Dapat tayong maghanap ng mga pagkakataon para makapagpakita ng kabaitan at paggalang sa mga kaibigan ni Jehova. (Roma 12:10) Makikita sa Awit 15:4 ang isang paraan kung paano natin magagawa iyan. Sinabi doon na ang isang panauhin sa tolda ni Jehova ay “hindi . . . sumisira sa pangako, kahit pa makasamâ ito sa kaniya.” Masasaktan natin ang iba kung hindi natin tutuparin ang mga pangako natin. (Mat. 5:37) Halimbawa, inaasahan ni Jehova na tutuparin ng mga panauhin niya ang panata nila sa pag-aasawa. Natutuwa rin siya kapag talagang sinisikap ng mga magulang na tuparin ang mga ipinangako nila sa mga anak nila. Mahal natin ang Diyos at ang kapuwa natin, kaya gagawin natin ang buong makakaya natin para tuparin ang mga ipinangako natin. Mapaparangalan din natin ang mga kaibigan ni Jehova kung magiging mapagbigay tayo at mapagpatuloy sa kanila. (Roma 12:13) Kung sisikapin nating makasama ang mga kapatid bukod sa mga pulong at ministeryo, mas titibay ang pakikipagkaibigan natin sa kanila at kay Jehova. Isa pa, natutularan natin si Jehova kapag mapagpatuloy tayo. w24.06 12 ¶15-16

Ipinapaalam ni Jehova ang katotohanan sa mga mapagpakumbaba. (Mat. 11:25) Naipakita nating mapagpakumbaba tayo nang tanggapin natin ang tulong ng iba para malaman ang katotohanan. (Gawa 8:​30, 31) Pero dapat pa rin tayong mag-ingat para hindi tayo maging mapagmataas. Kung mapagmataas tayo, baka isipin natin na ang mga opinyon natin ay kasinghalaga ng mga prinsipyo sa Bibliya at ng mga tagubilin ng organisasyon ni Jehova. Para mapanatili natin ang kapakumbabaan, kailangan nating tandaan kung gaano kaliit ang halaga natin kung ikukumpara kay Jehova. (Awit 8:​3, 4) Puwede rin nating ipanalangin kay Jehova na tulungan tayong maging mapagpakumbaba at maging handang magpaturo. Tutulungan niya tayong makita na nakakahigit ang kaisipan niya kaysa sa opinyon natin. Makikita natin ang kaisipan ni Jehova sa tulong ng Bibliya at ng organisasyon. Sa pagbabasa mo ng Bibliya, tingnan kung gaano kamahal ni Jehova ang mga mapagpakumbaba at na talagang ayaw na ayaw niya sa mga ma-pride, mayabang, at mapagmataas. At kung makatanggap ka ng isang pribilehiyong mapapansin ng iba, mas kailangan mong mag-ingat at magsikap na manatiling mapagpakumbaba. w24.07 10 ¶8-9

Simula 1919, gumamit si Jesus ng maliit na grupo ng mga pinahiran para organisahin ang gawaing pangangaral at maglaan ng espirituwal na pagkain sa mga tagasunod niya. (Luc. 12:42) At kitang-kitang pinagpapala ni Jehova ang pagsisikap ng maliit na grupong ito. (Isa. 65:​13, 14) Kung hindi tayo organisado, hindi natin magagawa ang gawaing iniatas ni Jesus sa atin. (Mat. 28:​19, 20) Halimbawa, kung walang mga nakaatas na teritoryo, baka mangaral lang tayo kung saan natin gusto. Kaya baka paulit-ulit na magawa ng magkakaibang mamamahayag ang isang teritoryo, pero hindi naman nagagawa ang ibang teritoryo. May naiisip ka pa bang dahilan kung bakit mahalagang maging organisado? Inoorganisa tayo ni Jesus sa ngayon kung paanong inorganisa niya ang mga tagasunod niya noong nasa lupa siya. w24.04 8-9 ¶2-4