Tolomialomia nsaki ka anto watotoshaka periodikɛ
1. Ngande wakokaso kamba la woshelo wa periodikɛ dia nomialomia nsaki?
1 Anto efula wahomana laso lo esambishelo tolongolaka ndo tetawɔka ekanda aso la ɔngɛnɔngɛnɔ tshɛ, koko mengengaka dia mbetawɔ wekelo wa Bible wa mbala la mbala. Yoho mɔtshi ya nomialomia nsaki yawɔ ele lo mbashaka periodikɛ. Etena katayasha onto periodikɛ, funda lokombo ndo adrɛsɛ wa onto, lushi lakanyahomana, periodikɛ kakandetawɔ, ndo divɛsa diakanyakɛtshanya kâmɛ la oseka kiambokambo tshɛ yakayɛnyi yakoka mɛnya nsaki k’onto. Etena tshɛ kakoma periodikɛ nkina y’eyoyo, sɔna awui wayɔngɛnyangɛnya anto watoyoshaka periodikɛ, ndo tɔtɔmiyawɔ etena kawaembolayɛ. (1 Kor. 9:19-23) L’edjedja ka wonya, dikambo dimɔtshi dakawadia lo tojurunalɛ taso mbeyaka memula nsaki yawɔ ndo mbatshutshuya dia kombola nyomoleka mbeya akambo akina.
2. Lande na kele ekɔ ohomba efula dia anto nyanga Jehowa ɛlɔ kɛnɛ, ndo kakɔna kakokaso sala nto dia mbakimanyiya?
2 Koko, sho mbeyaka dia anto efula hawotokoma ekambi wa Jehowa lo mbadiaka tsho periodikɛ vɔamɛ. Lam’ele ekɔ ohomba efula dia anto nyanga Jehowa ɛlɔ kɛnɛ, kakɔna kakokaso sala nto dia mbakimanyiya? (Zef. 2:2, 3; Eny. 14:6, 7) Sho kokaka nomialomia nsaki yawɔ lo mbaɛnyaka divɛsa dimɔtshi diakatasɔnɛ etena tshɛ kawashaso periodikɛ.
3. a) Ngande wakokaso nɔngɔsɔla ɛkɛtshanyelo wa divɛsa ɔtɔi? b) Awui akɔna wakiyanya anto wa lo ɛtshi kanyu ka nkɛtɛ?
3 Ɛkɛtshanyelo wa divɛsa ɔtɔi: Kanyiya dikambo dia anto watoyoshaka periodikɛ, ndo lɔngɔsɔla ɛkɛtshanyelo wa divɛsa ɔtɔi dikambo dia ehomba tshɛ wa shikaa wa onto la onto. (Fil. 2:4) Ɛnyɛlɔ, naka onto ɔmɔtshi eke ka shisha onto ɔmɔtshi lalangande efula, kete wɛ kokaka membola mbala efula dia mbɛnya kɛnɛ kata Bible lo dikambo dia wanɛ wambovɔ ndo dia elongamelo ka eolwelo. Wɛ kokaka kamba la awui wele lo dibuku Comment raisonner lo ɛtɛ wa awui wata ɔnɛ: “Nyɔi” ndo “Eolwelo” dia nɔngɔsɔla ɛkɛtshanyelo ɛsɔ wa divɛsa ɔtɔi. Ɛkɛtshanyelo ekina wendana la awui wele oko woho wayoshila hemɔ, lotshundu l’osombe, ndo nyɔi kokaka ndjosalema l’ɔkɔngɔ. Oyango ele wa tana dikambo diayokotola yambalo y’onto ndo mbɛnyaka yema yema kɛnɛ kata Bible lo dikambo diakɔ.
4. Etena kakambaso la Afundelo, lande na kele ekɔ ohomba mbâmanya anto fundo, ndo woho akɔna wakokaso sala dikambo sɔ?
4 Tâmanya fundo: Kânga mbele tongaka nshi tshɛ ohomba dia ɛkɛtshanyelo ɛsɔ monga tomondo ndo wɔdu, awui akina nɔmbamaka nto l’ɔtɛ wa mbadia tsho divɛsa diakayasɔnyi. Satana ambetɛ anto totshungu diaha vɔ mbetawɔ lokumu l’ɔlɔlɔ. (2 Kor. 4:3, 4) Kânga wanɛ wambekesanɛ la Bible wekɔ la ohomba wa ekimanyielo dia kishihodia. (Etsha 8: 30, 31) Omalɔkɔ, ɔsa etena dia nembetshiya ndo mbisha ɛnyɛlɔ kendana la divɛsa, woho wotoyotosha sawo sɔ lo Kalasa k’olimu wa teokrasi. (Etsha 17:3) Yashikikɛ dia onto ambɛna nɛmɔ di’oshika diele la Ɔtɛkɛta wa Nzambi lo lɔsɛnɔ lande hita.
5. Ngande wakoka onto latotoshaka periodikɛ ndjokoma ombeki wa Bible?
5 Naka onto ngɛnangɛnaka kɛnɛ kekande, kete yema yema wɛ koka sala dia ɛkɛtshanyelo monga wa avɛsa ahende kana asato lo wendelo tshɛ. Yanga diaaso dia mbɔtshiya sawo otsha lo biukubuku Katɔlɔmba kana dibuku Ewo. Lo yoho shɔ onto latotoshaka periodikɛ mbeyaka ndjokoma ombeki wa Bible.