwagh u mlu u ken hemen hemba er yange ve fa mimi sha hiihii la. Shi ve doo Yehova ishima sha ci u mba civir un her “a iyol i been ve.”—Ôr Pasalmi 92:12-15.

 4. Ka nyi i gbe u anmgbianev asev mba ve bee iyol la vea fa sha er vea zua a ishimasurunu?

⁴ Wea lu organden hegen yô, fa wang wer Yehova hungur a tom u yange u er sha ci na ken ijime la ga. (Heb. 6:10) U ngu eren tom u pasen kwagh la sha gbashima, nahan saan Ter wase u sha la iyol. U ngu wan ishima a atsan, kua atsan a nan we ishimavihin kpishi je kpaa. U ngu dondon atindiakaa a Bibilo a perapera la. U ngu eren ityom you i ken nongo u Yehova la sha mimi shi tesen mbagenev i. U ngu eren kwagh u u fetyô la cii sha er u tsera sha akaa kpishi a nongo u Yehova u gem eren hegen la yô. U ngu suen mba ve lu eren tom u pasen kwagh hanma shighe la shi taver ve ishima. U doo Yehova ishima kpishi er u var a na yô. A tôndo zwa ér “[una ta] mba i doo un a ve la kera ga”! (Ps. 37:28) Ngu kaan a we ér: “Zan zan ivu je kpaa, Me tôô [u].” (Yes. 46:4) Nahan yô, de henen wer u bee iyol yum yô, u kera ngu nongo u Yehova a inja ga ze. U gba kwagh je asenge nga ga!

 5. Ka nyi i gbe u mba ve bee iyol la vea umburu?

⁵ Anmgbianev asev mba ve bee iyol la vea fatyô u wasen nongo u Yehova sha igbenda kpishi. Shin er alaghga vea kera lu a agee er yange ve lu a mi la nahan ga kpa, ve zua a mfe sha akaa kpishi ken anyom a ve civir Yehova la. Nahan Yehova una za hemen u eren tom a ve sha igbenda kposo kposo. De se nenge ikyav sha kwagh u mbagenev sha ayange a tsuaa la, kua sha ayange a ase ne.

6-7. Ka unô i er kwagh ve ken Bibilo u tesen ér Yehova veren mbabeenyol mba ve civir un sha mimi la doo doo?

⁶ Bibilo ôr kwagh u mbacivir Yehova sha mimi mbagenev mba yange ve er un tom kpoghuloo zan zan kua ken iyolbeen kpaa yô. Ikyav i tesen yô, Mose yange lu anyom 80 shighe u hii u eren Yehova tom u profeti, shi Yehova tsua un ér a hemen ikyurior i Iserael la. Profeti Daniel yange hemba anyom 90, kpa Yehova lu tindin un, lu ôron kwagh sha ci Na her. Shi apostoli Yohane kpa yange una hemba anyom 90 shighe u Yehova lu ôron un akaa a una nger ken takeda u Mpase la.

⁷ Mbacivir Yehova sha mimi mbagenev kpishi yange ve lu sha aan a icivirigh ga, nahan alaghga ior nengen ve ér mba ityôkyaa ga. Kpa Yehova yô nenge ve ér ve gba kwagh, shi yange na ve injar sha ci u ve civir un sha mimi ken uma ve cii. Ikyav i tesen yô, i ôr kwagh u Shimion ken Bibilo cuku tseegh tsô, ér “lu orperapera shi civir Aôndo a ishima i môm.” Kpa Yehova fa or u Shimion lu jim jim yô, shi na un ian i icivirigh i nengen er i mar Yesu yô, je shi ôr kwaghôron u profeti sha Yesu man ngô na. (Luka 2:22, 25-35) Ana, kwase côghol u lu profeti la di ye? Yange lu anyom 84, kpa “mayange banen ken tempel ga.” Er “zaan mkombo” hanma shighe yô, Yehova na un iveren, a nenge er i mar Yesu yô. Shimion man Ana cii yange ve doo Yehova ishima kpishi.—Luka 2:36-38.

8-9. Ka nyi anmgbian u kwase ugen a ze hemen u eren ken nongo u Yehova er a hingir kwasecôghol nahan kpaa?

⁸ Sha ayange a ase ne, mbacivir Yehova mba ve bee iyol la kpishi ver ikyav i dedoo sha ci u mba ve lu agumaior la. Nenge ase kwagh u yange er anmgbian u kwase ugen yô, iti na ér Lois Didur. Yange lu anyom 21 tseegh shighe u hii u eren tom u ikpurpania ken tar u Kanada la. Va eren nom yô, un kua nom na John ve er tom u zenden sôron atôônanongo la anyom imôngo. Shi ve va er tom shin Betel ken Kanada hemba anyom 20. Shighe u Lois lu anyom 58 la, i tindi un vea John ken tar u Ukraine. Vea er nena? Vea kaa ér ve bee iyol gande u za eren tom ken tar ugene? Yange ve lumun u za eren tom la, nahan i tsua John ér a za lu ken Kômatii u Nengen sha Branci u tar la. Ve za er tom hen branci la anyom ataankarahar, maa John saa ku. Kpa Lois tsua u lun her, zan hemen a tom na. Hegen ne, Loise ngu anyom 81, kpa ngu eren Yehova tom her kpoghuloo, shi tsombor u Betel u ken Ukraine la soo un kpishi.

⁹ Kasev mba côgholov er Lois nahan, alaghga a kera nengen ve ér ve gba kwagh er shighe u noov vev lu uma la ga. Nahan kpa, er yange ve gba kwagh nahan, kape nyian kpa ve gbe kwagh kpishi je la. Anmgbianev mba kasev mba yange ve sue noov vev anyom imôngo, shi ve lu civir Yehova sha mimi zan zan nyian la ve gba Yehova kwagh tsung. (1 Tim. 5:3) Shi ka ve taver mbagenev mba ve lu aguamaukase la asema kpen kpen.

10. Ka ikyav i dedoo i nyi Tony a vere?

¹⁰ Mbacivir Yehova mbagenev kpishi mba ve bee iyol, ve hingir kor la kpa ve gba kwagh tsung. Ikyav i tesen yô, anmgbian u been iyol ugen ngu kor kor, mba nengen sha a na ken iyouci, iti na ér Tony. Yange i er un batisema hen kpentar u Pennsylvania ken tar u Amerika ken inyom i 1942, shighe u lu anyom 20 la. Ica lu a gba ga je maa i kôr un ér a nyôr shoja. Vendan yô, i wuhe un ken purusu anyom ahar man iwer ataratar. Un vea kwase na Hilda yange ve yese mbayev vev mba kasev uhar ken mimi. Tony yange er Yehova tom anyom kpishi; Yange er tom u ortamen u hemen tiônnongo (u hegen i yer ér ortamen u wasen mzough u mbatamen tom la) hen atôônanongo atar, kua tom u ortamen u nengen sha mkohol. Shi yange a za hemen mkombo hen purusu ugen hen kpentar la, shi a hen Bibilo a ior her. Er Tony a lu anyom 98 hegen nahan kpa, a kegh iyol u memen tom u Yehova ga. Ngu eren kwagh u a fetyô la cii sha ci u Yehova vea tiônnongo na!

11. Se tese ser anmgbianev asev mbabeenyol mba ve lu kor kor la gba kwagh nena?

¹¹ Se tese ser anmgbianev asev mbabeenyol mba ve lu kor kor la gba kwagh nena? Aluer gba sha mi yô, mbatamen vea fatyô u wasen ve u zan shin ungwan hanma mkombo, shi wasen ve er vea fatyô u pasen kwagh yô. Se tese ser kwagh ve gba se ishima sha u za zuan ashe a ve, shin yilan ve sha Zoom lamen a ve. Anmgbianev asev mba ve bee iyol, mba alaghga ve lu ken ayouacii ica a atôônanongo a ve la je yô, doo u se hemba tesen ve ikyo i wan cii. Aluer se wa ikyo ga yô, se hungur a mbabeenyol mban. Shighe u se lu lamen a ve yô, alaghga a taver ve mbagenev u ôron se kwagh ve, shin vea nenge ér doo u ôron se ga. Kpa aluer se tôô shighe se pine ve mbampin shi se kegh ato a ve shighe u ve lu ôron akaa a a er ve ken nongo u Yehova ve i saan ve iyol la yô, se zua a ishimaver kpishi.

12. Ka anmgbianev er an nahan se fatyô u zuan a ve hen tiônnongo wase?

¹² Alaghga a kpiligh se iyol u fan ser hen tiônnongo wase kpa mbabeenyol mba veren ikyav i dedoo mba. Anmgbian u kwase ugen ken tar u Amerika, iti na ér Harriette. Yange civir Yehova sha mimi anyom kpishi hen tiônnongo na, hen kpentar u New Jersey. Maa va mough her za lu vea wan na u kwase. Yange anmgbianev mba hen tiônnongo na u he ne mba tôôn shighe mba lamen a na yô, ve mase kaven er a gbe kwagh kpishi yô. Yange ôr ve mbamzeyol mba yange una due kwaghpasen ve a tagher mi, shighe u fa mimi sha hiihii, er ken inyom i 1925 nahan la. Sha shighe la, yange una duen kwaghpasen yô, a tôô brôôshi u kiren zwa a wa ken ikpa, sha er aluer i za kôr un i wuhe kpa, una fatyô u kiren zwa yô. Jighilii yô, ken inyom i 1933 la, i wuhe un kwa har, man hanma kwa yô, tsa ken purusu kasua jimin. Yange a wuhe un yô, nom na u lu Orshiada ga kpa suen un la a nengen sha mbayev vev mba kikiri utar. Sha kpôô yô, mbabeenyol mba civir Yehova sha mimi er Harriette nahan kuma u a nenge ve ér ve gba kwagh kpishi je!

13. Ka nyi se hen sha kwagh u mbabeenyol mba ve gbe Yehova kua nongo na kwagh kpishi laa?

¹³ Anmgbianev asev mba ve bee iyol la ve gba Yehova kua nongo kwagh kpen kpen. Ve nenge er Yehova a ne ve iveren shi a sue nongo na sha igbenda kposo kposo yô. Ve hen kwagh u injaa ken akaa a yange ve er shami ga yô. Nahan nenge ve wer mba “mngerem ma zan,” shi hen kwagh ken a ve. (Anz. 18:4) Aluer u tôô shighe u lam a ve sha er u fa ve yô, jighjigh u nan wou una seer taver, shi u hen akaa kpishi!

14. Duteronomi 32:7 taver agumaior ishima ér ve er nyi?

¹⁴ Hanma anmgbian u been iyol u u fe cii, ker shighe za tema imôngo vea nan. (Ôr Duteronomi 32:7.) Ka mimi, alaghga vea kera lu nengen tsembelee ga, shi zenden fele fele kpaa ga, shi vea lu ôron kwagh teghelee teghelee, kpa ve yô vea tôô ér mba gbong gbong her, shi ve zua a ‘iti i dedoo’ hen Yehova. (Orpa. 7:1) Umbur kwagh u a ne ve ve gbe Yehova kwagh yô. Nahan za hemen u tesen ve wer ve gba kwagh. Lu er Elisha nahan. Yange sue wener una za hemen u lun vea Eliya kôôsôo sha iyange i masetyô i ve lu imôngo la. Elisha ôr a Eliya kwa tar ér: “Me undu u ga.”—2 Utor 2:2, 4, 6.

15. Ka mbampin mba nyi nahan se fatyô u pinen mba ve bee iyol laa?

¹⁵ Tese wer kwagh u anmgbianev mba ve bee iyol la gba u ishima sha mimi sha u pinen ve akaa a ve sha icivir. (Anz. 1:5; 20:5; 1 Tim. 5:1, 2) U fatyô u pinen ve mbampin er mban nahan: “Ka nyi yange i na ve u fa wer ka mimi je ne?” “Akaa a yange er u la wase u nena ve u seer kporom hen Yehova?” “Ka nyi i wase u ve u lu civir Yehova her saan saana?” (1 Tim. 6:6-8) Nahan kegh ato a ve shighe u ve lu ôron kwagh la.

16. Aluer mbabeeyol vea agumaior mba teman imôngo lamen yô, ve cii a wase ve nena?

¹⁶ Orbeenyol ka nana lam vea gumor yô, hanma ve nan zua a ishimataver. (Rom. 1:12) We u u lu gumor la u hemba nengen wang er Yehova a we mbaicivir un ikyo yô. Orbeenyol la di nana nenge ér kwagh u nan gba u ishima. A doo nan u ôron we averen a Yehova a ne nan yô.

17. Se fatyô u kaan ser hanma inyom mbabeenyol mba ve lu civir Yehova sha mimi her la ka ve seer doonashe sha ci u nyi?

¹⁷ Ka wea hiin u been iyol yô, mdoom ou ma panden kure kure. Kpa mbabeenyol mba ve lu civir Yehova sha mimi her la yô, hanma inyom ka ka ve seer doon sha ishigh ki Yehova. (1 Tes. 1:2, 3) Kwagh ne ka mimi sha ci u nyi? Sha ci u ka ve na jijingi u Aôndo ian ér a tsaase ve shi a wase ve u lun a aeren a doon Aôndo ishima. Aluer se seer fan kwagh u anmgbianev asev mba ve bee iyol la, shi se mba nan ve icivir shi henen kwagh hen a ve yô, se hemba nengen er ve gbe kwagh kpishi yô!

18. Ka nyi se lu timen sha mi ken ngeren u dondon laa?

¹⁸ Agumaior ka aa wa mbaganden ikyo shi mbaganden kpa vea nengen agumaior ér a gba kwagh yô, hanma or ken tiônnongo nan hemba taver ken jijingi. Ken ngeren u dondon la, se lu timen sha igbenda i mbaganden vea fatyô u tesen ér mba ve lu agumaior la gba kwagh ken tiônnongo yô.